ഒരു റഷ്യൻ യക്ഷിക്കഥ 8

8 .ലെനിൻ തൊഴിലാളികൾക്ക് എതിരെ 

ലോക ചരിത്രത്തിൽ ലെനിന്റേതു പോലെ ഒരു വൃത്തികെട്ട ഭരണം വേറെ ഉണ്ടായിട്ടില്ല.

അയാൾ സിംഹാസനം ഏറിയ ശേഷം,ഭരണം വിലയിരുത്താനും മറ്റും പാർട്ടി യോഗങ്ങൾ നടന്നത് വല്ലപ്പോഴുമാണ്.യോഗങ്ങൾ നടക്കുമ്പോൾ എന്തെങ്കിലും വായിച്ചു കൊണ്ടിരിക്കും.ഒടുവിൽ സിനോവീവോ കാൾ റാഡെക്കോ ചോദിക്കും:" സഖാവിൻറെ അഭിപ്രായമെന്ത്?"
അപ്പോൾ പ്രസംഗിക്കും.

യോഗത്തിന് എത്തുന്നവരോട് പുച്ഛമായിരുന്നു.രണ്ട് പേരെ മാത്രം അയാൾ പരിഗണിച്ചു:ട്രോട് സ്‌കി,ഷെർഷിൻസ്കി.പോളിഷ്,ജർമൻ സോഷ്യലിസ്റ്റ് നേതാവായ റാഡെക് ( 1885 -1939 )  1917 ന് ശേഷം റഷ്യയിൽ എത്തി.ജൂതൻ.ശരിപ്പേർ കരോൾ സോബൽസോഹൻ .സ്റ്റാലിന്റെ കാലത്ത് കൊന്നു.ലെനിൻറെ രഹസ്യ പൊലീസ് ചേക യുടെ മേധാവി ആയിരുന്നു,ഫെലിക്സ് ഷെർഷിൻസ്കി ( Felix Dzerzhinsky )പോളിഷ് സമ്പന്ന കുടുംബത്തിലെ അംഗം.വിമത ശബ്‌ദം ഉയർത്തുന്നവരെ ഉന്മൂലനം ചെയ്യുകയായിരുന്നു,അയാളുടെ പണി.കൊല ഇഷ്ടപ്പെട്ടത് കൊണ്ടല്ല,സഖാക്കളുടെ പാപം സഹിക്കാൻ കഴിയാത്തത്‌ കൊണ്ടാണ് കൊന്നതെന്ന് അയാൾ പറഞ്ഞു പോന്നു.

കേന്ദ്ര തടി കമ്മിറ്റി ( Central timber committee ) മേധാവി എന്ന നിലയിൽ തൊഴിൽ / പ്രതിരോധ സോവിയറ്റിൽ അംഗമായിരുന്ന സൈമൺ ലീബർമാൻ ഓർത്തിരുന്ന ഒരു സംഭവമുണ്ട്:വന മേഖലകളിലെ കർഷകർ നിശ്ചിത തൂക്കം വിറക് കേന്ദ്രത്തിന് നൽകാൻ ക്വോട്ട വച്ചിരുന്നു.പലപ്പോഴും അത് കിട്ടിയില്ല.എന്ത് പരിഹാരം എന്ന ചർച്ചയിൽ ഷെർഷിൻസ്കി പറഞ്ഞു:" കർഷകർ തന്നില്ലെങ്കിൽ ഇരട്ടി ഫോറസ്റ്റർമാർ നൽകണമെന്ന് നിശ്ചയിക്കാം;തന്നില്ലെങ്കിൽ വെടി വയ്ക്കാം".

ഷെർഷിൻസ്കി 

അങ്ങനെ നിരവധി ഫോറസ്റ്റർമാർ കൊല്ലപ്പെട്ടപ്പോൾ,ആ തൊഴിലിൽ അനുഭവ ജ്ഞാനം ഉള്ളവർ ഇല്ലാതായി.1919 വസന്തത്തിൽ പുട്ടിലോവ് ഫാക്റ്ററി തൊഴിലാളികൾ പെട്രോഗ്രാഡ് തെരുവുകളിൽ ലെനിന് എതിരെ പ്രകടനം നടത്തി.അവർ വിളിച്ചു പറഞ്ഞു:" ലെനിനും കുതിര മാംസവും തുലയട്ടെ,ഞങ്ങൾക്ക് സാറും ( ചക്രവർത്തി ) പന്നി മാംസവും മതി".
തൊഴിലാളികളെ വെടിവച്ചു കൊന്നു,ഫാക്ടറികൾ പൂട്ടി.ഫാക്റ്ററികൾക്ക് വേണ്ട അസംസ്‌കൃത വസ്‌തുക്കൾ,ലെനിൻ ഉയർത്തിയ ഭീകരത കാരണം കിട്ടിയില്ല.സമ്പദ് രംഗം താറുമാറായി.1921 ഫെബ്രുവരിയിൽ ലെനിൻ സുഹൃത്ത് ഗ്ളെബ് കിർഷിഷാനോവ്‌സ്‌കിക്ക് എഴുതി:"നാം യാചകരായി;പട്ടിണിയിൽ നാം അനാഥരായ പിച്ചക്കാരായി".
അലക്‌സാണ്ടർ ഷ്ല്യാപ്നിക്കോവും അലക്‌സാൻഡ്ര കൊലോന്റെയും നേതൃത്വം നൽകിയ ' തൊഴിലാളി പ്രതിപക്ഷം',ഫാക്റ്ററികൾ തൊഴിലാളികൾക്ക് കൊടുക്കുക എന്ന മുദ്രാവാക്യം ഉയർത്തി.
നടക്കാത്ത ഒക്ടോബർ വിപ്ലവത്തെപ്പറ്റിയാണ്,' ലോകത്തെ പിടിച്ചു കുലുക്കിയ പത്തു ദിവസങ്ങൾ എന്ന വ്യാജ നിർമിതി അമേരിക്കൻ പത്ര പ്രവർത്തകൻ ജോൺ റീഡ് ലോകത്തിന് നൽകിയത്.ലോകത്തെ ഇന്നും പിടിച്ചു കുലുക്കുന്ന നാല് സംഭവങ്ങൾ ലെനിൻറെ ദുർഭരണത്തിൽ നടന്നു.പോളണ്ടുമായുള്ള യുദ്ധം,തംബോവ്  കലാപം,ക്രോൺസ്റ്റാറ്റ് കലാപം,1921 -22 ലെ ക്ഷാമം.

പോളണ്ടുമായുള്ള യുദ്ധം 

1919 ഫെബ്രുവരി മുതൽ 1921 മാർച്ച് വരെയായിരുന്നു,റഷ്യ തോറ്റ പോളണ്ടുമായുള്ള യുദ്ധം.രണ്ടാം പോളിഷ് റിപ്പബ്ലിക്കും യുക്രേനിയൻ റിപ്പബ്ലിക്കും പ്രോട്ടോ സോവിയറ്റ് യൂണിയനും തമ്മിൽ,ഇന്നത്തെ പശ്ചിമ യുക്രൈൻ,ബെലാറസ് പ്രദേശങ്ങൾക്ക് വേണ്ടി ആയിരുന്നു,യുദ്ധം.സോവിയറ്റ് റഷ്യയും സോവിയറ്റ് യുക്രൈനും ചേർന്നതാണ്,പ്രോട്ടോ സോവിയറ്റ യൂണിയൻ.
വിപ്ലവകാരിയായ പോളണ്ട് ഭരണത്തലവൻ ജോസഫ് പിൽസുഡ്സ്‌കി,പോളണ്ടിന്റെ നേതൃത്വത്തിൽ മധ്യ,പൂർവ യൂറോപ്യൻ സാമ്രാജ്യത്തിനായി,പോളണ്ടിന്റെ അതിർത്തികൾ വികസിപ്പിക്കാൻ ഒരുമ്പെട്ടു.പോളണ്ടിനെ ജർമനിക്കുള്ള പാലമാക്കി റഷ്യൻ സാമ്രാജ്യ സ്ഥാപനമായിരുന്നു,ലെനിൻറെ ലക്ഷ്യം.1919 ൽ പോളണ്ട് പശ്ചിമ യുക്രൈനും 1920 ഏപ്രിലിൽ കീവും പിടിച്ചു.റഷ്യൻ സേന പോളിഷ് സൈന്യത്തെ വാഴ്‌സയിലേക്ക് ഓടിച്ചു.വാഴ്സ യുദ്ധത്തിൽ പോളണ്ട് ജയിച്ചു.1920 ഒക്ടോബറിൽ ഇരുരാജ്യങ്ങളും വെടിനിർത്തൽ പ്രഖ്യാപിച്ചു.1921 മാർച്ച് 18 ന് ഒപ്പിട്ട റിഗ സന്ധി പ്രകാരം,പോളണ്ടിന് അതിനു കിഴക്കുള്ള 200 കിലോമീറ്റർ പ്രദേശം അധികം കിട്ടി.

പോളിഷ് പ്രതിരോധ നിര,1920 

പോളണ്ടിന്റെ വിജയം,റഷ്യൻ സ്വാധീനം ജർമനിയിലും ഹംഗറിയിലും റൊമാനിയയിലും വ്യാപിക്കാതെ കാത്തു.1989 ൽ പോളണ്ടിന്റെ ഭരണത്തിൽ നിന്ന് കമ്മ്യൂണിസ്റ്റുകൾ പുറത്താകും വരെ,ഈ യുദ്ധം പാഠപുസ്തകങ്ങളിൽ വന്നില്ല.ആരെങ്കിലും പ്രശ്‍നം ഉയർത്തിയാൽ,യുദ്ധത്തിന് കാരണം,'വിദേശ ഇടപെടൽ ' ആണെന്ന് പറഞ്ഞു പോന്നു.രണ്ടു രാജ്യങ്ങളെക്കൊണ്ടും ഇത് പറയിച്ചത്,കമ്മ്യൂണിസ്റ്റ് നേതാക്കൾ ആയിരുന്നു.മാർക്‌സിസം,സാമ്രാജ്യത്വത്തിന് ഇന്ധനമാകും എന്ന് ഗുണപാഠം.

തംബോവ് കലാപം 

ആഭ്യന്തരയുദ്ധ കാലത്ത്,റഷ്യയിൽ 1920 -21 ൽ ഉണ്ടായ,ലോകത്തിലെ ഏറ്റവും വലിയ കർഷക കലാപം.ഇതിൽ 1,40,000 പേർ കൊല്ലപ്പെട്ടു.
മോസ്‌കോയിൽ നിന്ന് 300 മൈൽ തെക്കുകിഴക്ക് തംബോവ് ഒബ്ലാസ്റ്റ്,വോറൊനേഷ് ഒബ്ലാസ്റ്റ് ,മേഖലയിൽ ആണ് ഇതുണ്ടായത്.സോഷ്യലിസ്റ്റ് റവലൂഷനറി പാർട്ടി നേതാവായ അലക്‌സാണ്ടർ ആന്റോനോവ് ആണ് നേതൃത്വം നൽകിയത്.ആന്റോനോവ് ലഹള എന്നും അറിയപ്പെടുന്നു.

ലെനിൻ ഭരണം ഏറിയതോടെ,ബോൾഷെവിക്കുകൾ അധിക ധാന്യം പിടിച്ചെടുക്കൽ ( Prodrazryorstka ) നയം നടപ്പാക്കി.ഒരു മേഖലയിലെ കർഷകർ ഉൽപാദിപ്പിക്കുന്ന ധാന്യം,കാർഷിക ഉൽപന്നങ്ങൾ എന്നിവയിൽ,വീട്ടാവശ്യത്തിനുള്ളതു കഴിച്ച്,ബാക്കി നഗര വിതരണത്തിനായി ചെറിയ തുക നൽകി പിടിച്ചെടുക്കുന്ന പരിപാടി ആയിരുന്നു,ഇത്.തംബോവിൻറെ ക്വോട്ട 1.8 കോടിയിൽ നിന്ന് 2 .7 കോടി പൂഡ്‌സ് ആയി ഉയർത്തി.ഒരു പൂഡ്‌സ് 16 .38 കിലോ.
ഇതിൽ രോഷാകുലരായ കർഷകർ 1920 ഓഗസ്റ്റ് 19 ന് ഖിട്രോവോയിൽ കലാപം തുടങ്ങി.ജനത്തിന് മുന്നിൽ,കാരണവന്മാരെ തല്ലി റെഡ് ആർമി ധാന്യം പിടിച്ചതായിരുന്നു,പ്രകോപനം.തംബോവ് കർഷകർ യൂണിയൻ ഉണ്ടാക്കി സ്വന്തമായി കോൺഗ്രസ് വിളിച്ചുകൂട്ടി സോവിയറ്റ് അധികാരത്തെ നിരാകരിച്ചു;സ്വന്തമായി നിയമ നിർമാണ സഭ ഉണ്ടാക്കി.സഭ,പ്രായപൂർത്തി വോട്ടവകാശവും ഭൂപരിഷ്കരണവും പ്രഖ്യാപിച്ചു.ഭൂമി മുഴുവൻ കർഷകർക്ക് വിട്ടു നൽകുകയായിരുന്നു,ഉന്നം.

ആന്റോനോവ് ( നടുവിൽ )

കലാപകാരികളായ കർഷകരുടെ എണ്ണം 1920 ഒക്ടോബറിൽ 50000 ആയിരുന്നു.ഇവർക്കൊപ്പം റെഡ് ആർമിയിൽ നിന്ന് വിരമിച്ച ഭടന്മാരും ചേർന്നു,ഇക്കൂട്ടർ സോവിയറ്റ് രഹസ്യ പൊലീസ് ആയ ചേക യിൽ നുഴഞ്ഞു കയറി.70000 വരുന്ന കലാപകാരികളെ റെഡ് ആർമി,അതിൻറെ മേധാവി മിഖയിൽ തുഖാചേവ്സ്കിയുടെ നേതൃത്വത്തിൽ നേരിട്ടു.ബോൾഷെവിക്കുകൾ കർഷകർക്ക് നേരെ രാസായുധങ്ങൾ പ്രയോഗിച്ചു.ഏഴു ഉന്മൂലന ക്യാമ്പുകൾ ഭരണകൂടം തുറന്നു.1921 ഫെബ്രുവരി രണ്ടിന് ഭരണകൂടം ധാന്യം പിടിക്കൽ നിർത്തി .അന്റോനോവിനെ 1922 ൽ കൊന്നു.പത്താം കോൺഗ്രസിന് മുൻപ് ഈ മേഖലയിൽ,നികുതി ( Prodnalog ) ഏർപ്പെടുത്തി.കോൺഗ്രസ് ഈ നയം അംഗീകരിച്ചു.
കർഷകരായ കലാപകാരികളെ ബോൾഷെവിക്കുകൾ,കാട്ടുകള്ളന്മാർ എന്ന് വിളിച്ചു.കലാപ കാലത്ത്,കസാൻ മൊണാസ്ട്രിയുടെ വിന്റർ ചർച്,പ്രാദേശിക ചേക ആസ്ഥാനമാക്കി.അത് തംബോവ് സൈനിക കമ്മിസാരിയറ്റിന്റെ ആർകൈവ്സ് ആയി.1933 ൽ പ്രാദേശിക ഭരണകൂടം കലാപ രേഖകൾക്ക് തീയിട്ടു.തീ നിയന്ത്രണാതീതമായപ്പോൾ,വെള്ളമൊഴിച്ചു ;മണ്ണ് വിതറി.അൾത്താരയിൽ തീയിട്ടില്ല.അതിനാൽ,1982 ൽ കുറെ രേഖകൾ കിട്ടി.
തംബോവിലെ പാർട്ടി മേധാവി അലക്‌സാണ്ടർ ഷ്ലിക്റ്റർ ,ലെനിനെ നേരിട്ട് വിളിച്ച ശേഷമാണ്,പട്ടാളത്തെ അയച്ചത്.

