ഒരു റഷ്യൻ യക്ഷിക്കഥ 12

12.ഷഡാനോവും തിന്മ മരവും  വീഴുന്നു 

സ്റ്റാലിന്റെ കലാ  സൈദ്ധാന്തികൻ ആയിരുന്നു,ആന്ദ്രേ അലക്‌സാണ്ടറോവിച് ഷഡാനോവ്.സോവിയറ്റ് പാർട്ടിയുടെ പ്രത്യയശാസ്ത്ര സെക്രട്ടറിയും ലെനിൻഗ്രാഡ് പാർട്ടി മേധാവിയും ആയിരുന്ന ഷഡാനോവ് മരിക്കും വരെ പി ബി യിൽ ഉണ്ടായിരുന്നു.1934 ൽ എഴുത്തുകാരുടെ രാജ്യാന്തര സമ്മേളനത്തിൽ മുഖ്യപ്രസംഗം നടത്തിയാണ്,ഷഡാനോവ് ലോകശ്രദ്ധയിൽ എത്തിയത്."എഴുത്തുകാർ മനുഷ്യാത്മാക്കളുടെ എന്ജിനീയർമാരാണ്",ഷഡാനോവ് കണ്ടെത്തി !

രണ്ടാം ലോകയുദ്ധത്തിന് ശേഷം,ലെനിൻഗ്രാഡ് പിടിച്ച പോരാട്ടത്തിലെ നായകനായാണ് ഷഡാനോവ് പാർട്ടിയിൽ ഉയർന്നത്.സ്റ്റാലിൻ കഴിഞ്ഞാൽ ശക്തൻ.സ്റ്റാലിന്റെ ഡാച്ചയിൽ പിയാനോ വായിച്ചും ഗോർക്കിയുമായി സാഹിത്യ സംവാദം നടത്തിയും കഴിഞ്ഞു വന്ന അദ്ദേഹം ഏറെ നേരം പണിയെടുത്തിരുന്നു.മലയാള സാഹിത്യത്തിൽ അയാൾ വീഴ്ത്തിയ കരിനിഴലുകൾ വഴിയേ കാണാം.അക്കാര്യത്തിൽ ഇ എം എസിന് ഗുരുവായിരുന്നു,ഷഡാനോവ്.

ഷഡാനോവ് 

റഷ്യയിൽ 1921 -29 കാലം ധിഷണയുടെ പ്രതിസന്ധി കാലമായി അറിയപ്പെടുന്നു.ലെനിൻറെ ചുവപ്പ്\ഭീകരത;സ്റ്റാലിൻ നിർബന്ധിത കൂട്ടുകൃഷിക്കളങ്ങൾ വഴി കർഷകരെ വിറപ്പിച്ച കാലം.പുത്തൻ സാമ്പത്തിക നയ കാലം.ബുദ്ധിജീവികൾക്ക് കൂച്ചു വിലങ്ങിട്ടു.കല,സാഹിത്യം,തത്വശാസ്ത്രം,ശാസ്ത്രം എന്നിവയെല്ലാം സമ്മർദ്ദത്തിലായി.ഇ സേമിയറ്റിൻ രചിച്ച നമ്മൾ എന്ന നോവൽ വിലക്കി;അത് 1925 ൽ അമേരിക്കയിൽ പ്രസിദ്ധീകരിച്ചു.

ഒക്ടോബർ അട്ടിമറിയെ  പിന്തുണച്ചവരിൽ നിന്നു നല്ല രചനകൾ വന്നപ്പോൾ,അട്ടിമറിക്ക് ആധികാരികത കിട്ടി.ഇസാക് ബാബേൽ,അലക്‌സാണ്ടർ ഫദെയേവ്,ബോറിസ് പിൽന്യക്,മയക്കോവ്സ്കി,സെർലി യെസീനിൻ,ആർട്ടെo വെസോലി,റോഡ് ലിയാനോവ് എന്നിവർ  ഇതിൽപ്പെടും.ഇതിനെ അനുകൂലിക്കാത്ത ബോറിസ് പാസ്റ്റർ നാക്,അന്ന അഹ്‌മത്തോവ,ഇ സേമിയറ്റിൻ തുടങ്ങിയവരും എഴുതി.മുപ്പതുകളിൽ എല്ലാം തീർന്നു.ബാബേൽ,പിൽന്യക്,വെസോലി എന്നിവരെ കൊന്നു.മികച്ച നാടക സംവിധായകൻ മേയർഹോൾഡിനെ വെടിവച്ചു കൊന്നു.മയക്കോവ്‌സ്‌കിയും യെസീനിനും ആത്മഹത്യ ചെയ്‌തു.ബോഗ്‌ധനെവ് രോഗം പകർന്ന രക്തം കുത്തിവച്ച് ജീവനൊടുക്കി. മാൻടെൽസ്റ്റാം ലേബർ ക്യാമ്പിൽ മരിച്ചു വീണു.അഹ്മത്തോവയും പാസ്റ്റർ നാക്കും അതിജീവിച്ചു.സേമിയറ്റിൻ നാട് വിട്ടു.സ്റ്റാലിന് ഹല്ലെലുയ്യ പാടിയ ഫദെയേവ്,ഷോളോഖോവ്,ഒലീഷ,ഗോർക്കി എന്നിവർക്ക് സർഗ്ഗശേഷി ഇല്ലാതായി.ഇരുപതാം പാർട്ടി കോൺഗ്രസ് സ്റ്റാലിനെ കുഴിച്ചു മൂടിയ ക്രൂഷ്‌ചേവിൻറെ പ്രസംഗം കേട്ട് വീട്ടിലെത്തി ഫദയേവ്,തുടർച്ചയായി മദ്യപിച്ച് ബോധം കെട്ടു.12 നാൾ തുടർച്ചയായി മദ്യപിച്ച് തോക്കെടുത്ത് തലയിലേക്ക് വെടി വച്ച് മരിച്ചു.കേന്ദ്രകമ്മിറ്റി അംഗവും എഴുത്തുകാരുടെ യൂണിയൻ പ്രസിഡന്റും ആയിരുന്നു.

ഫദയേവ്,മയകോവ്‌സ്‌കി,സ്റ്റാവ്‌സ്‌കി 

യുദ്ധത്തിന് മുൻപ് 97 ഉന്നത വിദ്യാഭ്യാസ സ്ഥാപനങ്ങൾ ഉണ്ടായിരുന്നത് 1922 ൽ 278 ആയെങ്കിലും,1926 ൽ 138 ലേക്ക് താണു.തുടക്കത്തിൽ ലൂണാചാർസ്‌കിക്ക് കീഴിൽ സാംസ്‌കാരിക നയത്തിന് പരിമിത ലക്ഷ്യങ്ങൾ മാത്രമായിരുന്നു.സർവകലാശാലകൾ ബുദ്ധിജീവികളെ ഒതുക്കാൻ രാഷ്ട്രീയ സമ്മർദത്തിൽ ആയി.തൊഴിലാളി ഫാക്കൽറ്റികളിൽ നിന്നും വിദ്യാഭ്യാസ കമ്മിസാരിയറ്റിൽ നിന്നുമുള്ളവരെ സർവകലാശാല ഭരണസമിതികളിൽ തിരുകിക്കയറ്റി.അവിടത്തെ വാസവന്മാരും ആനാവൂർ നാഗപ്പന്മാരുമായി ഭരണം.പ്രൊഫസർ സ്ഥാനങ്ങൾ അനുയായികളെക്കൊണ്ട് നിറച്ചു.വിദ്യാർത്ഥി പ്രവേശനത്തിൽ ബൂർഷ്വകളെ ഒഴിവാക്കി.പഴയ ബുദ്ധിജീവികളുടെയും മധ്യവർഗ്ഗത്തിന്റെയും കുട്ടികൾ പെരുവഴിയിലായി.തത്വശാസ്ത്രം,സാമൂഹിക ശാസ്ത്രം,നിയമം,ചരിത്രം എന്നിവയുടെ ഉള്ളടക്കത്തിൽ ഭരണകൂടം ഇടപെട്ടു.

അട്ടിമറിയുടെ ആദ്യ ദശകത്തിൽ,സർവകലാശാലകളിലെ ചരിത്ര,തത്വചിന്ത,നിയമ ഫാക്കൽറ്റികൾ മൊത്തത്തിൽ പരിഷ്‌കരിക്കുകയോ പൂട്ടുകയോ ചെയ്‌തു.പുത്തൻകൂറ്റ് സംഗതികൾ പഠിപ്പിക്കാൻ രണ്ടു സ്ഥാപനങ്ങൾ ഉണ്ടായി -റെഡ് പ്രൊഫസേർസ് ഇൻസ്റ്റിട്യൂട്ട് ( 1921 ),കമ്മ്യൂണിസ്റ്റ് അക്കാദമി.ബുഖാറിൻ ഉണ്ടായിരുന്ന കാലം അയാൾ നിയന്ത്രിച്ചു.എല്ലാ സ്ഥാപനങ്ങളും വരുതിയിൽ ആയപ്പോൾ ഈ രണ്ടെണ്ണം പൂട്ടി.മാർക്സ് -എംഗൽസ് ഇൻസ്റ്റിട്യൂട്ട് ,വ്യാഖ്യാനങ്ങൾ ഇറക്കി.ഡയറക്ടർ റയസോവിനെ മുപ്പതുകളിൽ പുറത്താക്കി.അദ്ദേഹത്തെയും ഉന്മൂലനം ചെയ്തിരിക്കാം;അദ്ദേഹം 1938 ൽ സാറാട്ടോയിൽ സ്വാഭാവികമായി മരിക്കുകയായിരുന്നു എന്നാണ് ഭാഷ്യം;ഇങ്ങനെ മരിച്ചതായി കരുതപ്പെട്ട ഇന്ത്യക്കാരൻ വിരേന്ദ്രനാഥ് ചതോപാധ്യായ എന്ന ചാറ്റോയെ സ്റ്റാലിൻ കൊല്ലുകയായിരുന്നു.സരോജിനി നായിഡുവിൻറെ സഹോദരനായ അദ്ദേഹം അക്കാദമി ഓഫ് സയൻസസിൽ നരവംശ ശാസ്ത്ര പ്രൊഫസർ ആയിരുന്നു.ചാരൻ എന്ന് മുദ്ര കുത്തി 1937 സെപ്റ്റംബർ രണ്ടിനാണ് വെടി വച്ച് കൊന്നത്.

ബുഖാറിൻറെ സുഹൃത്ത് പൊക്രോവ്സ്കി ആയിരുന്നു,റെഡ് പ്രൊഫസേർസ് ഇൻസ്റ്റിട്യൂട്ട് ഡയറക്ടർ.1932 മരിച്ചതിനാൽ ഉന്മൂലനത്തിൽ നിന്ന് രക്ഷപ്പെട്ടു.മരണാനന്തരം അദ്ദേഹത്തിൻറെ റഷ്യാ ചരിത്രം പിഴവ് നിറഞ്ഞതാണെന്ന് വിലയിരുത്തി.ലെനിന് ആ ചരിത്രം ഇഷ്ടമായിരുന്നു.ചരിത്രം,ഭൂതകാലത്തിലേക്ക് വിക്ഷേപിച്ച രാഷ്ട്രീയം മാത്രമാണ് എന്ന അദ്ദേഹത്തിൻറെ വെളിപാട് ശരിയല്ലെന്ന് വിമർശനമുണ്ടായി.1938 ൽ സ്റ്റാലിന്റെ ലഘുപാഠം വരും വരെ പാർട്ടി ചരിത്രത്തിൽ കർശന നിയന്ത്രണങ്ങൾ നില നിന്നു.ഇരുപതുകളിൽ നിയമ,ഭരണഘടനാ സൈദ്ധാന്തികൻ ആയിരുന്ന യെവ്ജനി പഴുക്കാനിസിനെ കൊന്നു.

ലെനിനും ട്രോട് സ്‌കിയും നവീനസാഹിത്യം വായിച്ചിരുന്നില്ല.തൊഴിലാളികൾക്ക് വിദ്യാഭ്യാസം ഇല്ലാത്തതിനാൽ സംസ്‌കാരമുണ്ടാക്കാൻ കഴിയില്ലെന്ന് ട്രോട് സ്‌കി വിശ്വസിച്ചു.വർഗ്ഗരഹിത സമൂഹത്തിലേ അരിസ്റ്റോട്ടിൽ ഗൊയ്ഥെ,മാർക്സ് എന്നിവരെപ്പോലെ ബുദ്ധിയുള്ളവർ ഉണ്ടാകൂ !

സ്റ്റാലിൻ വ്യക്തിപൂജയുടെ ഭാഗമായി,കലയും സാഹിത്യവും ഭരണകൂടം,പാർട്ടി,സ്റ്റാലിൻ എന്നീ ബിംബങ്ങളെ അതിശയോക്തി കലർന്ന് ചിത്രീകരിച്ചു.പുത്തൻ തൊഴിലാളി വർഗ ധാർമികത എന്നൊന്നുണ്ടായി.വിവാഹം.മോചനം എന്നിവ കടലാസിൽ മാത്രമായി.വിഹിത,അവിഹിത സന്തതികൾ തമ്മിൽ വിവേചനം ഇല്ലാതായി.ഗർഭഛിദ്രം എപ്പോൾ വേണമെങ്കിലും ആകാം.ലൈംഗിക സ്വാതന്ത്ര്യം നിലവിൽ വന്നു.മാതാപിതാക്കൾക്കെതിരെ കുട്ടികൾ നടത്തുന്ന ചാരവൃത്തി പ്രോത്സാഹിപ്പിച്ചു.പള്ളികൾ സ്വകാര്യ നിയമത്തിനു കീഴിൽ വന്നു.പാർട്ടി അംഗങ്ങളായ അവിശ്വാസികൾക്ക് പള്ളികളിൽ മേൽകൈ കിട്ടി.ഇരുപതുകളുടെ ഒടുവിൽ,നിരവധി പുരോഹിതരെ കൊന്ന ശേഷം,പല പുരോഹിതർക്കും പാർട്ടിക്കും ഭരണകൂടത്തിനും വിപ്ലവത്തിനും വേണ്ടി കുർബാന അർപ്പിക്കേണ്ടി വന്നു.ആശ്രമങ്ങളും കോൺവെന്റുകളും ഏറ്റെടുത്തു.ഇടിച്ചു നിരത്തി.

കിറോവ് 

പാർട്ടി 17 -o കോൺഗ്രസിന് ശേഷം 1934 ൽ സ്റ്റാലിൻ ഏകാധിപത്യത്തിൻറെ കൊടുമുടി കയറി. ഡിസംബർ ഒന്നിന് കേന്ദ്ര കമ്മിറ്റി സെക്രട്ടറിയും ലെനിൻഗ്രാഡ് പാർട്ടി മേധാവിയുമായ സെർജി കിറോവിനെ കൊന്ന് പഴയ ബോൾഷെവിക്കുകളുടെ ഉന്മൂലനത്തിന് തുടക്കമിട്ടു.സിനോവീവിനെയും കാമനെവിനെയും തടവിലാക്കി.വൻനഗരങ്ങളിൽ കൂട്ടക്കൊലകൾ നടത്തി.ശുദ്ധീകരണത്തിൻറെ ആദ്യ വർഷമായ 1937 ൽ ഭീകരത ഉച്ചിയിൽ തൊട്ടു.സിനോവീവ്,കാമനെവ്,സ്മിർനോവ് എന്നിവരെ 1936 ഓഗസ്റ്റിൽ വധശിക്ഷയ്ക്ക് വിധിച്ചിരുന്നു.1937 ജനുവരിയിലെ രണ്ടാം വിചാരണയിൽ കാൾ റാഡെക്,ഗ്രിഗറി പ്യാട്ടക്കോവ്,ഗ്രിഗറി സോക്കോൾ നിക്കോവ് തുടങ്ങിയവർ വർഗ വഞ്ചകരാണെന്ന് വിധിച്ചു.1915 സെപ്റ്റംബർ അഞ്ചിന് ഇറ്റാലിയൻ കമ്മ്യൂണിസ്റ്റ് പാർട്ടി വിളിച്ച രാജ്യാന്തര സോഷ്യലിസ്റ്റ് സമ്മേളനത്തിൽ ലെനിനൊപ്പം പങ്കെടുത്ത ആളായിരുന്നു,റാഡെക്.13 -o പരി കോൺഗ്രസിൽ സ്റ്റാലിനെ വിമർശിച്ചു.ലെനിനും സിനോവീവിനുമൊപ്പം അടച്ച ട്രെയിനിൽ ഉണ്ടായിരുന്നു.ലെനിൻ ഒസ്യത്തിൽ പ്രശംസിച്ച കേന്ദ്ര കമ്മിറ്റി അംഗമായിരുന്നു,പ്യാട്ടക്കോവ്.തന്നെ എതിർക്കുന്നവരെ ഉന്മൂലനം ചെയ്യാൻ ലെനിൻ 1919 മേയിൽ സോകോൾനിക്കോവിനാണ് എഴുതിയത്;കാമനെവിനും സിനോവീവിനുമൊപ്പം പി ബി യിൽ എത്തി.1938 മാർച്ചിൽ ബുഖാറിൻ,അലക്‌സി റിക്കോവ്,എൻ എൻ ക്രെസ്റ്റിൻസ്‌കി,സി റാക്കോവ്‌സ്‌കി,ജി ജി യാഗോദ എന്നിവർക്ക് ശിക്ഷ കിട്ടി.1934 -36 ൽ രഹസ്യ പൊലീസ് മേധാവി ആയിരുന്ന യാഗോദ,ഒരിക്കൽ ഉന്മൂലനത്തിൻറെ തലപ്പത്തുണ്ടായിരുന്നു.1937 ൽ തന്നെ,മാർഷൽ മിഖയിൽ തുഖാചേവ്സ്കിതുടങ്ങി നിരവധി പട്ടാള നേതാക്കളെ രഹസ്യ വിചാരണ ചെയ്‌ത്‌ വെടി വച്ച് കൊന്നു,ലെനിൻറെ നിഴലായിരുന്നു,റിക്കോവ്.13 -o പാർട്ടി കോൺഗ്രസിൽ സാമ്പത്തിക നയം അവതരിപ്പിച്ചു.ട്രോട് സ്‌കി കഴിഞ്ഞാൽ അടുത്ത ശക്തി ആയിരുന്നു,റാക്കോവ്സ്കി.പോളണ്ട് യുദ്ധത്തിൽ ലെനിന് വേണ്ടി മുന്നണിപ്പോരാളിയായി,തുഖാചേവ്സ്കി.

പീഡിപ്പിച്ചാണ് കുറ്റം സമ്മതിപ്പിച്ചിരുന്നത്.ഇല്ലെങ്കിൽ ഭാര്യയെയും മക്കളെയും കൊല്ലുമെന്ന് ഭീഷണിപ്പെടുത്തി.ചില മേഖലകളിലെ പാർട്ടി കമ്മിറ്റി അംഗങ്ങളെ മുഴുവൻ കൊന്നു.കൊല നടത്തിയവരെയും കൊന്നു.ലെനിൻറെ സഹപ്രവർത്തകർ,മുൻ ഉദ്യോഗസ്ഥർ,പി ബി,പാർട്ടി സെക്രട്ടേറിയറ്റ്അംഗങ്ങൾ,ശാസ്ത്രജ്ഞർ,അഭിഭാഷകർ,എൻജിനീയർമാർ,ഡോക്റ്റർമാർ,പട്ടാളക്കാർ എന്നിവരെയൊക്കെ കൊന്നപ്പോൾ,രണ്ടാം ലോകയുദ്ധത്തിന്റെ ആദ്യ രണ്ടു വർഷം ജര്മനിയോട് തോറ്റു.സ്റ്റാലിൻ പറഞ്ഞയാളെ കൊന്നാൽ അയാൾ അതിൻറെ പേരിൽ കൊല്ലപ്പെടുമായിരുന്നു.പാവേൽ പോസ്റ്റിഷേവ് ഇങ്ങനെയാണ് കൊല്ലപ്പെട്ടത്.*

മറ്റെല്ലാ കുറ്റങ്ങളും സമ്മതിച്ച ബുഖാറിൻ,ലെനിൻറെ കൊല ആസൂത്രണം ചെയ്‌തു എന്ന കുറ്റം ഏറ്റില്ല.പതിനേഴാം കോൺഗ്രസിൽ പങ്കെടുത്ത  ഭൂരിപക്ഷം പ്രതിനിധികളെയും കൊന്നു.

റഷ്യയിലെ വിദേശ കമ്മ്യൂണിസ്റ്റുകളും പെട്ടു.കോമിന്റേണിന്റെ 1938 ലെ പ്രമേയം പോളിഷ് കമ്മ്യൂണിസ്റ്റ് പാർട്ടിയെ പിരിച്ചു വിട്ടു.അതിലുള്ളത് ട്രോട് സ്കിയിസ്റ്റുകൾ ആണെന്നായിരുന്നു,ആരോപണം.സോവിയറ്റ് യൂണിയനിലെ അതിൻറെ പ്രവർത്തകരെ കൊന്നു.ബേല കുന്പനെപോലുള്ള ഹംഗറിയിലെ കമ്മ്യൂണിസ്റ്റുകളും യൂഗോസ്ലാവ്,ബൾഗേറിയൻ,ജർമൻ കമ്മ്യൂണിസ്റ്റുകളും ചോര ചിന്തി.

നിണസാഗരത്തിന്റെ അരുണിമയിൽ ഏകാധിപതി പൊട്ടിച്ചിരിച്ചു -ഇനി ബദൽ ഇല്ല!

രണ്ടാം ലോകയുദ്ധകാലത്ത്,സ്റ്റാലിന്റെ തടവറകളൊന്നിൽ,പോളിഷ് കവി അലക്‌സാണ്ടർ വാറ്റ്,പഴയ ബോൾഷെവിക് ചരിത്രകാരൻ ഐ എം സ്റ്റേറ്റ്‌ലോവിനോട് ചോദിച്ചു:

മോസ്‌കോ വിചാരണകളിലെ നായകർ എന്ത് കൊണ്ടാണ് കുറ്റം സമ്മതിച്ചത്?

കാൽമുട്ടുവരെ ഞങ്ങൾ ചോരയിൽ ആയിരുന്നു ,ചരിത്രകാരൻ പറഞ്ഞു.

