ചെഷസ്‌കുവിന് കറുത്ത ക്രിസ്‌മസ്‌

അപ്പോൾ അയാൾ പാട്ടു പാടി 

ചെഷസ്‌കുവിനെയും ഭാര്യ എലേനയെയും 1989 ക്രിസ്‌മസ്‌ ദിനത്തിൽ വെടിവച്ചു കൊന്നത് വിവരിക്കുമ്പോൾ അയോണൽ ബോയെറുവിൻറെ കൈകൾ വിറയ്ക്കുന്നു.ഒരു പറമ്പിലെ ടോയ്‌ലെറ്റ് സമുച്ചയത്തിനടുത്ത് മതിലിനോട് ചേർത്തു നിർത്തി ആയിരുന്നു,വെടി വച്ചത്.നല്ല തണുപ്പായിരുന്നു.റൊമാനിയ 24 കൊല്ലം ഭരിച്ച കമ്മ്യൂണിസ്റ്റ് ഏകാധിപതിയെ കൊല്ലാൻ നിയോഗിക്കപ്പെട്ട മൂന്നംഗ സ്‌ക്വാഡിലെ അംഗമായിരുന്നു,പാരാട്രൂപ്പർ ബോയെറു.

ഒരു മിനിറ്റ് 44 സെക്കൻഡ് മാത്രം നീണ്ട നിഴൽ വിചാരണ നടന്ന ഹാളിൽ നിന്ന് ഏകാധിപതിയെയും ഭാര്യയെയും അയാൾ പുറത്തേക്ക് ആനയിച്ചു.ചെഷസ്‌കു കമ്മ്യൂണിസ്റ്റ് ഇന്റർനാഷനൽ ഏതാനും വരികൾ പാടി.കോക്രി കാട്ടിയ  പട്ടാള സർജന്റ് ഗോർഗിൻ ഒക്ടേവിയനെ   നോക്കി എലേന പറഞ്ഞു:Fuck You ! ബോയ്‌റുവിന്റെ കലാഷ്‌നിക്കോവ് വെടിയുണ്ടകൾ വർഷിച്ചു.എല്ലാം പെട്ടെന്ന് ആയതിനാൽ പട്ടാള വിഡിയോഗ്രാഫർക്ക് അവസാന വട്ട വെടിയുണ്ടകൾ പായുന്നതും ജഡങ്ങൾ വീഴുന്നതുമേ കിട്ടിയുള്ളൂ."സംസാരിക്കുമ്പോൾ ഇപ്പോഴും ഒരു പിടപ്പുണ്ട്",ബോയെറു  ദി ഒബ്‌സർവർ ലേഖിക എമ്മ ഗ്രഹാം ഹാരിസനോട് 2014 ഡിസംബറിൽ പറഞ്ഞു,"രണ്ടു ജീവിതങ്ങളാണ് ഞാൻ ഇല്ലാതാക്കിയത്;യുദ്ധത്തിൽ അത് ന്യായമാണ്;നിരായുധരെ കൊല്ലുന്നത് പ്രയാസമാണ്.എൻറെ ജോലി ആളെ കൊല്ലുന്നത് ആണെങ്കിലും ഇങ്ങനെ വരണമെന്ന് എനിക്ക് ആഗ്രഹമില്ല."

ചെഷസ്‌കുവിൻറെ ജഡം 

തടിച്ച് മീശയുള്ള ബോയെറുവിനെ  വിഡിയോയിൽ ജാഗ്രതയോടെ കാണാം.ഭീതിയിലും ദാരിദ്ര്യത്തിലും രാജ്യത്തെ ആഴ്ത്തിയ ഏകാധിപതിയുടെ ജീവിതം അവസാനിപ്പിച്ചതിൽ അയാൾക്ക് ഖേദമില്ല.അയാളുടെ പുരോഹിതനായ മുത്തച്ഛൻ കുറെ കാലം തടവിലായിരുന്നു .ചെഷസ്‌കു ഇല്ലാതായപ്പോൾ അദ്ദേഹം സന്തുഷ്ടനായി കാണപ്പെട്ടു."നീ വിഷമിക്കണ്ട,നിൻറെ പാപം ഞാൻ ഏറ്റോളാം",വൃദ്ധൻ പറഞ്ഞു.
ബോയെറുവിന് സ്വകാര്യതയും സമാധാനവും നഷ്ടപ്പെട്ടു;ഈ 'പ്രസിദ്ധി'യിൽ ഭാര്യ ദുഖിതയായി.
തൻറെ വെടിയുണ്ടകളാണ് ഇരുവരെയും കൊന്നതെന്ന് ബോയെറു  കരുതുന്നു.മൂന്നംഗ സ്‌ക്വാഡിൽ ഒരാൾ ഏതാനും സെക്കണ്ടുകൾ മരവിച്ചിരുന്നു.രണ്ടാമൻ തോക്ക് ഓട്ടോമാറ്റിക് സംവിധാനത്തിൽ ഇടാൻ മറന്നിരുന്നു.അതിനാൽ ഏതാനും വെടിയുണ്ടകൾ ഒന്നൊന്നായി വർഷിക്കാനേ ആയുള്ളൂ.
അന്ന് 31 വയസുള്ള ബോയെറു വരേണ്യ 64 ബോട്ടേനി പാരച്യൂട്ട് റെജിമെൻറ്‌  യൂണിറ്റ് ഓഫിസർ ആയിരുന്നു.സ്‌കൂളിൽ കമ്മ്യൂണിസം പഠിച്ചാണ് അയാൾ വളർന്നത്." ഏതു വിപ്ലവവും ചോര ചിന്തുന്നു;വിപ്ലവം അതിൻറെ നായകരെ തിന്നും",അയാൾ പറഞ്ഞു.വാസന തൈലത്തിൽ മുങ്ങിയ ചെഷസ്‌കുവിനെ കാണുന്നതിന് മിനുട്ടുകൾ മുൻപാണ് ഉത്തരവ് കിട്ടിയത്.മന്ത്രി ചോദിച്ചു,"ക്യാപ്റ്റൻ,തയ്യാറാണോ ?"
"അതെ",ബോയെറു  പറഞ്ഞു.

