പാർട്ടി ജനറൽ സെക്രട്ടറിയെ കൊന്നു

അവിടത്തെ പാർട്ടി ഡ്രാക്കുള 

റൊമാനിയയിലെ കമ്മ്യൂണിസ്റ്റ് പാർട്ടി ഡ്രാക്കുള നിക്കോളായ് ചെഷസ്‌കു ആണെന്ന പൊതു വിശ്വാസം തെറ്റാണ്;അവിടത്തെ വലിയ ഭീകരൻ,ചെഷസ്‌കുവിൻറെ ഗുരുവും പാർട്ടി ജനറൽ സെക്രട്ടറിയും ആയിരുന്ന ഗിയോർഗി ഗോർഗ്യു -ദേജ് (  Gheorge Gheorgiu-Dej 1901 -1965 ) ആയിരുന്നു. പാർട്ടി ജനറൽ സെക്രട്ടറി സ്റ്റെഫാൻ ഫോറിസിനെ കൊന്നാണ് ഇയാൾ പാർട്ടി പിടിച്ചത് .ഗോർഗ്യുവിനും ചെഷസ്‌കുവിനും വലിയ വിദ്യാഭ്യാസം ഉണ്ടായിരുന്നില്ല;ബുദ്ധിയുള്ളവരെ സഹിച്ചിരുന്നുമില്ല.ഗോർഗ്യു അനുസരിച്ചത് സ്റ്റാലിനെ മാത്രമാണ്.

ഗോർഗ്യു ദേജ് 

അയാളുടെ കഥ പറയും മുൻപ് പാർട്ടി ചരിത്രം കുറച്ചെങ്കിലും അറിയണം.
ബോൾഷെവിക് അനുകൂല സോഷ്യലിസ്റ്റ് പാർട്ടിയാണ് അവിടെ കമ്മ്യൂണിസ്റ്റ് പാർട്ടി ആയി മാറിയത്.രണ്ടാം ലോകയുദ്ധ കാലത്ത് ചിതറിയ ചെറിയ ഗ്രൂപ് മാത്രമായിരുന്നു പാർട്ടി.അത് സ്റ്റാലിൻ നേതൃത്വം നൽകിയ കോമിന്റേണിന്റെ ഉപഗ്രഹം മാത്രമായിരുന്നു.റെഡ് ആർമി 1944 ൽ റൊമാനിയയിൽ എത്തിയാണ് രാജഭരണത്തെ അട്ടിമറിച്ചത്.മുപ്പതുകളിൽ പാർട്ടി നേതാക്കൾ തടവിൽ ആയിരുന്നു.കുറെ നേതാക്കൾ സോവിയറ്റ് യൂണിയനിൽ അഭയം തേടി.പാർട്ടിയിൽ രണ്ടു ഗ്രൂപ് ഉണ്ടായി -സോവിയറ്റ് യൂണിയനിൽ പോയവരും നാടൻമാരും.നാടന്മാർ ജയിൽ ഗ്രൂപ് എന്നും അറിയപ്പെട്ടു.

റെഡ് ആർമി വന്ന് രാജഭരണത്തെ 1944 ഓഗസ്റ്റിൽ കട പുഴക്കിയപ്പോൾ,കമ്മ്യൂണിസ്റ്റുകൾ വലിയ പാർട്ടി ആയി.അയോൺ അന്റോനെസ്‌കു ആണ് യുദ്ധകാലത്ത് പ്രധാനമന്ത്രിയായി രണ്ട് സർക്കാരുകളെ നയിച്ചത്.സൈനികനായ ഇയാളെ പിടികൂടി കമ്മ്യൂണിസ്റ്റുകൾ കൊന്നു.മൈക്കിൾ രാജാവിനെ നാട് കടത്തി.1945 മാർച്ച് ആറിന് കമ്മ്യൂണിസ്റ്റ് ഭൂരിപക്ഷത്തിൽ  വന്ന മുന്നണി സർക്കാരിൽ പെത്രു ഗ്രോസ് ആയി പ്രധാനമന്ത്രി .കമ്മ്യൂണിസ്റ്റ് പക്ഷത്തു നിന്ന് ആഭ്യന്തര  മന്ത്രി തിയോഹാരി ജോർജെസ്‌കു,ധനമന്ത്രി വാസിലി ലൂക്ക,നിയമം  ല്യൂക്രേഷ്യു പത്രസ് കാനു,വാർത്താ വിനിമയം ഗോർഗ്യു .1945 ൽ പാർട്ടിയുടെ ആദ്യ സമ്മേളനം ഗോർഗ്യുവിനെ ജനറൽ സെക്രട്ടറിയാക്കി നിലനിർത്തി.ത്രിമൂർത്തികളിൽ ( troika ) കോൺസ്റ്റാന്റിൻ പ്രിവിലെസ്‌കു,യോസിഫ് രംഗേറ്റ എന്നിവരെ മുഖ്യ സ്ഥാനങ്ങളിൽ നിന്ന് നീക്കി അന പോക്കർ,തിയോഹാരി ജോർജെസ്‌കു ,വാസിലി ലൂക്ക എന്നിവരെ പി ബി യിൽ കൊണ്ട് വന്നു . 1948 ൽ കമ്മ്യൂണിസ്റ്റ് സർക്കാർ വന്നു,ഇന്ത്യൻ പാർട്ടിയിൽ കൽക്കട്ട തീസിസിൻറെ ഭീകരത ആയിരുന്നതിനാൽ,ഇവിടെ റൊമാനിയയെ ശ്രദ്ധിച്ചില്ല.1965 വരെ റൊമാനിയൻ വർക്കേഴ്‌സ് പാർട്ടി ആയിരുന്നു.ഇതിൻറെ പേര് കമ്മ്യൂണിസ്റ്റ് പാർട്ടി എന്നാക്കിയത് ചെഷസ്‌കുവാണ്.1953 മുതൽ 1989 വരെ ഇത് മാത്രമായിരുന്നു പാർട്ടി.ഇതാണ്,ജനാധിപത്യം ഇല്ലാത്ത ജനാധിപത്യ കേന്ദ്രീകരണം.അൻപതുകളുടെ തുടക്കത്തിൽ സ്റ്റാലിന്റെ സഹായത്തോടെ എല്ലാ വിഭാഗങ്ങളെയും ശരിയാക്കി ഗോർഗ്യു പാർട്ടി കൈയടക്കി.1947 മുതൽ 1965 ൽ മരണം വരെ അയാൾ തുടർന്നു;അവിടത്തെ ആദ്യ കമ്മ്യൂണിസ്റ്റ് ഏകാധിപതി.1952 -55 ൽ ആദ്യ കമ്മ്യൂണിസ്റ്റ് പ്രധാനമന്ത്രി.