അന്ന അഹമതോവ 

സ്റ്റാലിന്റെ ഭാവന സ്വീകരിച്ചവരിൽ ബ്രിട്ടീഷ് സോഷ്യലിസ്റ്റുകൾ സിഡ്‌നി -ബിയാട്രീസ് വെബുമാരും ഫ്രഞ്ച് നോവലിസ്റ്റ് റൊമെയ്ൻ റോളങും പെട്ടു.1936 ൽ മോസ്‌കോയിൽ എത്തിയ ഫ്രഞ്ച് നോവലിസ്റ്റ് ആന്ദ്രേ ഴീദ് ആരവത്തിൽ പെട്ടില്ല.പണ്ട് ആലുവ യു സി കോളജിൽ വന്ന ബ്രിട്ടീഷ് പത്രപ്രവർത്തകൻ മാൽകം മഗ്ഗറിഡ്‌ജ്‌ സത്യം കണ്ടു -Writer in Moscow ( 1934 ).

മുപ്പതുകളിൽ എല്ലാ സാംസ്‌കാരിക ശാഖയും സ്‌തംഭിച്ചു.ഗോർക്കിയുടെ വീട്ടിൽ 1932 ൽ എഴുത്തുകാരോട് സംസാരിക്കുമ്പോൾ സ്റ്റാലിൻ പറഞ്ഞു:എഴുത്തുകാർ മനുഷ്യാത്മാക്കളുടെ എൻജിനീയര്മാരാണ്.
ഈ വാചകമാണ്,1934 ൽ ഷഡാനോവ് എഴുത്തുകാരുടെ സമ്മേളനത്തിൽ ആവർത്തിച്ചത്..ഷഡാനോവ് പറഞ്ഞു:

• ലോകത്തിലെ ഏറ്റവും മഹത്തായ സാഹിത്യം സോവിയറ്റ് സാഹിത്യമാണ്.അത് മാത്രമാണ്,സർഗാത്മകമായ വളരുന്ന സാഹിത്യം.ബൂർഷ്വാ സാംസ്‌കാരിക രംഗമാകെ ജീർണതയിലും അഴിമതിയിലുമാണ്.ബൂർഷ്വാ നോവലുകൾ ദുരന്ത ബോധം നിറഞ്ഞതാണ്.അതിൻറെ എഴുത്തുകാർ മുതലാളിത്തത്തിന് സ്വയം വിറ്റിരിക്കുന്നു.അവയിലെ നായകന്മാർ കള്ളന്മാരും വേശ്യകളും ചാരന്മാരും തെമ്മാടികളുമാണ്...സോവിയറ്റ് എഴുത്തുകാരുടെ മഹത്തായ സമൂഹത്തിന് സോവിയറ്റ് ഭരണകൂടത്തിന്റെയും പാർട്ടിയുടെയും ഊർജമുണ്ട്.പാർട്ടി നിർദേശവും കരുതലും കേന്ദ്രകമ്മിറ്റിയുടെ പ്രതിദിന സഹായവും സ്റ്റാലിന്റെ നിലയ്ക്കാത്ത പിന്തുണയുമുണ്ട്.സോവിയറ്റ് സാഹിത്യം ശുഭാപ്‌തി പുലർത്തണം.അത് മുൻനോക്കി ആകണം.തൊഴിലാളി വർഗ താൽപര്യത്തിനും കൂട്ടുകൃഷിക്കാരുടെ താൽപര്യത്തിനും ഉതകണം.

രണ്ടാം ലോകയുദ്ധ ശേഷം ഷഡാനോവിന്റെ ആദ്യ പ്രധാന നീക്കം,ലെനിൻഗ്രാഡിലെ സാഹിത്യ മാസികകൾ,സ്വെസ്ദ (\നക്ഷത്രം),ലെനിൻഗ്രാഡ് എന്നിവയെ ആക്രമിക്കൽ ആയിരുന്നു.1946 ഓഗസ്റ്റിൽ ഇവയെ ആക്രമിച്ച് കേന്ദ്രകമ്മിറ്റി പ്രമേയം പാസാക്കി.ഇതിൽ പ്രധാന ഇരകൾ കവയിത്രി അന്ന അഹ്‌മത്തോവയും ഹാസ്യ സാഹിത്യകാരൻ സോഷോചെങ്കോയുമായിരുന്നു.ലെനിൻഗ്രാഡിലെ പ്രഭാഷണത്തിൽ ഷഡാനോവ് പറഞ്ഞു:

• സൊഷോചെങ്കോ റഷ്യൻ ജനതയെ പുളിച്ച തെറി വിളിക്കുന്നവനാണ്.ലെനിൻഗ്രാഡിൽ വിശാലമായി ജീവിക്കുന്നതിനേക്കാൾ,മൃഗശാലയിലെ കൂട്ടിൽ കഴിയാൻ തീരുമാനിക്കുന്ന കുരങ്ങൻറെ കഥ അയാൾ എഴുതി.മാനവരാശിയെ അയാൾ കുരങ്ങനോട് ഉപമിക്കുകയാണ്.അറുപതുകളിൽ തന്നെ,അയാൾ പാർട്ടിക്കൂറില്ലാത്ത അരാഷ്ട്രീയ കല പടച്ചിട്ടുണ്ട്.സോഷ്യലിസം കെട്ടിപ്പടുക്കുന്നതിൽ ഒരു പങ്കും വേണ്ടെന്ന നിലപാടിലാണ് അയാൾ.അയാൾ എന്നും ചളിക്കുണ്ടിലെ എലി ആയിരുന്നു.വ്യവസ്ഥയില്ല,ബോധമില്ല....

അന്ന അഹ്‌മതോവയെ ഷഡാനോവ് ചീത്ത വിളിച്ചു ( അന്ന 1910 ൽ മധുവിധുവിന് പാരിസിൽ പോയി ഫ്രഞ്ച് ചിത്രകാരൻ മോദി ഗ്ലിയാനി യുമായി പ്രണയത്തിൽ ആയിരുന്നു ):

• കാതറീൻറെ ( റാസ്‌പുട്ടിനെ അന്തഃപുരത്തിലേക്ക് ക്ഷണിച്ച രാജ്ഞി ) പഴയ സുന്ദര ദിനങ്ങൾ അഭിലഷിക്കുന്ന ( അന്ന ) സെക്‌സിന് പിന്നാലെ പായുന്നു.അവർ കന്യാസ്ത്രീയാണോ വേശ്യയാണോ എന്നുറപ്പിച്ചു പറയാൻ ആവില്ല.ആഗ്രഹങ്ങളും പ്രാർത്ഥനകളും ഇടകലർന്ന് രണ്ടും ചേർന്നതായിരിക്കാം.ഇവരുടെ ഇത്തരം രചനകൾ ലെനിൻഗ്രാഡിലെ മാസികകൾ അച്ചടിച്ചത്,സാഹിത്യ ജീവിതം ചീഞ്ഞതിന് തെളിവാണ്....സാഹിത്യം രാഷ്ട്രീയമായിരിക്കണം;അതിൽ പാർട്ടി വീര്യമുണ്ടാകണം.

ഷഡാനോവിന്റെ കരിനിഴൽ ഒരു വർഷം കഴിഞ്ഞ് തൃശൂർ പുരോഗമന കലാ സാഹിത്യ സംഘടനയുടെ സമ്മേളനത്തിൽ കണ്ടു.ഇ എം എസ് പ്രഭൃതികളുടെ നീക്കത്തെ എം പി പോളിന്റെ നേതൃത്വം തോൽപിച്ചു.എഴുത്തിൽ രാഷ്ട്രീയം വേണ്ട.

1947 ജൂണിൽ കേന്ദ്രകമ്മിറ്റി വിളിച്ച വിപുല യോഗത്തിൽ ഷഡാനോവ് തത്വചിന്തകർക്ക് ഉത്തരവുകൾ നൽകി.1948 ജനുവരിയിൽ സംഗീതജ്ഞരുടെ യോഗം വിളിച്ച്,ബൂർഷ്വാ സംഗീതം സോവിയറ്റ് സംഗീതത്തെ മലിനപ്പെടുത്തുന്നുവെന്ന് വിമർശിച്ചു.ഇനി വേണ്ടത്,ദേശാഭിമാന സംഗീതമാണ് !ഒൻപതാം സിംഫണിക്ക് ശകാരം കേട്ട ഡി ഷൊസ്തകോവിച്,സ്റ്റാലിന്റെ വനവൽക്കരണ പരിപാടിയെ പ്രകീർത്തിച്ച് സിംഫണി ഒരുക്കി.ജി എഫ് അലക്‌സാണ്ടറോവ് പ്രസിദ്ധീകരിച്ച പശ്ചിമ യൂറോപ്യൻ തത്വ ചിന്താ ചരിത്രത്തിൽ പാർട്ടി വീര്യമില്ലെന്ന് ഷഡാനോവ് വിമർശിച്ചു.അലക്‌സാണ്ടറോവ് ആത്മവിമര്ശനം നടത്തി,ചരിത്രമെഴുത്ത് നിർത്തി.

മോദിഗ്ലിയാനി വരച്ച അന്നയുടെ ക്രയോൺ ചിത്രം 

1947 സെപ്റ്റംബറിൽ പോളണ്ടിലെ സ്ക്ലർസ് കപോരേബയിൽ,കോമിൻഫോo സ്ഥാപക സമ്മേളനത്തിൽ,ലോക കമ്മ്യൂണിസ്റ്റ് ചേരിയെ സ്വാധീനിച്ച കുപ്രസിദ്ധ വാചകങ്ങൾ ഷഡാനോവിൽ നിന്നുണ്ടായി:

  യുദ്ധാനന്തര ലോകം അനിവാര്യമായും,രണ്ടു ചേരികളായി വിഭജിക്കപ്പെട്ടിരിക്കുന്നു.സോഷ്യലിസ്റ്റ് ചേരിയും സാമ്രാജ്യത്വ ചേരിയും.നിങ്ങൾ ഏതു ചേരിയിൽ എന്നതാണ്,ചോദ്യം.

ഈ ചോദ്യം കമ്മ്യൂണിസ്റ്റുകൾ കേരളത്തിലുമുയർത്തി.

പ്രമേഹവും മദ്യപാനവും രക്തസമ്മർദ്ദവും ഷഡാനോവിനെ തളർത്തി.1948 ജൂലൈയിൽ സ്റ്റാലിന്റെ ബ്ലിഷ്‌ ന്യായ ഡാച്ചയിലെ പി ബി യോഗത്തിനു ശേഷം,ക്രെംലിനടുത്ത പഴയ ചത്വരത്തിലെ ഓഫിസിലേക്ക് പോകുമ്പോൾ അയാൾ കുഴഞ്ഞു വീണു.സ്റ്റാലിന്റെ ഭാഗത്തു നിന്ന് ചില നീക്കങ്ങൾ അയാളെ അസ്വസ്ഥനാക്കിയിരുന്നു.ഏപ്രിലിൽ ഷഡാനോവിന്റെ മകൻ യൂറി,കേന്ദ്രകമ്മിറ്റി സംഘടിപ്പിച്ച ഒരു യോഗത്തിൽ,ലൈസൻകോയെ വിമർശിച്ചു.ഇതിന് കരണക്കാരായവരെ ശിക്ഷിക്കുമെന്ന് സ്റ്റാലിൻ ശപഥം ചെയ്തപ്പോൾ ഉന്നം താനാണെന്ന് ഷഡാനോവിന് മനസ്സിലായി.അയാൾക്ക് വൽദായ് ആരോഗ്യ കേന്ദ്രത്തിൽ വിശ്രമം വിധിച്ചു.ജൂലൈ 13 ന് അവിടെ എത്തിയ അയാൾ 31 ന് മരിച്ചു.ഇയാളും ഡോക്റ്റർ പ്ലോട്ടിൽ പെട്ടതായി സംശയം ഉണ്ടായി.അടുത്ത വർഷം യൂറി,സ്റ്റാലിന്റെ മകൾ സ്വെറ്റ്ലാനയെ വിവാഹം ചെയ്‌തു.

സ്റ്റാലിനും ഷഡാനോവും 

സ്റ്റാലിൻ അവസാനകാലത്ത് റഷ്യൻ ചരിത്ര നായകന്മാരിൽ സ്വയം സന്നിവേശിപ്പിച്ച് മഹത്വം നിർമിച്ചു.പീറ്റർ ദി ഗ്രേറ്റ്,ഇവാൻ ദി ടെറിബിൾ,അലക്‌സാണ്ടർ നെവ്‌സ്‌കി എന്നിവരെപ്പറ്റി സിനിമകളും നോവലുകളും ഉണ്ടാക്കി.ഐസൻസ്റ്റെയിന്റെ ഇവാൻ ദി ടെറിബിൾ സ്റ്റാലിൻ ജീവിച്ചിരുന്നപ്പോൾ പ്രദർശിപ്പിച്ചില്ല.സാർ ചക്രവർത്തി ഗൂഢാലോചനക്കാരുടെ തല ഛേദിക്കുന്നത് കാട്ടിയിരുന്നു.പൊക്കം കുറഞ്ഞ സ്റ്റാലിനെ ( അഞ്ചടി അഞ്ചിഞ്ച് ) ചലച്ചിത്രങ്ങളിലും നാടകങ്ങളിലും ഉയരം കൂട്ടി  കാണിച്ചു-ലെനിനേക്കാൾ ( അഞ്ചടി മൂന്നിഞ്ച് ) ഉയരം കൂടുതൽ.

ജോൺ റീഡിൻറെ ലോകത്തെ പിടിച്ചു കുലുക്കിയ പത്തു ദിവസങ്ങൾ പുതിയ പതിപ്പ് വന്നപ്പോൾ ലെനിൻറെ ആമുഖം നീക്കി.അദ്ദേഹത്തിൻറെ പുസ്തകത്തിൽ സ്റ്റാലിൻ ഇല്ല.

സ്റ്റാലിൻ  1952 -53 ൽ നിരപരാധികളെ ഉന്മൂലനം ചെയ്യാൻ ഡോക്ടർ പ്ലോട്ട് എന്ന പദ്ധതി ഒരുക്കി.കുറെ ഡോക്ടർമാർ റഷ്യക്കാരെ വിഷം നൽകി കൊല്ലുന്നു എന്ന് പ്രചരിപ്പിച്ച് ജൂതരായ  ഡോക്ടർമാരെ കൊല്ലുന്നതായിരുന്നു,പരിപാടി.സ്റ്റാലിന്റെ സ്വകാര്യ ഡോക്ടർ മിറോൺ വോവ്സിയെ തടവിലിട്ടു .1952 ഓഗസ്റ്റ് 12 ന് ലുബിയാങ്ക തടവറയിൽ 13 ജൂത കവികൾ,കലാകാരൻമാർ എന്നിവരെ കൂട്ടക്കൊല ചെയ്‌തു -കവികൾ കൊല്ലപ്പെട്ട രാത്രി എന്ന് അറിയപ്പെടുന്നു.സ്റ്റാലിൻ ജൂതനായ ഐൻസ്റ്റെയ്‌നെ അംഗീകരിച്ചിരുന്നില്ല.

1953 മാർച്ച് ഒന്ന് പുലർച്ചെ തലേ രാത്രി മുഴുവൻ നീണ്ട സൽക്കാര ശേഷം,മോസ്‌കോയ്ക്ക് 16 കിലോമീറ്റർ പടിഞ്ഞാറ്,കുൻറ്സെവോ ഔദ്യോഗിക വസതിയിലെ മുറിയിൽ നിന്ന് സ്റ്റാലിൻ പുറത്തു വന്നില്ല.ആഘാതത്താൽ ഒരു വശം തളർന്നിരുന്നു.ആ രാത്രി സ്റ്റാലിനൊപ്പം ചാര മേധാവി ബേറിയ,ഭാവി പ്രധാന മന്ത്രിമാരായ ജോർജ് മലെങ്കോവ്,നിക്കോളായ് ബുൾഗാനിൻ,നികിത ക്രൂഷ്ചേവ് എന്നിവർ ഉണ്ടായിരുന്നു.സുരക്ഷാ ഭടന്മാരോട് ശല്യപ്പെടുത്തരുത് എന്ന് പറഞ്ഞിരുന്നതിനാൽ,അവർ അന്വേഷിച്ചില്ല.രാത്രി പത്തു മണിയോടെ,ഡപ്യൂട്ടി കമണ്ടൻറ് പീറ്റർ ലോസ് ഗചേവ്‌,സ്റ്റാലിനെ നിലത്ത് പൈജാമ ധരിച്ച്,മൂത്രത്തിൽ കുളിച്ച നിലയിൽ കണ്ടെത്തി.

സ്റ്റാലിൻ പറഞ്ഞു:ശ് ...ശ് ...ശ്,,,

മാർച്ച് അഞ്ചിന് അയാൾ മരിച്ചു.

ബേറിയ സ്റ്റാലിനെ വിഷം കൊടുത്തു കൊല്ലുകയായിരുന്നു എന്ന് നാട് കടത്തപ്പെട്ട ചരിത്രകാരൻ അബ്‌ദുറഹ്‌മാൻ അവത്തോർഖാനോവ് 1975 ൽ വെളിപ്പെടുത്തി.

------------------------------------------------------
*സ്റ്റാലിന്റെ കത്ത്/ തിരഞ്ഞെടുത്ത കൃതികൾ,വാല്യം 13,1955, പേജ് 86.


See https://hamletram.blogspot.com/2019/07/11.html

ട്രോട് സ്‌കിയെ കൊല്ലാൻ നെരൂദയും

നെരൂദ സ്റ്റാലിന് സ്‌തുതി എഴുതി 

കേരളത്തിൽ ഏറ്റവും അറിയപ്പെടുന്ന കവിയാണ്, പാബ്ലോ നെരൂദ. ഗബ്രിയേൽ ഗാർസിയ മാർകേസിനെപ്പോലെ തന്നെ ആരാധകർ അയാൾക്കുമുണ്ട്. നെരൂദയുടെ ആത്മകഥ നേരത്തെ വായിച്ചിരുന്നു. കവിയുടെ  വ്യഭിചാര വാഞ്ഛ അതിൽ കണ്ടിരുന്നു. ശ്രീലങ്കയിൽ ഹൈക്കമ്മീഷണർ ആയിരിക്കെ വീട്ടു സഹായി ആയ ശ്രീലങ്കക്കാരിയെ പ്രാപിക്കുന്നതും മറ്റൊരവസരത്തിൽ നാടകകൃത്ത് ലോർക്കയെ താഴെ കാവൽ നിർത്തി ഒരു കവയിത്രിയുമായി രതിയിൽ ഏർപ്പെടുന്നതും അതിൽ വിവരിച്ചിരുന്നു.

2004 ൽ ആഡം ഫിൻസ്റ്റെയ്ൻ എഴുതിയ നെരൂദയുടെ ജീവചരിത്രം, Pablo Neruda: A Passion for Life ൽ, നെരൂദയ്ക്ക് റഷ്യൻ വിപ്ലവകാരി ലിയോൺ ട്രോട് സ്‌കിയുടെ വധത്തിൽ പങ്കുണ്ട് എന്ന സംശയം വിവരിച്ചത് വായിച്ചു നടുങ്ങിപ്പോയി. ഇപ്പോൾ,1953 ൽ സ്റ്റാലിന്റെ മരണ ശേഷം നെരൂദ എഴുതിയ വിലാപഗീതം (threnody) വായിച്ചപ്പോൾ സംശയം ബലപ്പെട്ടു.

To be men! That is the Stalinist law!

To be men! That is the Stalinist law! . . .
We must learn from Stalin
his sincere intensity
his concrete clarity. . . .
Stalin is the noon,
the maturity of man and the peoples.
Stalinists, Let us bear this title with pride. . . .
Stalinist workers, clerks, women take care of this day!
The light has not vanished.
The fire has not disappeared,
There is only the growth of
Light, bread, fire and hope
In Stalin’s invincible time! . . .
In recent years the dove,
Peace, the wandering persecuted rose,
Found herself on his shoulders
And Stalin, the giant,
Carried her at the heights of his forehead. . . .
A wave beats against the stones of the shore.
But Malenkov will continue his work.

സ്റ്റാലിനെ സ്‌തുതിക്കുന്ന ഈ കവിത പരിഭാഷപ്പെടുത്തി നമ്മുടെ ഭാഷയെ മലിനമാക്കുന്നില്ല. കമ്യൂണിസത്തിൽ മാനവികത എന്നൊന്നില്ല.നെരൂദയുടെ കവിതകളുടെ ഇംഗ്ലീഷ് സമാഹാരത്തിൽ ഈ കവിത മനഃപൂർവം ഒഴിവാക്കിയെങ്കിലും,സ്പാനിഷ് സമ്പൂർണ സമാഹാരത്തിൽ ഇത് ഇന്നുമുണ്ടെന്ന് സ്റ്റീഫൻ ഷ്വാർസ്‌* എഴുതുന്നു. കവിയുടെ മിടുക്ക് അവസാനം മലങ്കോവിനെയും സ്‌തുതിച്ചു എന്നതാണ്. സ്റ്റാലിന് ശേഷം വന്നത് മലെങ്കോവാണ്.

നെരൂദ, സീക്വയ്‌റോസ്‌, പാരീസ്, 1971 

ട്രോട് സ്‌കി വധത്തിൽ നെരൂദയ്ക്ക് എതിരെ ഉയർന്ന ആരോപണം നോക്കാം. റഷ്യയിലെ പാർട്ടിയിൽ നിന്ന് 1928 ൽ സ്റ്റാലിൻ പുറത്താക്കിയ ട്രോട് സ്‌കിക്ക് 1937 ലാണ് മെക്സിക്കോയിൽ രാഷ്ട്രീയാഭയം നൽകിയത്. മെക്‌സിക്കോ പ്രസിഡൻറ് ലസാറോ കർദേനാസിന് അന്ന് സ്റ്റാലിന്റെ പാവ എന്ന പ്രതിച്ഛായ ഉണ്ടായിരുന്നു. ഇത് മാറ്റാനാണ് അഭയം കൊടുത്തത്. എണ്ണ വ്യവസായം മെക്‌സിക്കോ ദേശസാൽക്കരിച്ചതിൽ അമേരിക്കയും യൂറോപ്യൻ രാഷ്ട്രങ്ങളും നീരസത്തിൽ ആയിരുന്നു.