കിഴക്കൻ യൂറോപ്പിൽ കമ്മ്യൂണിസത്തോട് വിട പറയുന്ന അവസാന സോവിയറ്റ് ഉപഗ്രഹ രാഷ്ട്രങ്ങളിൽ ഒന്നായിരുന്നു,റൊമാനിയ.ചെഷസ്‌കുവിനെതിരായ ജന വിപ്ലവ വാർത്തകൾ റേഡിയോ യൂറോപ്പിൽ ബെയ്റുവിൻറെ സേന കേട്ട് കൊണ്ടിരുന്നു.Little Lizard എന്നായിരുന്നു ഈ വിപ്ലവത്തിന് പേര്.നിരോധിച്ച ശേഷവും ഭരണ സംവിധാനത്തിലെ വിടവുകൾക്കിടയിലൂടെ നുഴഞ്ഞു കയറിയതിനാലാണ് ചെറിയ പല്ലി എന്ന പേര് വീണത്.ഡിസംബർ 21 ന് ബെയ്റുവിൻറെ യൂണിറ്റ് ചെഷസ്‌കുവിനോട് കൂറ് പ്രഖ്യാപിച്ച് പ്രതിജ്ഞ എടുത്തിരുന്നു.അടുത്ത നാൾ കേന്ദ്രകമ്മിറ്റി ഓഫിസ് ജനം പിടിച്ചു,ചെഷസ്‌കുവും ഭാര്യയും ഹെലികോപ്റ്ററിൽ രക്ഷപ്പെട്ടു.സൈനികർ ആഹ്‌ളാദം കൊണ്ട് വിങ്ങിപ്പൊട്ടി.ഒളിപ്പിച്ച മദ്യക്കുപ്പികൾ പുറത്തെടുത്തു.അവർ ബാരക്കുകളിൽ കാത്തു."വെടി വയ്ക്കാനുള്ള ചാൻസ് എനിക്ക് കിട്ടിയാൽ എന്ത് ചെയ്യും?," സുഹൃത്ത് ഡോറിൻ സിർലാൻ ചോദിച്ചു.അയാളും മൂന്നംഗ സ്‌ക്വാഡിൽ പെട്ടു.ഏകാധിപതിയെ കൊന്നു മടങ്ങുമ്പോൾ ഹെലികോപ്റ്റർ പ്രോസിക്യൂട്ടർമാരെയും ജഡ്ജിമാരെയും പട്ടാളത്തെയും കൊണ്ട് നിറഞ്ഞതിനാൽ,സിർലാന് കോപ്റ്ററിൽ കയറ്റിയ ചെഷസ്‌കുവിൻറെ ജഡത്തിന് മുകളിൽ ഇരിക്കേണ്ടി വന്നു.

ബോയെറു  

ഡോറിൻ മരിയൻ സിർലാനെ ഒബ്‌സർവർ ലേഖകൻ എഡ് വുള്ള്യാമി 2009 മേയിൽ  കണ്ടിരുന്നുഹെലികോപ്റ്ററിൽ മറ്റ് സീറ്റുകളെക്കാൾ ഇരിക്കാൻ സുഖം ചെഷസ്‌കുവിൻറെ ജഡമായിരുന്നുവെന്ന് സിർലാൻ ഓർമിച്ചു."അതിന് ചൂടുണ്ടായിരുന്നു;ചോര എൻറെ പട്ടാള പാന്റിലേക്ക് പടർന്നു"
ഫ്രഞ്ച് വിപ്ലവത്തെയും ഗില്ലറ്റിനെയും പറ്റി കേട്ടിരുന്ന സിർലാൻ അത് പോലെ ചരിത്ര സംഭവത്തിൽ പങ്കാളിയായി എന്നാണ് കരുതുന്നത്.അന്ന് 27 വയസ് .വിചാരണ ഒരു മിനുട്ടും 44 സെക്കൻഡും ആയിരുന്നെങ്കിൽ,കൊല പത്തു മിനുട്ടിൽ കഴിഞ്ഞു.കമാൻഡോ ആയി പരിശീലനം കിട്ടിയിരുന്നു.ചെഷസ്‌കു അയാളുടെ സുപ്രീം കമാൻഡർ ആയിരുന്നു;അയാളെ സംരക്ഷിക്കുകയായിരുന്നു ചുമതല.അതിനാൽ കൊല്ലുമ്പോൾ സുഖം തോന്നിയില്ല.