തൊഴിലാളിയുടെ മകനായ ഗോർഗ്യുവിന് പഠനം നിർത്തി പതിനൊന്നാം വയസിൽ ജോലിക്ക് പോകേണ്ടി വന്നു.പല ജോലി ചെയ്ത് ഇലക്ട്രീഷ്യൻ ആയി.ജോലിയിൽ നിന്ന് പലതവണ പല കമ്പനികൾ പിരിച്ചു വിട്ടു -എല്ലായിടത്തും സമരമുണ്ടാക്കി.1930 ലാണ് പാർട്ടിയിൽ ചേർന്നത്.ഗലാട്ടിയിലെ റയിൽവേ വർക് ഷോപ്പിൽ ജോലി ചെയ്ത അയാളെ സമരം കാരണം ട്രാൻസിൽവാനിയയിലെ  ദേജിലേക്ക് സ്ഥലം മാറ്റി.അങ്ങനെയാണ് സ്ഥലപ്പേര് കൂടെ പോന്നത്.അവിടെയും സമരം നടത്തി ജോലി പോയ അയാളെ ആരും എടുക്കാതായി.അവിടത്തെ പ്ളാൻറ് പൂട്ടി.1933 ൽ പൊതു പണിമുടക്ക് സംഘടിപ്പിച്ചു.ജയിലിലായ അയാളെ 1936 ൽ പാർട്ടി കേന്ദ്ര കമ്മിറ്റിയിൽ എടുത്തു.അയാൾ പാർട്ടി ജയിൽ പക്ഷ നേതാവായി.അന്റോനെസ്‌കു ഭരണകൂടം വീഴുന്നതിനു തൊട്ടു മുൻപ് 1944 ഓഗസ്റ്റിൽ മോചിതനായി.സോവിയറ്റ് ആർമി അവിടെ വന്നിരിക്കെ,അയാൾ ജനറൽ സെക്രട്ടറി ആയി.1952 ൽ വിദേശകാര്യ മന്ത്രി അന പോക്കർ,ആഭ്യന്തര മന്ത്രി തിയോഹാരി ജോർജെസ്‌കു,ധനമന്ത്രി വാസിലി ലൂക്ക എന്നിവരടങ്ങിയ മോസ്‌കോ പക്ഷത്തെ പുറത്താക്കി സർവ്വാധിപതി ആയി.നിയമമന്ത്രിയും ബുദ്ധിജീവിയുമായ  ല്യൂക്രേഷ്യു പത്രാസ്‌കാനുവിനെ 1954 ഏപ്രിൽ 14 ന് വെടിവച്ചു കൊന്നു.
ഗോർഗ്യു സെക്രട്ടറി ആയ അന്ന് മുതൽ മുൻ സെക്രട്ടറി സ്റ്റെഫാൻ ഫോറിസിനെ വേട്ടയാടാൻ തുടങ്ങി.1946 ൽ അയാളെ തട്ടിക്കൊണ്ടു പോയി കൊന്നു.