അവിടെ ട്രോട് സ്‌കിയെ കൊല്ലാൻ ആദ്യ ശ്രമം നടത്തിയത്, ഡേവിഡ് അൽഫാരോ സിക്വയ്‌റോസ് എന്ന ചുവർ ചിത്രകാരൻ ആയിരുന്നു. അയാളുടെ നേതൃത്വത്തിൽ 1940 മെയ് 24 രാത്രി പൊലീസ് യൂണിഫോമിൽ ഒരു സംഘം കൊയോക്കാനിൽ ട്രോട് സ്‌കിയുടെ വീട് ആക്രമിച്ചു. പട്ടാള മേജറുടെ വേഷത്തിൽ ആയിരുന്നു, സിക്വയ്‌റോസ്. അക്രമികൾ എല്ലാവരും മെക്‌സിക്കൻ കമ്മ്യൂണിസ്റ്റ് പാർട്ടിയിലോ പോഷക സംഘടനകളിലോ അംഗമായിരുന്നു. ട്രോട് സ്‌കിയുടെ കിടപ്പു മുറിയിലേക്ക് അവർ 300 വെടിയുണ്ടകൾ വർഷിച്ചു. കട്ടിലിന് താഴെ ഒളിച്ച് ട്രോട് സ്‌കിയും ഭാര്യ നടാഷയും മാർക്സിസത്തിൽ ഇല്ലാത്ത അദ്‌ഭുതം കൊണ്ട് രക്ഷപ്പെട്ടു. അവരുടെ ഇളയ പേരക്കുട്ടി ലെവിന്  പരുക്കേറ്റു. ആ കുട്ടിയുടെ പിതാവും ട്രോട് സ്‌കിയുടെയും രണ്ടാം ഭാര്യ നറ്റാലിയയുടെയും മൂത്ത മകനുമായ ലിയോൺ (ലെവ്) സെഡോവിനെ  സോവിയറ്റ് രഹസ്യ പൊലീസ് പാരിസിൽ കൊന്നിരുന്നു. ആക്രമണത്തിൽ അമേരിക്കൻ ഗാർഡിനെ തട്ടിക്കൊണ്ടു പോയി സിക്വയ്‌റോസ് സംഘം കൊന്നു. അമേരിക്കയിലെ ഹേഴ്സ്റ്റ് പത്ര ശൃംഖലയിൽ നിന്ന് ട്രോട് സ്‌കിക്ക് കിട്ടുന്ന പണത്തിന്റെ രേഖകൾ തപ്പിയാണ് സിക്വയ്‌റോസ് സംഘം എത്തിയതെന്ന് അയാളുടെ ജീവചരിത്രത്തിൽ (Siqueiros: His Life and Works, 1994) ഫിലിപ് സ്റ്റീൻ എഴുതുന്നു. ട്രോട് സ്‌കി, എഫ് ബി ഐ യ്ക്ക് വിവരങ്ങൾ നൽകുന്നതായി ശത്രുക്കൾ ആരോപിച്ചിരുന്നു. അതി ദീർഘമാണ് കോടതിയിൽ സിക്വയ്‌റോസ് നടത്തിയ രാഷ്ട്രീയ പ്രസ്‌താവന.

സിക്വയ്‌റോസിനെയും എട്ട് കമ്മ്യൂണിസ്റ്റ് പാർട്ടി അംഗങ്ങളെയും അറസ്റ്റ് ചെയ്‌തു.സോവിയറ്റ് യൂണിയൻറെയും മെക്‌സിക്കോയിലെ സോവിയറ്റ് ചാരവലയത്തിന്റെയും സമ്മർദത്തിൽ,ഇവർക്ക് ലഘു ശിക്ഷയാണ് നൽകിയത്.

ഇതിനിടെ മെക്‌സിക്കോയിൽ ചിലിയുടെ കോൺസൽ ജനറൽ ആയി നിയമിതനായ നെരൂദ അവിടെ 1940 ഓഗസ്റ്റ് 16 ന്  എത്തി. ചിലി വിദേശ മന്ത്രാലയത്തോട് ചോദിക്കാതെ നെരൂദ, സിക്വയ്‌റോസിനെ ജയിലിൽ പോയി കണ്ടു. അയാൾക്ക് ചിലിയിലേക്കുള്ള വിസ കൊടുത്തു -ജയിൽപുള്ളിക്ക് അത് കൊടുത്തത് നിയമവിരുദ്ധമാണ്. ഉപകാര സ്‌മരണയായി, സിക്വയ്‌റോസ് തെക്കൻ ചിലിയിലെ ചില്ലനിൽ വലിയ ചുവർ ചിത്രം വരച്ചു. നെരൂദയെ രണ്ടു മാസത്തേക്ക് സസ്‌പെൻഡ് ചെയ്‌തു.

സിക്വയ്‌റോസ് 

നെരൂദ മെക്‌സിക്കോയിൽ എത്തി നാലു ദിവസം കഴിഞ്ഞ്, 1940 ഓഗസ്റ്റ് 21 ന്  ട്രോട് സ്‌കി കൊല്ലപ്പെട്ടു. റാമോൺ മെർക്കാദർ എന്ന സോവിയറ്റ് ചാരൻ ട്രോട് സ്‌കിയെ മഴു കൊണ്ട് തലയ്ക്കടിച്ചു കൊന്നു. സ്റ്റാലിൻ ഇയാളെ വ്യക്തിപരമായി തിരഞ്ഞെടുക്കുകയായിരുന്നു. മൂന്നാം കമ്മ്യൂണിസ്റ്റ് ഇന്റർനാഷനലിലെ (കോമിന്റേൺ) ഉന്നതരുടെ അറിവോടെ, മെക്‌സിക്കൻ കമ്മ്യൂണിസ്റ്റ് പാർട്ടിയുടെ സഹായത്തോടെ ആയിരുന്നു, കൊല. സോവിയറ്റ് യൂണിയൻറെയും കോമിന്റേണിന്റെയും നേതൃത്വത്തിനുള്ള അവസാന ഭീഷണി സ്റ്റാലിൻ അങ്ങനെ തുടച്ചു നീക്കി. സ്‌പാനിഷ്‌ കമ്മ്യൂണിസ്റ്റും അവിടെ സ്റ്റാലിന്റെ ഏജന്റും ആയിരുന്നു, കൊലയാളി. സ്‌പാനിഷ്‌ ആഭ്യന്തര യുദ്ധകാലത്ത് സോവിയറ്റ് ചാര ഓഫിസർ നാഹം എയ്‌റ്റിങ്‌ടൺ ആണ് ഇയാളെ റിക്രൂട്ട് ചെയ്‌തത്‌. ട്രോട് സ്‌കി വധം സ്റ്റാലിൻ പറഞ്ഞിട്ട് ചാര സംഘടനയുടെ വിദേശ വിഭാഗം ഡപ്യൂട്ടി ഡയറക്ടർ പാവേൽ സുഡോപ്ലേറ്റോവ് ആണ് ആസൂത്രണം ചെയ്‌തത്‌. 1939 മാർച്ചിൽ തന്നെ ചാരമേധാവി ബേറിയ സ്റ്റാലിന്റെ അടുത്തു കൊണ്ടു പോയെന്ന് പാവേൽ ഓര്മക്കുറിപ്പുകളിൽ എഴുതി. ഒരു സംഘം നടത്തിയ ആക്രമണം പാളിയപ്പോൾ ഒരാളെ ഏൽപിക്കുകയായിരുന്നു.

മാർക്‌സിസ്റ്റ് സൈദ്ധാന്തികൻ വാൾട്ടർ ബെഞ്ചമിനെ സ്പെയിനിൽ കൊന്നതും സ്റ്റാലിന്റെ ചാരവൃന്ദമായിരുന്നു എന്ന് ആരോപണമുണ്ട്.

സിക്വയ്‌റോസ് നടത്തിയ വധശ്രമത്തിലും പിന്നീടുള്ള ആസൂത്രണത്തിലും നെരൂദ പങ്കാളിയാണ് എന്ന ആരോപണം, പല തവണ ശത്രുക്കൾ ഉയർത്തി. സിക്വയ്‌റോസിന്റെ ശ്രമം നെരൂദ എത്തുന്നതിന് മൂന്ന് മാസം മുൻപായിരുന്നു. 1971 വരെ നെരൂദ ഒരു വിശദീകരണവും നൽകിയില്ല. ആ വർഷം ഉറുഗ്വേ മാസിക മാർച്ച യ്ക്ക് നൽകിയ അഭിമുഖത്തിൽ നെരൂദ വിശദീകരിച്ചത് ഇങ്ങനെ:

• ഞാൻ ട്രോട് സ്‌കിയെ കണ്ടിട്ടില്ല.കോൺസൽ ജനറൽ സ്ഥാനമേൽക്കാൻ ഞാൻ മെക്‌സിക്കോയിൽ എത്തിയതേയുള്ളൂ. ചിലിയിലെ മെക്‌സിക്കൻ സ്ഥാനപതി ഒക്‌ടേവിയോ റീസ് എസ്പിന്ദോള എന്നെ കാണാൻ വന്നു. മെക്‌സിക്കോയുടെ പുതിയ പ്രസിഡൻറ് ജനറൽ മാനുവൽ ആവില കമച്ചോ ഒരു രഹസ്യ ദൗത്യം ഏൽപിച്ചിരിക്കുന്നു. ചിത്രകാരൻ ഡേവിഡ് അൽഫാരോ സിക്വയ്‌റോസിന് വ്യക്തിപരമായ നിലയിൽ ചിലിക്ക് വേഗം വിസ നൽകണം.nഅപേക്ഷ എന്നെ വിസ്മയിപ്പിച്ചു. സിക്വയ്‌റോസ് തടവിലായിരുന്നു. ട്രോട് സ്‌കിയുടെ വീട് അയാൾ യന്ത്രത്തോക്ക് ഉപയോഗിച്ച് ആക്രമിച്ചതായിരുന്നു കുറ്റം. ജയിലിൽ ആയിരിക്കെ എങ്ങനെ വിസ കൊടുക്കുമെന്ന് ഞാൻ ചോദിച്ചു. അയാളെ മോചിപ്പിക്കാം എന്ന് സ്ഥാനപതി പറഞ്ഞു. സിക്വയ്‌റോസിനെ കാണാമെന്ന് ഞാൻ പറഞ്ഞു; അടുത്ത ദിവസം കണ്ടു. ജയിൽ ഡയറക്‌ടർ ക്യാപ്റ്റൻ പെരെസ് റൂൾഫോ, സിക്വയ്‌റോസിനെ വിളിച്ചു. ഞങ്ങൾ മൂവരും പുറത്തു പോയി മദ്യപിച്ചു. വിസ നൽകുന്നതിന് പകരം അയാൾ മെക്‌സിക്കോ സർക്കാരിൻറെ പേരിൽ ചിലിക്ക് ഒരു ചിത്രം സംഭാവന ചെയ്യണമെന്ന് ഞാൻ ആവശ്യപ്പെട്ടു. അങ്ങനെയാണ് ഒരു വർഷം ചെലവിട്ട് അയാളുടെ ജീവിതത്തിലെ ഏറ്റവും വലിയ ചുവർ ചിത്രം വരച്ചത്.

സ്വയം സംസാരിക്കുന്ന വിശദീകരണം. കുറ്റവാളിയുമായി, മലയാളികളുടെ പ്രിയ കവി മദ്യപിക്കുന്നു പോലുമുണ്ട്. ആരോപണത്തിന് നെരൂദ വിശദീകരണം കൊണ്ട് ബലം കൂട്ടി. സിക്വയ്‌റോസിനെ രക്ഷപ്പെടുത്തിയത് വഴി, ട്രോട് സ്‌കി വധ അന്വേഷണം തടയപ്പെട്ടു. ചിത്രകാരനെ രക്ഷിച്ചതിൽ ജീവിതകാലം മുഴുവൻ നെരൂദ അഭിമാനം കൊണ്ടു.

നെരൂദ, റിവേറ, സിക്വയ്‌റോസ് ഒപ്പിടുന്നു, 1950 

റഷ്യയ്ക്ക് നെരൂദയിൽ താൽപര്യം ഉണ്ടായിരുന്നു എന്ന് കാട്ടാൻ രേഖകളുണ്ട്. മെക്‌സിക്കോ കാലത്ത് നെരൂദയെ റിക്രൂട്ട് ചെയ്യാൻ 1944 മേയിൽ നൽകുന്ന ശുപാർശ കെ ജി ബി ക്ക് മുൻപുള്ള എൻ കെ വി ഡി ഫയലുകളിൽ കണ്ടെന്ന് ആഡം ഫിൻസ്റ്റീൻ എഴുതുന്നു. വ്യക്തിപരമായി നെരൂദയ്ക്ക് സിക്വയ്‌റോസ് 1950 ൽ തിരിച്ചു കൊടുത്തു. നെരൂദയുടെ കാവ്യമായ കാന്റോ ജനറൽ ഡീലക്‌സ് പതിപ്പ് ആ വർഷം പുറത്തിറങ്ങിയത് അതിലെ 231 കവിതകൾക്കും സിക്വയ്‌റോസ് വരച്ച ചിത്രങ്ങളുമായാണ്. വെറും 500 കോപ്പി മാത്രം ഇറക്കിയ ആ പതിപ്പ് ഇന്ന് അമൂല്യമാണ്. നെരൂദയും ചിത്രകാരൻ ഡീഗോ റിവേറയും സിക്വയ്‌റോസും അത്രയും പുസ്തങ്ങളിൽ ഒപ്പിട്ടു. ട്രോട് സ്‌കി മെക്‌സിക്കോയിൽ ആദ്യം താമസിച്ചത്, റിവേറയുടെയും ചിത്രകാരിയായ ഭാര്യ ഫ്രീഡ കാലോയുടെയും വീട്ടിലായിരുന്നു. കമ്മ്യൂണിസ്റ്റ് പാർട്ടിയെ നിരോധിച്ച പ്രസിഡൻറ് ഗോൺസാലസ് വിഡേലയെ വഞ്ചകൻ എന്ന് വിളിച്ച് 1948 ൽ ചിലി വിട്ട നെരൂദയ്ക്ക് മെക്സിക്കോയിൽ രാഷ്ട്രീയാഭയം കിട്ടിയത് സിക്വയ്‌റോസ് ശ്രമിച്ചിട്ടായിരുന്നു.അങ്ങനെയാണ് നെരൂദ നായകനായത്.

ചിലിയിൽ സിക്വയ്‌റോസ് വരച്ച ചിത്രം 

നെരൂദയുടെ ശരിപ്പേര് നെഫ്ത്താലി റീസ് എന്നാണ്. സ്‌പാനിഷ്‌ ലോകത്തിനു പുറത്ത് കവിയായല്ല, നയതന്ത്രജ്ഞൻ ആയാണ് ആദ്യം അറിയപ്പെട്ടത്. സ്‌പാനിഷ്‌ ആഭ്യന്തര യുദ്ധകാലത്ത് ഏകാധിപതി ജനറൽ ഫ്രാങ്കോയ്ക്ക് എതിരെ പോരാടിയ റിപ്പബ്ലിക്കൻ വിപ്ലവകാരികൾക്കൊപ്പം ചിലിയുടെ നയതന്ത്രജ്ഞൻ എന്ന നിലയിൽ അദ്ദേഹം നിന്നു. അദ്ദേഹം പോരാട്ടത്തിൽ പങ്കെടുത്തു എന്ന വിശ്വാസം തെറ്റാണ്. 1939 ൽ സ്പെയിൻ വീണപ്പോൾ ഫ്രാങ്കോ ഭരണത്തിൽ നിന്ന് പിറനീസ് മലനിര വഴി ഫ്രാൻസിലേക്ക് വൻ അഭയാർത്ഥി പ്രവാഹമുണ്ടായി. ഇവരെ അമേരിക്കയിലേക്ക് അയയ്ക്കാൻ പ്രവാസ റിപ്പബ്ലിക്കൻ സർക്കാർ പണം സ്വരുക്കൂട്ടിയിരുന്നു. ഇതിന് ആർക്കൊക്കെ നറുക്ക് വീഴുമെന്ന് തീരുമാനിച്ചത്, കോമിന്റേൺ ഏജന്റുമാരാണ്. സ്പെയിനിൽ നിന്നുള്ള 90% കമ്മ്യൂണിസ്റ്റ് ഇതര അപേക്ഷകളും തള്ളി.അഭയാർത്ഥികളെ രക്ഷിക്കാൻ ചിലി സർക്കാർ അയച്ച വിന്നിപെഗ് എന്ന കപ്പലിൽ സ്റ്റാലിനോട് കൂറുള്ളവർക്ക് മാത്രമാണ് നെരൂദ പാസ്പോർട്ട് നൽകിയത്. നിരാകരിക്കപ്പെട്ട അഭയാർത്ഥികൾ ഫ്രാൻസിൽ തടവിലാവുകയോ മരിക്കുകയോ ചെയ്‌തു. ഹിറ്റ്ലറുടെ പട്ടാളം ഫ്രാൻസ് കീഴടക്കുകയായിരുന്നു.

നെരൂദയുടെ ചാരവൃത്തിയുടെ കഥകൾ ഇനിയും വരും. സ്റ്റാലിനെ സ്തുതിച്ച കവിയുടെ തിന്മ ചാരക്കൂമ്പാരത്തിൽ നിന്ന് ഉയരും.

----------------------------
*Stephen Schwartz / Il Postino: A Homage to Stalin, 1996 

© Ramachandran

ഒരു റഷ്യൻ യക്ഷിക്കഥ 11

11.ബുഖാറിനെ കൊല്ലുന്നു 

പ്രാഗിൽ 1912 ൽ നടന്ന ബോൾഷെവിക്കുകളുടെ സമ്മേളനത്തിന് ശേഷം,ഓസ്ട്രിയയുടെ നുകത്തിൻ കീഴിലായിരുന്ന പോളണ്ടിലെ ക്രാക്കോയിലാണ്,ലെനിൻ, നിക്കോളായ് ബുഖാറിനെ ആദ്യമായി കണ്ടത്.
മെൻഷെവിക്കുകളെ പുറത്താക്കിയ ലെനിൻ,പൂതിയ കേന്ദ്ര കമ്മിറ്റിയെ പ്രാഗിൽ തിരഞ്ഞെടുത്തു.ലെനിൻ,സിനോവീവ്,ഗ്രിഗറി ഓഴ്ദ്യോനികിഡ്‌സേ,ഡേവിഡ് ഷ്വാർസ്‌ മാൻ,എഫ് ഐ ഗോളോഷെച്കിൻ,സുരേൻ സ്‌പന്ദര്യൻ,റോമൻ മലിനോവ്‌സ്‌കി എന്നിവരായിരുന്നു,അംഗങ്ങൾ.ഓഴ്ദ്യോനികിഡ്‌സേ,ലോങ് ജുമോ സ്‌കൂളിൽ ലെനിൻറെ ശിഷ്യനായിരുന്നു.ഷ്വാർസ്‌ മാൻ കീവിൽ നിന്ന്,സ്പന്ദര്യൻ,ഓർദിനെപ്പോലെ,തീവ്ര ബക്കു കമ്മിറ്റി അംഗം.ഗോളോഷെച് കിൻ യുറാൾ മേഖലയിൽ പിന്നീട് സൈനിക കമ്മിസാർ ആയി.സാർ ചക്രവർത്തി കുടുംബത്തിൻറെ കൂട്ടക്കൊലയിൽ പങ്കെടുത്തു.മലിനോവ്‌സ്‌കിക്ക് എതിരെ ഒരു ബലാൽസംഗ കേസും മൂന്ന് കൊള്ളക്കേസുകളും ഉണ്ടായിരുന്നു.രേഖകൾ മുക്കി;മൂന്നു കൊല്ലം തടവിലായിരുന്നു.
പ്ലഖനോവിനെ വിളിച്ചെങ്കിലും,ക്ഷണം നിരസിച്ച് എഴുതിയ കത്തിൽ അദ്ദേഹം പറഞ്ഞു:
സമ്മേളന പ്രതിനിധികൾ ഒരേ പോലെ വോട്ട് ചെയ്യും വിധമാണ് ഒരുക്കങ്ങൾ.അതിനാൽ,പാർട്ടി ഐക്യത്തിനായി ഞാൻ പങ്കെടുക്കാതിരിക്കുന്നതാണ് നല്ലത്.

അങ്ങനെ,സോഷ്യൽ ഡെമോക്രാറ്റിക് പാർട്ടി സ്ഥാപകരായ പ്ലഖനോവ്,ആക്സൽറോഡ്,മാർട്ടോവ്,ചകിഡ്‌സേ,ട്രോട് സ്‌കി എന്നിവരുടെ അസാന്നിധ്യത്തിലായിരുന്നു,സമ്മേളനം.ലെനിനും സിനോവീവും മലിനോവ്‌സ്‌കിയും പുത്തൻ ത്രിമൂർത്തികളായി.സായുധ കലാപത്തിന് ലെനിൻ ആഹ്വാനം ചെയ്‌തു.ബാൾട്ടിക് കപ്പൽ വ്യൂഹവുമായി ബന്ധപ്പെട്ടു.പീരങ്കികളും വെടിമരുന്നുo കടത്തി.റഷ്യയെ വളയാൻ സമയമായി.പാരീസ് വിട്ട് ലെനിൻ ക്രാക്കോയിൽ താമസിച്ചു.

ബുഖാറിൻ 

ഒരു നാൾ ബുഖാറിൻ ചുമലിൽ കനത്ത സഞ്ചിയുമായി ലെനിൻറെ വീട്ടിൽ എത്തി.കൊലുന്നനെയുള്ള ബുഖാറിൻ സന്തുഷ്ടനായിരുന്നു.25 വയസ്.എട്ടു കൊല്ലം വിപ്ലവകാരി ആയിരുന്നു.ലെനിനെപ്പോലെ,വിശാലമായ നെറ്റി,നേർത്ത മുടിയിഴകൾ,ഇത്തിരി മുകളിലേക്ക് ഉയർന്ന മൂക്ക്.അസാധാരണമായ ആഹ്ളാദവും തീക്ഷ്‌ണമായ കാഴ്ചപ്പാടും അയാളിൽ കണ്ടു.അഞ്ചാറ് ഭാഷകളിലെ പുസ്തകങ്ങൾ അയാൾ ഭക്ഷിച്ചു.ചുമൽ സഞ്ചിയിൽ ജർമൻ ചിത്രങ്ങളുടെ പകർപ്പുകൾ ആയിരുന്നു.കാൽപനിക ചിത്രകാരൻ ആർനോൾഡ് ബോക്‌ലിൻ വരച്ചത്.
വേഷം അയാൾ കാര്യമാക്കിയില്ല.ഭിന്നതകളിൽ ഊന്നിയതായിരുന്നു,ലെനിനും അയാളും തമ്മിലുള്ള ബന്ധം.
ന്യൂയോർക്കിൽ നേരത്തെ ബുഖാറിനെ കണ്ട ട്രോട് സ്‌കിക്ക് അയാളെ ഇഷ്ടമായിരുന്നില്ല.മറ്റുള്ളവരുടെ വാക്കുകളും ആശയങ്ങളും പകർത്തുന്ന ഒരു മാധ്യമം എന്ന് അയാൾ ബുഖാറിനെ പരിഹസിച്ചു.നീണ്ട യാത്രയ്ക്ക് ശേഷം എത്തിയ തന്നെ പബ്ലിക് ലൈബ്രറിയിലേക്ക് വലിച്ചിഴച്ചതിൽ കുപിതനായിരുന്നു,ട്രോട് സ്‌കി.