സിർലാൻ സ്വന്തം ഭാഷയിൽ സംഭവം പുസ്തകമാക്കി.

ജനറൽ വിക്റ്റർ 

ക്രിസ്‌മസ്‌ രാവിലെയാണ് സിർലാൻറെ യൂണിറ്റിന് പ്രത്യേക ദൗത്യത്തിന് സന്നദ്ധരായവരെ വേണമെന്ന അറിയിപ്പ് കിട്ടിയത്.Zero Degrees എന്നായിരുന്നു പേര്.തിരിച്ച് വരുമെന്ന് ഉറപ്പില്ല എന്നാണ് ഇതിന് അർത്ഥം.രണ്ട് ഹെലികോപ്റ്ററിൽ എട്ട് കമാൻഡോകളെ പറത്തി.മണിക്കൂറിൽ 150 കിലോമീറ്റർ വേഗം.ഭൂനിരപ്പിൽ നിന്ന് 15 -30 മീറ്റർ മാത്രം ഉയരത്തിൽ -റഡാറിൽ വരാതിരിക്കാൻ.സ്റ്റീയ ബുക്കാറസ്റ്റ് ഫുട്ബോൾ സ്റ്റേഡിയത്തിന് അടുത്ത ഒരു പറമ്പായിരുന്നു ലക്ഷ്യം.കവചിത സൈനികരും നിരവധി കാറുകളും അടങ്ങിയ വ്യൂഹം ജനറൽ വിക്റ്റർ സ്റ്റാൻകുലെസ്‌കുവിൻറെ  നേതൃത്വത്തിൽ കാത്തു നിന്നു.പ്രതിരോധ സഹമന്ത്രി ആയിരുന്നു അദ്ദേഹം.അവിടന്ന് കോപ്റ്ററുകൾ തർഗോവിസ്റ്റെയിലേക്ക് പറന്നു -വെറും പത്തു മീറ്റർ  ഉയരത്തിൽ.മിസൈലുകൾ വഹിച്ച മൂന്ന് കോപ്റ്ററുകൾ അകമ്പടി ഉണ്ടായിരുന്നു.സ്ഥലത്തെത്തിയപ്പോൾ ഓരോ കോപ്റ്ററിൽ നിന്നും നാലു പേർ വീതം ഇറങ്ങാൻ ജനറൽ പറഞ്ഞു.ബാഡ്‌ജുകൾ ഇല്ല.ഗ്രനേഡും കത്തിയും കൂടി വേണം."സഖാക്കളേ",ജനറൽ പറഞ്ഞു,"ഞാൻ എക്കാലവും പാരാട്രൂപ്പേഴ്‌സിനെ വിശ്വസിച്ചു;ഞാൻ ഇപ്പോൾ വിപ്ലവത്തോടുള്ള നിങ്ങളുടെ കൂറിൽ വിശ്വസിക്കുന്നു".
ഒരു സൈനിക കോടതി, റൊമാനിയൻ ജനതയോട് ക്രൂരതകൾ കാട്ടിയ ദമ്പതികളെ  വിചാരണ ചെയ്യുമെന്ന് ജനറൽ പറഞ്ഞു.വധശിക്ഷ ആണെങ്കിൽ നടപ്പാക്കാൻ തയ്യാറാണോ?
"അതെ " എന്നായിരുന്നു ആരവം.
തൃപ്തി വരാതെ,തയ്യാറുള്ളവർ മുന്നോട്ട് വരാൻ ജനറൽ പറഞ്ഞു.എല്ലാവരും മുന്നോട്ട് വന്നു.അവരിൽ നിന്ന് ജനറൽ മൂന്നു പേരെ തിരഞ്ഞെടുത്തു:ക്യാപ്റ്റൻ ബെയ്റു,പെറ്റി ഓഫിസർ സിർലാൻ, സർജന്റ്.ഗോർഗിൻ ഒക്ടേവിയൻ.കെട്ടിടത്തിൽ നിന്ന് സകലരെയും ഒഴിപ്പിക്കുക,അവിടത്തെ ഒരു മുറി കോടതിയായി മാറുന്നതിന് കാവൽ നിൽക്കുക.അകത്തു കയറാൻ ആരെങ്കിലും തുനിഞ്ഞാൽ കൊല്ലുക.ശിക്ഷ കിട്ടിയാൽ ചെഷസ്‌കുവിനെ കൊല്ലേണ്ട സ്ഥലം ജനറൽ ക്യാപ്റ്റന് കാട്ടിക്കൊടുത്തു.മൂവരും തോക്കിലെ വെടിയുണ്ടകൾ അവരുടെ ശരീരത്തിൽ തീർക്കണം.