ല്യൂക്രേഷ്യു 

പത്രപ്രവർത്തകനായ ഇസ്തവാൻ ഫോറിസ് എന്ന സ്റ്റെഫാൻ ഫോറിസ് ( 1892 -1946 ) നാലു വർഷമാണ് ജനറൽ സെക്രട്ടറി ആയിരുന്നത്;1940 -44.ഊർജതന്ത്ര ബിരുദധാരി.റൊമാനിയയിലെ ഹംഗറി ന്യൂനപക്ഷത്തിൽ പെട്ടയാൾ.ഒന്നാം ലോകയുദ്ധത്തിൽ ആസ്ട്രോ -ഹങ്കേറിയൻ പട്ടാളത്തിൽ ലഫ്റ്റനന്റ് ആയിരുന്നു.ജർമനും ഫ്രഞ്ചും കൂടി വശമുള്ളതിനാൽ യുദ്ധം കഴിഞ്ഞ് പത്രപ്രവത്തകനായി.ഹംഗറിയിലെ സോവിയറ്റ് റിപ്പബ്ലിക് ഉണ്ടാക്കുന്ന പ്രസ്ഥാനത്തിൽ പ്രവർത്തിച്ച് ഹംഗറി പാർട്ടിയിൽ അംഗമായി.അത് പിരിച്ചു വിട്ടപ്പോൾ റൊമാനിയയിൽ എത്തി സോഷ്യലിസ്റ്റ് പാർട്ടിയിൽ ചേർന്നു.1921 ൽ കമ്മ്യൂണിസ്റ്റ് പാർട്ടി സ്ഥാപക അംഗമായി.1924 ൽ അത് നിരോധിച്ചപ്പോൾ തടവിലായി.1927 ൽ വിചാരണ കാത്തു കഴിയുമ്പോൾ 27 ദിവസത്തെ നിരാഹാരം കിടന്ന് മോചിതനായി വീട്ടു തടങ്കലിലായി.സോവിയറ്റ് യൂണിയനിലേക്ക് കടന്നു.അസാന്നിധ്യത്തിൽ വിചാരണ ചെയ്‌ത്‌ പത്തു കൊല്ലം തടവ് ശിക്ഷ നൽകി.എങ്കിലും ട്രാൻസിൽവാനിയയിൽ എത്തി ഏരിയ സെക്രട്ടറി ആയി.1931 ൽ അറസ്റ്റിലായി നാലു വർഷം ജയിലിൽ കിടന്നു.പാർട്ടി സി സി യിൽ എത്തി;കോമിന്റേൺ പിന്തുണയോടെ അപ്പോഴത്തെ ജനറൽ സെക്രട്ടറി ബോറിസ് സ്‌റ്റെഫാനോവിനെ പുറത്താക്കി ആ സ്ഥാനത്തെത്തി.അപ്പോൾ അയാൾ മോസ്‌കോയിൽ ആയിരുന്നു.

ബോറിസ് സ്‌റ്റെഫാനോവ് 

നാലു കൊല്ലം 1936 -40 ൽ ജനറൽ സെക്രട്ടറി ആയിരുന്നു സ്‌റ്റെഫാനോവ് ( 1883 -1969 ).ബൾഗേറിയയിൽ ജന്മി കുടുംബത്തിൽ ജനിച്ചു.ഹൈസ്‌കൂൾ കഴിഞ്ഞ് അധ്യാപകനും പട്ടാളക്കാരനുമായിരുന്നു.സഹോദരി അന്നയാണ് അയാളെ കമ്മ്യൂണിസ്റ്റ് ആക്കിയത്;അന്ന മൂന്നാം ബൾഗേറിയൻ പാർട്ടി കോൺഗ്രസിൽ പ്രതിനിധി ആയിരുന്നു.1913 ൽ റൊമാനിയൻ സോഷ്യലിസ്റ്റ് പാർട്ടിയിൽ എത്തി.ഇതിന് ബന്ധുവായ സോവിയറ്റ് നയതന്ത്രജ്ഞൻ ക്രിസ്ത്യൻ റാക്കോവ്സ്കി സഹായിച്ചതായി പറയുന്നു.1920 ലെ പൊതുപണിമുടക്കിൽ പങ്കെടുത്ത് ജയിലിൽ ആയതിനാൽ കമ്മ്യൂണിസ്റ്റ് പാർട്ടി സ്ഥാപക കോൺഗ്രസിൽ പങ്കെടുക്കാൻ ആയില്ല.1926 ൽ റൊമാനിയൻ പാർട്ടി പി ബി മുഴുവൻ സോവിയറ്റ് യൂണിയനിലേക്ക് പലായനം ചെയ്‌തു.അവിടന്ന് പ്രവർത്തിച്ച ജനറൽ സെക്രട്ടറി അലക്‌സാണ്ടർ സ്‌റ്റെഫാൻസ്‌കിയെ നീക്കിയാണ്,സ്‌റ്റെഫാനോവിനെ അവരോധിച്ചത്.സ്‌റ്റെഫാൻസ്‌കി റൊമാനിയൻ ആയിരുന്നില്ല;സോവിയറ്റ് -പോളിഷ് വംശജൻ ആയിരുന്നു.അനയുടെ ഭർത്താവ് മാർസൽ ട്രോട് സ്‌കി പക്ഷത്താണെന്ന് സ്‌റ്റെഫാനോവ് മുദ്ര കുത്തി.അയാളെ സ്റ്റാലിൻ കൊന്നു.1938 ൽ സ്‌റ്റെഫാനോവ് മോസ്കോയിലേക്ക് പലായനം ചെയ്തിരുന്നു.തൊഴിലാളി വർഗ്ഗത്തിൽ നിന്ന് വഴി മാറി എന്നാരോപിച്ചാണ് അയാളെ 1940 ൽ നീക്കി,ഫോറിസ് വന്നത്.