ലെനിൻ കാൺകെ,സ്റ്റാലിന്റെ സൈദ്ധാന്തികനായി,ബുഖാറിൻ.
ജോർജിയൻ നഗരമായ ഗോറിയിൽ 1879 ഡിസംബർ ഒൻപതിന് ജനിച്ച സ്റ്റാലിന്റെ ശരിപ്പേർ ജോസഫ് വിസാരിയോവിച് യുഗാഷ് വിലി എന്നായിരുന്നു.പ്രവദ പത്രം പിടിച്ച ശേഷം സ്വീകരിച്ച തൂലികാനാമമാണ്,ഉരുക്ക് എന്ന് അർത്ഥമുള്ള സ്റ്റാലിൻ.ചെരുപ്പുകുത്തി ആയ പിതാവ് വിസാരിയോൺ മദ്യപാനി ആയിരുന്നു.അമ്മ പഠിച്ചിരുന്നില്ല.ടിഫിസിലെ ഷൂ ഫാക്റ്ററിയിൽ പണിക്ക് ചേർന്ന വിസാരിയോൺ 1890 ൽ മരിച്ചു.ഗോറിയിലെ ഇടവക സ്‌കൂളിൽ അഞ്ചു വർഷം പഠിച്ച സ്റ്റാലിന് 1894 ൽ ടിഫിസിലെ ഓർത്തഡോക്സ് തിയോളജിക്കൽ സെമിനാരിയിൽ പ്രവേശനം കിട്ടി.സ്റ്റാലിന്റെ സാഹചര്യത്തിൽ കോക്കസസിൽ ഉപരിപഠനത്തിന് ചേരാവുന്ന ഏക സ്ഥാപനം.റഷ്യയിൽ നിന്ന് നാടുകടത്തിയ വിപ്ലവകാരികൾ സെമിനാരിയിൽ സോഷ്യലിസ്റ്റ് ആശയങ്ങൾ പരത്തിയിരുന്നു.സ്റ്റാലിൻ ഒരു സോഷ്യലിസ്റ്റ് ഗ്രൂപ്പിൽ ചേർന്നു.ദൈവശാസ്ത്രത്തിൽ എന്തെങ്കിലും താൽപര്യം ഉണ്ടായിരുന്നു എങ്കിൽ അത് നശിച്ചു.1899 വസന്തത്തിൽ പരീക്ഷ എഴുതാത്തതിന് പുറത്താക്കപ്പെട്ടു.സ്റ്റാലിന്റെ രചനകളിൽ ബൈബിൾ സ്വാധീനവും സുവിശേഷ ശൈലിയും കാണാം.ലേഖനങ്ങളിലും പ്രഭാഷണങ്ങളിലും എം വി രാഘവനെപ്പോലെ ചോദ്യങ്ങൾ ചോദിച്ച് ഉത്തരം പറയുന്ന ശൈലി ആയിരുന്നു.ലേഖനത്തിൽ ഓരോ ആശയത്തിനും അക്കം ഇട്ടു.
സോഷ്യൽ ഡെമോക്രാറ്റിക് പാർട്ടി നിലവിൽ വന്നിരുന്നില്ല.1899 -900 ൽ ടിഫിസ് ഭൗമ നിരീക്ഷണ കേന്ദ്രത്തിൽ ക്ളർക് ആയ ശേഷം അത് വിട്ട് രാഷ്ട്രീയക്കാരനായി.1901 മുതൽ ജോർജിയയിലെ നിയമവിരുദ്ധ സോഷ്യലിസ്റ്റ് പത്രമായ ബ്രിഡ്‌സോല ( പോരാട്ടം ) യിൽ ലേഖനങ്ങൾ എഴുതി.ആ വർഷം ഒടുവിൽ പാർട്ടി സംഘാടക സമിതി അംഗമായി.1902 ഏപ്രിലിൽ തൊഴിലാളി പ്രകടനം സംഘടിപ്പിച്ചതിന് അറസ്റ്റ്.സൈബീരിയയിലേക്ക് നാട് കടത്തി.രക്ഷപ്പെട്ട് 1904 ൽ കോക്കസസിൽ എത്തി.സോഷ്യൽ ഡെമോക്രാറ്റിക് പാർട്ടി തലേ വർഷം പിളർന്നിരുന്നു.സ്റ്റാലിൻ ബോൾഷെവിക് ചേരിയിൽ നിന്നു.റഷ്യയിലെത്താൻ പിന്നെയും സമയം എടുത്തു .1906 ഏപ്രിലിൽ സ്റ്റോക് ഹോമിൽ നടന്ന ഐക്യ കോൺഗ്രസിൽ പങ്കെടുത്ത ഏക ബോൾഷെവിക്.1912 വരെ കോക്കസസിൽ തന്നെ നിന്നു.
ലെനിനെ ആദ്യം കണ്ടത്,1905 ൽ ടമാർ ഫോഴ്സിൽ നടന്ന പാർട്ടി യോഗത്തിൽ.1906 -07 ൽ പാർട്ടിക്ക് പണമുണ്ടാക്കാൻ ബാങ്കുകൾ കൊള്ള ചെയ്‌തു.അതിന് ശേഷം ഏതാനും വർഷം അയാൾ സാർ ഭരണ കൂടത്തിൻറെ ചാര സംഘടനയായ ഓഖ്‌റാനയിൽ ഉണ്ടായിരുന്നതായി സോവിയറ്റ് ചാര മേധാവി അലക്‌സാണ്ടർ ഓർലോവ്,സ്റ്റാലിന്റെ മരണശേഷം വെളിപ്പെടുത്തി.

സ്റ്റാലിൻ,ബുഖാറിൻ,ഓർദ്ഴോനികിഡ്‌സേ,1929 

1913 മുതൽ നാലു വർഷം തടവിൽ ആയിരുന്നു സ്റ്റാലിൻ.ലെനിൻറെ ഭൗതിക വാദവും അനുഭവ ജ്ഞാനവാദവും ( Materialism and Empiricism ) എന്ന പ്രബന്ധത്തെ വിമർശിച്ചിരുന്നു.1912 ജനുവരിയിൽ പ്രാഗിൽ ലെനിൻ സർവ ബോൾഷെവിക് സമ്മേളനം വിളിച്ച് മെൻഷെവിക്കുകളെ പുറത്താക്കി.വോളോഗ് ദയിൽ ശിക്ഷ അനുഭവിച്ചിരുന്ന സ്റ്റാലിനെ ലെനിൻറെ നിർദേശപ്രകാരം പിന്നീട് സി സി യിൽ എടുത്തു.സ്റ്റാലിൻ എന്ന പേര് റഷ്യയിൽ എത്തി.വോളോഗ് ദയിൽ നിന്ന് രക്ഷപ്പെട്ട സ്റ്റാലിനെ വീണ്ടും അറസ്റ്റ് ചെയ്‌ത്‌ നാട് കടത്തി.പിന്നെയും തടവ് ചാടി ക്രാക്കോയിൽ ലെനിനെ കണ്ടു.റഷ്യയിൽ എത്തി സ്റ്റാലിൻ ഡിസംബറിൽ വിയന്നയിൽ ആറാഴ്ച ചെലവിട്ടു.ലെനിന് വേണ്ടി മാർക്‌സിസവും ദേശീയ പ്രശ്നവും എന്ന പൊള്ളയായ ലേഖനം എഴുതി.അത് ഓസ്ട്രിയൻ മാർക്സിസ്റ്റുകൾ ആയ റുഡോൾഫ് സ്പ്രിംഗർ,ബ്രൂണോ ബോയർ എന്നിവർക്ക് എതിരായിരുന്നു.സ്റ്റാലിന് റഷ്യൻ,ജോർജിയൻ ഭാഷകൾ മാത്രമാണ് വശം എന്നതിനാൽ അന്ന് വിയന്നയിൽ ഉണ്ടായിരുന്ന റഷ്യൻ സൈദ്ധാന്തികൻ ബുഖാറിൻ ആ സൈദ്ധാന്തികരുടെ ഉദ്ധരണികൾ സംഘടിപ്പിച്ചു കൊടുത്തതാകാമെന്ന് സംശയമുണ്ട്.1913 ൽ തടവിലായ സ്റ്റാലിൻ അത്തവണ മാത്രം തടവ് ചാടിയില്ല,1917 മാർച്ചിൽ പെട്രോഗ്രാഡിൽ എത്തി ലെനിൻറെ അസാന്നിധ്യത്തിൽ പാർട്ടി കൈയിൽ എടുത്തു.കാമനെവിനൊപ്പം പ്രവദ യുടെ പത്രാധിപരായി.കെറൻസ്കിയുടെ താൽക്കാലിക ഭരണകൂടത്തോട് ചായ്‌വ് കാട്ടി.സ്വിറ്റ്‌സർലൻഡിൽ നിന്നയയ്ക്കുന്ന ലേഖനങ്ങൾ തിരുത്തി ദുര്ബലമാക്കിയതിന്,മടങ്ങി എത്തിയ ലെനിൻ സ്റ്റാലിനെ ശാസിച്ചു.ഒക്ടോബർ അട്ടിമറി ആകുമ്പോഴേക്കും സ്റ്റാലിൻ മുഖ്യ നേതാക്കളിൽ ഒരാളായി.ട്രോട് സ്‌കി ജൂലൈയിൽ മാത്രമാണ് ബോൾഷെവിക് ആയത്.ലെനിൻറെ ആദ്യ ഭരണകൂട കാലത്ത്,സ്റ്റാലിൻ ദേശീയതയുടെ കമ്മിസാർ ആയി.1919 ൽ തൊഴിലാളി കർഷക ഇൻസ്പെക്ടറേറ്റ് കമ്മിസാർ.ഈ പദവി തൊഴിലാളികളെ കൈയിൽ ഒതുക്കാൻ സഹായിച്ചു.

സിനോവീവ് 

ലഭ്യമായ രേഖകൾ വച്ച്,ഒക്ടോബർ അട്ടിമറിക്ക് മുൻപേ സ്റ്റാലിനെ പാർട്ടിക്കാർ മനോരോഗി ആയി കണ്ടിരുന്നു.ബോൾഷെവിക്ക് കാരണവന്മാരെ കൂട്ടക്കൊല ചെയ്യും വരെ ആരും അയാളെ സൈദ്ധാന്തികനായി കണ്ടില്ല.അയാൾ വ്യക്തി പൂജ പ്രോത്സാഹിപ്പിച്ചപ്പോൾ ഏതു കീറക്കടലാസും അമൂല്യ രേഖയായി.
ലെനിൻറെ പ്രതിസന്ധികളിൽ സ്റ്റാലിൻ അവസാനത്തിന് മുൻപ് വരെ ഒപ്പം നിന്നു.സ്റ്റാലിൻ ബുദ്ധിജീവി അല്ലാത്തതിൽ ലെനിന് അതൃപ്തി ഉണ്ടായിരുന്നു.ഭീകര സത്വത്തെയാണ് പ്രതിഷ്ഠിച്ചതെന്ന് ലെനിൻ അറിഞ്ഞപ്പോൾ വൈകിപ്പോയി.
ലെനിൻറെ ഒസ്യത്ത് ശത്രുക്കൾ സ്റ്റാലിന് എതിരെ ഉപയോഗിച്ചപ്പോൾ സ്റ്റാലിൻ ചോദിച്ചു:
"ശരിയാണ്,ലെനിൻ ഞാൻ ക്രൂരൻ എന്ന് കുറ്റപ്പെടുത്തി.വിപ്ലവത്തിൻറെ കാര്യത്തിൽ ഞാൻ ക്രൂരനാണ്.വിപ്ലവം തെറ്റായിരുന്നു എന്ന് ലെനിൻ പറഞ്ഞോ?"
പാർട്ടി ജനറൽ സെക്രട്ടറി ആയി സ്റ്റാലിനെ ലെനിൻ സ്വന്തം ഇഷ്ടപ്രകാരമാണ് 1922 ഏപ്രിലിൽ നിർദേശിച്ചത്.ആ പദവി പാർട്ടിയിൽ ആദ്യമായിരുന്നു.ആരും എതിർത്തില്ല.ലെനിൻറെ അവകാശി എന്ന അർത്ഥം ആരും അന്ന് കൽപിച്ചില്ലെന്ന് ട്രോട് സ്‌കി പിൽക്കാലത്തു പറഞ്ഞു.പദവി വച്ച് സ്റ്റാലിൻ താക്കോൽ സ്ഥാനങ്ങളിൽ ഏറാൻ മൂളികളെ തിരുകിക്കയറ്റി.മിർ സയ്യിദ് സുൽത്താൻ ഗലിയേവിനെ സ്റ്റാലിൻ ഉന്മൂലനം ചെയ്‌തത്‌,കേരളത്തിലെ മുസ്ലിംകളും ശ്രദ്ധിക്കണം.
ഒക്ടോബർ അട്ടിമറിക്ക് ശേഷം ബോൾഷെവിക്കായ അധ്യാപകനായിരുന്നു ഗലിയേവ്.മാവോയിസത്തിന് മുൻപേ ആ ആശയം പറഞ്ഞയാൾ.ബഷ്‌കീറിൽ  നിന്നുള്ള അദ്ദേഹം പാർട്ടിയിലെ ഏക മുസ്ലിം ബുദ്ധി ജീവി ആയിരുന്നു.സോവിയറ്റ് ഭരണകൂടം മുസ്ലിം പ്രശ്നങ്ങൾ പരിഹരിക്കുന്നില്ലെന്നദ്ദേഹം പരാതിപ്പെട്ടു.റഷ്യയിൽ ഭരണം പിടിച്ച നഗർ തൊഴിലാളി,യൂറോപ്യൻ ബൂർഷ്വയെ പോലെയാണ്.ഗലിയേവ് ഒരു മുസ്ലിം പാർട്ടി ഉണ്ടാക്കാൻ ശ്രമിച്ചു.സ്വതന്ത്ര രാജ്യവും ആഗ്രഹിച്ചു.1923 ൽ ഗലിയേവിനെ പാർട്ടിയിൽ നിന്ന് പുറത്താക്കി.വിദേശ ചാരനെന്ന് മുദ്ര കുത്തി തടവിലിട്ടു.പ്രധാന പാർട്ടി നേതാവിനെതിരെ ഈ കുറ്റം ആദ്യമായിരുന്നു.ശുദ്ധീകരണ കാലത്ത് അദ്ദേഹത്തെ കൊന്നു.

സുൽത്താൻ ഗലിയേവ് 

ഗലിയേവിനെതിരായ നടപടി ലെനിൻ മരിക്കുന്നതിന് ഒരു വർഷം മുൻപാണ്.1921 ലെ പത്താം പാർട്ടി കോൺഗ്രസ് പാർട്ടിക്ക് അകത്തെ ചെറിയ ഗ്രൂപ്പുകളെ നിരോധിച്ചു.പാർട്ടി അംഗങ്ങളെ പുറത്താക്കാൻ സി സി ക്ക് അനുമതി നൽകി.ലെനിൻ,ട്രോട് സ്‌കി,സ്റ്റാലിൻ,സിനോവീവ്,കാമനെവ് എന്നിവരടങ്ങിയ സംഘം വിമത സ്വരങ്ങളെ അടിച്ചമർത്തി.1922 -23 ൽ പാർട്ടിക്ക് അകത്ത് നിരവധി കലാപങ്ങൾ ഉണ്ടായെങ്കിലും സ്റ്റാലിൻ ഉരുക്കുമുഷ്ടി പ്രയോഗിച്ചു.രോഗിയായ ലെനിന് വിവരങ്ങൾ കിട്ടാനുള്ള പഴുതുകൾ അടച്ചു.സിനോവീവ്,കാമനെവ് എന്നിവരുടെ സഹായത്തോടെ ട്രോട് സ്‌കിയെ ഒതുക്കി,പാർട്ടി പിടിച്ചു.സിനോവീവിനെയും സ്റ്റാലിൻ പുറത്താക്കി.ഇരുവരും സ്റ്റാലിനെ ഉന്നം വച്ചപ്പോൾ സിനോവീവ് ട്രോട് സ്‌കിക്ക്‌ എതിരെ മുൻപ് ഉന്നയിച്ച കുറ്റങ്ങൾ സ്റ്റാലിൻ ആയുധമാക്കി.ട്രോട് സ്‌കിയുടെ സുസ്ഥിര വിപ്ലവ ത്തിന് എതിരെ സ്റ്റാലിൻ ഒരു രാജ്യത്തെ സോഷ്യലിസം കൊണ്ട് വന്നു.

കാമനെവ് 

1921 ലെ പുത്തൻ സാമ്പത്തിക നയം ബുഖാറിനെ സൈദ്ധാന്തികൻ എന്ന നിലയിൽ പ്രസിദ്ധനാക്കി.1927 ൽ സിനോവീവും കാമനെവും പുറത്തായപ്പോൾ,സ്റ്റാലിൻ കഴിഞ്ഞാൽ അടുത്ത ആളായി ബുഖാറിൻ.
നിക്കോളായ് ഇവാനോവിച് ബുഖാറിൻ ( 1888 -1938 ) 1905 ലെ വിപ്ലവത്തിന് ശേഷമാണ് പ്രസ്ഥാനത്തിൽ എത്തിയത്.മോസ്‌കോയിൽ ജനിച്ചു വളർന്നു.മാതാപിതാക്കൾ അധ്യാപകർ ആയിരുന്നു.18 വയസിൽ പാർട്ടിയിൽ ചേർന്നു.1907 ൽ ഇക്കണോമിക്സ് പഠിക്കാൻ ചേർന്നു.പൂർത്തിയാക്കിയില്ല.1910 ൽ നാട് കടത്തി.ആറു കൊല്ലം ജർമനി,ഓസ്ട്രിയ എന്നിവിടങ്ങളിലും സ്കാന്ഡിനേവിയൻ രാജ്യങ്ങളിലും കഴിഞ്ഞു.1914 ൽ The Economic Theory of Leisure Class എഴുതി.1914 ൽ യുദ്ധം വന്നപ്പോൾ അയാളെ വിയന്നയിൽ നിന്ന് സ്വിറ്റ്സർലൻഡിലേക്ക് ഓടിച്ചു.ദേശീയ,കർഷക പ്രശ്നങ്ങളിൽ ഇയാളുടെ നിലപാട് തെറ്റാണെന്ന് ലെനിൻ വിമർശിച്ചു.ദേശീയ സ്വയം നിർണയ പ്രശ്‍നം മാർക്സിസ്റ്റ് വിരുദ്ധമാണെന്നും പാർട്ടി കർഷക പിന്തുണ നേടുന്നത് വിഡ്ഢിത്തമാണെന്നും ബുഖാറിൻ സിദ്ധാന്തിച്ചു.പിൽക്കാലത്തു ഇതിന് വിരുദ്ധമായ വ്യതിയാനത്തിന് ബുഖാറിൻ പഴി കേട്ടു.
സ്വിറ്റ്‌സർലൻഡിലും സ്വീഡനിലും ഇരുന്ന് ബുഖാറിൻ Imperialism and World Economy ( 1918 ) എഴുതി.കയ്യെഴുത്തു പ്രതി വായിച്ച ലെനിൻ അത് തൻറെ Imperialism,the Highest Stage of Capitalism എന്ന പ്രബന്ധത്തിന് ഉപയോഗിച്ചു.ഒക്ടോബർ അട്ടിമറിക്ക് ശേഷം തൊഴിലാളി വർഗത്തിന് ഭരണാധികാരം വേണ്ട എന്ന് സിദ്ധാന്തിച്ച ബുഖാറിനെ ലെനിൻ ശകാരിച്ചു-ലെനിൻ ഭരണകൂടവും വിപ്ലവവും എന്ന പുസ്തകത്തിൽ പ്രകടിപ്പിച്ച ഉട്ടോപ്യൻ ആശയം ആവർത്തിക്കുകയായിരുന്നു,ബുഖാറിൻ.ലെനിൻറെ ഏപ്രിൽ സിദ്ധാന്തങ്ങൾക്ക് ബുഖാറിൻ പിന്തുണ നൽകി.അട്ടിമറിക്ക് ശേഷം പ്രവദ പത്രാധിപരായി.1929 വരെ ആ സ്ഥാനത്ത് തുടർന്നു.പടിഞ്ഞാറൻ ലോകത്തിന് തീ കൊളുത്തിയാലേ റഷ്യൻ വിപ്ലവം നിലനിൽക്കൂ എന്ന പൊതു ബോൾഷെവിക് സമീപനം പങ്കിട്ട ബുഖാറിൻ,ജര്മനിയുമായി സമാധാനം എന്ന ലെനിൻ ലൈൻ നിരാകരിച്ചു.1918 ആദ്യം ബുഖാറിൻ ഇടത് ചേരിക്ക് ഒപ്പമായിരുന്നു.സമാധാനം പുനഃസ്ഥാപിച്ച ശേഷം ലെനിനൊപ്പം നിന്നു.ചരിത്രപരമായ ഭൗതിക വാദം,കമ്മ്യൂണിസത്തിൻറെ എ ബി സി എന്നിവ അയാളുടെ നില ഉയർത്തി.ട്രോട് സ്‌കി,സിനോവീവ്,കാമനെവ്‌ എന്നിവർ പിളർപ്പന്മാരാണെന്ന് അയാൾ മുദ്ര കുത്തി.തൊഴിലാളി വർഗ സർവാധിപത്യം എന്നാൽ ഒറ്റ കക്ഷി,അതിൽ ഗ്രൂപ്പുകൾക്ക് സ്ഥാനമില്ല.1925 ഡിസംബറിൽ 14 -o കോൺഗ്രസിൽ സ്റ്റാലിൻ ചോദിച്ചു:
നാം ബോൾഷെവിക്കുകൾക്ക്,ഔപചാരിക ജനാധിപത്യം,പൊള്ളയായ പുറന്തോട് മാത്രമാണെന്നും പാർട്ടി താൽപര്യമാണ് എല്ലാമെല്ലാമെന്നും പ്രതിപക്ഷത്തിന് അറിഞ്ഞു കൂടെ ?*
ലെനിനും ബുഖാറിനും പാർട്ടി ഏകാധിപത്യം എന്ന് പ്രയോഗിച്ചിരുന്നു;സ്റ്റാലിൻ പാർട്ടി നേതൃത്വത്തിൻ കീഴിൽ തൊഴിലാളിവർഗ സർവാധിപത്യം എന്ന് ഉപയോഗിച്ചു.