കലാപത്തെ ആധാരമാക്കി,2011 ൽ ആൻഡ്രി സ്മിർനോവ് Once Upon a time there Lived a Simple Woman എന്ന സിനിമയെടുത്തു.അലക്‌സാണ്ടർ സോൾഷെനിത്സിൻറെ Apricot Jam and Other Stories ൽ യൗവനത്തിൽ കലാപകാരികളെ നേരിട്ട ജനറലിന്റെ കഥയുണ്ട്.

ക്രോൺസ്റ്റാറ്റ് കലാപം 

സോവിയറ്റ് ബാൾട്ടിക് നാവിക വ്യൂഹത്തിൻറെ താവളമായ ഫിൻലൻഡ്‌ ഉൾക്കടലിലെ കോട്ട്ലിൻ ദ്വീപിലുള്ള നാവികക്കോട്ടയാണ്,ക്രോൺസ്റ്റാറ്റ്.55 കിലോമീറ്റർ അകലെയുള്ള പെട്രോഗ്രാഡിൻറെ കാവൽപ്പുര.അവിടെ സ്റ്റെപ്പാൻ പെട്രിചെങ്കോയുടെ നേതൃത്വത്തിൽ 1921 മാർച്ചിൽ ആയിരുന്നു,നാവിക കലാപം.നാവികരും നാട്ടുകാരുമായി 10000 പേരെ റെഡ് ആർമി വെടിവച്ചു കൊന്നു.

റഷ്യയുടെ സമ്പദ് രംഗം താറുമാറായിരുന്നു.വ്യവസായോത്പാദനം കുത്തനെ താണു.ഒന്നാം ലോകയുദ്ധകാലത്ത് നിന്ന് 1921 ൽ ഖനികളുടെയും ഫാക്റ്ററികളുടെയും ഉൽപാദനം 20 ശതമാനത്തിലേക്ക് താണു.മറ്റു ചില മേഖലകൾ മരവിച്ചു.പരുത്തി ഉൽപാദനം വെറും 5 %,ഇരുമ്പ് 2 %.ഒപ്പം 1920 ലെ വരൾച്ചയും 1921 ലെ ക്ഷാമവും.കർഷകർ പാടങ്ങൾ ഉഴുതില്ല.1921 ഫെബ്രുവരിയിൽ നൂറിലധികം കർഷക കലാപങ്ങൾ ഉണ്ടായി.പെട്രോഗ്രാഡ് തൊഴിലാളികൾ പണിമുടക്കി.റൊട്ടി റേഷൻ മൂന്നിലൊന്നായി.
1921 ഫെബ്രുവരി 26 ന് ക്രോൺസ്റ്റാറ്റിലെ നാവിക പ്രതിനിധികൾ പെട്രോഗ്രാഡിൽ എത്തി സ്ഥിതി വിലയിരുത്തി.28 ന് ബാൾട്ടിക് കപ്പലുകളായ പെട്രോപാവ്ലോസ്‌ക്,സേവാസ്റ്റോപോൾ എന്നിവയിലെ നാവികർ അടിയന്തര യോഗം ചേർന്ന് 15 ആവശ്യങ്ങൾ അടങ്ങിയ പ്രമേയം അംഗീകരിച്ചു.നിലവിലുള്ള സോവിയറ്റുകൾ തൊഴിലാളി,കർഷക താൽപര്യങ്ങൾ സംരക്ഷിക്കാത്തതിനാൽ,സോവിയറ്റുകളിലേക്ക് രഹസ്യ ബാലറ്റ് വഴി പുതിയ തിരഞ്ഞെടുപ്പ്,ആവിഷ്കാര സ്വാതന്ത്ര്യം,യൂണിയൻ സ്വാതന്ത്ര്യം,തടവുകാരുടെ മോചനം,സായുധ സേനകളിൽ പാർട്ടി നിരോധനം,റേഷൻ സമത്വം,കർഷക വാതന്ത്ര്യം എന്നിവയായിരുന്നു ആവശ്യങ്ങൾ.മാർച്ച് ഒന്നിലെ പൊതുയോഗത്തിൽ ബാൾട്ടിക് കമ്മിസാർ മിഖയിൽ കാലിനിൻ പങ്കെടുത്തു.16000 നാവികർ കാലിനിന്റെ  ഭീഷണിക്ക് വഴങ്ങിയില്ല.ഏഴിന് റെഡ് ആർമി നാവികരെ ആക്രമിച്ചു.17 ന് ബോൾഷെവിക്കുകൾ എത്തി.അവരും സൈന്യവും ചേർന്ന് 10000 പേരെ കൊന്നൊടുക്കി.12 ദിവസത്തെ കലാപം അമർച്ച ചെയ്ത ശേഷം,ബോൾഷെവിക്കുകൾ പാരീസ് കമ്മ്യൂണിന്റെ 50 വർഷം കൊണ്ടാടി.1200 -2168 കലാപകാരികളെ ഉന്മൂലനം ചെയ്‌തു.
കലാപത്തിന് ശേഷം ലെനിൻ പറഞ്ഞു:" ഒരു മിന്നൽ പോലെ ക്രോൺസ്റ്റാറ്റ് സത്യം വെളിവാക്കി."

പെട്രിചെങ്കോ  

'യുദ്ധ കമ്മൂണിസം ' നിർത്തി ലെനിൻ പുത്തൻ സാമ്പത്തിക നയം കൊണ്ട് വന്നു.ലോകവിപ്ലവം ഉടൻ ഉണ്ടാവില്ലെന്ന് അയാൾ തിരിച്ചറിഞ്ഞു.കലാപ നേതാവായ പെട്രോചെങ്കോ കർഷക കുടുംബത്തിൽ നിന്നായിരുന്നു.നാവികരിൽ മുക്കാൽ പങ്കും തെക്കുകിഴക്ക് നിന്നുള്ള പുത്തൻ കർഷക യുവാക്കൾ ആയിരുന്നു.സ്വാതന്ത്ര്യം ആഗ്രഹിച്ചതായിരുന്നു,കുറ്റം.
കലാപശേഷം രക്ഷപ്പെട്ട് ഫിൻലൻഡിൽ എത്തിയ പെട്രിചെങ്കോ  അവിടെ ചാരനായി 1941 ൽ അറസ്റ്റിലായി.അയാളെ 1944 ൽ സോവിയറ്റ് യൂണിയനിലേക്ക് നാട് കടത്തി.പത്തു കൊല്ലം തടവിൽ കിടന്ന് മരിച്ചു.8000 പേർ ഫിൻലൻഡിൽ അഭയം തേടി.1917 ൽ 30 ലക്ഷം വ്യവസായ തൊഴിലാളികൾ ഉണ്ടായിരുന്നത്,കലാപശേഷം 12,40,000  ആയി കുറഞ്ഞു-58 .7% ഇടിവ്.കർഷകരുടെ എണ്ണം 21 ലക്ഷത്തിൽ നിന്ന് 34000 ആയി -98.59 % ഇടിവ്.
ലൂയി ഫിഷർ God that Failed ( 1949 ) എന്ന പുസ്തകത്തിൽ,കലാപത്തിൻറെ അനന്തര ഫലം ഇങ്ങനെ രേഖപ്പെടുത്തി:മുൻപ് സഖാക്കളും അനുഭാവികളും പാർട്ടി വിടുക മാത്രമായിരുന്നു;ക്രോൺസ്റ്റാറ്റിന് ശേഷം,അവർ പാർട്ടി വിരുദ്ധരായി.

1921 -22 ലെ ക്ഷാമം 

വോൾഗ,യുറാൾ നദീ മേഖലകളിലായിരുന്നു,ക്ഷാമം.ഒരു കോടിയോളം മനുഷ്യർ ക്ഷാമത്തിൽ മരിച്ചു.മനുഷ്യൻ,മനുഷ്യനെ തിന്നുന്ന നിലയുണ്ടായി.ഒന്നാം ലോകയുദ്ധം,റഷ്യൻ ആഭ്യന്തര യുദ്ധം എന്നിവ വഴി റയിൽ ഗതാഗതം താറുമാറായതും സമ്പദ് രംഗം ശോഷിച്ചതും ബോൾഷെവിക്കുകളുടെ ധാന്യം പിടിച്ചെടുക്കൽ മൂലം കർഷകർ ഭക്ഷ്യോൽപാദനം ഉപേക്ഷിച്ചതും വോൾഗയിലെ വെള്ളപ്പൊക്കവും ക്ഷാമത്തിന് മുൻപത്തെ വരൾച്ചയുമാണ് കാരണങ്ങൾ;കുലാക്കുകൾ ഭക്ഷണം പൂഴ്ത്തി എന്ന് ബോൾഷെവിക്കുകൾ പ്രചരിപ്പിച്ചു.
മാക്‌സിം ഗോർക്കിയുടെ അഭ്യർത്ഥന മാനിച്ച്,അമേരിക്കൻ വ്യവസായിയും പിന്നീട് പ്രസിഡൻറുമായ  ഹെർബർട്ട് ഹൂവറുടെ എ  ആർ എ ( American Relief Administration ) റഷ്യയിൽ ഭക്ഷ്യ വസ്‌തുക്കൾ എത്തിച്ചു."അമേരിക്കൻ ഭക്ഷണം കുട്ടികകൾക്ക് മാത്രം കൊടുത്താൽ മതി  എന്ന് ലെനിൻറെ തിട്ടൂരം വന്നു.

1921 ക്ഷാമം,യുക്രൈനിലെ കുട്ടി 

ക്ഷാമം,ക്രിസ്ത്യൻ സഭക്കെതിരെ നീങ്ങാൻ അവസരമാണെന്ന് ലെനിൻ 1922 മാർച്ച് 19 ന് പൊളിറ്റ് ബ്യുറോയ്ക്ക് എഴുതി.ഓർത്തഡോക്സ് സഭയുടെ 45 ലക്ഷം ഗോൾഡൻ റൂബിളിൻറെ സ്വത്ത് കണ്ടുകെട്ടി അതിൽ പത്തു ലക്ഷം ദുരിതാശ്വാസത്തിന് ചെലവാക്കി.
ക്രോൺസ്റ്റാറ്റ് കലാപത്തിന് ശേഷം നടന്ന പത്താം പാർട്ടി കോൺഗ്രസ്,റഷ്യയിൽ അനുസരണ കർക്കശമാക്കാൻ തീരുമാനിച്ചു.ചേക യ്ക്ക് അളവറ്റ അധികാരം നൽകി.മെൻഷെവിക്കുകളുടെയും സോഷ്യലിസ്റ്റുകളുടെയും അവശിഷ്ടങ്ങൾ കൂടി,ചേക വെടി വച്ച് തീർത്തു.

ഷെർഷിൻസ്കി 

ലെനിൻ 1917 ഡിസംബർ 20 ന് മിലിട്ടറി കമ്മിറ്റി പിരിച്ചു വിട്ട് സൃഷ്ടിച്ചതാണ്,ചേക .നിയമനിർമാണ സഭ നിലവിൽ വരുന്ന അടിയന്തര സാഹചര്യം പറഞ്ഞായിരുന്നു,സൃഷ്ടി.' ഉരുക്ക് ഫെലിക്സ്' എന്നറിയപ്പെട്ട ഫെലിക്‌സ് ഷെർഷിൻസ്കി ( 1877 -1926 ) മേധാവി ആയി.മരണം വരെ തുടർന്നു.കത്തോലിക്കനായ അയാളുടെ കുടുംബത്തിന് വലിയ തോട്ടമുണ്ടായിരുന്നു.തോട്ടത്തിൽ അയാളുടെ സഹോദരി 12 വയസിൽ വെടിയേറ്റ് മരിച്ചു.വെടി വച്ചത് ഷെർഷിൻസ്‌കിയാണോ സഹോദരൻ സ്റ്റാനിസ്ലാവ് ആണോ എന്ന് ഇനിയും തീരുമാനം ആയിട്ടില്ല.
പോളണ്ട് ഭരണത്തലവൻ പിൽസുഡ്സ്‌കിയും ഷെർഷിൻസ്കിയും ഒരേ സ്‌കൂളിലാണ് പഠിച്ചത്.1904 ൽ സ്വിറ്റ്‌സർലൻഡിൽ ഷെർഷിൻസ്കിയുടെ കൈയിലാണ്,രോഗിയായ കാമുകി ജൂലിയ ഗോൾഡ് മാൻറെ മരണം.അയാൾ വിഷാദ രോഗിയായി.1905 ലെ വിപ്ലവം അയാളെ അതിൽ നിന്ന് രക്ഷിച്ചു.ആറാം പാർട്ടി കോൺഗ്രസിൽ കേന്ദ്ര കമ്മിറ്റിയിൽ എത്തി.ഒക്ടോബർ അട്ടിമറിക്ക് ലെനിൻ വിളിച്ച 12 പേരുടെ രഹസ്യ യോഗത്തിൽ ഷെർഷിൻസ്കി ഉണ്ടായിരുന്നു.ലൈനിനൊപ്പം നിന്ന അയാൾ ലുബിയങ്ക തടവറയിലേത് ഉൾപ്പെടെ നിരവധി നിലവറകളിൽ ഉന്മൂലനം നടപ്പാക്കി.വർഗ്ഗവും വിപ്ലവ പൂർവ ചരിത്രവും നോക്കി ആയിരുന്നു,ശിക്ഷ.അയാളുടെ ലുബിയങ്ക ഓഫിസ് ചുമരിൽ റോസാ ലക്സംബർഗിൻറെ ചിത്രം ഉണ്ടായിരുന്നു.