1943 ൽ ഫോറിസ് ജനറൽ സെക്രട്ടറി ആയിരിക്കെ പാർട്ടി നേതാക്കൾ മിക്കവാറും മോസ്കോയിലോ ജയിലിലോ ആയിരുന്നു.ഫോറിസിന് പുറമെ,ല്യൂക്രേഷ്യു,റീമസ് കോഫ്‌ളർ എന്നിവരായിരുന്നു പുറത്തുണ്ടായിരുന്നത്.ഇവരായിരുന്നു സെക്രട്ടേറിയറ്റ്.ബുക്കാറസ്റ്റിലെ ഒളിവിടത്തിലിരുന്ന് ഫോറിസിന്റെ  സെക്രട്ടറിയും കാമുകിയുമായ വിക്ടോറിയ സാർബു ചെറിയ സംഘത്തെ ഏകോപിപ്പിച്ചു.ബിസിനസുകാരനും എൻജിനീയറുമായ എമിൽ കൽമാനോവിച്ചി സ്വത്തിൻറെ ഒരു ഭാഗം പാർട്ടിക്ക് കൊടുത്തു.ഗോർഗ്യു വിൻറെ നേതൃത്വത്തിൽ കരൻസബെ ജയിലിൽ കഴിഞ്ഞിരുന്ന ഗ്രൂപ്പിന് പാർട്ടിയിൽ ഉയരാൻ ഫോറിസ് ഗ്രൂപ് തടസമായിരുന്നു.സഹപ്രവർത്തകരെ സദാ ഫോറിസ് ശാസിച്ചു കൊണ്ടിരുന്നതും അദ്ദേഹത്തെ ഒറ്റപ്പെടുത്തി.കോൺസ്റ്റാന്റിൻ പ്രിവ്യുലെച്ചു,ഗിയോർഗി പിണ്ടില്ലെ,യോസിഫ് രംഗേറ്റ്,എമിൽ ബോദ്റാനസ് എന്നിവർ ഇത് ഏറ്റുവാങ്ങിയവർ ആയിരുന്നു.കേരളത്തിൽ പി കൃഷ്ണ പിള്ളയും പത്രോസും സഖാക്കളെ പച്ചത്തെറി വിളിച്ചിരുന്നത് പോലെയാകാം എന്ന് തോന്നുന്നു.1944 മാർച്ചിൽ ബോദ്റാനസിനെ പാർട്ടി തീരുമാനിച്ച അട്ടിമറി പദ്ധതി രേഖകൾ സൂക്ഷിച്ചതിനും അത് പൊലീസ് പിടിച്ചെടുത്തതിനും തരം താഴ്ത്തിയിരുന്നു.സോവിയറ്റ് ചാരശൃംഖലയായ എം ജി ബി യുടെ ഏജൻറ് ആയ ബോദ്റാനസ്,ഗോർഗ്യുവുമായി ബന്ധപ്പെട്ടു-ഫോറിസിനെ പുറത്താക്കാൻ അവർ പദ്ധതി തയ്യാറാക്കി.

സ്റ്റെഫാൻ ഫോറിസ് 

1944 ഏപ്രിൽ നാലിന് ബുക്കാറസ്റ്റിൽ ബോംബ് സ്ഫോടന പരമ്പര നടത്തിയ ശേഷം ബോദ്റാനസ്,പ്രിവ്യുലെച്ചു,രംഗേറ്റ് എന്നിവർ ഫോറിസിനടുത്തു ചെന്ന് തോക്കു ചൂണ്ടി അയാളെ പുറത്താക്കി.ഈ മൂവർ സംഘം (Troika) നേതൃത്വം ഏറ്റെടുത്ത് കുറച്ചു നാൾ കഴിഞ്ഞ് ഗോർഗ്യുവിനെ ജനറൽ സെക്രട്ടറിയാക്കി -പാർട്ടി കോൺഗ്രസ് കൂടുമ്പോഴാണ് ജനറൽ സെക്രട്ടറി മാറുന്നതെന്ന് കരുതരുത് !ജയിലിലുള്ള ഗോർഗ്യുവിനെ വിവരം കോഡ് സന്ദേശത്തിൽ ബോദ്റാനസ് അറിയിച്ചു:

The inheritance [that is, the party documents] was passed down to us, and the head of the family [Foriș], his wife [Sârbu] and the family friend [Koffler] were taken to a good sanatorium [a house controlled by Bodnăraş' faction].