ഭക്ഷ്യോൽപാദനം താഴേക്ക് പോയ 1927 ൽ കർഷകർക്ക് എതിരെ സ്റ്റാലിൻ കണ്ടുകെട്ടൽ ഭീഷണി മുഴക്കി.കൂട്ടുകൃഷി കളങ്ങൾക്ക് സമയമായെന്ന് സ്റ്റാലിൻ പ്രഖ്യാപിച്ചു.ഈ നയത്തിനെതിരെ ബുഖാറിൻ,അലക്‌സി റിക്കോവ്,മിഖയിൽ ട്രോംസ്‌കി എന്നിവർ കലാപം ഉയർത്തി.ലെനിന് പിൻഗാമിയായി പ്രധാനമന്ത്രി ആയിരുന്നു റിക്കോവ്.ട്രേഡ് യൂണിയൻ ചുമതക്കാരനായിരുന്നു,ട്രോംസ്കി.ഇവരെ സ്റ്റാലിൻ വലതു പ്രതിപക്ഷമായി മുദ്ര കുത്തി.1929 ആദ്യം ഈ 'ദുഃഖകരമായ സത്യം' സ്റ്റാലിൻ പി ബി യെയും തുടർന്ന് ലോകത്തെയും അറിയിച്ചു.ഈ സമയത്ത് സ്റ്റാലിന്റെ താത്വികൻ എന്ന കുപ്രസിദ്ധി ഉയർത്തിയ പുത്തൻ സിദ്ധാന്തം അദ്ദേഹം അവതരിപ്പിച്ചു:കമ്മ്യൂണിസം മുന്നേറുന്തോറും വർഗ സമരവും ചൂഷകരുടെ പ്രതിരോധവും കൂടുതൽ കൂടുതൽ അക്രമാസക്തമാകും!
അടുത്ത കാൽനൂറ്റാണ്ട് ഈ കണ്ടെത്തൽ ആയിരുന്നു സകല പീഡന ങ്ങൾക്കും ആധാരം.സ്റ്റാലിന്റെ മരണസമയത്ത്,കൂട്ടുകൃഷി തുടങ്ങി കാൽനൂറ്റാണ്ട് കഴിഞ്ഞപ്പോൾ,ആളോഹരി ധാന്യോൽപാദനം 1918 ലെക്കാൾ കുറവായിരുന്നു.
നിര്ബന്ധ കൂട്ടുകൃഷി പദ്ധതി,ട്രോട് സ്‌കി -പ്രോബോഷെൻസ്‌കി സിദ്ധാന്തം,അവരുടെ പേര് മായ്ച്ചു നടപ്പാക്കിയതാണെന്ന് ലൂക്കാച് മുതൽ മെദ് വെദ്യേവ് വരെയുള്ള താത്വികർ പറഞ്ഞിട്ടുണ്ട്.ട്രോട് സ്‌കി ഈ വാദം തള്ളി.കൂട്ടുകൃഷിക്ക് തങ്ങൾ അനുകൂലമായിരുന്നു.നിര്ബന്ധമാക്കുന്നതിനെ എതിർത്തു.

ട്രോട് സ്‌കി 

1926 ശിശിരത്തിൽ ട്രോട് സ്‌കിയെ പി ബി യിൽ നിന്നും ഒരു വർഷത്തിന് ശേഷം പാർട്ടിയിൽ നിന്നും പുറത്താക്കി.1928 ആദ്യം തുർക്കി സർക്കാർ അനുമതിയോടെ അൽമാ അട്ടയിലേക്ക് നാട് കടത്തി.അവിടെയും അയാളെ വേട്ടയാടി.പ്രമുഖ കവി പാബ്ലോ നെരൂദ ട്രോട് സ്‌കിയുടെ ഒറ്റുകാരൻ ആയിരുന്നു എന്ന് പറയപ്പെടുന്നു.മെക്സിക്കോയിൽ ട്രോട് സ്‌കിയെ കൊല്ലാൻ ശ്രമിച്ച ചുവർ ചിത്രകാരൻ ഡേവിഡ് സെക്വേറോസിനെ നെരൂദ ജയിലിൽ കണ്ട് ചിലിയിലേക്ക് വിസ ഏർപ്പാട് ചെയ്‌തു.ഉപകാര സ്‌മരണയായി  കൂറ്റൻ ചിത്രം അയാൾ ചിലിയിൽ വരച്ചു.നെരൂദ മെക്‌സിക്കോയിൽ എത്തി നാലാം ദിവസം,1940 ഓഗസ്റ്റ് 21 ന്  സ്റ്റാലിന്റെ ഏജൻറ് റാമോൺ മെർക്കാദർ,ട്രോട് സ്‌കിയെ മഴു കൊണ്ട് തല്ലിക്കൊന്നു.അതിന് മെക്‌സിക്കൻ പാർട്ടി സഹായം ഉണ്ടായിരുന്നു.**1971 ൽ ഉറുഗ്വേ മാസിക മാർച്ച യ്ക്ക് നൽകിയ അഭിമുഖത്തിൽ,ആരോപണം നിഷേധിച്ചു.സെക്വേറോസിന് വിസ നൽകിയത് മെക്‌സിക്കൻ പ്രസിഡൻറ് ജനറൽ മാനുവൽ കാമചോയുടെ അപേക്ഷ അനുസരിച്ചായിരുന്നു;വിസ നൽകാനുള്ള ന്യായം അയാൾ ചിലിയിൽ ചിത്രം വരയ്ക്കും എന്നുള്ളതായിരുന്നു.ആരോപണം എന്നിട്ടും അടങ്ങിയില്ല.ചിത്രകാരൻ ജയിലിൽ ആണെന്ന് നെരൂദയ്ക്ക് അറിയാമായിരുന്നു.കോൺസൽ ജനറൽ ആകാൻ നേരത്തെ മെക്‌സിക്കോയിൽ എത്തുകയും ചെയ്‌തിരുന്നു.

1929 ഡിസംബറിൽ സ്റ്റാലിന്റെ അൻപതാം വയസ്സ്  ചരിത്ര സംഭവമായി കൊണ്ടാടിയതോടെ,വ്യക്തിപൂജ ആരംഭിച്ചു,1929 ൽ ബുഖാറിൻറെ പതനം മുതൽ 1938 ലെ അയാളുടെ കൊല വരെയുള്ള ചരിത്രം,മാർക്സിസ്റ്റുകൾക്ക് വിഷയമല്ല.പതനം കഴിഞ്ഞ് സുപ്രീം ഇക്കണോമിക് കൗൺസിലിന് കീഴിൽ ഗവേഷണ ഡയറക്റ്ററായി.വല്ലപ്പോഴും അമർന്ന ഒരു വിമർശനം ലേഖന രൂപത്തിൽ വന്നു.അച്യുതാനന്ദനെപ്പോലെ സി സി യിൽ തുടർന്നു.ഒരു പരസ്യ ശാസന കൂടി കഴിഞ്ഞ്,1934 ൽ ഇസ്വെസ്തിയ എഡിറ്ററായി.അക്കൊല്ലം ഓഗസ്റ്റിൽ എഴുത്തുകാരുടെ സമ്മേളനത്തിൽ താരതമ്യേന സ്വതന്ത്ര പ്രഭാഷണം നടത്തി.1935 ൽ പുതിയ സോവിയറ്റ് ഭരണഘടന ഉണ്ടാക്കാനുള്ള സമിതിയുടെ അധ്യക്ഷനായി.1937 ഫെബ്രുവരിയിൽ അറസ്റ്റിലായി.സ്റ്റാലിന്റെ അവസാന രാഷ്ട്രീയ വിചാരണകളിൽ ഒന്നിൽ അയാളെ കൊല്ലാൻ വിധിച്ചു.അവസാനത്തെ ബോൾഷെവിക് ആയിരുന്നു,ബുഖാറിൻ.
--------------------------------------------
*സ്റ്റാലിൻ / തിരഞ്ഞെടുത്ത കൃതികൾ,വാല്യം 7,1954,പേജ് 394
**Pablo Neruda: A Passion for Life / Adam Feinstein,2004,Page 154

See https://hamletram.blogspot.com/2019/07/10.html
   

ഒരു റഷ്യൻ യക്ഷിക്കഥ 10

10.വെപ്പാട്ടിക്ക് പിന്നാലെ ലെനിനും 

സ്വന്തം മരണത്തിനു മുൻപ്, ലെനിനെ വ്യക്തിപരമായി ഉലച്ച സംഭവമായിരുന്നു, 1920 സെപ്റ്റംബർ 24 ന്, വെപ്പാട്ടി ഇനെസ്സ ആർമാൻഡിന്റെ മരണം. തൻറെ 40 വയസിൽ 36 വയസുള്ള ഇനെസ്സയെ പാരിസിൽ കണ്ടുമുട്ടുമ്പോൾ, ലെനിനൊപ്പം ഭാര്യ ക്രൂപ് സ്കേയ താമസിച്ചിരുന്നു.

ഇനെസ്സയുമായി ലെനിൻറെ ബന്ധം തീക്ഷ്ണമായപ്പോൾ, ക്രൂപ് സ്കേയ, കിടപ്പു മുറിയിൽ നിന്നിറങ്ങി; ലെനിൻറെ ജീവിതത്തിൽ നിന്നിറങ്ങിയില്ല. ഗോർബച്ചേവ് അധികാരമേറി, രഹസ്യ ആർകൈവ്സ് പരസ്യമായ ശേഷമാണ്, ലെനിൻറെ വെപ്പാട്ടിയെപ്പറ്റി വിശദമായി അറിയുന്നത്. ലണ്ടനിൽ ഭാര്യയുടെ സുഹൃത്ത് അപ്പോളിനാര്യ യാക്കുബോവയുമായും ലെനിന് ബന്ധമുണ്ടായിരുന്നു.ലെനിൻറെ പ്രചോദനം യാക്കുബോവ ആയിരുന്നു എന്ന വിശ്വാസവും ശക്തമാണ്. അവരുടെ ചിത്രം പുറത്തു വന്നത് 2015 ലാണ്.
അപ്പോളിനാര്യ (1870 -1917) യോട് ലെനിൻ നടത്തിയ പ്രണയാഭ്യർത്ഥന അവർ നിരസിച്ചതായി ലൂയി ഫിഷർ എഴുതിയിട്ടുണ്ട്. 1902 -1911 ൽ ഇടക്കിടെ ലണ്ടനിൽ എത്തിയിരുന്നപ്പോൾ അവർ തമ്മിൽ വിപ്ലവ ദിശയെപ്പറ്റി തർക്കങ്ങൾ നടന്നു. ലിറോച് ക എന്ന ഓമനപ്പേരിലാണ് ലെനിൻ വിളിച്ചിരുന്നത്. ബ്രിട്ടീഷ് ലൈബ്രറിക്കടുത്ത് ഭർത്താവിനൊപ്പം താമസിക്കുകയായിരുന്നു പുരോഹിതൻറെ മകളായ അപ്പോളിനാര്യ. ഫിസിക്സ് പഠിച്ച ശേഷം തൊഴിലാളികൾക്ക് ക്‌ളാസ് എടുക്കുമ്പോഴാണ്, ക്രൂപ് സ്കേയയെ പരിചയപ്പെട്ടത്. ശിക്ഷിക്കപ്പെട്ട് സൈബീരിയയിൽ കഴിഞ്ഞ ശേഷം ലണ്ടനിൽ എത്തി.

അപ്പോളിനാര്യ 

ഇനെസ്സ ഫയദറോവ്ന ആർമാൻഡ് (1874 -1920) പാരിസിലെ ഒരു ഓപെറ ഗായകൻറെ അവിഹിത സന്തതി ആയിരുന്നു. അവരാണ്, രാഷ്ട്രീയ സമരത്തിൽ പതറിയ ലെനിന് ഊർജം കൊടുത്ത്, മുന്നണിയിൽ നിർത്തിയത്. 1919 ൽ മോസ്കോയിലെ ശക്തയായ സ്ത്രീ അവരായിരുന്നു.

പാരിസിൽ, 1910 ശിശിരത്തിൽ അവന്യൂ ദി ഓർലിയൻസിലെ ഒരു കഫേയിലാണ്, ലെനിൻ, ഇനെസ്സയെ കണ്ടു മുട്ടിയത്. ബോൾഷെവിക്കുകൾ ബീർ നുണഞ്ഞ് കഫെയുടെ മുകളിലെ മുറിയിൽ രാഷ്ട്രീയം ചർച്ച ചെയ്‌തു പോന്നു. ലെനിന് പണം വരുന്ന വഴികൾ ഭരണകൂടം മരവിപ്പിക്കുകയും, ലെനിൻ പ്രോലിറ്ററി  (Proletarri) എന്ന മാസിക നിർത്തുകയും ചെയ്‌ത കാലം. നാലു ഭാഷകൾ അറിയാവുന്ന ഇനെസ്സ, അയാളുടെ പ്രശ്നങ്ങൾ ഏറ്റെടുത്തു. 19 വയസ്സിൽ മോസ്കോയിലെ ഫ്രഞ്ച് സമൂഹത്തിൽപെട്ട, ധനിക തുണി കച്ചവട കുടുംബത്തിലെ മൂത്ത മകൻ അലക്‌സാണ്ടർ ആർമാൻഡിനെ വിവാഹം ചെയ്‌ത അവർ, ധനിക ആയിരുന്നു. ഒൻപതു കൊല്ലത്തെ ബന്ധത്തിൽ നാലു കുട്ടികൾ ഉണ്ടായി. 28 വയസ്സിൽ ഇനെസ്സ, അലക്‌സാണ്ടറുടെ 17 വയസുള്ള സഹോദരൻ വ്ളാദിമിർ വോളോദ്യയ്‌ക്കൊപ്പം പരസ്യമായി ജീവിച്ചു. വ്ളാദിമിറിൽ ഉണ്ടായ മകൻ ആൻഡ്രിയെ 1903 ൽ അലക്‌സാണ്ടർ ഏറ്റെടുത്തു. 1909 ൽ വ്ളാദിമിർ ക്ഷയം വന്ന് മരിച്ചു.

കമ്മ്യൂണിസ്റ്റ് ആയ വ്ളാദിമിറിന് ഒപ്പം വിപ്ലവ പ്രവർത്തനങ്ങളിൽ ഉണ്ടായിരുന്ന ഇനെസ്സ, ഭരണകൂടത്തെ ഭയന്നാണ്, പാരിസിൽ എത്തിയത്. അവർ ലോങ്ജുമോയിൽ വിപ്ലവ സ്‌കൂൾ തുടങ്ങി. അവിടെയാണ് ഇനെസ്സ ലെനിനോട് കാമം പറഞ്ഞത്. പ്രാഗിൽ സോഷ്യൽ ഡെമോക്രാറ്റിക് പാർട്ടി സമ്മേളനത്തിൽ ബോൾഷെവിക്കുകൾക്ക് വ്യാജ ഭൂരിപക്ഷം ഉണ്ടാക്കാൻ ഇനെസ്സയാണ് തന്ത്രം മെനഞ്ഞത്. ഇനെസ്സയ്ക്ക് വേണ്ടി ബന്ധം പിരിയാൻ ക്രൂപ് സ്കേയ തയ്യാറായെങ്കിലും, ലെനിൻ സമ്മതിച്ചില്ല. രണ്ടു സ്ത്രീകളും ഫെമിനിസ്റ്റുകൾ ആയിരുന്നു. ഇനെസ്സയുടെ മരണശേഷം, അവരുടെ ഇളയ കുട്ടികളെ ക്രൂപ് സ്കേയ ഏറ്റെടുത്തു.

വെപ്പാട്ടിയാണെങ്കിലും, ലെനിൻ അവർക്ക് ഉത്തരവുകൾ നൽകിയിരുന്നു. റഷ്യയിൽ പോളിഷ് കർഷക വേഷത്തിൽ ഇനെസ്സ സെൻറ് പീറ്റേഴ്‌സ്ബർഗിലെ പാർട്ടി പുനഃസംഘടിപ്പിക്കാൻ പോയി തടവിലായി. അലക്‌സാണ്ടർ 6500 റൂബിൾ മുടക്കി ജാമ്യത്തിൽ ഇറക്കി. ജാമ്യവ്യവസ്ഥ ലംഘിച്ച് 1913 ൽ രക്ഷപ്പെട്ട്, ക്രാക്കോയിൽ ലെനിൻറെ അടുത്തെത്തി. അപ്പോൾ ലെനിൻ ബന്ധം അവസാനിപ്പിക്കാൻ ഒരുമ്പെട്ടതായി, ഇനെസ്സയുടെ അവശേഷിക്കുന്ന പ്രണയ ലേഖനത്തിൽ നിന്നറിയാം:

ചുംബനങ്ങൾ വേണ്ട,എനിക്കൊന്നു കണ്ടാൽ മതി;അങ്ങയോട് സംസാരിച്ചിരിക്കാൻ സുഖമാണ്;അതാരെയും വേദനിപ്പിക്കേണ്ടതില്ല.എനിക്ക് എന്തിന് അത് പോലും നിഷേധിക്കുന്നു ?*

ഇനെസ്സ 

ലെനിൻ 1914 ജനുവരി മുതൽ ഇനെസ്സയ്ക്ക് 150 കത്തുകൾ അയച്ചു. ഇവയെല്ലാം ഉത്തരവുകൾ ആയിരുന്നു. കത്തിനൊടുവിൽ, കാണാൻ ആകാത്തതിൽ ദുഃഖം രേഖപ്പെടുത്തും. 1916 ജനുവരിയിൽ സോഫി പോപോഫ് എന്ന കള്ളപ്പേരിൽ ഇനെസ്സയെ പാരിസിൽ അയച്ചപ്പോൾ വേണ്ടത്ര പിന്തുണ ബോൾഷെവിക്കുകൾക്ക് കിട്ടിയില്ല. ലെനിൻ അവരെ ശാസിച്ച് കത്തയച്ചപ്പോൾ ഇനെസ്സ പ്രതിഷേധിച്ചു. അവർ കോപിച്ച് ലേക് ജനീവയ്ക്ക് മുകളിൽ വിശ്രമത്തിന് പോയി. ലെനിൻ തുരു തുരെ കത്തുകൾ അയച്ചു. നിരന്തരം വിളിച്ചു -അവർ മറുപടി നൽകാതെ കളിപ്പിച്ചു.

1917 ഫെബ്രുവരി വിപ്ലവത്തിന് ശേഷം , റഷ്യയിൽ എത്തി.മാർച്ചിൽ ഇനെസ്സയെ മോസ്‌കോ സോവിയറ്റിന്റെ എക്സിക്യുട്ടീവ് കമ്മിറ്റി അംഗമാക്കി. ഓഗസ്റ്റ് 30 ന്  മൈക്കിൾസൻ പ്ലാൻറിൽ, ലെനിനെ റവലൂഷനറി സോഷ്യലിസ്റ്റ് പാർട്ടിയിലെ ഫാനി കപ്ലാൻ വെടി വച്ച് വീഴ്ത്തി. തലനാരിഴയ്ക്ക് രക്ഷപ്പെട്ടു. ലെനിനെ വിപ്ലവ വഞ്ചകനായി കണ്ട ഫാനി, തൻറെ പാർട്ടി നിരോധിക്കപെട്ടപ്പോഴാണ് ലെനിനെ കൊല്ലാൻ ശ്രമിച്ചത്. അവരെ സെപ്റ്റംബർ മൂന്നിന് വെടി വച്ച് കൊന്നു.

ലെനിൻ ഇനെസ്സയെ വരുത്തി. കാമം പൂത്തു. ഇനെസ്സയ്ക്ക് ക്രെംലിനിൽ വലിയ വീട് കിട്ടി. ലെനിൻറെ ക്ലോസ്‌ഡ്‌ സർക്യൂട്ട് ഫോൺ വലയത്തിൽ അയാളെ നേരിട്ട് വിളിക്കാൻ സൗകര്യം കിട്ടി. ക്രൂപ് സ്കേയ പിൻവാങ്ങി ക്രെംലിൻ വിട്ടു. 1918 ൽ ഇനെസ്സ, മുൻ ഭർത്താവ് അലക്‌സാണ്ടറെ പാർട്ടി അംഗമാക്കി. അവർ കേന്ദ്ര കമ്മിറ്റി വനിതാ വിഭാഗം മേധാവി ആയി. 14 മണിക്കൂർ ജോലി ചെയ്‌തു. അവർക്ക് ന്യുമോണിയ വന്നപ്പോൾ ലെനിൻ കത്തുകൾ വഴി ആശ്വസിപ്പിച്ചു: ഫയർ പ്ളേസിൽ തീ കത്തിക്കാൻ വിറക് വേണോ?ഭക്ഷണം വേണോ ?പാചകത്തിന് ആരുണ്ട്?പെൺ മക്കളോട് ദിവസവും വിളിക്കാൻ പറയാം.

പനിയിൽ നിന്ന് രക്ഷപ്പെട്ട അവരെ കോക്കസസിലെ കിസ്ലോവോഡ്സ്കിൽ വിശ്രമത്തിന് അയച്ചു. കവർച്ചക്കാരുടെ ശല്യം കാരണം അവിടെ നിന്ന് സെപ്റ്റംബറിൽ സൈനിക ട്രെയിനിൽ ഇനെസ്സയെ കയറ്റി. ബൽസാനിൽ വച്ച് കോളറ പിടിപെട്ട് അവർ സെപ്റ്റംബർ 24 പുലർച്ചെ മരിച്ചു. എട്ടു ദിവസം കഴിഞ്ഞ് ജഡം മോസ്‌കോയിൽ എത്തിച്ചു. അലക്‌സാണ്ടർക്കൊപ്പം ലെനിൻ ജഡം കാത്തു നിന്നു. ജഡം റെഡ് സ്‌ക്വയറിൽ സംസ്‌കരിച്ചു. "ലെനിൻ ബോധം കെട്ട് താഴെ വീഴുമെന്ന് തോന്നി," അലക്‌സാൻഡ്ര കൊല്ലോന്റായ് ഓർമിച്ചു.