സിർലാൻ 

കോടതിയിലെത്തിയ ചെഷസ്‌കു ചകിതനായി.ഇവർ ആരെന്നു അയാൾക്ക് മനസിലായില്ല." നിങ്ങൾ റൊമാനിയക്കാരാണോ?",അയാൾ ചോദിച്ചു.
"ഞങ്ങൾ ജനറലിന് ഒപ്പമാണ്",സിറിലാൻ പറഞ്ഞു.
പുറത്ത് കാവൽ നിൽക്കുമ്പോൾ അകത്ത് നടക്കുന്നതെല്ലാം കേട്ടു.ശിക്ഷ വിധിച്ച ശേഷം പറഞ്ഞു:"അപ്പീൽ പത്ത് ദിവസത്തിൽ;ശിക്ഷ നടപ്പാക്കൽ ഉടൻ".
കമ്മ്യൂണിസത്തിലെ വലിയ അസംബന്ധം -മരിച്ച ശേഷം അപ്പീൽ.മരിച്ച ശേഷം പുനരധിവാസമുള്ള സംവിധാനമാണ്!
ചെഷസ്‌കുവിനെയും ഭാര്യയെയും വരിഞ്ഞു കെട്ടി മതിലിനടുത്തേക്ക് കൊണ്ട് പോയി ആദ്യം ചെഷസ്‌കുവിനെയും പിന്നെ ഭാര്യയെയും കൊല്ലാൻ ജനറൽ ഉത്തരവിട്ടു.
പുറത്തു വന്ന ചെഷസ്‌കുവും ഭാര്യയും കുഞ്ഞുങ്ങളെപ്പോലെ കരയുകയായിരുന്നു."ഞങ്ങളെ പട്ടികളെപ്പോലെ കൊല്ലരുത്",ചെഷസ്‌കു അപേക്ഷിച്ചു.
എലേന അപേക്ഷിച്ചു:"ഞങ്ങളെ പട്ടികളെപ്പോലെ കൊല്ലാൻ പോവുകയാണെങ്കിൽ,ഞങ്ങളുടെ സ്നേഹം മുൻ നിർത്തി അദ്ദേഹത്തെ കൊല്ലുന്നത് ഞാൻ കാണേണ്ടി വരരുത്;അദ്ദേഹത്തോടൊപ്പം മരിക്കാൻ എന്നെ അനുവദിക്കണം".
"അവരെയും അയാൾക്കൊപ്പം മതിലിനടുത്തേക്ക് കൊണ്ട് പോകൂ",ജനറൽ ഉത്തരവിട്ടു.
അവർക്ക് നേരെ നോക്കാൻ മടിച്ച് പലപ്പോഴും മുഖംതിരിച്ചെന്ന് സിർലാൻ ഓർത്തു.അപ്പോൾ ചെഷസ്‌കു മനുഷ്യൻ ആകുന്നത് കണ്ടു.അയാൾ സ്‌തംഭിച്ചു.സിർലാൻറെ മുഖത്ത് നോക്കി അയാൾ വിലപിച്ചു:"റൊമാനിയൻ സോഷ്യലിസ്റ്റ് റിപ്പബ്ലിക് നീണാൾ വാഴട്ടെ;ചരിത്രം പകരം വീട്ടും".
അയാൾ കമ്മ്യൂണിസ്റ്റ് ഇൻറർനാഷനൽ കുറച്ചു പാടി.
അപ്പോഴാണ് ജനറലിന്റെ ആജ്ഞ വന്നത്:ഫയർ !
മൂവരും അരയിൽ നിന്ന് വെടി ഉതിർത്തു;പാടുമ്പോൾ ആയിരുന്നു വെടി.ഒരു മീറ്റർ അല്ലെങ്കിൽ 50 സെന്റിമീറ്റർ അടുത്ത് നിന്നായിരുന്നു വെടി.മതിലിനോട് ചേർന്ന് അവർ മരിച്ചു വീഴുമ്പോൾ വെടിയുണ്ടകൾ പാതിയെ തീർന്നിരുന്നുള്ളു.മതിലിൽ ചെന്ന് മുട്ടി എലേന കോണോട് കോണായി മുകളിലേക്ക് ചിതറിത്തെറിച്ചു.