ബുക്കാറസ്റ്റ് സർവകലാശാലാ പ്രൊഫസറായ ലുക്രേഷ്യുവിൻറെ ബുദ്ധിജീവി ഗ്രൂപ് ഈ നീക്കത്തെ അനുകൂലിച്ചു.റൊമാനിയൻ രാജഭരണത്തിൻറെ ചാരസംഘമായ സിഗുറാന്റയ്ക്ക് വേണ്ടി പാർട്ടിയിൽ നുഴഞ്ഞു കയറിയവനാണ് ഫോറിസ് എന്ന് ഗോർഗ്യു പക്ഷം ആരോപിച്ചു.അത് കൊണ്ടാണ് എല്ലാവരും ജയിലിൽ ആയപ്പോൾ ഇയാൾക്ക് പുറത്തു നിൽക്കാൻ കഴിഞ്ഞത്.ഫോറിസിന് പാർട്ടി ഒളിവു കാല പത്രമായ റൊമാനിയ ലിബെറ യിൽ ചെറിയ എഡിറ്റോറിയൽ ജോലി കൊടുത്തു.പാർട്ടിക്ക് ഭരണം കിട്ടിയപ്പോൾ ഇയാളെ കസ്റ്റഡിയിൽ എടുക്കാൻ ഗോർഗ്യു ഉത്തരവിട്ടു.1944 സെപ്റ്റംബർ ഒടുവിൽ തട്ടിക്കൊണ്ടു പോയി ജനുവരിയിൽ മോചിപ്പിച്ചു.ഗോർഗ്യുവിന് എതിരെ ഇയാൾ മാനിഫെസ്റ്റോ തയ്യാറാക്കിയെന്ന് കിംവദന്തി പടർന്നപ്പോൾ മാർച്ച് 23 ന് തട്ടിക്കൊണ്ടു പോയി 20 ദിവസം കഴിഞ്ഞ് മോചിപ്പിച്ചു.ആ സമയത്ത് തയ്യാറാക്കിയ വിൽപത്രത്തിൽ പാർട്ടിയിലും സ്റ്റാലിനിലും  വിശ്വാസം രേഖപ്പെടുത്തി.മെയ് അവസാനവും ജൂൺ ആദ്യവും വിക്ടോറിയയ്‌ക്കൊപ്പം സഞ്ചരിക്കാൻ അനുവദിച്ചു.

ഗിയോർഗി പിണ്ടില്ലെയുടെ നേതൃത്വത്തിലെ സ്‌ക്വാഡ് ജൂൺ ഒൻപതിന് തെരുവിൽ ഫോറിസിനെ തടഞ്ഞു തട്ടിക്കൊണ്ടു പോയി.വിക്ടോറിയയുടെ സഹോദരനൊപ്പം വിദേശത്ത് താമസിക്കാൻ സാധനങ്ങൾ വാങ്ങാൻ ഇറങ്ങിയതായിരുന്നു ഫോറിസ് എന്ന് പറയപ്പെടുന്നു.ഒരു കൊല്ലത്തിനു ശേഷം ഇയാളെ കൊല്ലാൻ പി ബി രഹസ്യ വോട്ടെടുപ്പിൽ തീരുമാനിച്ചു.ഗോർഗ്യു,അന പോക്കർ,വാസിലി ലൂക്ക,തിയോഹാരി ജോർജെസ്‌കു എന്നിവരാണ് അവസാന തീരുമാനം എടുത്തത്.പിണ്ടില്ലെയും ഡ്രൈവർ ദുമിത്രൂ നെസ്‌യുവും ഫോറിസിനെ ആക്രമിച്ചു.പിണ്ടില്ലെ ഫോറിസിനെ കട്ടപ്പാര കൊണ്ട് അടിച്ചു കൊന്നു.അടുത്തൊരു പറമ്പിൽ ജഡം കുഴിച്ചിട്ടു.ഫോറിസിന്റെ രണ്ടു സഹായികളെ തുടർന്നുള്ള ദിനങ്ങളിൽ ഇത് പോലെ കൊന്നു.ഇതിൽ ഒരാളുടെ പേരെ ഇത് വരെ അറിയൂ -നിക്കോളെ പർഗരിയു.സോവിയറ്റ് ഏജൻറ് ആയ പിണ്ടില്ലെ ചാര മേധാവിയായി.
ഫോറിസിന്റെ ഗ്രൂപ്പിനെ ഗോർഗ്യു നാമാവശേഷമാക്കി.സമ്മർദ്ദം കാരണം ഫോറിസിന് എതിരെ മൊഴി നൽകിയവരും ഇതിൽ പെട്ടു.1954 ൽ കോഫ്‌ളറെയും ല്യൂക്രേഷ്യുവിനെയും കൊന്നതോടെ ഉന്മൂലനം പൂർണമായി.എമിൽ കൽമാനോവിച്ചിയെ ജയിലിൽ കൊന്നു.