ഫാനി കപ്ലാൻ
 

എന്താണ് ചെയ്യേണ്ടത്? എന്ന ചേർനിഷേവ്സ്കിയുടെ നോവൽ ഇരുവർക്കും ഇഷ്ടമായിരുന്നു. പിയാനോയിൽ അവർ ബീഥോവൻറെ സൊണാറ്റകൾ വായിച്ചു. അവരുടെ മരണശേഷം ലെനിൻ കൂടുതൽ വൃദ്ധനായ പോലെ തോന്നി. ജനത്തിൽ നിന്നകന്നു. അയാളുടെ ഭീകര ഭരണത്തിന് കീഴിൽ, ജീവിതം വിരസമാണെന്ന് ക്രോൺസ്റ്റാറ്റ് കലാപകാരികൾ പരാതിപ്പെട്ടു. കവിതയിലോ കലയിലോ താൽപര്യം തോന്നിയില്ല. മയക്കോവ്സ്കിയുടെ ഒരു കവിതാ സമാഹാരം 5000 കോപ്പി അടിച്ചെന്ന് കേട്ടപ്പോൾ, അയാൾ രോഷം കൊണ്ടു: "അത് അസംബന്ധമാണ്; നിറം പിടിപ്പിച്ച അൽപ്പത്തരം, കാപട്യം."

1921 ഡിസംബർ ഏഴിന്, രോഗിയായ ലെനിനെ ക്രെംലിനിൽ നിന്ന് ഗോർക്കിയിലേക്ക് മാറ്റി. 1922 ഏപ്രിൽ മൂന്നിന് പാർട്ടി പതിനൊന്നാം കോൺഗ്രസിലെ ഒരു തീരുമാനം, റഷ്യയെ മാത്രമല്ല, ലോകത്തെ തന്നെ വരും കാലത്ത് ദുരിതക്കടലിൽ ആഴ്ത്തുന്ന ഒന്നായിരുന്നു -സ്റ്റാലിൻ ജനറൽ സെക്രട്ടറി. അത്, പാർട്ടി കോൺഗ്രസിൽ നാലു പ്രസംഗങ്ങൾ ചെയ്‌ത ലെനിൻറെ നിർദേശമായിരുന്നു. സ്റ്റാലിൻ തന്നെ, ദേശീയതയുടെ കമ്മിസാർ ആയി. ഒരാഴ്ച കഴിഞ്ഞ്, ജനകീയ കമ്മിസാർമാരുടെ കൗൺസിൽ മേധാവി ആയി, ലെനിൻ തന്നെ നിർദേശിച്ചപ്പോൾ ട്രോട് സ്‌കി നിരസിച്ചു. അടുത്ത ജനറൽ സെക്രട്ടറി എന്നാണ് അതിന് അർത്ഥമെങ്കിലും, ആ സ്ഥാനം ഒരു സമ്മാനമായി കിട്ടേണ്ടതല്ലെന്ന് ട്രോട് സ്‌കിക്ക് തോന്നി. കേന്ദ്രകമ്മിറ്റിയിൽ ഭൂരിപക്ഷവും ജൂതന്മാരാണ്; താനും ജൂതനാണ്. മുഖ്യധാരയുടെ ഭാഗമാകാത്ത ന്യൂനപക്ഷം ജൂതന്മാർ ഒരു രാജ്യത്തെ നയിക്കുന്നതിൽ അപാകതയുണ്ടെന്ന് ട്രോട് സ്‌കിക്ക് തോന്നി. സ്റ്റാലിനെപ്പോലെ ഒരു ജോർജ്ജിയക്കാരനും അതിന് അർഹൻ അല്ല. സ്ഥാനം നിരസിച്ചതോടെ, സ്വന്തം മരണ വാറന്റിൽ ട്രോട് സ്‌കി ഒപ്പിട്ടു. 

ലെനിൻ ഗോർക്കിക്ക് മടങ്ങി.

ലെനിൻ അവസാന ദിനങ്ങളിൽ 

തലവേദന കൂടി വന്നു. ലെനിൻറെ ശരീരത്തിലെ രണ്ടു വെടിയുണ്ടകളിൽ നിന്നുള്ള വിഷമാകാം കാരണമെന്ന് ജർമൻ ഡോക്ടർ സ്ട്രംപെറ്റ് അഭിപ്രായപ്പെട്ടു. ബുള്ളറ്റിൽ നിന്നുള്ള വിഷം (lead poison) കാരണം തലവേദന വരുമെന്ന് വിവരമില്ലെന്ന് ഡോ റോസാനോവ് പറഞ്ഞു. ഏപ്രിൽ 23 ന് കഴുത്തിലെ വെടിയുണ്ട ശസ്ത്രക്രിയ വഴി നീക്കി. മോസ്‌കോ സോവിയറ്റ് പ്ലീ നത്തിൽ, നവംബറിൽ ലെനിൻ അവസാന പ്രസംഗം നടത്തി. ലെനിൻറെ നിർദേശപ്രകാരം, മോസ്‌കോയിൽ നിന്ന് അവസാനത്തെ മെൻഷെവിക് പ്രൊഫസർ റോഷ്‌ക്കോവിനെ പുറത്താക്കിയ ഡിസംബർ 16 ന് ലെനിന് പക്ഷാഘാതം ഉണ്ടായി. അയാൾ ഛർദിച്ചു. അന്ന് കരുത്തു ചോർന്ന് അയാൾ അധികാരം ഇല്ലാത്തവനായി.

പന്ത്രണ്ടാം പാർട്ടി കോൺഗ്രസിൽ തനിക്ക് സംസാരിക്കാൻ ആവില്ല എന്ന തിരിച്ചറിവിൽ, ഡിസംബർ 23 ന് ലെനിൻ, സഹായികളായ മരിയ വോളോദിചേവ, ലിഡിയ ഫൊത്തിയേവ എന്നിവർക്ക് 'പാർട്ടി കോൺഗ്രസിനുള്ള കത്ത് ' പറഞ്ഞു കൊടുക്കാൻ തുടങ്ങി. ഇത് ലെനിൻറെ ഒസ്യത്ത്  (The Testament of Lenin) എന്നറിയപ്പെടുന്നു. ഇത് പരസ്യമാക്കിയത്, സ്റ്റാലിന്റെ മരണശേഷം, ഇരുപതാം പാർട്ടി കോൺഗ്രസിൽ, 1956 ഫെബ്രുവരി 25 ന് ക്രൂഷ്‌ചേവാണ്. അന്ന് പാർട്ടിയും ലോകവും ഞെട്ടി.

ലെനിൻറെ സഹോദരി മരിയ 

ഡിസംബർ 23 ന് മരിയ കേട്ടെഴുതിയത്, ട്രോട് സ്‌കി നേതൃത്വം നൽകുന്ന ആസൂത്രണ കമ്മീഷന് നിയമാധികാരം നൽകുന്നതിനെപ്പറ്റിയും കേന്ദ്ര കമ്മിറ്റി അംഗ സംഖ്യ 22 ൽ നിന്ന് 50 -100 ആക്കാനുമുള്ള നിർദേശങ്ങളാണ്. കേന്ദ്രകമ്മിറ്റിയിൽ വ്യവസായ തൊഴിലാളികൾ വരണം എന്നതായിരുന്നു, ഉന്നം. ഇത് ട്രോട് സ്‌കിയുമായുള്ള സന്ധി ആയിരുന്നു. പത്താം പാർട്ടി കോൺഗ്രസ് വിഭാഗീയത അവസാനിപ്പിക്കണമെന്ന് പ്രമേയം പാസാക്കിയിരുന്നെങ്കിലും, ഒന്നും സംഭവിച്ചിരുന്നില്ല. സ്റ്റാലിനെക്കാൾ ജനകീയത ട്രോട് സ്‌കി, സിനോവീവ്, കാമനെവ്, ബുഖാറിൻ എന്നിവർക്ക് ഉണ്ടായിട്ടും, സ്റ്റാലിൻ ജനറൽ സെക്രട്ടറി ആയത്, വിഭാഗീയത കൂട്ടിയേക്കാം. അതിന് മുൻകരുതൽ ആയാണ് കേന്ദ്ര കമ്മിറ്റി അംഗ സംഖ്യ കൂട്ടൽ. അടുത്ത ദിവസം ലെനിൻ ഇത്ര കൂടി പറഞ്ഞു കൊടുത്തു:

• ജനറൽ സെക്രട്ടറി എന്ന നിലയിൽ സ്റ്റാലിൻ അളവറ്റ അധികാരം കൈയിൽ കേന്ദ്രീകരിച്ചിരിക്കുന്നു. വേണ്ട ജാഗ്രതയോടെ അയാൾ അത് ഉപയോഗിക്കുമെന്ന് എനിക്കുറപ്പില്ല. ട്രോട് സ്‌കി കഴിവുകൾ കൊണ്ട് മാത്രമല്ല, സി സി യിൽ വ്യക്തിപരമായി ഏറ്റവും കഴിവുള്ള ആൾ -അതിരു കവിഞ്ഞ ആത്മ വിശ്വാസവും ഉത്സാഹവും ഭരണപരമായ കാര്യങ്ങളിൽ കാണിക്കുന്നു. സി സി യിലെ ഈ രണ്ടു പ്രധാന നേതാക്കളുടെ ഈ രണ്ടു ഗുണങ്ങൾ, ഒരു പിളർപ്പിലേക്ക് നയിച്ചേക്കാം. അത് തടയാൻ പാർട്ടി ഉടൻ നടപടി എടുത്തില്ലെങ്കിൽ, അപ്രതീക്ഷിതമായി പിളർപ്പുണ്ടാകാം. സിനോവീവിൻറെയും കാമനെവിൻറെയും ഒക്ടോബർ സംഭവം** ആകസ്മികമല്ല. ട്രോട് സ്‌കിയുടെ ബോൾഷെവിക് സ്വഭാവം ഇല്ലായ്‌മ പോലെ, അത് കണ്ടാൽ മതി. സി സി യിലെ യുവ അംഗങ്ങളിൽ, ബുഖാറിനും പ്യാറ്റക്കോവും മിടുക്കന്മാരാണ്. ബുഖാറിൻ നല്ല സൈദ്ധാന്തികൻ ആണെങ്കിലും,പൂർണ മാർക്സിസ്റ്റ് അല്ല. പണ്ഡിത സ്വഭാവമാണ് കൂടുതൽ; വൈരുധ്യാത്മകത അല്ല. അത് പഠിച്ചിട്ടില്ല; മനസിലാക്കിയിട്ടില്ല.

താനൊഴിച്ച് ബാക്കി എല്ലാവരെയും വിമർശിക്കുന്ന ലെനിന് സ്വയം വിമര്ശനമില്ല. കേട്ടെഴുത്ത് രേഖ ഭദ്രമായി പൂട്ടി വയ്ക്കാൻ ലെനിൻ നിർദേശിച്ചു. സെക്രട്ടറിമാരുടെ കൂട്ടത്തിൽ ഭാര്യ ക്രൂപ് സ്കേയ ഉണ്ടായിരുന്നു. സ്റ്റാലിന് എതിരായ കേട്ടെഴുത്ത് എന്ത് ചെയ്യണമെന്ന് മരിയ, ലിഡിയയോട് ചോദിച്ചു. സ്റ്റാലിനോട് തന്നെ ചോദിക്കാൻ ലിഡിയ നിർദേശിച്ചു. ടൈപ് ചെയ്‌ത കോപ്പി, സ്റ്റാലിൻ ബുഖാറിൻ, ഓർദ് ഴോ നികിഡ്‌സേ, സെക്രട്ടേറിയറ്റിലെ അമായക് നസ്രേത്യൻ എന്നിവരെ കാണിച്ച ശേഷം, മരിയയോട് പറഞ്ഞു: "കത്തിച്ചു കളയൂ."

കത്തിച്ച ശേഷം, ലെനിനെ ധിക്കരിച്ചതിൽ മനം നൊന്ത്, കേട്ടെഴുതിയ കുറിപ്പുകളിൽ നിന്ന് വീണ്ടും ഒരു കോപ്പി ടൈപ്പ് ചെയ്‌ത്‌, സേഫിൽ വച്ച് പൂട്ടി.

ലിഡിയ ഫൊത്തിയേവ 

ഡിസംബർ 26, 30, 31 തീയതികളിൽ കേട്ടെഴുത്ത് തുടർന്നു. 1923 ജനുവരി നാലിന് ലിഡിയ ഫൊത്തിയേവ എഴുതി എടുത്തതായിരുന്നു, മാരകം:

• സ്റ്റാലിൻ പരുക്കനാണ്. ഈ കുറ്റം കമ്മ്യൂണിസ്റ്റുകൾ സഹിക്കുമെങ്കിലും, ജനറൽ സെക്രട്ടറിക്ക് ചേർന്നതല്ല. അതിനാൽ, സ്റ്റാലിനെ ആ സ്ഥാനത്തു നിന്ന് നീക്കി, സഹിഷ്‌ണുതയും കൂറും വിനയവുമുള്ള, ദുരയില്ലാത്ത മറ്റൊരാളെ ജനറൽ സെക്രട്ടറിയാക്കണമെന്ന് ഞാൻ നിർദേശിക്കുന്നു. സാഹചര്യം നിസ്സാരമാണെന്ന് തോന്നാം. എന്നാൽ, ഒരു പിളർപ്പ് ഒഴിവാക്കാനും, ട്രോട് സ്‌കിയുമായുള്ള വഷളായ ബന്ധം കണക്കിലെടുത്തും, ഈ നിസ്സാരത, നിർണായകമായി തീരും.

ഇത്, രോഗക്കിടക്കയിൽ കിടന്ന് ലെനിൻ, സ്റ്റാലിനോട് പ്രഖ്യാപിച്ച രാഷ്ട്രീയ യുദ്ധമായിരുന്നു. സുഖാനോവ് എഴുതിയ, വിപ്ലവത്തെപ്പറ്റിയുള്ള കുറിപ്പുകൾ (Notes on the Revolution ) എന്ന പുസ്തകത്തിന് ലെനിൻ എഴുതിയ നിരൂപണത്തിൽ, നെപ്പോളിയൻറെ ഒരു ഉദ്ധരണി ഉണ്ടായിരുന്നു: Un S ' engage et puis ..en voit -സേനാവിന്യാസം എങ്ങനെ വേണമെന്ന് തീരുമാനിക്കും മുൻപേ, സേനാധിപൻ യുദ്ധവുമായി മുന്നോട്ട് പോകണം.

ലെനിൻറെ കേട്ടെഴുത്ത് ചോർന്ന് പ്രശ്‍നം സി സി യിൽ സംഘർഷം സൃഷ്ടിച്ചു. ലെനിൻ പ്രവദ യിൽ എഴുതിയ ലേഖനങ്ങളിൽ, പാർട്ടിയിലെ തർക്കങ്ങൾ പരാമർശിച്ചു. 1923 ജനുവരി നാലിന്, നല്ലത് കുറവ്, പക്ഷെ നല്ലത് (Better Fewer, But Better) എന്ന ലേഖനം കണ്ട്, സി സി സെക്രട്ടറിമാരിൽ ഒരാളായ വലേറിയൻ കുയ്‌ബിഷേവ്, ലെനിൻറെ ലേഖനം വച്ച് ഡമ്മി പ്രവദ ഒരെണ്ണം അടിച്ച് ലെനിന് കൊടുക്കാൻ നിർദേശം വച്ചു.

സ്റ്റാലിന് എതിരെ ജോർജിയൻ പ്രശ്‍നം കുത്തിപ്പൊക്കാൻ സഹായികളായ നിക്കോളായ് ഗോർബുനോവ്, ലിഡിയ, മരിയ ലിയാസേവ് എന്നിവരെ ലെനിൻ ജോര്ജിയയിലേക്ക്, പ്രാദേശിക ബോൾഷെവിക് നേതാവ് ബുഡു എംദ്വാനിയുടെ അപേക്ഷ പ്രകാരം അയച്ചിരുന്നു. അവരുടെ റിപ്പോർട്ട് മാർച്ച് മൂന്നിന് കിട്ടി.

ഒക്ടോബർ അട്ടിമറിക്ക് ശേഷം, ലെനിൻ ഓരോ സ്വതന്ത്ര പ്രവിശ്യയെയും ബലമായി ചേർത്താണ്, സോവിയറ്റ് യൂണിയൻ ഉണ്ടാക്കിയത്. സോവിയറ്റ് യൂണിയനുള്ളിൽ സ്വതന്ത്ര പദവി വേണമെന്ന് ജോർജിയൻ ബോൾഷെവിക്കുകൾ വാദിച്ചു. ഫിലിപ് മഖ്റദ്സെ, എംദ്വാനി എന്നിവർ സ്റ്റാലിനെതിരെ പട നയിച്ചു. ജോർജിയ, അര്മേനിയ,അസർബൈജാൻ എന്നിവ ചേർത്ത് ട്രാൻസ് കൊക്കേഷ്യൻ ഫെഡറേഷൻ ആയിരുന്നു, ജോർജിയക്കാരനായ സ്റ്റാലിന്റെ ലക്ഷ്യം. മാർക്‌സ് 1848 ലെ കമ്മ്യൂണിസ്റ്റ് മാനിഫെസ്റ്റോ യിൽ തൊഴിലാളിക്ക് രാജ്യമില്ല (The working men have no country) എന്ന് പറഞ്ഞിരുന്നു. അപ്പോൾ തൊഴിലാളി വർഗ്ഗത്തിൻറെ ലോകവീക്ഷണം എന്താണ് എന്ന് റോസാ ലക്സംബർഗ്, കൗട് സ്‌കി, ഓട്ടോബോയർ, ലെനിൻ, സ്റ്റാലിൻ തുടങ്ങിയവർ തർക്കിച്ചു. 1913 ൽ സ്റ്റാലിൻ മാർക്‌സിസവും ദേശീയ പ്രശ്നവും (Marxism and the National Question) എഴുതി റഷ്യയിൽ ഈ വിഷയത്തിൻറെ അപ്പോസ്തലനായി. ദേശീയ സ്വയം നിർണയാവകാശം, തൊഴിലാളി വർഗത്തെ ഭിന്നിപ്പിക്കുമെന്ന് അയാൾ സിദ്ധാന്തിച്ചു. 1917 ൽ അയാൾ തന്നെ ദേശീയതകളുടെ കമ്മിസാർ ആയി.

നാം ഭാരതീയർ ശ്രദ്ധിക്കണം -കമ്മ്യൂണിസ്റ്റുകൾക്ക് ദേശീയത ഇല്ല; ഉള്ളത്, സാർവ ദേശീയതയാണ്. ലോക രാഷ്ട്രങ്ങളെല്ലാം കമ്മ്യൂണിസം അംഗീകരിച്ചു കഴിയുമ്പോഴേ, അവർക്ക് ദേശീയത ഉണ്ടാകൂ -അസംബന്ധം! ഇന്ത്യയ്ക്ക് സ്വാതന്ത്ര്യം കിട്ടിയതായി തന്നെ കമ്മ്യൂണിസ്റ്റുകൾ അംഗീകരിക്കുന്നില്ല.

1922 ഡിസംബർ 30 ന് ജോർജിയയ്ക്ക് സോവിയറ്റ് യൂണിയനിൽ ചേരുന്ന കരാറിൽ ഒപ്പിടേണ്ടി വന്നു. ജനുവരി 25 ന് പി ബി, എംദ്വാനിയെ പുറത്താക്കി. ജോർജിയയിലെ മിതവാദി കമ്മ്യൂണിസ്റ്റ് സർക്കാർ നിലം പൊത്തി. റഷ്യൻ ദേശീയത, റഷ്യേതര ദേശീയതകൾക്കു മേൽ അടിച്ചേൽപ്പിക്കുന്നതിനെ ലെനിൻ എതിർത്തു. ഈ സംഭവത്തെ തുടർന്ന് സ്റ്റാലിനിൽ നിന്നുള്ള വിച്ഛേദമാണ്, ലെനിൻറെ ഒസ്യത്തിൽ കാണുന്നത്.

കേട്ടെഴുത്തിനിടയിൽ, സ്റ്റാലിൻ ഫോണിൽ ക്രൂപ് സ്കേയയെ ചീത്ത വിളിച്ചു. അവർ ലെനിനോട് പരാതിപ്പെട്ടു.

മാർച്ച് അഞ്ചിന് മരിയയ്ക്ക് ലെനിൻ രണ്ടു കത്തുകൾ പറഞ്ഞു കൊടുത്തു. ഒന്ന് ട്രോട് സ്‌കിക്ക്-ജോർജിയൻ പ്രശ്‍നം സി സി യിൽ കുത്തിപ്പൊക്കാൻ ആയിരുന്നു, ഇത്. രണ്ട് സ്റ്റാലിന്:

എൻറെ ഭാര്യയെ ഫോണിൽ വിളിച്ച് ചീത്ത പറയാനുള്ള തെമ്മാടിത്തം നിങ്ങൾ കാട്ടി. സംഭവം മറക്കാമെന്ന് അവൾ നിങ്ങൾക്ക് വാക്ക് തന്നെങ്കിലും,അത് അവൾ സിനോവീവിനോടും കാമനെവിനോടും പറഞ്ഞിരുന്നു. എനിക്കെതിരെ ചെയ്തത്,ഞാൻ മറക്കില്ല. എൻറെ ഭാര്യയ്ക്ക് എതിരെ ചെയ്തത് എന്തും, എനിക്ക് എതിരെയാണ്. അതുകൊണ്ട്, പറഞ്ഞത് തിരിച്ചെടുത്ത് മാപ്പ് പറഞ്ഞില്ലെങ്കിൽ,നമ്മുടെ ബന്ധം വിച്ഛേദിക്കപ്പെടും.

സ്റ്റാലിൻ സ്വന്തം ഭാര്യ പാർട്ടിയിൽ സജീവമാകേണ്ടെന്ന് പറയുകയും ഭാര്യ തർക്കിക്കുകയും ചെയ്തപ്പോൾ, അവർക്ക് പാർട്ടി കാർഡ് തിരിച്ചു കൊടുത്തത്, ലെനിൻ ആയിരുന്നു.

ഈ കത്ത് സ്റ്റാലിന് കൊടുക്കേണ്ടെന്ന് ക്രൂപ് സ്കേയ ഉൾപ്പെടെ സഹായി സംഘം തീരുമാനിച്ചു. അന്ന് തന്നെ ലെനിൻറെ നില വഷളായി. ഏഴിന് മരിയ കത്ത് സ്റ്റാലിന് കൊടുത്തു. കാമനെവിനും സിനോവീവിനും കോപ്പിയുണ്ടായിരുന്നു. കത്തു വായിച്ച് സ്റ്റാലിൻ പറഞ്ഞു: "ഇത് ലെനിൻ അല്ല, അയാളുടെ രോഗമാണ്."