See https://hamletram.blogspot.com/2019/07/7.html

ഒരു റഷ്യൻ യക്ഷിക്കഥ 7

7.ജർമനി അയച്ച വിപ്ലവം 

ജനകീയ ഭരണകൂടത്തെ അട്ടിമറിക്കാൻ ലെനിൻ അവസാന തീരുമാനമെടുത്തത്,റഷ്യയിൽ തിരിച്ചെത്തി,കാര്പോവ്കയിലെ 31 നമ്പർ മുറിയിൽ ആയിരുന്നു.റഷ്യൻ സോഷ്യൽ ഡെമോക്രാറ്റിക് പാർട്ടിയിലെ ബോൾഷെവിക് വിഭാഗത്തിലെ 12 പേരുടെ രഹസ്യ യോഗം അദ്ദേഹം വിളിച്ചു:ലെനിൻ,ട്രോട് സ്‌കി,സിനോവീവ്,കാമനെവ്,സ്വേദ്ലോവ്,സെർഷിൻസ്‌കി,സ്റ്റാലിൻ,യുറിറ്റ്‌സ്‌കി,ബുബ്നോവ്,സോകോൾനിക്കോവ്,ലോമോവ്,അലക്‌സാൻഡ്ര കൊളോൻടെ.വാർവര യാക്കോവ് ലിയേവ മിനിറ്റ്സ് എഴുതി;സുഖാനേവിന്റെ ഭാര്യ ചായയും സാൻഡ് വിച്ചും നൽകി.

സിനോവീവ് ആയിരുന്നു,ലെനിൻറെ ഏറ്റവും അടുത്തയാൾ.
തീരുമാനത്തെ എതിർത്ത സിനോവീവും കാമനെവും അടുത്ത രാവിലെ ബദൽ രേഖ തയ്യാറാക്കി,ഗോർക്കിയുടെ പത്രത്തിൽ അച്ചടിക്കാൻ കൊടുത്തു.31 ന് അത്,അച്ചടിച്ചു വന്നു.അകത്തെ ചർച്ചയിൽ പറഞ്ഞ കാര്യങ്ങൾ പുറത്തറിയിക്കുന്നത്,ഗുരുതരമായ പാർട്ടി വ്യതിയാനമാണ്.ലെനിൻ അവരോട് പൊറുത്തില്ല.അടുപ്പം കാരണം,കൊന്നില്ല.

ലെനിൻ അടച്ച ട്രെയിനിൽ എത്തുന്നു,ഏപ്രിൽ 16 ,1917 

അന്നത്തെ യോഗത്തിൽ,ഏഴംഗ പൊളിറ്റ് ബ്യുറോയെ തിരഞ്ഞെടുത്തു:ലെനിൻ,സിനോവീവ്,കാമനെവ്,ട്രോട് സ്‌കി,സ്റ്റാലിൻ,സൊകോൾനിക്കോവ്,ബുസ്‌നോവ്.
ഫിൻലൻഡിൽ നിന്ന് ലെനിൻ എത്തിയത്,ഒക്ടോബർ 20 നായിരുന്നു."വൈകിക്കുന്നത് മരണമാണ് " ( To delay is death ) എന്ന് പീറ്റർ ദി ഗ്രേറ്റ് പറഞ്ഞത് ലെനിന് അറിയാമായിരുന്നു.ജൂലൈ കലാപത്തിന് ശേഷമാണ്,ലെനിൻ പെട്രോഗ്രാഡിൽ നിന്ന് ഫിൻലൻഡിലേക്ക് രക്ഷപ്പെട്ടത്.ജർമ്മനിക്കെതിരെ ജൂൺ 16 ന് താൽക്കാലിക പ്രധാനമന്ത്രി കെറൻസ്കി യുദ്ധം പ്രഖ്യാപിച്ചിരുന്നു.മുന്നണിയിൽ നിന്ന് പെട്രോഗ്രാഡിൽ എത്തിയ സൈനികർ വീണ്ടും യുദ്ധത്തിന് പോകാൻ വിസമ്മതിച്ചു.അവർ കൂറുമാറി ബോൾഷെവിക് പക്ഷത്തായി.അവരും ക്രോൺസ്റ്റാറ്റിലെ നാവിക വ്യൂഹത്തിൽ കലാപം നടത്തി തിരിച്ചു വന്ന നാവികരും ബോൾഷെവിക്കുകളും ചേർന്നാണ്,കലാപത്തിന് വട്ടം കൂട്ടിയത്.ട്രോട് സ്‌കി അറസ്റ്റിലായി.

ഏറ്റവും അവികസിതവും ദരിദ്രവുമായ രാഷ്ട്രമായാണ് റഷ്യയെ പടിഞ്ഞാറൻ യൂറോപ്പ് കണ്ടിരുന്നത്.കര്ഷകരാ യിരുന്നു,കൂടുതൽ.വ്യവസായ തൊഴിലാളികൾ ന്യൂന പക്ഷം.റഷ്യയിൽ മാത്രമായിരുന്നു,ഭൂവുടമകൾക്ക് അന്ന് അടിമകൾ ഉണ്ടായിരുന്നത്.യൂറോപ്പിലെ മറ്റ് രാഷ്ട്രങ്ങൾ മധ്യ കാലഘട്ടത്തിൽ തന്നെ അടിമത്തം അവസാനിപ്പിച്ചിരുന്നു.റഷ്യയിൽ അടിമത്തം നിരോധിച്ചത് 1861 ൽ മാത്രമാണ്.1890 -1910 ൽ പെട്രോഗ്രാഡ്,മോസ്‌കോ എന്നീ റഷ്യൻ നഗരങ്ങളിൽ ജനസംഖ്യ ഇരട്ടിച്ചു.1854 -56 ലെ ക്രിമിയൻ യുദ്ധം മുതലുള്ള യുദ്ധങ്ങൾ റഷ്യയെ ദാരിദ്ര്യത്തിൽ ആഴ്ത്തി.ഭക്ഷ്യ ക്ഷാമം കൊടുമ്പിരിക്കൊണ്ടു.1905 ലെ വിപ്ലവത്തിന് ശേഷം സാർ ചക്രവർത്തി പൊതുസഭയായ ദൂമ ഇടക്കിടെ പിരിച്ചു വിട്ടു.1914 ഓഗസ്റ്റിൽ സെർബുകൾക്ക് വേണ്ടി റഷ്യ ഒന്നാം ലോകയുദ്ധത്തിൽ പങ്കു ചേർന്നത് കൂനിന്മേൽ കുരുവായി .1915 ൽ ചക്രവർത്തി തന്നെ യുദ്ധ മുന്നണിയിലേക്ക് പോയി.അദ്ദേഹത്തിൻറെ അസാന്നിധ്യത്തിൽ അലക്‌സാൻഡ്ര രാജ്ഞി,ഗ്രിഗറി റാസ്‌പുട്ടിനെ അന്തഃപുരത്തിലേക്ക് എടുത്തു.ഭരണം നിയന്ത്രിച്ച അയാളെ,1916 ഡിസംബർ 30 ന് പ്രഭു വർഗം കൊന്നു.മിതവാദികൾ വിപ്ലവകാരികൾക്കൊപ്പമായി.ഈ പശ്ചാത്തലത്തിൽ ആയിരുന്നു,1917 ഫെബ്രുവരി വിപ്ലവം.

റാസ്‌പുടിൻ 

ഇതുവഴി വന്ന കെറൻസ്കിയുടെ താൽക്കാലിക ഭരണ കൂടം അഭിപ്രായ സ്വാതന്ത്ര്യം,നിയമത്തിനു മുന്നിൽ സമത്വം,തൊഴിലാളികൾക്ക് സംഘടനാ സ്വാതന്ത്ര്യം എന്നിവ ഉറപ്പു വരുത്തിയെങ്കിലും യുദ്ധക്കെടുതിയിൽ ജനം വലഞ്ഞു.കർഷകർ കൃഷിയിടങ്ങൾ കൊള്ളയടിച്ചു.ഭക്ഷ്യ കലാപങ്ങൾ വാർത്ത അല്ലാതായി.ഫെബ്രുവരി 27 ന് തൊഴിലാളികൾ ഡപ്യുട്ടികളെ തിരഞ്ഞെടുത്ത് പെട്രോഗ്രാഡ് സോവിയറ്റ് ഉണ്ടാക്കി.അതിൽ ഭൂരിപക്ഷം,മെൻഷെവിക്കുകൾ ആയിരുന്നു.അവർ താൽക്കാലിക ഭരണകൂട ആസ്ഥാനമായ ടോറിഡ് കൊട്ടാരത്തിൽ തന്നെ യോഗം വിളിച്ചു.ജനാധിപത്യ പുനഃസ്ഥാപനം,മത വിവേചനം അവസാനിപ്പിക്കൽ,നിയമനിർമാണ സഭയിലേക്ക് തിരഞ്ഞെടുപ്പ് എന്നിവ ആയിരുന്നു ആവശ്യങ്ങൾ.കാമനെവ് ഉൾപ്പെടെ പല ബോൾഷെവിക്കുകളും താൽക്കാലിക ഭരണകൂടത്തെ തുണച്ചു.സോവിയറ്റിൽ മാത്രമല്ല,പെട്രോഗ്രാഡ്,മോസ്‌കോ എന്നിവിടങ്ങളിലും മെൻഷെവിക്കുകൾക്കായിരുന്നു,ഭൂരിപക്ഷം.
എന്നാൽ,ജൂലൈ കലാപത്തിന് ശേഷം ബോൾഷെവിക്കുകൾക്ക് ശക്തി കൂടി.ഫെബ്രുവരിയിൽ 24000 അംഗങ്ങൾ മാത്രം ഉണ്ടായിരുന്ന സ്ഥാനത്ത്,സെപ്റ്റംബറിൽ അത് രണ്ടു ലക്ഷമായി.നഗരങ്ങളിലും ഭൂരിപക്ഷം കിട്ടി.ഓഗസ്റ്റിൽ പട്ടാള മേധാവി കോർണിലോവ് അട്ടിമറിക്ക് ശ്രമിക്കുകയും കെറൻസ്കി ബോൾഷെവിക്ക് പിന്തുണ തേടി അവർക്ക് ആയുധങ്ങൾ നൽകുകയും ചെയ്‌തതോടെ,ഭരണകൂടം ഉന്തിയാൽ തകരുമെന്ന നില വന്നു.സെപ്റ്റംബർ ആദ്യം,തടവിലായിരുന്ന ബോൾഷെവിക്കുകളെ മോചിപ്പിച്ചു.മോചിതനായ ട്രോട് സ്‌കി,പെട്രോഗ്രാഡ് സോവിയറ്റ് ചെയർമാനായി.

പാർവുസ്,ട്രോട് സ്‌കി,ദ്യുഷ് ,1906 

ഫിൻലൻഡിൽ നിന്ന് ലെനിനെ തങ്ങളുടെ പ്രദേശം വഴി അടഞ്ഞ ട്രെയിനിൽ റഷ്യയിൽ എത്തിക്കാൻ ജർമൻ രഹസ്യ പൊലീസ് തീരുമാനിച്ചത്,ലെനിൻ റഷ്യയിൽ കുഴപ്പങ്ങൾ ഉണ്ടാക്കിക്കോളും എന്ന തോന്നലിൽ ആയിരുന്നു.1905 ലെ ഗാപോൺ അച്ചനെപ്പോലെ,മാർക്സിസ്റ്റ് വിപ്ലവ ഗ്രന്ഥങ്ങളിൽ കാണാത്ത ഒരു കഥാപാത്രമാണ്,ആ തന്ത്രം മെനഞ്ഞത് -മാർക്സിസ്റ്റ് സൈദ്ധാന്തികനും ജർമൻ ചാരനുമായ അലക്‌സാണ്ടർ പാർവുസ്.ലെനിന് പണവും മറ്റു സൗകര്യങ്ങളും എത്തിച്ചിരുന്നത്,പാർവുസ് ആയിരുന്നു എന്നാണ് സൂചന.ലെനിനെ പാർവുസ് 1900 ൽ മ്യുണിക്കിലും 1915 ൽ ബേണിലും 1917 ഏപ്രിൽ 13 ന് സ്റ്റോക്ക്ഹോമിലും കണ്ടിരുന്നു.ഇസ്‌ക്ര എന്ന പത്രമിറക്കാൻ ലെനിനെ പ്രേരിപ്പിച്ചത്,പാർവുസ് ആയിരുന്നു.പത്രം ഇറങ്ങിയത് ജർമനിയിൽ നിന്നാണ് ;പത്രം പിടിക്കാൻ ഗുരു പ്ലഖനോവിനെ ലെനിൻ നിരാകരിക്കുകയും ചെയ്‌തിരുന്നു.1905 ലെ വിപ്ലവ ശേഷം,ജനീവയിൽ നിന്ന് ട്രോട് സ്‌കി, പെട്രോഗ്രാഡിലേക്ക് പോകുന്നതിനു പകരം,പാർവുസിനെ കാണാൻ മ്യുണിക്കിലേക്കാണ് പോയത്.പാർവുസിന്റേതായിരുന്നു,ട്രോട് സ്‌കി പിന്നീട് എഴുതിയ,സുസ്ഥിര വിപ്ലവം ( Permanent Revolution ) എന്ന സിദ്ധാന്തം.
വൈറ്റ് റഷ്യയിലെ ബരേസിനോയിൽ ജൂത കുടുംബത്തിൽ ജനിച്ച പാർവുസിൻറെ ശരിപ്പേർ ഇസ്രായേൽ ലാസറേവിച് ഹെൽപ്ഹാൻഡ് എന്നായിരുന്നു.വിപ്ലവകാരിയും സമ്പന്നനുമാവുക എന്നതായിരുന്നു,ലക്ഷ്യം.അയാൾ രണ്ടും സാധിച്ചു.യൗവനത്തിൽ അലക്‌സാണ്ടർ എന്ന് പേര് മാറ്റി.അലക്‌സാണ്ടർ ഹെൽപ്ഹാൻഡ് എന്ന പേരിൽ കച്ചവടം നടത്തി.അലക്‌സാണ്ടർ പാർവുസ് എന്ന പേരിൽ മാർക്‌സിസ്റ്റ് സൈദ്ധാന്തിക പ്രബന്ധങ്ങൾ എഴുതി.സൈദ്ധാന്തിക ലോകത്ത്,റോസാ ലക്സംബർഗ് പോലും,അയാളെ ജീനിയസ് ആയാണ് കണ്ടത്.