എമിൽ 

നിയമമന്ത്രി ആയിരുന്നു ല്യൂക്രേഷ്യു.അഭിഭാഷകനും സാമൂഹിക,ധന ശാസ്ത്രജ്ഞനുമായ ല്യൂക്രേഷ്യു ( 1900 -1954 ) ബുക്കാറസ്റ്റ് സർവകലാശാല പ്രൊഫസറായിരുന്നു.സ്റ്റാലിന്റെ തിട്ടൂരങ്ങൾക്ക് എതിര് നിന്നതിനാൽ പാർട്ടിയിൽ നോട്ടപ്പുള്ളി ആയി.ഗോർഗ്യു കൊന്ന ല്യൂക്രേഷ്യുവിനെ ചൊഷെസ്‌കു പുനരധിവസിപ്പിച്ചു.കുലീന കുടുംബത്തിൽ ജനിച്ച് യൗവനത്തിൽ സോഷ്യലിസ്റ്റ് ആയി.പാർട്ടി പത്രത്തിൻറെ എഡിറ്ററായിരുന്നു.അനയുടെ  ഭര്ത്താവിനൊപ്പം 1922 ൽ കോമിന്റേൺ കോൺഗ്രസിൽ പ്രതിനിധി ആയിരുന്നു.അഞ്ചാം പാർട്ടി കോൺഗ്രസിൽ സി സി യിൽ എത്തി.1933 -35 ൽ മോസ്‌കോയിൽ കോമിന്റേൺ പ്രതിനിധി ആയപ്പോൾ സ്റ്റാലിനിസം കെടുതി ആണെന്ന് മനസ്സിലായി.രണ്ടാം ലോകയുദ്ധകാലത്ത് ഗോർഗ്യുവിനൊപ്പം ജയിലിൽ കിടന്നു.1945 ൽ സി സി യിൽ എത്തി.സോവിയറ്റ് അധിനിവേശകാലത്ത് പി ബി അംഗമായി;മന്ത്രിസഭയിൽ അംഗമായി.ജനറൽ സെക്രട്ടറി ആയി പരിഗണിച്ചെങ്കിലും സ്റ്റാലിൻ സമ്മതിച്ചില്ല.1948 ഫെബ്രുവരിയിലെ അഞ്ചാം പാർട്ടി കോൺഗ്രസ് സി സി അംഗത്വത്തിൽ നിന്ന് നീക്കി;തുടർന്ന് മന്ത്രി സ്ഥാനത്തു നിന്നും.ഏപ്രിൽ 28 ന് അറസ്റ്റിലായി.മൂന്നംഗ പാർട്ടി കമ്മീഷൻ പലതവണ വിചാരണ ചെയ്‌തു;ചിലപ്പോൾ ഗോർഗ്യു പങ്കെടുത്തു.1946 വേനൽ മുതൽ ഇയാൾ ചാര നിരീക്ഷണത്തിൽ ആയിരുന്നെന്ന് രേഖകൾ കാണിക്കുന്നു.കമ്മീഷൻറെ നിഗമനം നിരാകരിച്ച് 1949 അവസാനം ഇയാളെ ഗോർഗ്യു രഹസ്യ പൊലീസ് കസ്റ്റഡിയിൽ വിട്ടു.ചാരസംഘടന അന്വേഷണം തുടങ്ങിയ ദിവസം ബ്ലേഡ് കൊണ്ട് കൈത്തണ്ടയിലെ ഞരമ്പ് മുറിച്ച് ല്യൂക്രേഷ്യു ആത്മഹത്യയ്ക്ക് ശ്രമിച്ചു.അതിൽ നിന്ന് രക്ഷപ്പെട്ടപ്പോൾ ഉറക്ക ഗുളികകൾ കഴിച്ച് ജീവനൊടുക്കാൻ ശ്രമിച്ചു.ആഭ്യന്തര സോവിയറ്റ് ഉപദേഷ്ടാവ് അലക്‌സാണ്ടർ സഖറോവിൻറെ നിർദേശം അവഗണിച്ച്,ല്യൂക്രേഷ്യുവിനെതിരെ തെളിവില്ലെന്ന് തിയോഹാരി ജോർജെസ്‌കു തീരുമാനിച്ചു.അവധികാലം കഴിഞ്ഞ് മടങ്ങിയ ഉപദേഷ്ടാക്കൾ അത് വീറ്റോ ചെയ്‌തു.1954 ഏപ്രിൽ 17 ന് അയാളെ വെടിവച്ചു കൊന്നു.

പിണ്ടില്ലെ 

പാർട്ടിക്ക് തുടക്കത്തിൽ സാമ്പത്തിക സഹായം നൽകിയ ആളായിരുന്നു റീമസ് കോഫ്‌ളർ (  Remus Koffler 1902 -1954 ).1949 ൽ ആയിരുന്നു അറസ്റ്റ്.1950 ആദ്യം തടവിൽ ആത്മകഥ എഴുതി.പിതാവിന് ഫാക്ടറിയും നിരവധി വീടുകളും ഉണ്ടായിരുന്നെങ്കിലും ധൂർത്ത ജീവിതത്താൽ എല്ലാം പോയി.ഒന്നാം ലോകയുദ്ധ കാലത്ത് ജർമൻ അധിനിവേശം വന്നപ്പോൾ അവർക്ക് മദ്യം വിറ്റാണ് പണം ഉണ്ടാക്കിയത്.ജൂതനായിരുന്നു;കത്തോലിക്കനായി.കമ്മ്യൂണിസ്റ്റ് ,മാനിഫെസ്റ്റോയും ട്രോട് സ്‌കി എഴുതിയ റഷ്യൻ വിപ്ലവ ജീവചരിത്രവും വായിച്ച് സൂറിച്ചിൽ പഠിക്കുമ്പോൾ കമ്മ്യൂണിസ്റ്റായി.1920 ൽ ബെർലിനിൽ പഠിക്കാൻ പോയപ്പോൾ ഒരു യുവതിയിൽ നിന്ന് സിഫിലിസ് കിട്ടി.1948 വരെ ചികിൽസിച്ചു.ബെർലിൻ പാർട്ടിയിൽ ആണ് ആദ്യം ചേർന്നത്.1932 ൽ റൊമാനിയയ്ക്ക് മടങ്ങി ക്ളർക് ആയി.അപ്പോൾ പണം വെട്ടിച്ചെന്ന് ആത്മകഥയിൽ തുറന്നു പറയുന്നു.അത് വച്ച് കാസിനോയിൽ ചൂത് കളിച്ചു.പാർട്ടി ഫണ്ടും ഇതിന് തിരിമറി ചെയ്തു.ഫോറിസ്,തിയോഹാരി തുടങ്ങിയ നേതാക്കൾക്കും വലിയ നിലയിൽ ജീവിക്കാൻ ഇയാൾ പണം കൊടുത്തു.1932 -35 ൽ ഭാര്യയും മകളുമായി ജീവിക്കുന്ന ഇയാളുടെ ഒറ്റമുറി വീട്ടിലാണ്  ല്യൂക്രേഷ്യു പാർട്ടി യോഗങ്ങൾ നടത്തിയത്.ഭാര്യയെ അന്യരുമായി വേഴ്ചയ്ക്ക് പ്രേരിപ്പിച്ച് അത് രഹസ്യമായി കണ്ട് ഇയാൾ സ്വയംഭോഗം ചെയ്തിരുന്നു.