സ്റ്റാലിൻ മറുപടി എഴുതി: "സഖാവ് എൻറെ ഭാര്യയെ ശകാരിച്ചിരുന്നെങ്കിൽ ഞാൻ ഇടപെടില്ലായിരുന്നു. താങ്കൾ പറഞ്ഞ സ്ഥിതിക്ക്, ഞാൻ നദെഴ് ദ (ക്രൂപ് സ്കേയ) യോട് മാപ്പ് പറയാം."

ഈ കത്ത് കണ്ടാൽ ലെനിൻറെ രോഷം ഇരട്ടിക്കുമെന്ന് കാമനെവ്, സ്റ്റാലിനെ ഉപദേശിച്ചു. കത്ത് തിരുത്തുമ്പോഴേക്കും ഫോണിൽ ലെനിൻറെ സഹോദരി മരിയ ഫോണിൽ സ്റ്റാലിനെ ശകാരിച്ചു.

ഭാര്യയ്‌ക്കൊപ്പം ഒടുവിൽ 

ലെനിൻ വായന നിർത്തിയിരുന്നു; സംസാരവും. അയാൾക്ക് നടക്കാനാവില്ലായിരുന്നു. മറ്റുള്ളവർ എടുത്തു കൊണ്ട് പോകണമായിരുന്നു. മാർച്ച് 10 ന് പക്ഷാഘാതത്താൽ വലതു ഭാഗം തളർന്നു.

പന്ത്രണ്ടാം പാർട്ടി കോൺഗ്രസ് കടന്നു പോയി. ദേശീയ പ്രശ്ന രേഖ സ്റ്റാലിൻ അവതരിപ്പിച്ചു. എംദ്വാനിയും സംഘവും തോറ്റു. ട്രോട് സ്‌കി എതിർത്തില്ല. ഭാവിയിലെ ട്രോട് സ്‌കിയെ പേടിച്ച് സിനോവീവും കാമനെവും സ്റ്റാലിനൊപ്പം നിന്നു. ലെനിൻ, സ്റ്റാലിനെതിരെ അയച്ച കത്തുകൾ പ്രതിനിധി സംഘ നേതാക്കളെ മാത്രം കേൾപ്പിച്ചു.

സ്റ്റാലിനെ സംബന്ധിച്ചിടത്തോളം, ഇനി ലെനിൻ ഉണ്ടാകരുത്.
ജർമനിയിൽ നിന്ന് വന്ന വിദഗ്ദ്ധ ഡോക്ടർ സ്ട്രoപെറ്റ്, ലെനിൻറെ രോഗം, അവസാന ഘട്ടത്തിൽ എത്തിയ സിഫിലിസ് ആണെന്ന് കണ്ടെത്തി. ആഴ്‌സനിക്, അയഡിൻ ചികിത്സ തുടരാൻ നിർദേശിച്ചു. റഷ്യൻ ഡോക്ടർമാർ മേയിലും രോഗം എന്തെന്ന് പൊതു ധാരണയിൽ എത്തിയില്ല. ബ്രിട്ടീഷ് കമ്മ്യൂണിസ്റ്റ് പാർട്ടി, ജെ എം കാർട്ടർ ആൻഡ് കമ്പനിയിൽ നിന്ന് വൈദ്യുത ചക്രക്കസേര അയച്ചു കൊടുത്തു. യുദ്ധത്തിൽ പരുക്കേറ്റ ഏതെങ്കിലും സൈനികന് അത് നൽകാൻ ലെനിൻ ഉത്തരവിട്ടു. കാക്കിയായിരുന്നു, ലെനിൻറെ വേഷം. ആകെ അയാൾ ഉച്ചരിച്ച വാക്കുകൾ, "ഇവിടെ, ഇവിടെ, ഇവിടെ."

ക്രൂപ് സ്കേയ കരഞ്ഞു കൊണ്ടിരുന്നു. അവരോടും മരിയയോടും ലെനിൻ വിഷം ചോദിച്ചു. നിർബന്ധിച്ചപ്പോൾ മരിയ ക്വിനൈൻ കൊടുത്തു.
ലെനിന് ആഗ്രഹം തോന്നി അയാളെ ഒക്ടോബർ 15 ന് ക്രെംലിനിൽ കൊണ്ട് പോയി സ്വന്തം ഓഫിസും സി സി യോഗം കൂടുന്ന മുറിയും കാട്ടിക്കൊടുത്തു. ഓഫിസ് കണ്ട് അയാൾ അസ്വസ്ഥനായി. ലെനിൻ സുഖമായിരിക്കുന്നു എന്ന് ചേക യ്ക്ക് ഡോ പീറ്റർ പാകല്ൻ റിപ്പോർട്ട് കൊടുത്തു. സദാസമയവും ഈ ചാരൻ ലെനിൻറെ ഗോർക്കി വസതിയിൽ ഉണ്ടായിരുന്നു. നവംബറിലും ഡിസംബറിലുമായി ലെനിന് ഏഴ് ആഘാതങ്ങൾ ഉണ്ടായി.

പാർട്ടിയിൽ ഉരുണ്ടു കൂടിയ തർക്കങ്ങൾ അയാൾ അറിഞ്ഞില്ല. ശിശിരത്തിൽ ട്രോട് സ്‌കി, പുതിയ ദിശ (The New Course) എന്ന ലഘുലേഖ എഴുതി. അതിനെ സ്റ്റാലിൻ, കാമനെവ്, സിനോവീവ്, ബുഖാറിൻ എന്നിവർ ചേർന്ന ഔദ്യോഗിക പക്ഷം എതിർത്തു. 1924 ജനുവരിയിലെ 13 -o പാർട്ടി കോൺഗ്രസിൽ ട്രോട് സ്‌കി പക്ഷം തോറ്റു.

ലെനിൻ അവസാനം 

\
ജനുവരി 21 രാവിലെ പത്തരയ്ക്ക് എഴുന്നേറ്റ ലെനിൻ, കുളിമുറിയിൽ പോയി വന്ന് അര കപ്പ് കട്ടൻ കാപ്പി കുടിച്ച്, വീണ്ടും കിടന്നുറങ്ങി. മൂന്നിന് വീണ്ടും അര കപ്പ് കാപ്പിയും സൂപ്പും കുടിച്ചു. ഡോ ഓസിപ്പോവ് പരിശോധിച്ചു. 5 .40 ന് നില വഷളായി. ഡോക്ടർമാരായ ഓസിപ്പോവ്, ഫോർസ്റ്റർ, വേലിസ്ട്രാറ്റോവ്, ഇവരുടെ സഹായി വ്ളാദിമിർ റുകാവിഷ്‌നിക്കോവ്, ക്രൂപ് സ്കേയ, ലെനിൻറെ സഹോദരി മരിയ എന്നിവർ നില വിലയിരുത്തി. ലെനിന് ബോധമറ്റു; ഹൃദയ താളം തെറ്റി. അത് ശരിയാക്കാൻ മരിയ വ്ളാദിമിർ സോറിനോട് കർപ്പൂരം ചോദിച്ചു.

ബുഖാറിൻ എത്തിയപ്പോൾ ഡോ പീറ്ററെ കാണാനില്ലായിരുന്നു. മുകൾ നിലയിലാണ് അയാളെ കണ്ടത്. വിയർത്ത്, വേദന കൊണ്ട് ലെനിൻ നിലവിളിച്ചു. 6.50 ന് ശ്വാസം നിലച്ചു.

ട്രോട് സ്‌കി സുഖുമിയിലേക്ക് വിശ്രമ യാത്രയിൽ ടിഫിലിസിൽ എത്തിയിരുന്നു. വിലാപയാത്ര ശനിയാഴ്ചയാണെന്നും വരേണ്ടെന്നും സ്റ്റാലിൻ അയാളെ അറിയിച്ചു. ആറു നാൾ കഴിഞ്ഞ് മാത്രമായിരുന്നു, സംസ്കാരം. ജഡം എക്കാലവും സൂക്ഷിക്കാൻ ക്രൂപ് സ്കേയയുടെ അഭിപ്രായം നിരാകരിച്ച്, പി ബി അഥവാ സ്റ്റാലിൻ തീരുമാനിച്ചു. ആ ജഡം ഒരു രാഷ്ട്രീയ കവചം ആയിരിക്കും. തൊഴിലാളികൾ ആവശ്യപ്പെട്ടിട്ടാണ് ജഡം സൂക്ഷിക്കുന്നതെന്ന് സ്റ്റാലിൻ കള്ളം പറഞ്ഞു. ജഡം ഐക്യ പ്രതീകം ആയിരിക്കും.

അന്ത്യ യാത്ര/ ഐസക് ബ്രോഡ്‌സ്‌കി 

ജഡം സൂക്ഷിക്കാനുള്ള ലേപന വിദ്യ അറിയുന്നവർ മോസ്‌കോയിൽ ഇല്ലായിരുന്നു. ഖാർകോവിൽ നിന്ന് പാത്തോളജിസ്റ്റ് -അനാട്ടമിസ്റ്റ് വോറൊബീവും സഹായികളും വന്ന്, ഡോ ബി ഐ സ്‌ബർസ്‌കിക്കൊപ്പം ആയിരുന്നു,ലേപനം.***അവർക്ക് ഗവേഷണത്തിന് മൃഗങ്ങൾ,അവയവങ്ങൾ എന്നിവ മരവിപ്പിച്ചേ പരിചയം ഉണ്ടായിരുന്നുള്ളു.

ഈജിപ്തിൽ കെയ്‌റോയ്ക്ക് പുറത്ത്, മരപ്പെട്ടിയിലാക്കി, കൽ പിരമിഡുകളുടെ നിലവറയിൽ ആയിരുന്നു, ഫറവോമാരെ അടക്കം ചെയ്‌തത്‌. ഇത് അങ്ങനെ അല്ല. റെഡ് സ്‌ക്വയറിൽ മാർബിൾ വലയത്തിനുള്ളിൽ. ഓർത്തഡോക്സ് സഭ തന്നെ, വിശുദ്ധന്മാരുടെ എല്ലുകളേ സൂക്ഷിച്ചിരുന്നുള്ളു. പോസ്റ്റ് മോർട്ടത്തിൽ രോഗം, സ്ലെറോസിസ് ആണെന്ന് എഴുതി -പിതാവിന് ഉണ്ടായിരുന്ന രോഗം .ലെനിൻറെ തലച്ചോറിൽ നിന്ന് 30000 ചീളുകൾ എടുത്ത് ബ്രെയിൻ ഇൻസ്റ്റിട്യൂട്ട് സ്ഥാപിച്ചു.

ജനുവരി 28 ന് ഇനെസ്സ ആർമാൻഡിന്റെ മകൾ ഇന്നയ്ക്ക് ക്രൂപ് സ്കേയ എഴുതി: "അദ്ദേഹത്തെ ക്രെംലിനിൽ ജഡമായി സൂക്ഷിക്കാൻ പദ്ധതി വന്നപ്പോൾ, എനിക്ക് രോഷം തോന്നി. ചുവപ്പൻ മതിലിന് കീഴിൽ, സഖാക്കൾക്കൊപ്പം ഒന്നിച്ചു കഴിയാമായിരുന്നു.

ഈ കത്ത്, പൂർണമായും രഹസ്യം എന്നെഴുതി പി ബി സൂക്ഷിച്ചു .
ഇനെസ്സയുടെ അടുത്ത് ലെനിനെ അടക്കണം എന്നായിരുന്നു, ക്രൂപ് സ്കേയയുടെ ആഗ്രഹം.

---------------------------------------

* Inessa , Lenin's Mistress / Michel Pearson
**ഒക്ടോബർ സംഭവം:ആദ്യ പി ബി ചർച്ച സിനോവീവും കാമനെവും മാക്‌സിം ഗോർക്കിയുടെ പത്രത്തിന് ചോർത്തിയതും ബദൽ രേഖ പ്രസിദ്ധീകരിച്ചതും
*** The Secret File of Joseph Stalin:A Hidden Life / Roman Brackman

See https://hamletram.blogspot.com/2019/07/9.html

ഒരു റഷ്യൻ യക്ഷിക്കഥ 9

9.പാർലമെൻറ് ലെനിൻ പിരിച്ചു വിടുന്നു

ലോകത്തിലെ ഏറ്റവും വലിയ ജനാധിപത്യ ധ്വംസകരിൽ ഒരാളാണ്,ലെനിൻ. 'വിപ്ലവ' ശേഷം തിരഞ്ഞെടുപ്പിലൂടെ നിലവിൽ വന്ന നിയമ നിർമാണ സഭയെ ഒരു സമ്മേളനത്തിന് ശേഷം 1918 ജനുവരിയിൽ അയാൾ പിരിച്ചു വിട്ടു.ആ തിരഞ്ഞെടുപ്പിൽ ജനം ബോൾഷെവിക്കുകളെ തള്ളിക്കളഞ്ഞതായിരുന്നു,കാരണം.സ്വന്തം ജീവൻ തന്നെ  അപകടത്തിലാണെന്ന് ശങ്കിച്ച ലെനിൻ,ഏതൊരു ഏകാധിപതിയെയും പോലെ,ഭയത്തിന് അടിമയായി,ശത്രുക്കളെ ഉന്മൂലനം  ചെയ്യുന്ന ഭീകരത രാജ്യമെങ്ങും നടപ്പാക്കി.

ജനം സാർ ചക്രവർത്തിയുടെ ഭരണം തൂത്തെറിഞ്ഞത്,റഷ്യൻ പാർലമെന്റായ ദൂമ പിരിച്ചു വിട്ടത് കൊണ്ടാണ്.കെറൻസ്കിയുടെ താൽക്കാലിക ഭരണ കൂടത്തിനെതിരെ ബോൾഷെവിക്കുകൾ ചാർത്തിയ കുറ്റവും,സഭ സജീവമാക്കാത്തതാണ്.ലെനിൻറെ മാതൃകയായ ഭീകരൻ നെചായേവ് ,ചക്രവർത്തിയുടെ സാക്ഷിക്കൂട്ടിൽ നിന്ന് വാദിച്ചപ്പോൾ ചൂണ്ടിക്കാണിച്ചതും റഷ്യയിൽ മധ്യ കാലഘട്ടത്തിൽ പോലും,സെംസ്‌കി സോബോർ ( Semski Sobor ) എന്ന സഭ ഉണ്ടായിരുന്നതാണ്.
സെംസ്‌കി സോബോർ എന്ന വാക്കിനർത്ഥം,നാടിൻറെ സഭ എന്നാണ്.16,17 നൂറ്റാണ്ടുകളിൽ റഷ്യയിൽ നില നിന്ന നിയമ സഭയാണ്,അത്.അതിന് പകരം,ചക്രവർത്തി നിക്കോളാസ് രണ്ടാമൻ ദൂമ രൂപീകരിച്ചത് 1905 ലാണ്.
ചക്രവർത്തിയോ ഓർത്തഡോക്സ് പാത്രിയർക്കീസോ ആയിരുന്നു,സോബോറിന്റെ അധ്യക്ഷൻ.മൂന്ന് വിഭാഗങ്ങളിൽ നിന്നായിരുന്നു,അംഗങ്ങൾ: പ്രഭുക്കൾ,വൈദികർ,കച്ചവടക്കാരുടെയും ജനത്തിൻറെയും പ്രതിനിധികൾ.ആദ്യ സോബോർ 1549 ൽ ഇവാൻ ദി ടെറിബിൾ രൂപീകരിച്ചു.ചക്രവർത്തിയുടെ തീരുമാനങ്ങൾ അംഗീകരിക്കുന്ന റബർ സ്റ്റാമ്പ് ആയിരുന്നു സഭ.1566 ൽ ഒപ്രിച് നിന  ( Oprichnina ) നിരോധിക്കാൻ ആവശ്യപ്പെട്ട സഭ ചക്രവർത്തിയെ ഞെട്ടിച്ചു.രാഷ്ട്രീയ പൊലീസിനെ വച്ച് ചക്രവർത്തി പരസ്യ വധശിക്ഷയും അടിച്ചമർത്തലും പ്രഭുക്കളുടെ ഭൂമി പിടിക്കലും നടത്തുന്ന നയമായിരുന്നു,ഇത്.

സോഷ്യൽ ഡെമോക്രാറ്റ് പോസ്റ്റർ ,1917 

റൊമാനോവ് വംശം അധികാരമേറിയപ്പോൾ,സഭ ഇല്ലാതായി.1654 ൽ സഭ ചേർന്നത്,30 വർഷത്തിന്‌ ശേഷമായിരുന്നു.1682 ലും 84 ലും ആണ് ഒടുവിൽ സഭ ചേർന്നത്.1922 ൽ ചക്രവർത്തിയെ സ്ഥാന ഭ്രഷ്ടനാക്കിയതിൽ പശ്ചാത്തപിച്ച്,അമൂർ മേഖലയിൽ,പട്ടാള ജനറൽ ആയിരുന്ന എം കെ ഡീയാട്രിക്‌സ്‌,സോബോർ വിളിച്ചു കൂട്ടി.അധ്യക്ഷ സ്ഥാനത്ത് ഗ്രാൻഡ് ഡ്യൂക്ക് നിക്കോളാസിൻറെയും ടൈഖോൻ പാത്രിയർക്കീസിന്റെയും പേരുകൾ വച്ചെങ്കിലും,വന്നില്ല.രണ്ടു മാസം കഴിഞ്ഞ് സഭ ഇല്ലാതായി.
നിയമ നിർമാണ സഭയ്ക്കായുള്ള ജനരോഷത്തോട് ലെനിൻ ആദ്യം പ്രതികരിച്ചത്,തിരഞ്ഞെടുപ്പ് നീട്ടിക്കൊണ്ടായിരുന്നു.നാലഞ്ച് വർഷം ജനത്തെ രാഷ്ട്രീയം പഠിപ്പിച്ച് പാകമാകുമ്പോൾ തിരഞ്ഞെടുപ്പാകാം എന്ന് അയാൾ സിദ്ധാന്തിച്ചു.ആ സമയം കൊണ്ട് വോട്ടർ പട്ടികയിൽ ബോൾഷെവിക്കുകൾ മാത്രം ഉണ്ടാകുന്ന സ്ഥിതി വരും.ഇപ്പോൾ തിരഞ്ഞെടുപ്പ് നടത്തിയാൽ,ഭൂരിപക്ഷം കിട്ടണം എന്നില്ല.ഒരു ബൂർഷ്വാ സംവിധാനം മാത്രമാണ്,പാർലമെൻറ് !

1917 നവംബർ 25 ന് തിരഞ്ഞെടുപ്പ് നടത്തുമെന്ന് നവംബർ 9 ന് ലെനിൻറെ തിട്ടൂരം  ( decree ) വന്നു.മാൽനിൻസ്‌കി കൊട്ടാരത്തിൽ തിരഞ്ഞെടുപ്പ് കമ്മീഷൻ പ്രവർത്തനം തുടങ്ങി.നവംബർ 11 ന് മിലിട്ടറി കമ്മിറ്റി ചെയർ മാൻ പോഡ് വോയ്‌സ്‌കി,പെട്രോഗ്രാഡിൽ അടിയന്തരാവസ്ഥ പ്രഖ്യാപിച്ചു.നഗരത്തെ സൈന്യം വലയം ചെയ്‌തു.പ്രതിപക്ഷത്തെ തിരഞ്ഞെടുപ്പ് പ്രചാരണത്തിൽ നിന്ന് തടയുകയായിരുന്നു,ഉന്നം.പ്രതിപക്ഷത്തിന് പോസ്റ്ററുകൾ തയ്യാറാക്കാൻ ആവശ്യമുള്ളത്ര കടലാസുകൾ കിട്ടാതായി.കമ്മീഷൻ പ്രവർത്തനത്തെ ലെനിൻ ഭരണ കൂടം തടസ്സപ്പെടുത്തി.

കേഡറ്റ് പോസ്റ്റർ,1917 

പട്ടാള മേധാവി ആയിരുന്ന കോർണിലെവിനെ പിന്തുണയ്ക്കുന്ന കേഡറ്റുകൾ,സോഷ്യലിസ്റ്റ് റെവല്യൂഷനറി പാർട്ടി,ബോൾഷെവിക് പാർട്ടി എന്നിവയായിരുന്നു,പ്രധാന കക്ഷികൾ.പെട്രോഗ്രാഡിലെ ഫലം,നവംബർ 30 ന് വന്നു.കേഡറ്റുകൾക്ക് 2,45,006 വോട്ട്.റെവല്യൂഷനറി പാർട്ടിക്ക് 1,52,230.ബോൾഷെവിക്കുകൾക്ക് 4,24,027.ബോൾഷെവിക്കുകൾക്ക് ഭൂരിപക്ഷം.മോസ്‌കോയിലും മറ്റ് ചില നഗരങ്ങളിലും ബോൾഷെവിക്കുകൾക്ക് ഭൂരിപക്ഷം കിട്ടി.പ്രവിശ്യകളിലെ കഥ മറ്റൊന്നായിരുന്നു.റെവല്യൂഷനറി പാർട്ടിക്കായിരുന്നു,ഭൂരിപക്ഷം.ആകെ 4 .17 കോടി വോട്ടിൽ ഈ പാർട്ടിക്ക് 2.08 കോടി കിട്ടി.ബോൾഷെവിക്കുകൾക്ക് 98 ലക്ഷം.മെൻഷെവിക്കുകൾക്ക് ഏതാനും ആയിരം.
ഈ അവസ്ഥയിൽ,ലെനിൻ തിരഞ്ഞെടുപ്പ് കമ്മീഷനെ തടവിലാക്കി.മോസസ് യൂറിറ്റ്സ്‌കിയെ പകരക്കാരനാക്കി.പ്രതിപക്ഷ നേതാക്കൾ വീട്ടു തടങ്കലിൽ ആയി.അച്ചടി ശാലകൾ പൂട്ടിച്ചു.ഡിസംബർ അഞ്ചിന് മിലിട്ടറി കമ്മിറ്റി പിരിച്ചു വിട്ട്,ആ സ്ഥാനത്ത് പ്രതിവിപ്ലവ പ്രതിരോധ വകുപ്പ്,ചേക  ഉണ്ടാക്കി.സിനോവീവും കൂട്ടരും സന്ധിക്കു വേണ്ടി വാദിച്ചെങ്കിലും നടന്നില്ല.