പാവപ്പെട്ട കുടുംബത്തിലായിരുന്നു,ജനനം.അച്ഛൻ കൊല്ലനായിരുന്നു.കുട്ടിക്കാലത്ത് വീട് കത്തിച്ചാമ്പലായപ്പോൾ,കുടുംബം ഒഡേസയിലേക്ക് മാറി.ഇന്ന് യുക്രൈനിലാണ്,ഒഡേസ.ബേസൽ സർവകലാശാലയിൽ നിന്ന് പൊളിറ്റിക്‌സിൽ ഡോക്റ്ററേറ്റ് നേടിയ പാർവുസ്,ജർമ്മനിയിലേക്ക് കുടിയേറി,റോസാ ലക്സംബർഗിനെ കണ്ടു.ജർമനി അയാൾക്ക് പൗരത്വം നൽകിയില്ല." കുറഞ്ഞ ചെലവിൽ പിതൃഭൂമി കണ്ടെത്താനാണ് എൻറെ ശ്രമം",അയാൾ റോസയോട് പറഞ്ഞു.1904 -1905 ലെ ജപ്പാനുമായുള്ള യുദ്ധത്തിൽ റഷ്യ തോൽക്കും എന്ന പാർവുസിൻറെ പ്രവചനം ശരിയായപ്പോൾ ജർമനിക്ക് അയാളോട് മതിപ്പ് തോന്നി.ഒരു രാജ്യത്തിന് പുറത്തു നടക്കുന്ന യുദ്ധം,ആ രാജ്യത്ത് കലാപത്തിന് ഉപയോഗിക്കാം എന്ന പാർവുസിൻറെ സിദ്ധാന്തമാണ്,ട്രോട് സ്‌കി,സുസ്ഥിര വിപ്ലവ ത്തിൽ പ്രയോഗിച്ചത്.1917 ലെ ഏപ്രിൽ സിദ്ധാന്തങ്ങളിൽ ( April Theses ) ലെനിൻ ഇത് ഉപയോഗിച്ചു.(ഒന്നാം ലോകയുദ്ധ കാലത്ത് എം എൻ റോയ് തുടങ്ങിയവർക്ക് ജർമനി പണം നൽകിയതും ഓർക്കാം ).

തുർക്കിയിൽ ആയുധ വ്യാപാരത്തിൽ ഇടനിലക്കാരനായിരിക്കെ,പാർവുസ് ജർമൻ സ്ഥാനപതി ഹൻസ് ഫ്രയർ വോൺ വാൻഗൻഹെയ്‌മുമായി അടുത്തു.സഖ്യ കക്ഷികൾക്കിടയിൽ വിപ്ലവ അഞ്ചാം പത്തികളെ സൃഷ്ടിക്കുന്നതിൽ തൽപരനായിരുന്നു,അയാൾ.പൊതുപണിമുടക്ക് വഴി റഷ്യയെ തളർത്താനാകുമെന്ന് പാർവുസ് സ്ഥാനപതിയെ ബോധിപ്പിച്ചു.സ്ഥാനപതി,പാർവുസിനെ ബെർലിനിലേക്ക് അയച്ചു.1915 മാർച്ച് 15 ന് പാർവുസ്,ജർമൻ നേതൃത്വത്തിന് മുന്നിൽ 20 പേജ് പദ്ധതി അവതരിപ്പിച്ചു:റഷ്യയിൽ വൻ രാഷ്ട്രീയ സമരങ്ങൾക്കുള്ള പദ്ധതി ( A Presentation of Massive Political Strikes in Russia ).ബോൾഷെവിക്കുകളെ ഉപയോഗിച്ച് റഷ്യയെ രണ്ടാക്കുക എന്നതായിരുന്നു,പദ്ധതി.വംശീയ വിഘടന വാദികൾ,സാർ ഭരണത്തെ എതിർക്കുന്ന എഴുത്തുകാർ എന്നിവരും പദ്ധതിയിൽ പെട്ടു.പാർവുസ് ജർമൻ സോഷ്യൽ ഡെമോക്രാറ്റിക് പാർട്ടി സൈദ്ധാന്തികനായി.സ്വിസ് സോഷ്യലിസ്റ്റ് ഫ്രിസ്‌ പ്ലാറ്റന്റെ മേൽനോട്ടത്തിൽ,1917 ഏപ്രിലിൽ ജർമൻ ഇന്റലിജൻസിനൊപ്പം പാർവുസ്,ലെനിനെയും 30 വിപ്ലവകാരികളെയും സ്വിറ്റ്‌സർലൻഡിൽ നിന്ന് ജർമനിയും സ്വീഡനും വഴി ട്രെയിനിൽ അയച്ചു.കോപ്പൻഹേഗൻ കേന്ദ്രമാക്കി,പോഷക കമ്പനികൾ വഴിയാണ്,പെട്രോഗ്രാഡിൽ ബോൾഷെവിക്കുകൾക്ക് പണം എത്തിച്ചത്.1905 ലും 1917 ലും പാർവുസ് പെട്രോഗ്രാഡിൽ എത്തി.

പാർവുസ് 

സോഷ്യലിസ്റ്റ് ലോകം പാർവുസിനെ വെറുക്കുന്ന ഒരു സംഭവമുണ്ട്:ഗോർക്കിയുമായി അദ്ദേഹത്തിൻറെ The Lower Depths എന്ന നാടകം കളിക്കാൻ പാർവുസ് ഒരു കരാറുണ്ടാക്കി.ലാഭത്തിൻറെ 25% ഗോർക്കിക്ക് നൽകും.500 വേദികളിൽ നാടകം കളിച്ചിട്ടും,ഗോർക്കിക്ക് ഒന്നും കൊടുത്തില്ല.1,30,000  ഗോൾഡ് മാർക്ക് പാർവുസ് മോഷ്ടിച്ചതായി വാർത്ത പരന്നപ്പോൾ,റോസാ ലക്സംബർഗ് ഇടപെട്ട്,ഗോർക്കിയെ ശാന്തനാക്കി.കുറെ നാൾ കഴിഞ്ഞ് പാർവുസ് പണം കൊടുത്തു.ബെർലിനിലെ പീക്കോക് ദ്വീപിലെ 32 മുറിയുള്ള കൊട്ടാര സദൃശമായ വസതിയിലായിരുന്നു,പാർവുസിൻറെ മരണം.രണ്ടു മക്കളും സോവിയറ്റ് നയതന്ത്ര രംഗത്തായിരുന്നു.ട്രോട് സ്‌കി എഴുതിയ സോവിയറ്റ് ചരിത്രത്തിൽ,ശങ്കകൾക്ക് മറുപടി പറയാൻ ശ്രമം ഉണ്ടെങ്കിലും,1917 ലെ 'വിപ്ലവ 'ത്തിൽ ജർമൻ രഹസ്യ പൊലീസിൻറെ പങ്ക് നില നിൽക്കും.
ജർമനി ലെനിനെ റഷ്യയിൽ എത്തിക്കും മുൻപ്,റാസ് ലിവ്,ഹെൽസിങ് ഫോഴ്‌സ് എന്നിവിടങ്ങളിൽ,ഒരു വയ്‌ക്കോൽ പാടത്തും പൊലീസ് മേധാവിയുടെ വീട്ടിലും വച്ചാണ്,ലെനിൻ ഭരണ കൂടവും വിപ്ലവവും എഴുതിയത്.വയ്‌ക്കോൽ പാടത്തിൻറെ ശാന്തതയും പൊലീസ് ഭീകരതയും മൂടിനിൽക്കുന്ന ആ പുസ്തകത്തിൽ ഇല്ലാത്തത്,യുക്തിയാണ്.സ്വപ്നത്തിൻറെയും ഭ്രാന്തിൻറെയും നൂൽപ്പാലത്തിൽ കഴിയുന്ന ഒരു രോഗിയെ ആ പുസ്തകത്തിൽ കാണാം.വിപ്ലവാനന്തര സമൂഹത്തിൽ അതിക്രമങ്ങൾ ഉണ്ടാകുമെന്ന് ലെനിൻ പറയുന്നു അവയെ അമർച്ച ചെയ്യേണ്ടതില്ല.ജനം സ്വയം അത് ചെയ്യും.ചൂഷണമാണ്,അതിക്രമത്തിന് കാരണം.ചൂഷണം കൊഴിയുന്നതോടെ,അതിക്രമങ്ങളും കൊഴിയും.എത്ര വേഗം കൊഴിയുമെന്ന് പറയാൻ ആവില്ല.കൊഴിയുന്നതോടെ,ഭരണകൂടവും കൊഴിയും !

ഈ ഭ്രാന്തൻ സിദ്ധാന്തം ലെനിൻ,എംഗൽസിന്റെ ആന്റി ഡ്യുറിങി ൽ നിന്ന് എടുത്തതാകാം.എംഗൽസ് പറയുന്നു:" ഭരണകൂടം കൊഴിയുമ്പോഴാണ് ചരിത്രം തുടങ്ങുന്നത്.അപ്പോഴേ മനുഷ്യൻ സ്വതന്ത്രൻ ആകൂ ".ലെനിൻ പറയുന്നു:" ഭരണകൂടം ഉള്ളിടത്തോളം,സ്വാതന്ത്ര്യം ഇല്ല ;സ്വാതന്ത്ര്യം ഉള്ളപ്പോൾ ഭരണകൂടവും ഇല്ല ."

സ്വാതന്ത്ര്യം എന്ന മഹത്തായ ആശയത്തെ ഇത്ര വികലമായി അവതരിപ്പിക്കുന്നയാൾ,വികലമായ മാനസിക ഘടന ഉള്ളയാളായിരിക്കും.
ഈ കൊഴിഞ്ഞു പോക്കിനെ 1918 ൽ ബുഖാറിൻ ചോദ്യം ചെയ്തപ്പോൾ,അത് വലിയ കാര്യമല്ല എന്നായിരുന്നു,ലെനിൻറെ മറുപടി.ഈ ഭ്രാന്തൻ രചനയ്ക്ക് ലെനിൻ നെചായേവ്,ബക്കുനിൻ എന്നിവരുടെ ജൽപനങ്ങളും സ്വീകരിച്ചിരിക്കാം.പുസ്തകത്തിനായി തയ്യാറാക്കിയ കുറിപ്പുകളുടെ മാർജിനിൽ ബക്കുനിൻറെ പേരുണ്ട്.പാരീസ് കമ്മ്യൂണിന്റെ കാലത്ത്,മാർക്‌സ് എഴുതിയ കത്തുകളിൽ ഒന്നിലെ ഈ വാചകം ലെനിനെ സ്വാധീനിച്ചിരിക്കാം:കമ്മ്യൂണിസ്റ്റ് ഘടന ( Communard ) ഉദ്യോഗസ്ഥ -സൈനിക ഘടനയെ തട്ടിത്തകർക്കും -ഈ ഭൂഖണ്ഡത്തിൽ ജനകീയ വിപ്ലവത്തിനുള്ള പ്രാഥമിക ഉപാധി ഇതാണ് ( 1871 ഏപ്രിൽ ).
1917 സെപ്റ്റംബർ 25 -27 ൽ ലെനിൻ എഴുതിയ രണ്ടു കത്തുകൾ,റഷ്യയിലെ ജനാധിപത്യ ഭരണകൂടത്തെ മറിച്ചിടുമെന്ന് ഉറപ്പിച്ചു:ഇപ്പോൾ നാം അധികാരം പിടിച്ചില്ലെങ്കിൽ,ചരിത്രം നമുക്ക് മാപ്പ് നൽകില്ല;പെട്രോഗ്രാഡിലും മോസ്കോയിലും ഒരേസമയം അധികാരം പിടിക്കുക -ഒന്നിച്ചായില്ലെങ്കിൽ,മോസ്‌കോയിൽ തുടങ്ങണം.
ലളിതമായാണ് വിപ്ലവ പദ്ധതി ലെനിൻ ഇവിടെ വരച്ചത്-ടെലഗ്രാഫ് ഓഫിസുകൾ പിടിക്കുക;ഉദ്യോഗസ്ഥരെ തടവിലാക്കുക,പീറ്റർ /പോൾ കോട്ടയിൽ സേനയെ വിന്യസിക്കുക.
സെപ്റ്റംബർ ഒടുവിൽ ലാറ്റുക് എന്ന പത്രപ്രവർത്തകന്റെ വീട്ടിൽ ക്രേന്ദ്ര കമ്മിറ്റി അംഗം അലക്‌സാണ്ടർ ഷോട്ട് മാൻ ലെനിനെ കണ്ടു.വിപ്ലവം വഴി കെറൻസ്കി സർക്കാരിൻറെ കറൻസി നോട്ടുകൾക്ക് വിലയില്ലാതായാൽ,എന്ത് ചെയ്യുമെന്ന് ഷോട്ട് മാൻ ചോദിച്ചു."നാം പത്രം ഓഫീസുകളിലെ പ്രസുകളിൽ അടിക്കും ",ലെനിൻ പറഞ്ഞു.പൊക്കം കുറഞ്ഞ ആ മനുഷ്യൻ,എത്ര പാപ്പരായിരുന്നു !

ഷോട്ട് മാൻ 

പാർട്ടി കൂടെ നിന്നില്ലെങ്കിൽ,സ്വന്തം നിലയ്ക്ക് അധികാരം പിടിക്കും എന്ന് വ്യക്തമാക്കിക്കൊണ്ട് ,ഒക്ടോബർ 12 ന് ലെനിൻ കേന്ദ്ര കമ്മിറ്റിയിൽ നിന്ന് രാജിവച്ചു.ഒക്ടോബർ 21 ന് അയാൾ എഴുതി:റഷ്യൻ വിപ്ലവത്തിൻറെയും ലോക വിപ്ലവത്തിൻറെയും വിജയം,രണ്ടോ മൂന്നോ ദിവസത്തെ മാത്രം ആശ്രയിച്ചിരിക്കുന്നു.
അത്ര തന്നെ വേണ്ടി വന്നില്ല.വെറും 20 മണിക്കൂറിൽ ഭരണകൂടം വീണു.
ബ്രിട്ടനും ജർമനിയും സമാധാനസന്ധിയിൽ എത്തുമെന്ന് കിംവദന്തി ഉണ്ടായിരുന്നു.അങ്ങനെ വന്നാൽ,അവർ വെവ്വേറെ റഷ്യയെ ആക്രമിക്കുമെന്നും ബോൾഷെവിക്കുകൾ ക്ഷൗരം ചെയ്യേണ്ടി വരുമെന്നും ഏകാധിപതിക്ക് തോന്നി.അധികാരദാഹി അടങ്ങിയില്ല.
ഒക്ടോബർ 24 നും 25 നും ( നമ്മുടെ നവംബർ 6-7 ) ഇടയിൽ ഏകാധിപതിക്ക് ദരിദ്രജനം സിംഹാസനം ഒരുക്കി.