എലേന 

ചെഷസ്‌കു മരിച്ച് രണ്ടു ദിവസം കഴിഞ്ഞ് മാത്രമേ കോടതി രൂപീകരിക്കുന്ന ഉത്തരവ് ഒപ്പിട്ടുള്ളു;അന്നേ ജഡം ടി വി യിൽ കാട്ടിയുള്ളു.
സംഭവശേഷം താൻ ഭ്രഷ്ടൻ ആയെന്ന് സിർലാൻ പറഞ്ഞു.ചെഷസ്‌കുവിൻറെ പിൻഗാമി അയോൺ ഇലിയെസ്‌കു,സിർലാനെ പരിഗണിച്ചില്ല.1998 ൽ സിർലാൻ പട്ടാളത്തിൽ നിന്ന് പുറത്താക്കപ്പെട്ടു.ഒക്റ്റേവിയൻ ടാക്‌സി ഡ്രൈവർ ആയി;ബോയെറു കേണലും.

തടവിൽ ഒന്നിച്ചു കഴിയുമ്പോഴാണ്,നിക്കോളെ ചെഷസ്‌കു ( 1918 -1989 ) കമ്മ്യൂണിസ്റ്റ് ഗുരുവും പിന്നീട് റൊമാനിയൻ പാർട്ടി ജനറൽ സെക്രട്ടറിയും ഏകാധിപതിയും സർവോപരി സ്റ്റാലിന്റെ സിൽബന്തിയുമായ ഗോർഗ്യു ദേജിനെ പരിചയപ്പെട്ടത്.തൊഴിലാളി കുടുംബങ്ങളിൽ നിന്ന് വന്ന ഇരുവരും വലിയ സഖാക്കളായി.പാർട്ടിയിൽ ലോകത്തിലെ ആദ്യ വനിതാ വിദേശകാര്യ മന്ത്രി അന പോക്കറുടെ ബുദ്ധിജീവി സംഘത്തെ വെട്ടി നിരത്തി ഗോർഗ്യു,ചെഷസ്‌കുവിന് വഴിയൊരുക്കി.പാവപ്പെട്ട കർഷക കുടുംബത്തിലെ ഒൻപതു മക്കളിൽ ഒരാൾ.അച്യുതാനന്ദനെപ്പോലെ തയ്യൽ പണി ചെയ്താണ് ചെഷസ്‌കു കുടുംബം നോക്കിയത്.സദാ ചീത്ത വിളിക്കുന്ന ഈശ്വര വിശ്വാസിയായ പിതാവിൽ നിന്ന് പതിനൊന്നാം വയസിൽ ഒളിച്ചോടി ബുക്കാറസ്റ്റിൽ എത്തി.സഹോദരിക്കൊപ്പം താമസിച്ച് ചെരുപ്പുണ്ടാക്കുന്ന കടയിൽ സഹായി ആയി.ചെരുപ്പുകുത്തി അലക്‌സാൻഡ്രൂ വഴി പാർട്ടിയിൽ എത്തി.

അയോൺ ഇലിയെസ്‌കു 

പതിനഞ്ചാം വയസ്സു മുതൽ തെരുവുയുദ്ധങ്ങളിൽ വഴക്കാളിയായി.1939 ൽ ജയിലിൽ നിന്ന് പുറത്തു വന്നപ്പോൾ എലേനയെ കെട്ടി.യുദ്ധകാലത്താണ് ടാർഗു ജിയുവിലെ തടവിൽ ഗോർഗ്യുവിനൊപ്പം ഒരു മുറിയിൽ കഴിഞ്ഞത്.ജയിൽ ജീവനക്കാർക്ക് കോഴ കൊടുത്തതിനാൽ പാർട്ടിക്കാർ അകത്ത് സ്വതന്ത്രരായിരുന്നു.അവിടെ ഗോർഗ്യു സ്വയം വിമർശനത്തിന് സഖാക്കളെ നിർബന്ധിച്ചു.ഗോർഗ്യു പഠിച്ച പോലെയല്ല ഇവരുടെ മാർക്‌സിസം അല്ലെങ്കിൽ,അയാൾക്ക്‌ വേണ്ടി ചെഷസ്‌കു സഖാക്കളെ തല്ലി.1944 ൽ റെഡ് ആർമി റൊമാനിയയിൽ എത്തിയപ്പോൾ ചെഷസ്‌കു യുവജനവിഭാഗം തലവനായി.1947 ൽ കമ്മ്യൂണിസ്റ്റ് ഭരണത്തിൽ കൃഷി മന്ത്രി.1952 ൽ സി സി യിൽ.രണ്ടു വർഷം കഴിഞ്ഞ് പി ബി യിൽ -ഇതിനിടയിൽ പാർട്ടിയിൽ നടന്ന ശുദ്ധീകരണത്തിൽ ചരട് വലിച്ചു.ഗോർഗ്യു 1965 ൽ മരിച്ചപ്പോൾ ജനറൽ സെക്രട്ടറി.1967 ൽ പ്രസിഡൻറ് കൂടി ആയി.