നിയമ നിർമാണ സഭയിലേക്ക് തിരഞ്ഞെടുക്കപ്പെട്ട ഡപ്യുട്ടികൾ ഡിസംബർ 10 ന് മോസ്‌കോയിൽ എത്തി.അടുത്ത നാൾ സമ്മേളനം.ബോൾഷെവിക്കുകൾ രാത്രി തന്നെ,കാതറീൻ രാജ്ഞി വാണിരുന്ന,സമ്മേളനം നടക്കേണ്ട ടോറിഡ് കൊട്ടാരം കൈയടക്കി.ഗേറ്റ് പുറത്തു നിന്ന് പൂട്ടി.ഭടന്മാർ കൊട്ടാരത്തിന് കാവൽ നിന്നു.കൊട്ടാരത്തിനകത്ത് യൂറിറ്റ്സ്‌കിയും 50 പേരും മാത്രം.കേഡറ്റ് പാർട്ടി നേതാക്കളെ അറസ്റ്റ് ചെയ്‌ത്‌ പീറ്റർ പോൾ കോട്ടയിലേക്ക് കൊണ്ട് പോയി.കെറൻസ്കി സർക്കാരിൽ മന്ത്രിമാരായിരുന്ന പ്രൊഫസർ ആൻഡ്രി ഷിംഗറേവ്,ഡോ ഫയദോർ കൊകോഷ്‌കിൻ എന്നിവരെയും അറസ്റ്റ് ചെയ്‌തു.ഇരുവർക്കും ജന സ്വാധീനം ഉണ്ടായിരുന്നു.
അങ്ങനെ,സമ്മേളനം അലസി.ജനുവരി 18 ന് വീണ്ടും ചേരാൻ ലെനിൻ തിട്ടൂരമിറക്കി.

നിയമനിർമ്മാണസഭ,1918 

ജനുവരി 14 ന് ലെനിൻ,മിഖയിലോവ്സ്കി റൈഡിങ് സ്‌കൂളിൽ പുതുതായി രൂപം നൽകിയ സോഷ്യലിസ്റ്റ് ആർമി വിഭാഗത്തോട് സംസാരിച്ചു.ഇവിടെയാണ് ചക്രവർത്തി സേനയെ അവലോകനം ചെയ്‌തിരുന്നത്‌.കവചിത വാഹനങ്ങൾ ഹാളിനെ വലയം ചെയ്‌തു.ഒരു കവചിത വാഹനത്തിൽ ലെനിൻ എത്തിയപ്പോൾ,ആരവങ്ങൾ മുഴങ്ങി.ലെനിൻറെ പ്രസംഗം തീർന്നപ്പോൾ,ചെറിയ കൈയടി ഉണ്ടായെങ്കിലും,ആളുകൾ എഴുന്നേറ്റ് നിന്ന് ആദരിച്ച് പതിവ് പോലെ ശബ്ദം മുഴക്കിയില്ല.പ്രസംഗം നന്നായില്ല.സംഘർഷം ലഘൂകരിക്കാൻ,അമേരിക്കക്കാരനായ ആൽബർട്ട് റീസ്  വില്യംസ് അവിടത്തെ സഖാക്കൾക്ക് വേണ്ടി,ഇപ്പോൾ അഭിവാദ്യം ചെയ്യുമെന്ന് പോഡ് വോയ്‌സ്‌കി അറിയിച്ചു.പത്രപ്രവർത്തകനായ വില്യംസ്,ബോൾഷെവിക്കുകളുടെ ജനസമ്പർക്ക വിഭാഗത്തിൽ പ്രവർത്തിക്കുകയായിരുന്നു.ലെനിൻ പരിഭാഷയ്ക്ക് തയ്യാറായപ്പോൾ,റഷ്യനിൽ പ്രസംഗിക്കാം എന്നായി വില്യംസ്.ക്ഷീണിതനായ ലെനിന് ,തൻറെ പ്രസംഗം നന്നായില്ലെന്ന് അറിയാമായിരുന്നു.വില്യംസ് പ്രസംഗിച്ചു മുന്നേറിയപ്പോൾ,ഇടക്കിടെ പട്ടാളക്കാർ പൊട്ടിച്ചിരിച്ചു,കൈയടിച്ചു.വില്യംസ് ആയി,അന്നത്തെ താരം.

ആൽബർട്ട് റീസ് വില്യംസ് 

യോഗം കഴിഞ്ഞ്,ലെനിൻ നടുമുറ്റത്തേക്ക് നടന്നു.പട്ടാളം അനുഗമിച്ചു.ലെനിൻ,ഫിൻലൻഡിൽ മേൽനോട്ടക്കാരനായിരുന്ന സ്വിസ് കമ്മ്യൂണിസ്റ്റ്  ഫ്രിറ്റ്സ് പ്ലാറ്റനെയും തൻറെ സഹോദരി മരിയയെയും കൂടെ കൂട്ടിയിരുന്നു.റൈഡിങ് സ്‌കൂളിൽ നിന്ന് 50 വാര മഞ്ഞിലൂടെ കാർ നീങ്ങിയപ്പോൾ,മൂന്ന് വെടിയുണ്ടകൾ വിൻഡ് ഷീൽഡ് തകർത്ത് കാറിനുള്ളിലേക്ക് കയറി.പ്ലാറ്റൻ ലെനിൻറെ തല പിടിച്ചു താഴ്ത്തി.ഡ്രൈവർ വേഗം കൂട്ടി,അടുത്ത വളവെടുത്ത്,കാർ നിർത്തി.നിർത്തിയത് വിഡ്ഢിത്തമായിരുന്നു -വീണ്ടും ആക്രമണം നടക്കില്ല എന്ന് ഉറപ്പുണ്ടായിരുന്നില്ല.വെടിയുണ്ടകൾ  വന്നത്,പിന്നിൽ റൈഡിങ് സ്‌കൂളിന്റെ ഭാഗത്തു നിന്ന് തന്നെ ആയിരുന്നു.ലെനിൻ രക്ഷപ്പെട്ടത്,മാർക്സിസത്തിൽ ഇല്ലാത്ത അദ്‌ഭുതം കൊണ്ട് മാത്രമായിരുന്നു.ഡ്രൈവർ പുറത്തിറങ്ങി ടയറുകൾ പരിശോധിച്ചു.ടയർ പൊട്ടിയെങ്കിൽ അപകടമായേനെ.മഞ്ഞിൻറെ പുതപ്പിലൂടെ അവർ ഭരണ കേന്ദ്രമായ സ്‌മോൾനിക്ക് നീങ്ങി.പ്ലാറ്റന്റെ കൈയിൽ നേരിയ പരുക്ക് മാത്രം.ആ പരുക്ക് പിൽക്കാലത്ത് അയാൾ സദാ പ്രദർശിപ്പിച്ചു .

ഫ്രിറ്റ്സ് പ്ലാറ്റൻ 

നാലു ദിവസത്തിന് ശേഷം നിയമ നിർമാണ സഭ ചേർന്നു.രണ്ടായിരം നാവികരും പട്ടാളക്കാരും കൊട്ടാരം വളഞ്ഞു.12 മണി ആയപ്പോൾ ജനക്കൂട്ടം ഇരച്ചെത്തി.പട്ടാളം അതിന് നേരെ നിറയൊഴിച്ചു.എട്ടൊമ്പതു പേർ കൊല്ലപ്പെട്ടു.വീണ്ടും മറ്റൊരു ജനക്കൂട്ടം രൂപപ്പെട്ടു.അതിന് നേരെയും നിറയൊഴിച്ചു.അത്രയും പേർ പിന്നെയും കൊല്ലപ്പെട്ടു.
സഭാംഗങ്ങൾ സമ്മേളനം പുലരും വരെ നീളുമെന്ന് സംശയിച്ച് മെഴുകു തിരികൾ കരുതിയിരുന്നു.ഹാളിൽ ബോൾഷെവിക് അംഗങ്ങളെ കണ്ടില്ല.അവർ കൊട്ടാരത്തിലെ മറ്റൊരു മുറിയിൽ ലെനിനൊപ്പം ചർച്ചയിൽ ആയിരുന്നു-രണ്ടു മണി.ലെനിനൊപ്പം ഭാര്യ ക്രൂപ് സ്കേയയും സഹോദരി മരിയയും സെക്രട്ടറി ബ്രോൻച് ബ്രയെവിച്ചും ഉണ്ടായിരുന്നു.നാലുമണിയോടെ,അവിടെ നിന്ന് ലെനിൻ സമ്മേളന ഹാളിലേക്ക് നടക്കുമ്പോൾ,പിസ്റ്റൾ മുറിയിൽ മറന്നു.ഓവർ കോട്ടിലാണെന്ന് ഓർമിച്ചു തിരിഞ്ഞ് നടന്നു.മുറിയിലെത്തിയപ്പോൾ,പിസ്റ്റൾ കാണാതായിരുന്നു.ലെനിൻ രോഷം കൊണ്ടു.

വിക്റ്റർ ചെർണോവ് 

സമ്മേളനാരംഭത്തിൽ,സോഷ്യലിസ്റ്റ് റെവല്യൂഷനറി പാർട്ടിയിലെ വലതു വലതു വിഭാഗത്തിലുള്ള സെർജി ഷ്വെറ്റ് സോവ് എന്ന മുതിർന്ന അംഗം അധ്യക്ഷനാകണമെന്ന് കീഴ്വഴക്കം ചൂണ്ടിക്കാട്ടി അംഗങ്ങൾ വാദിച്ചു.അദ്ദേഹം എഴുന്നേറ്റ് സമ്മേളനം തുടങ്ങുന്നതായി പ്രഖ്യാപിക്കാൻ ഒരുമ്പെട്ടപ്പോൾ,അയാളെ തള്ളി മാറ്റി,ബോൾഷെവിക് അംഗം യാക്കോവ് സ്വെർദ് ലോവ്,സമ്മേളനം തുടങ്ങുന്നതായി പ്രഖ്യാപിച്ചു.കമ്മ്യൂണിസ്റ്റ് ഇൻറർനാഷനൽ പാടണമെന്ന് ഒരംഗം ആവശ്യപ്പെട്ടപ്പോൾ എല്ലാവരും യോജിച്ചു.അധ്യക്ഷ സ്ഥാനത്തേക്ക് റെവല്യൂഷനറി പാർട്ടി ഇടത് പക്ഷത്തിലെ മരിയ സ്പിരിഡോനോവയും വലതു പക്ഷത്തിലെ വിക്റ്റർ ചെർണോവും മത്സരിച്ചു.തംബോവിലെ ഗവർണറെ വെടിവച്ചു കൊന്ന് ശിക്ഷിക്കപ്പെട്ടവളായിരുന്നു,മരിയ.തിരഞ്ഞെടുപ്പിൽ,244 -151 ന് മരിയ തോറ്റു.
റെവല്യൂഷനറി പാർട്ടി നയം സ്വെർദ് ലോവും ബോൾഷെവിക്കുകളുടേത് ബുഖാറിനും വിശദീകരിച്ചു.രാത്രി 11 ന് സ്വെർദ് ലോവിൻറെ രേഖയിൽ,ബോൾഷെവിക്കുകൾ 136 -237 ന് തോറ്റു.റെവല്യൂഷനറി പാർട്ടിയുടെ പരിപാടി പാർലമെന്റ്‌ അംഗീകരിച്ചു.തങ്ങൾ സമ്മേളനം ബഹിഷ്‌കരിക്കുകയാണെന്ന് അറിയിച്ച് ,ബോൾഷെവിക്കുകൾ ഇറങ്ങിപ്പോയി.

റെഡ് ഗാർഡുകൾ സഭയിൽ/ ബോറിസ് സ്വികോറിൻ 

സമ്മേളനം തുടർന്നു.ചെർണോവ് ഭൂപരിഷ്‌കരണ ബില്ലിൻറെ കരട് അവതരിപ്പിച്ചു.പുതിയ റിപ്പബ്ലിക് നിലവിൽ വന്നതായുള്ള പ്രമേയം അവതരിപ്പിക്കാൻ എഴുന്നേറ്റപ്പോൾ, ഹാളിലെ വിളക്കുകൾ അണഞ്ഞു.പുലർച്ചെ നാലരയോട് അടുത്തിരുന്നു.സമ്മേളനം തുടങ്ങി 13 മണിക്കൂർ പിന്നിട്ടിരുന്നു.അങ്ങനെ,ബഹളത്തിൽ തുടങ്ങി,ഇരുളിൽ ആദ്യസമ്മേളനം ബോൾഷെവിക്കുകൾ അവസാനിപ്പിച്ചു.മണിക്കൂറുകൾ കഴിഞ്ഞ്,പാർലമെൻറ് പിരിച്ചു വിട്ട്,ലെനിൻ തിട്ടൂരം ഇറക്കി.
ആ അട്ടിമറി കഴിഞ്ഞ്,അടുത്ത നാൾ ഉച്ചയോടെ സ്‌മോൾ നിയിൽ ഓൾ റഷ്യൻ സോവിയറ്റ് സെൻട്രൽ എക്സിക്യൂട്ടീവ് കമ്മിറ്റി ചേർന്നു.ലെനിൻ കടന്നു വരുമ്പോൾ,ആറടി അഞ്ചിഞ്ച് ഉയരമുള്ള ബോൾഷെവിക് പാർലമെൻറ് അംഗം ക്രാമനോവ് ഉച്ചത്തിൽ വിളിച്ചു:ഏകാധിപതി നീണാൾ വാഴട്ടെ !

ലെനിൻ പ്രസംഗിച്ചു:പാർലമെന്റിന്റെ നയം താൽക്കാലിക ഭരണ കൂടത്തിന്റേത് തന്നെ.റഷ്യൻ വിപ്ലവം ബൂർഷ്വാ വിപ്ലവത്തിൽ നിൽക്കരുത്.ജനം പറഞ്ഞത് കൊണ്ട് പാർലമെൻറ് സമ്മേളനം വിളിച്ചെന്നേയുള്ളൂ .
ലെനിൻ പറഞ്ഞത് ആർക്കും മനസ്സിലായില്ല.പാർലമെൻറ് തിരഞ്ഞെടുപ്പ് നടത്തണം എന്നത് ബോഷെവിക്കുകളുടെ കൂടി ആവശ്യമായിരുന്നു.അതിൽ ബോൾഷെവിക്കുകൾ തോറ്റപ്പോൾ,ലെനിന് ഇറങ്ങിപ്പോകാമായിരുന്നു.തിരഞ്ഞെടുപ്പ് കമ്മീഷനെ പിരിച്ചു വിട്ടു;തിരഞ്ഞെടുപ്പ് അട്ടിമറിച്ചു,പാർലമെന്റും പിരിച്ചു വിട്ടു.
തൊഴിലാളി സർവാധിപത്യത്തെ  മാർക്സിസ്റ്റ് ചിന്തകൻ കൗട് സ്‌കി വിമർശിച്ചപ്പോൾ,ലെനിൻ അദ്ദേഹത്തെ ചീത്ത വിളിച്ചു:ബൂർഷ്വ,ചെരുപ്പ് നക്കി !
അത് ശരിയായില്ലെന്ന് റോസാ ലക്സംബർഗ് റഷ്യൻ വിപ്ലവം എന്ന പ്രബന്ധത്തിൽ എഴുതി:*
ഇതെല്ലാം നശിപ്പിച്ചു കഴിഞ്ഞാൽ,എന്താണ് ബാക്കി?തിരഞ്ഞെടുപ്പ് വഴി നിലവിൽ വന്ന പ്രതിനിധി സഭകൾക്ക് പകരം,ലെനിനും ട്രോട് സ്‌കിയും സോവിയറ്റുകൾ മാത്രമാണ് യഥാർത്ഥ പ്രതിനിധാനമെന്ന് ഉറപ്പിച്ചിരിക്കുന്നു...ജനാധിപത്യത്തിന് പകരം,ഏകാധിപത്യം ,ബൂർഷ്വാ ഏകാധിപത്യം .ഇത് സോഷ്യലിസ്റ്റ് നയമല്ല.

തൻറെ നടപടിയെ ന്യായീകരിക്കാൻ ലെനിൻ പ്രത്യയ ശാസ്ത്രം മുഴുവൻ അരിച്ചു പെറുക്കി.ഒടുവിൽ 1903 ലെ രണ്ടാം പാർട്ടി കോൺഗ്രസിൽ പ്ലഖനോവ് നടത്തിയ പ്രസംഗത്തിലെ ലാറ്റിൻ ഉദ്ധരണിയിൽ അഭയം  തേടിയെന്ന് ക്രൂപ് സ്കേയ പിന്നീട് ഓർമിച്ചു:Salus revolutionis Suprema.വിപ്ലവത്തിൻറെ വിജയമാണ്,ഏറ്റവും വലിയ നിയമം.( The  Success of revolution is the Supreme Law .).
ഈ വരട്ടുവാദം മുഴുവൻ ലെനിന് ഗുരുവായ ഭീകരൻ നെചായെവിൽ നിന്ന് കിട്ടിയതാണെന്ന് കാണാം.അയാളുടെ വിപ്ലവകാരിയുടെ അനുഷ്ഠാന വിധി ( Catechism of a Revolutionary ) യിലെ പ്രധാന തത്വങ്ങൾ ഇവയാണ്:**

• വിപ്ലവകാരിക്ക് ഒന്നും നോക്കാനില്ല.അയാൾക്ക് താല്പര്യങ്ങളോ വികാരങ്ങളോ ഇല്ല.വിപ്ലവം മാത്രമാണ് ലക്ഷ്യം.സാമൂഹിക ക്രമവുമായി സകല ബന്ധവും അയാൾ വിച്ഛേദിച്ചിരിക്കുന്നു.ധാർമികതയോ സംസ്കാരമോ അയാൾക്കില്ല.അയാൾ സമൂഹത്തെ നശിപ്പിക്കും.
• എല്ലായിടത്തും വിപ്ലവകാരി നുഴഞ്ഞു കയറും.സകലരെയും ചൂഷണം ചെയ്യും.സകലരെയും കാൽകീഴിലാക്കും.സാധാരണക്കാരൻറെ ദുരിതങ്ങൾക്ക് ആക്കം കൂട്ടും.അയാൾ ക്രൂരനായ ക്രിമിനലിൻറെ സഖ്യത്തിലാകും.ആ ക്രിമിനലാണ്,റഷ്യയിലെ യഥാർത്ഥ വിപ്ലവകാരി.

ഈ സിദ്ധാന്തത്തിൻറെ മൂർത്ത രൂപമാണ്,ലെനിൻ.

നെചായേവ് 

പഴയ സഖാവിനെ 1869 ൽ കൊന്ന് റഷ്യ വിട്ട ഭീകരനാണ്,ഈ ഗുരു.ഒന്നാം കമ്മ്യൂണിസ്റ്റ് ഇന്റർനാഷനലിൽ നിന്ന് പുറത്തായ അയാൾ,1872 ൽ സ്വിറ്റ്സർലൻഡിൽ പിടിയിലായി.റഷ്യയിലേക്ക് നാട് കടത്തി.20 കൊല്ലം ശിക്ഷ കിട്ടി.ദസ്തയേവ്സ്കിയുടെ Demons എന്ന നോവലിലെ പ്യോത്തർ വെർഖോവൻസ്‌കി,ഈ ഗുരുവാണ്.അയാളുടെ നിഹിലിസ്റ്റ് പ്രസ്ഥാനത്തിന് എതിരായ നോവലാണ്,അത്.ദസ്തയേവ്സ്കി ലെനിന് പ്രിയങ്കരൻ ആയിരുന്നില്ല.ലെനിൻ എങ്ങനെ ഇരിക്കുമെന്ന് 1917 വരെ റഷ്യക്കാർക്ക് അറിവുണ്ടായിരുന്നില്ല.അത് വരെ പ്രവദ ലെനിൻറെ ചിത്രം അടിച്ചിരുന്നില്ല.1921 ലെ ആഭ്യന്തര യുദ്ധ കാലത്തും അയാളെ അറിയുമായിരുന്നില്ല.ആ വർഷത്തെ പുത്തൻ സാമ്പത്തിക നയം വന്നപ്പോൾ ജനം അയാളെ ശ്രദ്ധിച്ചു.

അടിമ കുടുംബത്തിൽ ജനിച്ച നെചായേവ്,18 വയസിൽ ചരിത്രകാരൻ മിഖയിൽ പോഗോഡിൻറെ സഹായി ആയി.അധ്യാപക പരിശീലനം നേടി.നിക്കോളായ് ചേർനിഷെവ്‌സ്‌കിയുടെ എന്താണ് ചെയ്യേണ്ടത് ?( 1863 )എന്ന നോവലിലെ റാഖ്മെറ്റോവിനെപ്പോലെ പായയിൽ ഉറങ്ങി.കറുത്ത റൊട്ടി  തിന്നു.ആ നോവൽ ലെനിനും പ്രിയമായിരുന്നു -ആ ശീർഷകം കടമെടുത്താണ് ലെനിൻറെ മുഖ്യ പ്രബന്ധം.തുർഗനേവിന്റെ Fathers and Sons എന്ന നോവലിന് മറുപടി ആയിരുന്നു,ഈ നോവൽ.

സ്‌കൂളിൽ രാത്രി മെഴുകുതിരി വെട്ടത്തിൽ വിപ്ലവം വായിച്ചിരുന്ന നെചായേവ് അതിന് വേറ സസൂലിച്ചിനെയും ക്ഷണിച്ചിരുന്നു.അതിന് പോയെങ്കിലും പ്രണയം അവൾ നിരസിച്ചു.വിപ്ലവകാരിക്ക് വികാരങ്ങൾ പാടില്ല എന്ന് അയാൾ എഴുതിയത്,ഇത് കൊണ്ടാകാം.ജനീവയിൽ സൈദ്ധാന്തികൻ ബക്കുനിൻറെ വത്സല ശിഷ്യനായി.നെചായേവിന്റെ അനുഷ്ഠാന വിധി യിലാണ്,ലക്ഷ്യം മാർഗത്തെ സാധൂകരിക്കും എന്ന അപകടകരമായ വാചകം പ്രത്യക്ഷപ്പെട്ടത്.

------------------------------------------

*Rosa Luxemberg / The Russian Revolution,1918,Chapter 6 

**Sergy Nechayev / Catechism of a Revolutionary,1869.Quoted in Stalin:The First in -depth Biogrophy  based on Explosive New Documents from Russia's Secret Archives,1997 / Edward Radzinsky 

See https://hamletram.blogspot.com/2019/07/8.html