ലെനിൻ അധികാരമേറിയ ശേഷം,നിയമനിർമാണ സഭാ തിരഞ്ഞെടുപ്പുകളിൽ അയാളുടെ ബോൾഷെവിക്കുകൾക്ക് കിട്ടിയത്,24 % മാത്രം വോട്ടായിരുന്നു.പെട്രോഗ്രാഡിനും മോസ്‌കോയ്ക്കും പുറത്ത്,ബോൾഷെവിക്കുകൾക്ക് വോട്ടില്ല എന്ന് തെളിഞ്ഞു.അപ്പോൾ ലെനിൻ രാജി വയ്‌ക്കേണ്ടതായിരുന്നു.പകരം അയാൾ,ബോൾഷെവിക്കുകൾ അല്ലാത്തവരെ സോവിയറ്റ് അംഗത്വത്തിൽ നിന്ന് പുറത്താക്കി.1918 ജനുവരിയിൽ നിയമ നിര്മാണസഭ പിരിച്ചു വിട്ടു.1918 ജൂലൈ 16 ന് സാർ ചക്രവർത്തി കുടുംബത്തെ ഉന്മൂലനം ചെയ്‌തു.
നിയമ നിർമാണ സഭ പിരിച്ചു വിട്ടത്,ജനാധിപത്യ ധ്വംസനം ആയിരുന്നു എന്ന് മാർക്സിസ്റ്റ് ചിത്രകാരി റോസാ ലക്സംബർഗ് എഴുതി.ഭരണകൂടമുള്ളപ്പോൾ മനുഷ്യന് സ്വാതന്ത്ര്യമില്ല എന്നെഴുതിയ ഏകാധിപതി മനുഷ്യനെ അറിഞ്ഞില്ല.

See https://hamletram.blogspot.com/2019/07/6.html

ഒരു റഷ്യൻ യക്ഷിക്കഥ 6

6.ഗോർക്കി എഴുതി,ലെനിൻ വഞ്ചകൻ !

മാക്‌സിം ഗോർക്കി ഏറ്റവും മഹാനായ എഴുത്തുകാരനാണെന്ന് മാർക്സിസ്റ്റുകൾ വിശ്വസിക്കുന്നു.ഗോർക്കിക്ക് ലെനിനെപ്പറ്റി ഒരു മതിപ്പും ഉണ്ടായിരുന്നില്ല.ലെനിൻറെ മരണാനന്തരം ഗോർക്കി എഴുതിയ ഓർമയിൽ,അകൽച്ചയിൽ നിന്നുള്ള ആദരം കാണാനുണ്ട്.
1907 ഏപ്രിൽ 30 ന് ആരംഭിച്ച് ഒരുമാസം നീണ്ട റഷ്യൻ സോഷ്യൽ ഡെമോക്രാറ്റിക് പാർട്ടിയുടെ ലണ്ടനിൽ നടന്ന അഞ്ചാം കോൺഗ്രസിൽ ലെനിനെ ഗോർക്കി കണ്ടു.ഗോർക്കിയുടെ നോവൽ അമ്മ യുടെ കയ്യെഴുത്തു പ്രതി ഐ പി ലേദിഷ്‌നികോവിൽ നിന്ന് വാങ്ങി ലെനിൻ വായിച്ചിരുന്നു.കോൺഗ്രസ് നടക്കുമ്പോൾ,പാർട്ടി ബോൾഷെവിക്കുകളും മെൻഷെവിക്കുകളും ആയി തിരിഞ്ഞിരുന്നു.
ഇതേ വർഷമാണ് ലെനിനെ ആദ്യം കണ്ടതെന്ന് ഗോർക്കി എഴുതിയത് ശരിയല്ല.ഇരുവരും ആദ്യം കണ്ടത്,സെൻറ് പീറ്റേഴ്‌സ്ബർഗിൽ 1905 ലായിരുന്നു.1907 ലെ ലണ്ടൻ കോൺഗ്രസ് ആ ബന്ധം ഉറപ്പിച്ചു.കോൺഗ്രസിൽ ഗോർക്കിക്ക് വോട്ടവകാശം ഉണ്ടായിരുന്നു;പ്രസംഗിക്കാൻ അനുമതി ഉണ്ടായിരുന്നില്ല.ഗോർക്കിക്ക് 30 വയസ്സായിരുന്നു.ലെനിനെക്കാൾ രണ്ടു വയസ് കൂടുതൽ.

ലെനിനും ഗോർക്കിയും 

കോൺഗ്രസ് ചേരാനിരുന്നത് കോപ്പൻഹേഗനിലാണ്.ഡാനിഷ് സർക്കാർ അവസാനനിമിഷം  അനുമതി നിഷേധിച്ചതിനാൽ,300 പ്രതിനിധികൾ സ്വീഡനിലെ മാൽമോയിൽ എത്തി.അവിടെ താമസം കണ്ടുപിടിക്കുമ്പോഴേക്കും,സ്വീഡിഷ് സർക്കാർ വിപ്ലവകാരികളോട് സ്ഥലം കാലിയാക്കാൻ ആവശ്യപ്പെട്ടു.ഇംഗ്ലീഷ് സോഷ്യലിസ്റ്റുകളായ എച്ച് എൻ ബ്രയിൽസ് ഫോർഡ്,ജോർജ് ലാൻസ്ബ്യുറി എന്നിവർ ലണ്ടനിൽ സൗകര്യം ഒരുക്കി.സൗത്ത് ഗേറ്റ് റോഡിലെ റവ.എഫ് ആർ സ്വാനിന്റെ ബ്രദർ ഹുഡ് പള്ളിയായ വൈറ്റ് ചാപ്പലിലാണ് പാർട്ടി കോൺഗ്രസ് നടന്നത് .ഗോർക്കി ഓർമിച്ചു:"വെറും മറച്ചുവരുകൾ ഒരലങ്കാരവും ഇല്ലാതെ അസംബന്ധമായി നിന്നു.കുന്തം പോലുള്ള ഇടുങ്ങിയ ജനാലകൾ,ഇടുങ്ങിയ ഹാളിലേക്ക് നോക്കി നിന്നു.ഒരു ദരിദ്ര സ്‌കൂളിലെ ക്‌ളാസ് മുറി പോലെ ആ ഹാൾ തോന്നിച്ചു".
ഗോർക്കിയെ പരിചയപ്പെടുത്തിയപ്പോൾ ലെനിൻ കൈകൾ മുറുകെപ്പിടിച്ചു."ഇവിടെ വലിയ അടി പ്രതീക്ഷിക്കാം",ലെനിൻ പറഞ്ഞു.
R  എന്ന അക്ഷരം ലെനിൻ ഉച്ചരിക്കുമ്പോൾ കൊഞ്ഞ ഉണ്ടായിരുന്നു.വെയ്സ്റ്റ് കോട്ടിൻറെ കയ്യുറകളിൽ,ഇരു കൈകളുടെയും പെരുവിരൽ തിരുകുന്നത് ശീലമായിരുന്നു.നേതാവിൻറെ പകിട്ടില്ല.
ഗോർക്കിയെ പ്ലഖനോവിന് പരിചയപ്പെടുത്തി.പുതിയൊരു ശിഷ്യനെ കിട്ടിയ ക്ഷീണിതനായ അധ്യാപകനെപ്പോലെ,കൈകെട്ടി ഗുരു അലസമായി നോക്കി.പൊടുന്നനെ ലെനിൻ അമ്മ യിലെ  പോരായ്‌മകളെപ്പറ്റി സംസാരിക്കാൻ തുടങ്ങി.ധൃതിയിലാണ് പുസ്തകം എഴുതിയതെന്ന് ഗോർക്കി പറഞ്ഞു." ധൃതി വച്ചത് നന്നായി",ലെനിൻ പറഞ്ഞു," ആ പുസ്തകം ആവശ്യമായിരുന്നു.പല തൊഴിലാളികളും പ്രസ്ഥാനത്തിൻറെ ഭാഗമായത്,സ്വാഭാവികമായി,വികാരം കൊണ്ടാണ്.അമ്മ അവർക്ക് പ്രയോജനപ്പെടും."
അഞ്ചു ഗ്രൂപ്പുകളാണ്,കോൺഗ്രസിൽ പങ്കെടുത്തത്.ബോൾഷെവിക്കുകൾ,മെൻഷെവിക്കുകൾ,ബണ്ടിറ്റുകൾ,ലാത്വിയ,പോളണ്ട് എന്നിവിടങ്ങളിൽ നിന്നുള്ള സോഷ്യൽ ഡെമോക്രാറ്റുകൾ,അവർ ബെഞ്ചുകളിൽ ഇരുന്നു.മെൻഷെവിക്കുകൾ ഇടത്ത്,ബോൾഷെവിക്കുകൾ വലത്ത്,മറ്റ് ഗ്രൂപ്പുകൾ ഇടയ്ക്ക്.
മറ്റുള്ളവർക്ക് മനസിലാക്കാൻ പ്രയാസമായ ജോർജിയൻ ചുവയുമായി സ്റ്റാലിൻ ഇരുന്നു.കാമനെവ്,സിനോവീവ്,ട്രോട് സ്‌കി തുടങ്ങി പിൽക്കാലത്ത് സ്റ്റാലിൻ കൊന്നവരും ഉണ്ടായിരുന്നു.പ്രസിദ്ധർ മെൻഷെവിക്കുകൾ ആയിരുന്നു -പ്ലഖനോവ്,ആക്സൽറോഡ്,ദ്യൂഷ്,മാർട്ടോവ്,ഡാൻ.
ലണ്ടനിൽ 1903 ലെ രണ്ടാം പാർട്ടി കോൺഗ്രസിലാണ് മെൻഷെവിക്കുകൾ ചേരി മാറിപ്പോയത്.1912 ൽ അവരെ പാർട്ടിയിൽ നിന്ന് പുറത്താക്കി.
ഇവാനോവിച് എന്ന വ്യാജപ്പേരിലാണ് സ്റ്റാലിൻ വന്നിരുന്നത്.വോട്ടവകാശമുള്ള,പ്രസംഗ അവകാശമില്ലാത്ത പ്രതിനിധി.പാർട്ടിക്ക് പണമുണ്ടാക്കാൻ അയാൾ നടത്തിയ കൊള്ളകളെ കോൺഗ്രസ് അപലപിച്ചു.ആ പ്രമേയത്തെ ലെനിൻ എതിർത്തു.
മുഖ്യ താത്വികൻ പ്ലഖനോവ് ആയിരുന്നു,ഉദഘാടകൻ.പ്രസംഗം തുടങ്ങി 20 മിനിറ്റ് കഴിഞ്ഞപ്പോൾ ബോൾഷെവിക്കുകൾ അസ്വസ്ഥരായി.ലെനിൻ എരിപിരി കൊണ്ടു.പാർട്ടിയിൽ റിവിഷനിസ്റ്റുകൾ ഇല്ലെന്ന് ഗുരു പറ ഞ്ഞപ്പോൾ,ലെനിൻ ചിരി അമർത്തി.ലെനിൻ പ്രസംഗിക്കുമ്പോൾ,മെൻഷെവിക്കുകൾ തടസ്സപ്പെടുത്തി.അവർ ഒച്ച വച്ചു:ഈ കോൺഗ്രസ് തത്വം വിളമ്പാനുള്ളതല്ല.ഞങ്ങളെ പഠിപ്പിക്കണ്ട,ഞങ്ങൾ സ്‌കൂൾ കുട്ടികൾ അല്ല.താൻ ഗൂഢാലോചനക്കാരൻ !
ലെനിനൊപ്പം വില കുറഞ്ഞ ഹോട്ടലിൽ ആഹാരം കഴിച്ച സംഘത്തിൽ ആയിരുന്നു,ഗോർക്കി.ലെനിൻ അധികo കഴിച്ചില്ല -രണ്ടോ മൂന്നോ മുട്ട,ഒരു കഷണം പന്നിയിറച്ചി,ഒരു മഗ് ബീർ.
അക്കാലത്ത് ഇറ്റലിയിലെ കാപ്രിയിലാണ്,ഗോർക്കി താമസിച്ചിരുന്നത്.കോൺഗ്രസ് കഴിഞ്ഞ് പാരിസിൽ രണ്ടുമുറി ഫ്ലാറ്റിൽ ലെനിനെയും ഭാര്യയെയും ഗോർക്കി കണ്ടു.തൊഴിലാളികൾക്ക് സ്വയം പഠനത്തിനുള്ള ചരിത്ര പരമ്പര എന്ന ഗോർക്കിയുടെ ആശയം ലെനിൻ തള്ളി.അവർക്ക് വായിക്കാൻ നേരമില്ല.പുസ്തകം വാങ്ങുന്നത് ബുദ്ധിജീവികളാണ്.ഒരു പത്രവും ലഘു ലേഖകളും ആണ് വേണ്ടത്.ലെനിൻ പെട്ടെന്ന് എഴുന്നേറ്റ് പെരുവിരലുകൾ വെയ്സ്റ്റ് കോട്ടിൽ തിരുകി,മുറിയിൽ നടക്കാൻ തുടങ്ങി.കണ്ണുകൾ തിളങ്ങി.വരാനിരിക്കുന്ന യുദ്ധത്തെപ്പറ്റി ചെറു പ്രസംഗം നടത്തി.