ചെഷസ്‌കു തുടക്കത്തിൽ കൈയടി നേടി -1968 ൽ സോവിയറ്റ് സേന ചെക്കോസ്ലോവാക്യ പിടിച്ചത് അനുകൂലിച്ചില്ല.അതിന് ഒരാഴ്ച മുൻപ് അവിടെ പോയി അലക്‌സാണ്ടർ ഡ്യുബ്ചെക്കിന് പിന്തുണ നൽകി.ഗർഭം അലസിപ്പിക്കലും ഗർഭ നിരോധന മാർഗങ്ങളും നിയമവിരുദ്ധമാക്കി.റൊമാനിയൻ വംശത്തെ കൂട്ടാൻ ചെയ്ത വിദ്യ അനാഥ കുഞ്ഞുങ്ങളുടെ എണ്ണം കൂട്ടി.അമേരിക്കയുമായി അടുത്തു.പശ്ചിമ ജർമനിയെ അംഗീകരിച്ചു.രാജ്യാന്തര നാണ്യ നിധിയിൽ ചേർന്നു.ചൈന,ഉത്തര കൊറിയ,മംഗോളിയ,വിയറ്റ്നാം എന്നീ രാജ്യങ്ങൾ 1971 ൽ സന്ദർശിച്ച ചെഷസ്‌കു കിം ഇൽ സുങ്,മാവോ എന്നിവരുടെ വ്യക്തി മാഹാത്മ്യ പ്രചാരണത്തിൽ ആവേശം കൊണ്ടു.ഏകാധിപത്യം,ദേശീയത.കമ്മ്യൂണിസം എന്നിവയുടെ മിശ്രണം നന്നേ ബോധിച്ചു.എലേനയും മാവോയുടെ ഭാര്യ ജിയാങ് ചിങ്ങും കൂട്ടായി.വിദേശികളെ പറ്റിക്കാൻ ആഡംബര പൂർണമായ പൊട്ടേംകിൻ ഗ്രാമങ്ങൾ പണിതത് ഇഷ്ടപ്പെട്ടു.1787 ൽ ക്രിമിയയ്ക്ക് യാത്ര ചെയ്ത കാതറീൻ രണ്ട് രാജ്ഞിയെ പറ്റിക്കാൻ കാമുകൻ ഗ്രിഗറി പൊട്ടേംകിൻ ഈ വേല കിട്ടിയതിൽ നിന്നാണ് രാഷ്ട്രീയത്തിൽ ഈ പ്രയോഗം വന്നത്.കൊറിയയെ പകർത്താൻ തീരുമാനിച്ച ചെഷസ്‌കു 1971 ജൂലൈ ആറിന് പാർട്ടിയിൽ നടത്തിയ പ്രസംഗം ജൂലൈ സിദ്ധാന്തങ്ങൾ എന്നറിയപ്പെട്ടു.17 നിർദേശങ്ങൾ അതിൽ വന്നു:പാർട്ടി വിദ്യാഭ്യാസം,നിർമാണ പദ്ധതികളിൽ യുവാക്കളുടെ പങ്കാളിത്തം,റേഡിയോ ,ടി വി,സിനിമ എന്നിവയെ പാർട്ടി പരിപാടി കൊണ്ട് മൂടൽ,പുസ്തകങ്ങൾ ഇറക്കൽ,കലാ,സാഹിത്യ യൂണിയനുകൾ എന്നിവ ഇതിൽപെട്ടു.അയാൾ തുടക്കത്തിലെ നയങ്ങളിൽ നിന്ന് പിറകോട്ട് പോയി.നിരോധിത പുസ്തകങ്ങളുടെ പട്ടിക വന്നു.മരിച്ച സ്റ്റാലിൻ റൊമാനിയയിൽ ഉയിർത്തു.സോഷ്യലിസ്റ്റ് ഹ്യൂമനിസത്തിൻറെ പേരിൽ എഴുത്തുകാർ ആക്രമിക്കപ്പെട്ടു.മനുഷ്യന് സ്വകാര്യത നഷ്ടപ്പെട്ടു.

എഴുപതുകളിൽ പാശ്ചാത്യ ലോകത്തിനെതിരായ അറബ് എണ്ണ ഉപരോധത്തിൽ,എണ്ണ സമ്പന്നമായ റൊമാനിയ കാശു വാരി.പടിഞ്ഞാറൻ ബാങ്കുകളിൽ നിന്ന് വൻ വായ്‌പ എടുത്തു.എണ്ണ ശുദ്ധീകരണ ശാലകൾ പണിത് ലാഭം കിട്ടുമ്പോൾ തിരിച്ചടയ്ക്കാം എന്ന് കരുതി.റൊമാനിയൻ തൊഴിലാളികൾക്ക് ഉൽപാദന ക്ഷമത ഇല്ലാത്തതിനാൽ ഒന്നും സമയത്തിന് തീർന്നില്ല.1977 ലെ ഭൂകമ്പവും വലച്ചു.അത്തരം പ്രശ്നങ്ങൾ മാർക്സിസത്തിൽ പറയുന്നില്ല.പ്രപഞ്ച നിയമം ഏകാധിപതിയുടെ കണക്ക് തെറ്റിച്ചു.
കൂടുതൽ വേതന,നല്ല തൊഴിൽ സാഹചര്യങ്ങൾ എന്നിവ ആവശ്യപ്പെട്ട് 70,000 ഖനി തൊഴിലാളികൾ പണിമുടക്കി.അവർ മുദ്രാവാക്യം വിളിച്ചു:ചെമപ്പൻ ബൂർഷ്വാസി തുലയട്ടെ !