ഉപജാപ വിദഗ്ദ്ധനായിരുന്നു.46 മില്യൺ ലെയ് വരെ ഇയാൾ മുതലാളിമാരിൽ നിന്ന് പാർട്ടിക്ക് പിരിച്ചു.ഫോറിസിന്റെ ഏറ്റവും അടുത്തയാൾ എന്ന നിലയിലാണ് ഇയാളെ കൊന്നത്.വിഭാഗീയതയുടെ ദൃക്‌സാക്ഷി എന്ന നിലയ്ക്കും പാർട്ടി ഫണ്ട് എവിടന്നു വന്നു എന്നറിയുന്നയാൾ എന്ന നിലയിലും ഗോർഗ്യുവിന് ഇയാൾ അപകടകാരി ആയിരുന്നു.1954 ഏപ്രിൽ 17 പുലർച്ചെ മൂന്നിന് അയാളെ കഴുത്തിൽ വെടിവച്ചു കൊന്നു.

ല്യൂക്രേഷ്യുവിൻറെ വിചാരണയിൽ കൂട്ടി ചേർത്താണ് പാർട്ടിക്ക് ആദ്യകാലത്ത് പണം നൽകിയ എമിൽ കാൽമനോവിച്ചി ( Emil Calmanovici 1896 -1956 ) യെ ഗോർഗ്യു പക്ഷം പിടി കൂടിയത്.അയോദ് ജയിലിൽ നിരാഹാരത്തിൽ നിന്ന് രക്ഷപെട്ട ശേഷം ദുരൂഹമായി മരിച്ചു.
ജൂതൻ.മ്യൂണിക്,ബെർലിൻ സർവകലാശാലകളിൽ പഠിച്ചു.മാർക്സ്,ലെനിൻ എന്നിവരുടെ കൃതികൾ വായിച്ചതിനൊപ്പം റിയൽ എസ്റ്റേറ്റിൽ നിക്ഷേപിച്ച് ധനികനായി.പ്രസ്,റേഡിയോ സ്റ്റേഷൻ,സി സി ഓഫിസ്,പാർട്ടി കുട്ടികളുടെ സ്‌കൂൾ ഒക്കെ ഇയാളുടെ വക ആയിരുന്നു.30 മില്യൺ ലെയ് പാർട്ടിക്ക് മുടക്കിയെന്ന് ഇയാൾ മൊഴി നൽകി.തൻറെ സ്വത്ത് ദേശസാൽക്കരിച്ചപ്പോൾ ഒരു ബില്യൺ രാജ്യത്തിന് കിട്ടി.