മരിയ 

ഇരുവരും പിന്നെ കാപ്രിയിൽ കണ്ടു.ഓസ്ട്രിയൻ ചിന്തകൻ ഏണസ്റ്റ് മക്കിനു റഷ്യയിൽ ആരാധകർ ഉണ്ടാകുന്നത് സംസാരിച്ച് ലെനിൻ അയാളെ നിരാകരിച്ചു.യൗവ്വനം മുതൽ തത്വചിന്തയെ സംശയമാണെന്ന് ഗോർക്കി പറഞ്ഞു.അനുഭവവുമായി അതിന് ബന്ധമില്ല.തത്വ ചിന്ത പെണ്ണിനെപ്പോലെയാണ്;ചമഞ്ഞു വരും.ലെനിൻ പൊട്ടിച്ചിരിച്ചു.മുതലാളിത്തം ഭൂമിയെ എങ്ങനെ നശിപ്പിച്ചു എന്ന വിഷയത്തിൽ നോവൽ എഴുതാൻ ലെനിൻ പറഞ്ഞു.അവിടെയെത്തിയ നോവലിസ്റ്റായ ബൊഗ്ദാനോവിനെ ലെനിൻ കുത്തി നോവിച്ചു.
ഗോർക്കിയുടെ വെപ്പാട്ടി മരിയ ആൻഡ്രിയെവയ്ക്ക് നൊവായ ഷിസൻ  ( നവജീവൻ ) എന്ന പത്രം ഉണ്ടായിരുന്നു.ബോൾഷെവിക്കുകൾ ഇതിൽ എഴുതാൻ തുടങ്ങി.ലെനിൻ ഇതും പിടിച്ചെടുക്കാൻ ഒരുമ്പെട്ടു.ബോൾഷെവിക്കുകളുടെ കയ്യിലായ പത്രം നിരോധിച്ചു.ഗോർക്കിയും മരിയയും ഫിൻലൻഡിലേക്ക് കടന്നു.
1914 ലെ യുദ്ധകാലത്ത്,റഷ്യയിൽ പാർട്ടി ഉണ്ടായിരുന്നില്ല.പുറത്ത് ലെനിൻറെ അനുയായികൾ കഷ്‌ടി 20 പേർ.ഇതിൽ സിനോവീവും ഇനെസ്സ ആർമാൻഡും മാത്രമേ ഉറച്ചവർ ആയിരുന്നുള്ളു.ലെനിൻറെ ശരിയായ പ്രണയിനി ആയിരുന്നു ഇനെസ്സ.ലെനിന് വേണ്ടി അവർ പിയാനോ വായിച്ചു.ബീഥോവൻറെ അപോഷ്യനാറ്റ ലെനിന് പ്രിയമായിരുന്നു.
1917 ൽ റഷ്യയിൽ സാർ ഭരണകൂടത്തെ അട്ടിമറിച്ചു കെറൻസ്കി ഉണ്ടാക്കിയ താൽക്കാലിക ഭരണ കൂടവും ബോൾഷെവിക്കുകളുടെ പെട്രോഗ്രാഡ് സോവിയറ്റും തമ്മിൽ തർക്കമായപ്പോൾ,ഇരുവരും സന്ധിയിൽ എത്തണമെന്ന് ഗോർക്കി,ഭരണകൂടത്തിന് എഴുതി.സൂറിച്ചിൽ നിന്ന് ലെനിൻ അയയ്ക്കുന്ന കത്തുകൾ പ്രവദ പ്രസിദ്ധീകരിച്ചിരുന്നു.ഇവ Letter From Afar എന്ന പേരിൽ പുറത്തു വന്നു.ഭരണ കൂടത്തിനുള്ള കത്തിൽ ഗോർക്കി ആവശ്യപ്പെട്ടത്,മാനത്തോടെ ജീവിക്കാനുള്ള സമാധാനം ആയിരുന്നു.
ലെനിൻ ക്ഷുഭിതനായി.'മാനം' അയാൾക്ക് ബൂർഷ്വാ മുൻ വിധി ആയിരുന്നു.ഗോർക്കിയെ പിച്ചി ചീന്തി മാർച്ച് 25 ന് ലെനിൻ നാലാം കത്ത് എഴുതി.ചിത്ര ശലഭത്തിനു മേൽ റോഡ് റോളർ കയറ്റും പോലെ ആയിരുന്നു,അത്:

വെറും മണ്ടൻ മുൻവിധികൾ നിറഞ്ഞ ഇത്തരമൊരു കത്ത് വായിച്ചപ്പോൾ കയ്‌പ്‌ ( ഗോർക്കി എന്ന വാക്കിന് അർത്ഥം,കയ്‌പ്‌ ) അനുഭവപ്പെട്ടു.കാപ്രിയിൽ വച്ചുള്ള സംഭാഷണങ്ങളിൽ ഞാൻ ഗോർക്കിയോട് അദ്ദേഹത്തിനു പറ്റിയ രാഷ്ട്രീയ പിഴവുകളെപ്പറ്റി മുന്നറിയിപ്പ് നൽകിയിരുന്നു.ശാസിച്ചിരുന്നു.ഗോർക്കി ഈ ശാസനകളെ സഹജമായ മധുര പുഞ്ചിരിയാൽ ഒഴിവാക്കി,ഏറ്റു പറയും,"ഞാനൊരു ചീത്ത മാർക്‌സിസ്റ്റ് ആണ്;ഞങ്ങൾ കലാകാരന്മാർ കുറച്ചൊക്കെ ഉത്തരവാദിത്തം ഇല്ലാത്തവരാണ്."...ഇതിനെതിരെ നമുക്ക് തർക്കിക്കാൻ ആവില്ല.ഗോർക്കിക്ക് നല്ല കലാശേഷിയുണ്ട്.അത് ആഗോള തൊഴിലാളി പ്രസ്ഥാനത്തിന് മുതൽക്കൂട്ടായിരിക്കും.പക്ഷെ,ഗോർക്കി എന്തിനാണ്,രാഷ്ട്രീയത്തിൽ ഇടപെടുന്നത്?ഗോർക്കിയുടെ കത്തിൽ കാണുന്നത്,ബൂർഷ്വകൾക്കും അവരുടെ സ്വാധീനത്തിൽപെട്ട ഒരു വിഭാഗം തൊഴിലാളികൾക്കുമുള്ള മുൻ വിധികളാണ്.ഇവക്കെതിരെ നിരന്തര പോരാട്ടത്തിന് പാർട്ടിയുടെയും രാഷ്ട്രീയ ബോധമുള്ള തൊഴിലാളികളുടെയും ശക്തി തിരിച്ചു വിടണം.ഈ യുദ്ധം സാർ ഭരണകൂടം തുടങ്ങി വച്ചതാണ്...ഭൂവുടമകളുടെയും മുതലാളിമാരുടെയും ഭരണകൂടം ...ആ ഭരണകൂടത്തോട് സമാധാനത്തിന് നിർദേശം വയ്ക്കുന്നത്,വേശ്യാലയ ഉടമയോട്,ചാരിത്ര്യ പ്രസംഗം നടത്തുന്നത് പോലെയാണ്.

നൊവായ ഷിസൻ,1905 

സൂറിച്ചിൽ നിന്നെഴുതിയ കത്ത്,സ്റ്റോക്ക് ഹോമിലേക്ക് അയച്ച് പെട്രോഗ്രാഡിൽ എത്തിക്കുകയായിരുന്നു.അപ്പോൾ ഫെബ്രുവരിയിലെ റഷ്യൻ വിപ്ലവം തുടങ്ങി പത്തു നാൾ പിന്നിട്ടിരുന്നു.വിപ്ലവ നായകൻ പ്രവാസത്തിലായിരുന്നു.എന്നിട്ടും,കൂട്ടുകാരനെ സംഹരിക്കുന്നതിൽ ആയിരുന്നു,കമ്പം.
കത്തിന് ഗോർക്കി അപ്പോൾ മറുപടി നൽകിയില്ല.ലെനിൻ റഷ്യയിൽ മടങ്ങിയെത്തി,ഭരണകൂട അട്ടിമറിയിൽ ഏർപ്പെട്ട ശേഷം,1917 നവംബർ 21 ന് ഗോർക്കി നൊവായ ഷിസൻ പത്രത്തിൽ ലെനിന് എതിരെ ആഞ്ഞടിച്ചു:

അന്ധരായ ഭ്രാന്തന്മാരും ദയയില്ലാത്ത സാഹസികരും സാമൂഹിക വിപ്ലവത്തിലേക്ക് പായുകയാണ് -ഇത് അരാജകത്വത്തിലേക്കും തൊഴിലാളി വർഗ്ഗത്തിൻറെ നാശത്തിലേക്കും വിപ്ലവത്തിൻറെ തന്നെയും നാശത്തിലേക്കുള്ള പോക്കാണ്.
ഈ പാതയിൽ ലെനിനും കിങ്കരന്മാരും ധരിക്കുന്നത്,ഏതു കുറ്റവും ചെയ്യാമെന്നാണ്.പെട്രോഗ്രാഡിൽ കൂട്ടക്കൊല.മോസ്‌കോയിൽ നാശം.സംസാര സ്വാതന്ത്ര്യത്തിനു വിലക്ക്.വിവേകം നശിച്ച അറസ്റ്റുകൾ -പ്ലീഹ്‌വെയും സ്റ്റോലിപെനും കാട്ടിയ അതേ രാക്ഷസീയ പ്രവൃത്തികൾ.
അവരിരുവരും ജനാധിപത്യത്തിനും റഷ്യയിൽ ക്രമവും സത്യസന്ധവുമായിരുന്ന എല്ലാറ്റിനും എതിരെ പ്രവർത്തിച്ചു എന്നത് നേരാണ്.ലെനിനാകട്ടെ,തൊഴിലാളി വർഗ്ഗത്തിലെ വലിയ വിഭാഗത്തിൻറെ പിന്തുണയുണ്ട്.തൊഴിലാളികളുടെ സാമാന്യ ബുദ്ധിയും അവരുടെ ചരിത്ര ദൗത്യത്തെക്കുറിച്ചുള്ള തിരിച്ചറിവും അവരുടെ കണ്ണ് തുറപ്പിക്കുമെന്ന് ഞാൻ പ്രതീക്ഷിക്കുന്നു.ലെനിൻ നൽകിയ വാഗ്‌ദാനങ്ങൾ പാലിക്കുക അസാധ്യമാണ്.ബക്കുനിൻ,നെചായേവ് എന്നിവരുടെ പാതയിൽ,അരാജക പ്രവണതകൾ നിറഞ്ഞ ഭ്രാന്താണ്,ലെനിനുള്ളത്.
തങ്ങളുടെ ചോര കൊണ്ടാണ് ലെനിൻ പരീക്ഷണം നടത്തുന്നതെന്ന് തൊഴിലാളി വർഗം തിരിച്ചറിയണം.തൊഴിലാളി വർഗ്ഗത്തിൻറെ വികാരത്തെ വലിച്ചു നീട്ടി അതിൻറെ ഫലം എന്തായിരിക്കുമെന്ന് പരീക്ഷിക്കുകയാണ്.റഷ്യയിലെ തൊഴിലാളി വർഗത്തിന്,ഇന്നത്തെ സാഹചര്യങ്ങളിൽ അയാൾ വിജയം പ്രതീക്ഷിക്കുന്നില്ല.തൊഴിലാളി വർഗത്തെ രക്ഷിക്കാൻ ഒരു അദ്‌ഭുതം അയാൾ പ്രതീക്ഷിക്കുന്നുണ്ടാകാം.
അദ്‌ഭുതങ്ങളുണ്ടാവില്ലെന്ന് തൊഴിലാളി മനസ്സിലാക്കണം.അവനെ കാത്തിരിക്കുന്നത്,വിശപ്പും പൂട്ടിയ വ്യവസായ ശാലകളും നിലച്ച ഗതാഗതവും നീണ്ട രക്തരൂക്ഷിതമായ  അരാജകത്വവും ചോര പുരണ്ട,ഇരുൾ മൂടിയ പ്രത്യാഘാതവുമാണ്.അതിലേക്കാണ്,തൊഴിലാളി വർഗത്തെ നേതാക്കൾ നയിക്കുന്നത്.ലെനിൻ സർവശക്തനായ മായാജാലക്കാരനല്ല.അയാൾ തീരുമാനിച്ചുറച്ച ചെപ്പടി വിദ്യക്കാരനാണ്.അയാൾക്ക് തൊഴിലാളി വർഗ്ഗത്തിൻറെ ജീവനോടോ,ആത്മാഭിമാനത്തോടോ ഒരു മമതയും ഇല്ല.സാഹസികരും ഭ്രാന്തന്മാരും ചെയ്യുന്ന വൃത്തികെട്ട,അസംബന്ധമായ,ഹീനമായ കുറ്റങ്ങൾ തൊഴിലാളി വർഗത്തിന് മേൽ ചാരാനുള്ള ശ്രമം തൊഴിലാളികൾ അനുവദിക്കരുത്.ലെനിനല്ല ,തൊഴിലാളി വർഗത്തിനായിരിക്കും,ഉത്തരവാദിത്തം.

ഗോർക്കി 

ഒരു പാർട്ടിയുടെയും സംരക്ഷണമില്ലാതെ,ഗംഭീരമായ ഏകാന്തതയിൽ,ഗോർക്കി,റഷ്യയുടെ മനഃസാക്ഷി ആയി നിന്നു.ലെനിൻറെ ഉരുക്കുമുഷ്ടിക്കു പോലും ഗോർക്കിയെ നിശബ്ദനാക്കാൻ കഴിഞ്ഞില്ല.
വിപ്ലവത്തെ ലെനിൻ ഒറ്റി എന്ന് വെളിവാക്കി,നവംബർ 23 ന് പത്രത്തിൽ,ഗോർക്കി,തൊഴിലാളികൾക്കുള്ള ഒരു വിളംബരം പ്രസിദ്ധീകരിച്ചു:

തൊഴിലാളി വർഗത്തോട് 

നെചായേവിന്റെ വഴിയിലൂടെ,"മാലിന്യക്കൂമ്പാരത്തിലൂടെ അതിവേഗം ലെനിൻ റഷ്യയിലേക്ക്,സോഷ്യലിസ്റ്റ് ഭരണകൂടത്തെ" കൊണ്ടു വന്നിരിക്കുന്നു.നമുക്ക് ഏതു റഷ്യക്കാരനെയും അപമാനിച്ച് നമുക്കൊപ്പം കൊണ്ടു വരാം  എന്ന് നെചായേവ് പറഞ്ഞതിനോട് ഒട്ടി നിൽക്കുന്നവരാണ്,ലെനിനും ട്രോട് സ്‌കിയും അവരെ ചളിക്കുണ്ടിലേക്ക് അനുഗമിക്കുന്നവരും.അങ്ങനെ,വിപ്ലവവും തൊഴിലാളി വർഗവും ഹീനമായി അപമാനിക്കപ്പെട്ടിരിക്കുന്നു.തൊഴിലാളികൾ കൂട്ടക്കൊലകൾക്കും വംശഹത്യകൾക്കും നിര്ബന്ധിക്കപ്പെട്ടിരിക്കുന്നു...