ചെഷസ്‌കു 

പട്ടാളം അവർക്ക് മേൽ വെടി വയ്ക്കാൻ സമ്മതിച്ചു.ഈ തൊഴിലാളികളിൽ ഭൂരിപക്ഷത്തിനും തുടർന്നുള്ള വർഷങ്ങളിൽ കാൻസർ വന്നു-ഇവർക്ക് നെഞ്ചിൽ അഞ്ചു മിനുട്ട് എക്‌സ് റേ ചാരസംഘടന ഡോക്ടർമാരെ കൊണ്ട് നിർബന്ധിച്ച് എടുപ്പിച്ചിരുന്നു.കാൻസർ ഉറപ്പിക്കാൻ ആയിരുന്നു ഇത്.
ചാരസംഘടന സെകുരിറ്റാറ്റ് ജനറൽ അയോൺ മിഹയിൽ പാസെപ്പ 1978 ൽ അമേരിക്കയിലേക്ക് കൂറ് മാറിയത് തിരിച്ചടിയായി.

വിദേശത്ത് നിന്ന് കടം വാങ്ങിയ 13 ബില്യൺ ഡോളർ ( 92484 കോടി രൂപ ) തിരിച്ചടയ്ക്കാൻ വയ്യാതായി.ഇറാനിലെ ഷാ സ്ഥാനഭ്രഷ്ടൻ ആയതിനാൽ കുറഞ്ഞ വിലയ്ക്ക് എണ്ണ കിട്ടാതായി.കാർഷിക,വ്യവസായ ഉൽപന്നങ്ങൾ മുഴുവൻ കടം തിരിച്ചടയ്ക്കാൻ കയറ്റി അയച്ചു.റേഷൻ വന്നു;വൈദ്യുതിയും ഗ്യാസും ഇല്ലാതായി.റേഡിയോ സ്റ്റേഷനുകൾ പൂട്ടി.ടി വി ചാനലിൽ ഒരു പരിപാടി പ്രതിദിനം രണ്ടു മണിക്കൂർ മാത്രം.1989 വേനലിൽ കടം അടച്ചു തീർത്തു.ഡിസംബറിൽ ചെഷസ്‌കു പുറത്താകും വരെ കയറ്റുമതി തുടർന്നു.

1984 ഒക്ടോബറിൽ ആസൂത്രണം ചെയ്‌ത പട്ടാള അട്ടിമറി അലസിയിരുന്നു;ഇത് ചെയ്യേണ്ട പട്ടാള യൂണിറ്റിനെ പെട്ടെന്ന് ചോളം കൊയ്യാൻ അയച്ചതായിരുന്നു കാരണം.1989 നവംബറിൽ പതിനാലാം പാർട്ടി കോൺഗ്രസ് ചെഷസ്‌കുവിനെ വീണ്ടും നേതാവാക്കി.അടുത്ത മാസം ടീമിസോറയിലും ബുക്കാറസ്റ്റിലും അക്രമ പരമ്പര അരങ്ങേറിവംശീയ വിദ്വേഷം കുത്തിവയ്ക്കാൻ ശ്രമിച്ചു എന്നാരോപിച്ച് ലാസ്ലോ ടോക്‌സ് എന്ന ഹംഗേറിയൻ രാഷ്ട്രീയക്കാരനായ പാസ്റ്ററെ പുറത്താക്കാൻ ശ്രമിച്ചതായിരുന്നു ടീമിസോറയിൽ പ്രതിഷേധ കാരണം.ജനക്കൂട്ടത്തിനു നേരെ വെടിവയ്‌പ് ഉണ്ടായി.ഡിസംബർ 18 ന് ഇറാനിൽ പോയ ചെഷസ്‌കു 20 ന് തിരിച്ചെത്തിയപ്പോൾ എല്ലാം വഷളായിരുന്നു.സി സി ഓഫിസിലെ ടി വി റ്സ്റ്റുഡിയോയിൽ നിന്ന് രാജ്യത്തോട് പ്രസംഗിച്ച അയാൾ വിദേശ കരങ്ങളെ കുറ്റപ്പെടുത്തി.അടുത്ത നാൾ ബുക്കാറസ്റ്റിലെ വിപ്ലവ സ്‌ക്വയറിൽ  പൊതു യോഗത്തിൽ പ്രസംഗിച്ചു.എട്ടു മിനിറ്റായപ്പോൾ ജനം കൂവാൻ തുടങ്ങി.അയാൾ സി സി മന്ദിരത്തിൽ ഒളിച്ചു.ജനം വിപ്ലവകാരികളായി.തെരുവ് നിറഞ്ഞു.