യോസിഫ് രംഗേറ്റ് 

പാർട്ടിയിൽ ഗോർഗ്യു ഗ്രൂപ്പുമായി വലിയ ബന്ധം ഉണ്ടായിരുന്നില്ല.ഡോഫ്റ്റന ജയിലിൽ കഴിയുന്ന ഗോർഗ്യുവിന് സമ്മാനമായി ഒരു ജാക്കറ്റ് അയച്ചിരുന്നു.ബുദ്ധിജീവി ഗ്രൂപ്പുമായിട്ടായിരുന്നു ബന്ധം.സകല പാർട്ടികളുമായും ബന്ധമുണ്ടായിരുന്ന എമിൽ,തനിക്ക് കിട്ടുന്ന വിവരങ്ങൾ കോഫ്‌ളർക്ക് നൽകിയിരുന്നു.പാർട്ടി ഭരണത്തിൽ വന്നപ്പോൾ എമിൽ പാർട്ടി അംഗമായി.പാർട്ടിയുടെ പ്രിയ വ്യവസായിയും.1956 മെയ് 26 ന് അറസ്റ്റിലായി.ഇയാളും ല്യൂക്രേഷ്യുവും പാശ്ചാത്യ ശക്തികൾക്ക് ചാരവൃത്തി നടത്തി എന്നായിരുന്നു ആരോപണം.പാർട്ടി ചരിത്രം എഴുതുന്നതിൻറെ ഭാഗമായാണ് കൊണ്ട് പോകുന്നത് എന്നാണ് പിടിക്കുമ്പോൾ ഇയാളോട് പറഞ്ഞത്.ആഭ്യന്തരമന്ത്രി തിയോഹാരി എമിലിനൊപ്പം നിൽക്കുന്നത് കണ്ട് കർശന നടപടിക്ക് ഗോർഗ്യു നിർബന്ധിച്ചു.എമിൽ കുറ്റം സമ്മതിച്ചില്ല.1953 ഫെബ്രുവരിയിൽ വഴങ്ങി.മിൽട്ടൺ എന്നൊരാളുടെ നേതൃത്വത്തിൽ ചാരശൃംഖലയിൽ അംഗമായിരുന്നു താനെന്ന് എമിൽ പറഞ്ഞു -പറുദീസാ നഷ്ടം എഴുതിയ ഇംഗ്ലീഷ് കവി ജോൺ മിൽട്ടൺ ആയിരുന്നു മനസ്സിൽ!1938 ൽ സോവിയറ്റ് സൈദ്ധാന്തികൻ ബുഖാറിൻ കൊല്ലപ്പെടും മുൻപ് എഴുതിയ പ്രസ്താവന പോലൊന്ന് എമിൽ നൽകി.

ജീവപര്യന്തത്തിനും നിർബന്ധിത വേലയ്ക്കും അയാളെ ശിക്ഷിച്ചു.1955 ൽ ജയിലിൽ നിന്ന് ഒരു വില്ലയിലേക്ക് മാറ്റി നിരന്തരം ചോദ്യം ചെയ്തു.അവിടത്തെ കാവൽക്കാരനോട് എമിലുമായി അടുക്കാൻ പാർട്ടി നിർദേശിച്ചു.സൗഹൃദം വളർന്നപ്പോൾ എമിൽ തുണിയിൽ വിദേശ ജൂതർക്ക് എഴുതിയ സഹായ അഭ്യർത്ഥന കാവൽക്കാരനു കടത്താൻ കൊടുത്തു;അയാൾ അത് പാർട്ടിക്ക് കൈമാറിയപ്പോൾ തെളിവായി.വില്ലയിൽ നിന്ന് ചങ്ങലക്കിട്ട് എമിലിനെ ജയിലിൽ കൊണ്ട് പോയി.അവിടെ നിരാഹാരം കിടന്നു.ഡോക്ടർമാർ നൽകിയ ആഹാരം നിരാഹാരികൾക്ക് കഴിക്കാവുന്നത് ആയിരുന്നില്ല.അന്നനാളത്തിൽ തുള വീണു.ഇതിനു മുൻപ് നിരാഹാരം അവസാനിപ്പിക്കുന്ന പ്രസ്താവന എമിലിൽ നിന്ന് എഴുതി വാങ്ങി.

സ്റ്റാലിന്റെ മരണ ശേഷം 'സ്വതന്ത്ര പാത ' പിന്തുടരാൻ തീരുമാനിച്ച ഗോർഗ്യു,അന,തിയോഹാരി,വാസിലി എന്നിവരെ പാർട്ടിയിൽ നിന്ന് പുറത്താക്കി.ലോകത്തിലെ ആദ്യ വനിതാ വിദേശ കാര്യമന്ത്രി ആയിരുന്നു,അന.തിയോഹാരി ആഭ്യന്തര മന്ത്രിയും വാസിലി ധനമന്ത്രിയും ആയിരുന്നു.ഈ ഒഴിവിലാണ് ചെഷസ്‌കു ഉയർന്നത്.1956 മാർച്ചിൽ സോവിയറ്റ് യൂണിയനിലെ ക്രൂഷ്ചേവ് പരിഷ്കാരങ്ങളെ അനുകൂലിച്ച പി ബി അംഗങ്ങളായ മിറോൺ കോൺസ്റ്റാന്റിനെസ്കു,യോസിഫ് ചിഷിനേവ്സ്കി എന്നിവരെ പുറത്താക്കി.1956 ൽ സോവിയറ്റ് യൂണിയൻ ഹംഗറിയിലെ വിപ്ലവം അടിച്ചമർത്തിയപ്പോൾ ഗോർഗ്യു അതിനെ തുണച്ചു;വിമത നേതാവ് ഇoറെ നാഗിയെയും കൂട്ടരെയും റൊമാനിയയിൽ തടവിലിട്ടു.അലക്‌സാണ്ടർ സോൾഷെനിതാസിൻ,ബോറിസ് പാസ്റ്റർനാക് എന്നിവർക്കെതിരെ നിന്നു.1965 മാർച്ച് 19  ന്  ശ്വാസകോശ അർബുദം കാരണം ഗോർഗ്യു മരിച്ചു.ചെഷസ്‌കു വന്നു.

See https://hamletram.blogspot.com/2019/08/blog-post_15.html