മാധ്യമ സ്വാതന്ത്ര്യത്തെ അടിച്ചമർത്താൻ തൊഴിലാളികളെ സമ്മതിപ്പിച്ച ശേഷം ലെനിനും കിങ്കരന്മാരും ജനാധിപത്യത്തിൻറെ ശത്രുക്കൾക്ക് അതിൻറെ വായടയ്ക്കാൻ അവസരം നൽകിയിരിക്കുന്നു.ലെനിൻ -ട്രോട് സ്‌കി ഏകാധിപത്യത്തെ എതിർക്കുന്നവർക്കെതിരെ ക്ഷാമം,കൂട്ടക്കൊല എന്നീ ഭീഷണികൾ പ്രയോഗിച്ചു.ഈ നേതാക്കൾ അവരുടെ പീഡനത്തെ ന്യായീകരിക്കുന്നു.വർഷങ്ങളായി ഈ രാജ്യത്തെ നന്മയുള്ളവർ ഇത്തരം പീഡനങ്ങൾക്കെതിരെയാണ് പോരാടിയത്.
സോഷ്യലിസത്തിൻറെ നെപ്പോളിയന്മാരാണ് തങ്ങളെന്ന് ഈ ലെനിനിസ്റ്റുകൾ ഭാവിക്കുന്നു.ഓരോ പ്രദേശത്തേക്കും അവർ കടന്നു കയറി റഷ്യയുടെ പതനം ഉറപ്പു വരുത്തുന്നു.ഒരു ചോരക്കടൽ വഴിയാണ്,റഷ്യൻ ജനത ഇതിനു വില നൽകേണ്ടത്....
( ലെനിന് ) ' നേതാവ് ' ആകാനുള്ള മേന്മകളുണ്ട്.അത്തരമൊരു പദവിക്ക് വേണ്ട ധാർമിക ശൂന്യത അദ്ദേഹത്തിനുണ്ട്.ജനത്തോട് ' വരേണ്യനു'ള്ള പുച്ഛവും അദ്ദേഹത്തിനുണ്ട്.
ലെനിൻ നേതാവും റഷ്യൻ വരേണ്യനുമാണ്.ആ ജീർണിച്ച വർഗ്ഗത്തിൻറെ ധാർമിക വിശേഷങ്ങളെല്ലാം അദ്ദേഹത്തിനുണ്ട്.ഇക്കാരണത്താലാണ്,ആരംഭം മുതൽ തോൽക്കുന്ന ക്രൂര പരീക്ഷണത്തിലേക്ക് റഷ്യൻ ജനതയെ നയിക്കാൻ അവകാശമുണ്ടെന്ന് അദ്ദേഹം കരുതിയത്.
യുദ്ധം കൊണ്ട് നശിക്കുകയും ക്ഷീണിക്കുകയും ചെയ്‌ത നമ്മുടെ ജനത ഇപ്പോൾ തന്നെ ആയിരക്കണക്കിന് ജീവൻ ബലി കഴിച്ചു.ഇനി പതിനായിരക്കണക്കിന് വേണ്ടി വരും.ദീർഘ കാലം നാം തകർച്ചയിൽ ആയിരിക്കും.
റഷ്യ ഈ ദുരന്തം സഹിക്കുന്നത് ലെനിനെ ദുഃഖിപ്പിക്കുന്നില്ല.അയാൾ വരട്ടുവാദത്തിൻറെ അടിമയാണ്.വൈവിധ്യമാർന്ന ജീവിതത്തെപ്പറ്റി അയാൾക്ക് ബോധമില്ല.ജനത്തെ അറിയില്ല.അവരുടെ കൂടെ നിന്നിട്ടില്ല.അവരെ എങ്ങനെ കലാപങ്ങൾക്ക് പ്രേരിപ്പിക്കാം എന്ന് പുസ്തകങ്ങളിൽ നിന്ന് പഠിച്ചിട്ടുണ്ട്.എളുപ്പത്തിൽ അവരുടെ വികാരങ്ങളെ ഇളക്കാനും അറിയാം.രസവാദിയുടെ കൈയിലെ മൂലകം പോലെയാണ്,അയാൾക്ക് തൊഴിലാളി വർഗം.നിശ്ചിത സാഹചര്യങ്ങളിൽ,ഈ മൂലകത്തെ സോഷ്യലിസ്റ്റ് ഭരണകൂടമാക്കുക അസാധ്യമാണ്.പരീക്ഷണം പരാജയപ്പെട്ടാൽ ലെനിന് എന്ത് ചേതം?
രസവാദി ജഡ പദാർത്ഥങ്ങളിൽ പരീക്ഷണം നടത്തുന്നു.ലെനിൻ ആകട്ടെ,ജീവിക്കുന്ന മാംസത്തിൽ പരീക്ഷണം നടത്തി വിപ്ലവത്തെ പതനത്തിൽ എത്തിക്കുന്നു.ലെനിൻറെ പാതയിലെ സത്യസന്ധരായ തൊഴിലാളികൾ ഭീകരമായ പരീക്ഷണമാണ് തങ്ങളിൽ നടക്കുന്നത് എന്നറിയണം.ഈ പരീക്ഷണം അവരിലെ ശക്തിയെ നശിപ്പിക്കും.ദീർഘ കാലം വിപ്ലവത്തിൻറെ സ്വാഭാവിക വികാസം തടയപ്പെടും.

ഗോർക്കി വിപ്ലവത്തെ മ്യൂസിയം ഡയറക്ടറുടെ ശങ്കകളോടെയാണ് സ്വാഗതം ചെയ്തതെന്ന് ട്രോട് സ്‌കി കളിയാക്കി.ഗോർക്കി ഭയന്നില്ല.പത്രം ധീരമായി ലെനിനെ ആക്രമിച്ചു-അതിൻറെ പ്രസിദ്ധീകരണം ബലം പ്രയോഗിച്ച് തടയും വരെ.

See https://hamletram.blogspot.com/2019/07/5.html

ഒരു റഷ്യൻ യക്ഷിക്കഥ 5

5.ലെനിൻ പ്ലഖനോവിനെ വെട്ടി നിരത്തി

ലെനിൻറെ തിരഞ്ഞെടുത്ത കൃതികളിൽ,സ്വന്തം ജീവിതവുമായി ബന്ധപ്പെട്ട ആഖ്യാനം ഒന്നേയുള്ളു -17  പേജ് നീണ്ട ആ വിവരണമാകട്ടെ,പ്ലഖനോവുമായി തർക്കിച്ച് പിരിഞ്ഞത്തിന്റേതാണ്.ഒരു പത്രവും മാസികയും തുടങ്ങുന്നതിനെപ്പറ്റി ലെനിൻ എഴുതിയ കുറിപ്പ്,വേറ സസൂലിച്ചിനെക്കൊണ്ട് പ്ലഖനോവ് മാറ്റി എഴുതിച്ചു.ലെനിൻറെ ഭാഷ പ്ലഖനോവിന് പിടിച്ചില്ല.ഉള്ളടക്കത്തിന് കാമ്പുള്ളതായും തോന്നിയില്ല.
ലെനിൻ ആദ്യമായി വിദേശത്തു പോകുന്നത്,1895 ൽ പ്ലഖനോവിനെ കാണാൻ വേണ്ടി തന്നെയാണ്.റഷ്യൻ മാർക്‌സിസ സ്ഥാപകരായ ലെനിനെയും ആക്സൽറോഡിനെയും ജനീവയിൽ ലെനിൻ കണ്ടു.സ്വതന്ത്ര ബൂർഷ്വയുമായി സഖ്യം വേണ്ടി വരുമെന്ന് അവർ ലെനിനെ വിശ്വസിപ്പിച്ചു.റഷ്യയിലേക്ക് മടങ്ങിയ ലെനിൻ,സെൻറ് പീറ്റേഴ്‌സ്ബർഗിലെ സമരങ്ങളെ തുടർന്ന് ഒന്നരക്കൊല്ലം ജയിലായി,ലഖു ലേഖകൾ എഴുതി.അതിനു ശിക്ഷയായി മൂന്നു കൊല്ലം സൈബീരിയയിലേക്ക് നാട് കടത്തി.അവിടെയും എഴുതി.ആധുനിക ന്യൂറോളജിയിൽ ഇത് തലച്ചോറിനെ ബാധിച്ച അസുഖമാണ് -ഹൈപ്പർഗ്രാഫിയ.കേരളത്തിലെ പാർട്ടിയിലും ഇത് ബാധിച്ചവർ ഉണ്ടായിരുന്നു.

പ്ലഖനോവ്  

സൈബീരിയയിൽ,റഷ്യൻ സോഷ്യൽ ഡെമോക്രാറ്റുകളുടെ കടമ എന്ന ലഘു ലേഖയും റഷ്യയിൽ മുതലാളിത്തത്തിൻറെ വികാസം എന്ന പ്രബന്ധവും എഴുതി.ഈ പ്രബന്ധമാണ്,എതിർ ചേരിക്ക് എതിരെ ലെനിൻറെ മാസ്റ്റർപീസ്.താൻ ഉൾപ്പെട്ട സോഷ്യൽ ഡെമോക്രാറ്റിക് പാർട്ടി ആരുമായി സഖ്യത്തിൽ ഏർപ്പെടണം എന്ന് വ്യക്തമാക്കുന്നതാണ്,ലഘു ലേഖ.നമ്മുടെ പാർട്ടിക്ക് ഒരു കരട് പരിപാടി ( 1899 ) എന്ന രേഖയിൽ ലെനിൻ എഴുതി:പെറ്റി ബൂർഷ്വയുടെ ജനാധിപത്യാവശ്യങ്ങൾക്ക് പിന്തുണ നൽകുക എന്നാൽ,പെറ്റി ബൂർഷ്വയ്ക്ക് പിന്തുണ നൽകൽ അല്ല.
രാഷ്ട്രീയ സഖ്യങ്ങളെ സ്വന്തം താൽപര്യങ്ങൾക്ക് ഉപയോഗിക്കാം എന്നേ ലെനിൻ കരുതിയിരുന്നുള്ളു.തൊഴിലാളി വർഗവും അടിസ്ഥാന തന്ത്രത്തിൻറെ ഭാഗം മാത്രമായി.ജനകീയ ചേരിക്ക് ശക്തി പോയപ്പോൾ,സോഷ്യൽ ഫെമോക്രാറ്റുകൾക്കിടയിൽ പുതിയ ആശയങ്ങൾ നാമ്പിടുന്നത് ലെനിനെ വിറളി പിടിപ്പിച്ചു.കാർഷിക പ്രശ്നത്തെപ്പറ്റി കൗട് സ്‌കി എഴുതിയ ലേഖനത്തെ വിമർശിച്ച് എസ് ബുൾഗാക്കോവ് എഴുതിയ ലേഖനം കണ്ട് താൻ രോഷാകുലനായെന്ന് ലെനിൻ തന്നെ പറഞ്ഞിട്ടുണ്ട്.ബേൺസ്റ്റീന് ജനപ്രിയത കൂടുന്നതും ബുൾഗാക്കോവ് തുടങ്ങിയവർക്ക് സ്വീകാര്യത കിട്ടുന്നതും ലെനിനെ ആകുലനാക്കി.അതിനാൽ താൻ തത്വചിന്ത പഠിക്കാൻ തുടങ്ങിയെന്ന് 1899 ജൂൺ 27 ന് ലെനിൻ എ എൻ പോട്രേസോവിന് എഴുതി.ഹോൾബാക്കിനെയും സി എ ഹെൽവെറ്റിയസിനെയും വായിച്ചു.ഇമ്മാനുവൽ കാന്റിനെ വായിക്കണം.തത്വ ചിന്താപരമായ തർക്കങ്ങൾ ലെനിൻ ഗൗനിച്ചില്ല.സോഷ്യൽ ഡെമോക്രാറ്റുകൾ ഇക്കണോമിസം എന്നൊരു വരട്ടുവാദം കൊണ്ടുവന്നപ്പോഴും ലെനിൻ കലി തുള്ളി.ഇവർ പുറത്തിറക്കിയ ക്രെഡോ എന്ന രേഖയ്ക്കുള്ള മറുപടിയാണ്,എന്താണ് ചെയ്യേണ്ടത്? എന്ന ലെനിൻറെ രേഖ.പ്ലഖനോവ് നിരവധി സിദ്ധാന്തങ്ങൾ കൊണ്ടു വന്നിട്ടും താൻ സൈദ്ധാന്തികൻ ആയില്ല എന്ന തോന്നലിൻറെ ഉൽപന്നം കൂടി ആയിരുന്നു,ഇത്.ഇത് ബോൾഷെവിസത്തിന് അടിത്തറയായി.
സൈബീരിയയിലെ തടവ് കഴിഞ്ഞ് 1900 തുടക്കത്തിൽ ലെനിൻ വീണ്ടും ജനീവയിൽ എത്തി.റഷ്യൻ സോഷ്യൽ ഡെമോക്രാറ്റുകളുടെ പ്രസ്ഥാനത്തിന്,ഇസ്‌ക്ര ( തീപ്പൊരി ) എന്ന പ്രസിദ്ധീകരണം ഉണ്ടാക്കാൻ ലെനിൻ പ്ലഖനോവിനെ കണ്ടപ്പോഴായിരുന്നു,പൊട്ടിത്തെറി.
യുവാവായ ലെനിൻ പ്രീതി നേടുന്നതിൽ പ്ലഖനോവിന് താൽപര്യം ഇല്ലായിരുന്നു.അവർ തമ്മിൽ നടന്ന കൂടിക്കാഴ്ചയുടെ ആഖ്യാനമാണ്,ആദ്യം പറഞ്ഞത്.

ലെനിൻ(നടുവിൽ ) മാർട്ടോവ് ( വലത് )-1898 

അദ്‌ഭുതങ്ങൾ പ്രതീക്ഷിച്ചാണ്,ലെനിൻ എത്തിയത്.തൻറെ രോമക്കുപ്പായത്തിലെ ഒരു ബട്ടണുമായി പ്രേമത്തിലായ കർക്കശക്കാരനായ കരണവരാണ് പ്ലഖനോവ്  എന്ന് ഗോർക്കി എഴുതി.ആ ബട്ടണിൽ തടവി തടവി ഒരു ഘട്ടം എത്തുമ്പോൾ,പ്ലഖനോവ്,അതമർത്തും.ആ  നിമിഷം പ്രഭാഷണം ഒന്ന് നിൽക്കും.അത് കഴിഞ്ഞ് വാക്കുകളുടെ പ്രവാഹം.ലെനിൻ ആജ്ഞ സ്വീകരിക്കാൻ ഒരുക്കം അല്ലായിരുന്നു.അതിനാൽ എതിർത്തു.വേറയെ ലെനിന് ഇഷ്ടമായിരുന്നു.അവർ പ്ലഖനോവിനെ ആദരിക്കുന്നത് കണ്ട് ലെനിന് അദ്‌ഭുതം തോന്നി.വേറയും  ആക്സൽറോഡും പ്ലഖനോവിന് പരിചയായപ്പോൾ,ലെനിൻ ഏകനായി.പത്രം ,മാസിക എന്നിവയുടെ സൈദ്ധാന്തിക നിയന്ത്രണം ആർക്ക് എന്നായിരുന്നു,തർക്കം.
 അടുത്ത പ്രഭാതത്തിലും തർക്കം തുടർന്നു.തീപ്പൊരി എങ്ങനെയാണണച്ചത്‌ എന്ന ശീര്ഷകത്തിലാണ്,ലെനിൻറെ ആഖ്യാനം. മറ്റ് ലേഖനങ്ങളിലെ കൈയക്ഷരവുമായി നോക്കുമ്പോൾ രോഷം വിങ്ങിയതാണ്,ഒറ്റയടിക്ക് 17 പേജ് അണ പൊട്ടൽ.പ്ലഖനോവിൻറെ ഗുരുനാട്യവും പുച്ഛവും  കോപാകുലനാക്കി  എന്നാണ് ലെനിൻ എഴുതുന്നത്.കർശനമായ വാഗ്‌വാദത്തിൽ,താൻ വ്യക്തിപരമായ ആക്രമണങ്ങളിൽ പങ്കെടുത്തിട്ടില്ലെന്ന് പ്ലഖനോവ് പറഞ്ഞു.രാഷ്ട്രീയ തത്വങ്ങൾ വെളിവാക്കാൻ പ്ലഖനോവ്  ചില സ്വകാര്യ കത്തുകൾ ( ലെനിനുമായി അല്ല ) പ്രസിദ്ധീകരിച്ചത് വ്യക്തിപരം തന്നെയായിരുന്നു." പ്ലഖനോവ് അസഹിഷ്‌ണുത കാട്ടി",ലെനിൻ എഴുതി,"മറ്റുള്ളവരുടെ വാദങ്ങൾ കേൾക്കാൻ അദ്ദേഹം ഒരുക്കമല്ലായിരുന്നു.അതിനു കഴിവില്ലായിരുന്നു,സത്യസന്ധൻ അല്ലായിരുന്നു."