വാസിലി മിലിയ 

പ്രതിരോധ മന്ത്രി വാസിലി മിലിയ സ്വയം വെടിവച്ച് ജീവനൊടുക്കി. ചെഷസ്‌കു സൈനിക മേധാവി സ്ഥാനം ഏറ്റു.അയാളെ കൊന്നതാണെന്നു കരുതി പട്ടാളക്കാർ ക്ഷുഭിതരായി,കൂറ് മാറി.ജനക്കൂട്ടത്തെ അഭിസംബോധന ചെയ്യാൻ ശ്രമിച്ച ഏകാധിപതിയെ ജനം കല്ലെറിഞ്ഞു.ജനം അയാൾ ഒളിച്ച മന്ദിരത്തിൽ കടന്നു.അയാൾ എലിവേറ്ററിൽ കുടുങ്ങി.അയാളും എലേനയും  പ്രധാനമന്ത്രി മാനിയ മനേസ്‌കൂ,മുൻമന്ത്രി എമിൽ ബോബു എന്നിവരും  പുരപ്പുറത്തു കയറി ഹെലികോപ്റ്ററിൽ രക്ഷപ്പെട്ടു.വിപ്ലവം ഒതുക്കാൻ 1000  പേരെ കൊന്നിരുന്നു.

കോപ്റ്ററിൽ അവർ  40 കിലോമീറ്റർ അകലെ സ്നാഗുവിലെ ചെഷസ്‌കുവിൻറെ വീട്ടിലേക്കാണ് ആദ്യം പോയത്;അവിടന്ന് തർഗോവിസ്റ്റെയിലേക്ക്.അവിടെ ഇറങ്ങാൻ പട്ടാളം ആജ്ഞാപിച്ചു.അവരെ പൊലീസ് പിടിച്ച് പട്ടാളത്തിന് കൈമാറി.അന്ന് ക്രിസ്‌മസ്‌ ആയിരുന്നു.ചെഷസ്‌കുവിനെ അട്ടിമറിച്ചത് സോവിയറ്റ് ചാരസംഘടന കെ ജി ബി യുമായി ചേർന്ന് ആസൂത്രണം ചെയ്തതാണെന്ന് 2009 ൽ ജനറൽ വിക്റ്റർ വെളിപ്പെടുത്തി;വിവരം അമേരിക്ക അറിഞ്ഞിരുന്നു.കലാപങ്ങളിൽ സോവിയറ്റ് മിലിട്ടറി ഇൻറലിജൻസ് ജി ആർ യു പങ്കെടുത്തിരുന്നു.അതിനർത്ഥം,ചെഷസ്‌കുവിനെ പുറത്താക്കിയതിന് പിന്നിൽ ഗോർബച്ചേവ് ആയിരുന്നുവെന്നാണ്.ചെഷസ്‌കുവിൻറെ പിൻഗാമിയായ അയോൺ ഇലിയെസ്‌കു ( ജനനം 1930 ) മോസ്‌കോയിൽ പഠിക്കുന്ന കാലത്ത് ഗോർബച്ചേവിന്റെ സുഹൃത്തായിരുന്നു എന്ന് വാദമുണ്ട്.കേന്ദ്ര കമ്മിറ്റി അംഗവും യുവജന മന്ത്രിയുമായിരുന്ന അയോണിനെ തന്നെ വെട്ടുമെന്നു ഭയന്ന് 1971 ൽ തന്നെ ചെഷസ്‌കു എല്ലാ സ്ഥാനങ്ങളിൽ നിന്നും പുറത്താക്കിയിരുന്നു.

റെയിൽ തൊഴിലാളിയും കമ്മ്യൂണിസ്റ്റുമായ അലക്‌സാൻഡ്രൂവിൻറെ മകനായ അയോൺ മോസ്‌കോ എനർജി ഇൻസ്റ്റിട്യൂട്ടിലാണ് പഠിച്ചത്.അവിടെ റൊമാനിയൻ വിദ്യാർത്ഥി സംഘടനാ സെക്രട്ടറി എന്ന നിലയിലായിരുന്നു,ഗോർബച്ചേവിനെ പരിചയം.അയോൺ ഇത് നിഷേധിച്ചെങ്കിലും,1989 ജൂലൈയിൽ ഗോർബച്ചേവ് റൊമാനിയയിൽ എത്തിയപ്പോൾ,അയോണിനെ ചെഷസ്‌കു ബുക്കാറസ്റ്റിൽ നിന്ന് മാറ്റി നിർത്തിയിരുന്നു.

See https://hamletram.blogspot.com/2019/08/blog-post_16.html