വേറ സസൂലിച് 

'ഇസ്‌ക്രയുടെയും സാര്യയുടെയും പത്രാധിപ സമിതി പ്രഖ്യാപനത്തിൻറെ കരട്' എന്ന രേഖ ലെനിൻ തയ്യാറാക്കിയിരുന്നു.ഇസ്‌ക്ര,പത്രം.സാര്യ ( പ്രഭാതം )മാസിക.ഇതാണ് പ്ലഖനോവ് മടക്കിയത്.കുപിതനായി മാറ്റിയെഴുതി കൊടുത്തു.അത് തിരുത്താൻ വേറയ്ക്ക് കൊടു ത്തപ്പോൾ ലെനിൻ ഞെട്ടിപ്പോയി.പത്രാധിപ സമിതിയുടെ വോട്ടവകാശത്തെപ്പറ്റി ലെന്സിനും പ്ലഖനോവും തർക്കിച്ചു.സമിതിയിൽ ആറ് അംഗങ്ങൾ ആകാമെന്ന് തീരുമാനിച്ചു.പ്ലഖനോവ്,ആക്സൽറോഡ്,വേറ സസൂലിച്* ,ലെനിൻ,മാർട്ടോവ്,എ എൻ പോട്രെസോവ്.തനിക്ക് രണ്ടു വോട്ട് വേണമെന്ന് പ്ലഖനോവ് വാശി പിടിച്ചു.ലെനിൻ അതിനെ എതിർത്തു.
ലെനിൻ എഴുതുന്നു:(ലെനിൻ / തിരഞ്ഞെടുത്ത കൃതികൾ,വാല്യം 4,പേജ് 342 )

ജാല വിദ്യയാൽ എന്ന പോലെ പ്ലഖനോവിനോടുള്ള എൻറെ ആകർഷണം അപ്രത്യക്ഷമായി.അവിശ്വസനീയമായ തലത്തിൽ ഞാൻ അപമാനിക്കപ്പെട്ടു.എനിക്കു നൊന്തു.എനിക്ക് ജീവിതത്തിൽ ഒരിക്കലും മറ്റൊരാളോടും ഇത്ര ആദരവും പരിഗണനയും ആദരവും തോന്നിയിരുന്നില്ല.ഒരാൾക്ക് മുന്നിലും ഇത്ര വിനയത്തോടെ ഞാൻ നിന്നിട്ടില്ല.ഇത് പോലെ വേറൊരാളിൽ നിന്നും എനിക്ക് പുറകിൽ തൊഴി കിട്ടിയിട്ടില്ല.അതാണ് ഉണ്ടായത്....കുഞ്ഞുങ്ങളെപ്പോലെ ഭയപ്പെടുത്തി ഞങ്ങളുടെ ബുദ്ധിയെ തളർത്തി....ഒരു മാന്യതയുമില്ലാതെ ഞങ്ങളെ നിരാകരിച്ചു.രാവിലെ സഹ എഡിറ്ററാകാൻ പറ്റില്ലെന്ന് പറഞ്ഞപ്പോൾ തന്നെ ശാന്തമായി പ്ലഖനോവ് ഞങ്ങളെ കെണിയിലാക്കുകയായിരുന്നു.അത് നിശ്ചയിച്ചറപ്പിച്ച ചതുരംഗ കളി ആയിരുന്നു....

എല്ലാം ഉപേക്ഷിച്ച് റഷ്യയിലേക്ക് മടങ്ങാൻ തോന്നിയെന്ന് ലെനിൻ എഴുതുന്നു.എന്നാൽ ഏകാധിപതിയുമായി ഒരു കൂടിക്കാഴ്ച കൂടിയാകാമെന്ന് തീരുമാനിച്ചു.ഒരു ശവമടക്കിനു പോകും പോലെ ആയിരുന്നു,ഇത്.താൻ ചീത്തയാണെന്ന് ലെനിൻ പ്ലഖനോവിനോട് തുറന്നടിച്ചു.പ്രസക്തമല്ലാത്ത തോന്നലുകൾക്ക് ലെനിൻ അടിമയായെന്ന് കാരണവർ സിദ്ധാന്തിച്ചു.ലെനിൻറെ സഹായത്തെ ആശ്രയിച്ചല്ല താൻ കഴിയുന്നത്.വിയോജിപ്പുണ്ടായതിനാൽ കൈകൂപ്പി ചാരിയിരിക്കാൻ പോകുന്നില്ല.വേണമെങ്കിൽ രാഷ്ട്രീയ പ്രവർത്തനം ഉപേക്ഷിക്കാം.
ഇത് കേട്ട് ലെനിൻ ക്ഷുഭിതനായി കൂടിക്കാഴ്ച അവസാനിപ്പിച്ചു.അടുത്ത നാൾ വീണ്ടും കാരണവരെ കണ്ടു.പത്രാധിപ സമിതിയിൽ വാഗ്വാദം അനുവദിക്കാമോ എന്നറിയാൻ.കാരണവർ നിരസിച്ചു.എങ്ങനെയാണ് വോട്ടെടുപ്പ് എന്ന് ലെനിൻ ചോദിച്ചു.അടിസ്ഥാന പ്രശ്നങ്ങളിൽ വോട്ടെടുപ്പ് പറ്റില്ലെന്നായി,കാരണവർ.പത്രമിറക്കാൻ ന്യൂറംബെർഗിലേക്ക് പോകുമ്പോൾ,ലെനിൻറെ ഉള്ളു കലമ്പി.

ഇസ്‌ക്ര 

ലെനിൻറെ ഭാഷ സംസ്‌കാര ഹീനവും കരണവരുടേത്,സൗമ്യവും ആയിരുന്നു.ലെനിൻ ഉപയോഗിക്കുന്ന ചീത്ത വാക്കുകൾ റഷ്യൻ സോഷ്യലിസ്റ്റ് റിയലിസ സാഹിത്യത്തിൽ സുലഭമായിരുന്നു.ഇക്കാര്യത്തിൽ മാർക്‌സും ദിമിത്രി പിസാറേവും ആയിരുന്നു,ലെനിന് മാതൃക.കടിഞ്ഞാൺ വിടാതെ ലെനിൻ ജർമനിയിൽ ഇസ്‌ക്രയ്ക്കും സാര്യയ്ക്കും യന്ത്രം ഒരുക്കി.ഭാര്യ ക്രൂപ്സ്കേയ തടവ് കഴിഞ്ഞ് മ്യുണിക്കിൽ എത്തിയപ്പോൾ,അവരെ പത്രാധിപ സമിതി അധ്യക്ഷയാക്കി.പ്ലഖനോവ് സ്വിറ്റ്‌സർലൻഡിൽ തുടർന്നു -അസ്തമിക്കുന്ന കാരണവർ.1901 ലെ ശിശിരത്തിൽ ലെനിൻറെ ആദ്യ സൈദ്ധാന്തിക ഗ്രന്ഥം പുറത്തു വന്നു.ചർണിഷേവ്സ്കിയുടെ പ്രസിദ്ധ നോവലിൻറെ ശീർഷകം കടമെടുത്തു:എന്താണ് ചെയ്യേണ്ടത്?( What is to be Done ?).ഇതിലെ സിദ്ധാന്തങ്ങൾക്ക് മാർക്സിസവുമായി ഒരു ബന്ധവും ഇല്ല.സെർജി നെചായേവ്,പിസാറേവ് എന്നിവരുടെ ആശയങ്ങൾ കടം എടുക്കുകയായിരുന്നു.തൊഴിലാളി വർഗ്ഗത്തിൻറെ ഉന്നമനം ആ വർഗ്ഗത്തിൻറെ തന്നെ പണിയാണ് എന്ന മാർക്‌സിയൻ സിദ്ധാന്തം നിരാകരിച്ച്,പരിശീലനം സിദ്ധിച്ച ഒരു സംഘം ബുദ്ധിജീവികൾ വിപ്ലവത്തിൻറെ കാവലാളായി നിൽക്കുമെന്ന് ഉറപ്പിക്കുന്നു."സ്വന്തം പ്രയത്നത്താൽ,തൊഴിലാളി വർഗത്തിന് തൊഴിലാളി യൂണിയൻ മനസ്സുണ്ടാക്കാനേ കഴിയൂ ,ലെനിൻ എഴുതുന്നു  പ്രവാചകനെപ്പോലെയാണ് ലെനിൻ ഇതിൽ സ്വയം അവതരിപ്പിക്കുന്നത്.ലെനിൻ കടം കൊണ്ട നെചായേവിന്റെ പുസ്തകത്തിൻറെ പേരു തന്നെ,വിപ്ളവത്തിന്റെ അനുഷ്ടാന വിധി ( The Revolutionary Catechism ) എന്നാണ്.
റഷ്യൻ തൊഴിലാളി വർഗത്തെ ലോക തൊഴിലാളി വർഗ നായകന്മാരാക്കും എന്ന് ലെനിൻ ഇതിൽ പറയുമ്പോൾ,ജർമൻ,ബ്രിട്ടീഷ്,അമേരിക്കൻ തൊഴിലാളികളെക്കാൾ പിന്നാക്കമായിരുന്നു.

നെചായേവ് 

ഇസ്‌ക്രയുടെ ആദ്യ ലക്കത്തിൽ പ്ലഖനോവിൻറെ ലേഖനം ഉണ്ടായിരുന്നു.
ലെനിൻറെ സിദ്ധാന്തം,പാർട്ടിയെ പ്രൊഫഷനൽ ബുദ്ധിജീവികൾ റാഞ്ചാൻ ഇടയാക്കുമെന്നും അതിന് മാർക്‌സുമായി ബന്ധമില്ലെന്നും പ്ലഖനോവ് എഴുതിക്കൊണ്ടിരുന്നു.സ്വന്തം നിലയ്ക്ക് തൊഴിലാളി വർഗത്തിന് സോഷ്യലിസ്റ്റ് അവബോധം ഉണ്ടാകില്ലെന്ന ലെനിൻറെ നിരീക്ഷണം മാർക്സിസത്തിന് നിരക്കില്ല.1905 ലെ വിപ്ലവവും പ്ലഖനോവിൻറെ ചിന്തയെ മാറ്റിയില്ല.ഇതിനു ശേഷം ലെനിൻ പ്ലഖനോവിനെ ഗുരുസ്ഥാനത്തു നിന്ന് നീക്കി.ലെനിൻ ഉൾപ്പെട്ട ബോൾഷെവിക്ക് ചേരിക്ക് എതിരായ മെൻഷെവിക്ക് ചേരിയിൽ ഗുരു ചേർന്നു.1905 നു ശേഷം ചരിത്രം,തത്വശാസ്ത്രം,സൗന്ദര്യ ശാസ്ത്രം എന്നിവയിൽ ഗുരു എഴുത്ത് ഒതുക്കി.നിരവധി വാല്യങ്ങളുള്ള റഷ്യൻ സാമൂഹ്യ തത്വശാസ്ത്ര ചരിത്രം മനസ്സിൽ ഉണ്ടായിരുന്നെങ്കിലും,മൂന്ന് വാല്യങ്ങളേ പൂർത്തിയാക്കാൻ ആയുള്ളൂ.1905 -1914 ൽ കമ്മ്യൂണിസ്റ്റ് ഇന്റർനാഷനലിലെ മധ്യ ചേരിക്ക് ഒപ്പമായിരുന്നു.ഒന്നാം ലോകയുദ്ധ കാലത്ത്,സോഷ്യൽ ഡെമോക്രാറ്റിക് പാർട്ടിയിലെ വലതു ചേരിയിൽ എത്തി.1917 ഫെബ്രുവരിയിൽ രാജഭരണം കട പുഴകിയപ്പോൾ,പ്ലഖനോവ് റഷ്യയിൽ തിരിച്ചെത്തി.ഒക്ടോബർ ' വിപ്ലവം ' ബോൾഷെവിക്കുകൾക്ക് പറ്റിയ പാളിച്ചയാണെന്ന് അദ്ദേഹം കണ്ടു.ഫെബ്രുവരിയിൽ ലെനിൻ ഇല്ലാത്ത നേരത്തു നടന്ന വിപ്ലവത്തിൻറെ നേട്ടങ്ങളെ അത് നശിപ്പിക്കുമെന്ന് പ്രവചിച്ചു.1918 മെയ് 30 ന് ഒരു ഫിനിഷ് ചികിത്സാ കേന്ദ്രത്തിൽ നിരാശനും ഏകാകിയുമായി മരിച്ചു.ലെനിന് ശേഷം,പുനരധിവാസമുണ്ടായി.
ഫിൻലൻഡിലേക്ക് അവസാനകാലത്ത് പോയത്,'ജന ശത്രു' എന്ന് വിളിച്ച്,സദാ പ്ലഖനോവിനെ ലെനിൻറെ റെഡ് ഗാർഡുകൾ വേട്ടയാടിയത് കൊണ്ടായിരുന്നു.ആ കാരണവരെ നാം ഓർക്കണം:1904 ൽ തന്നെ, ലെനിൻ ഉന്മൂലനത്തിന് ഒരുമ്പെടുമെന്ന് ഗുരു പറഞ്ഞിരുന്നു.**ലെനിൻ മുന്നോട്ടു വച്ച സംഘടനാ സംവിധാനത്തെ മാർട്ടോവ് എതിർത്ത്,ലെനിൻ രാജി വച്ചു പോയ ശേഷമാണ് ഇത് ഗുരു പറഞ്ഞത്.റോസാ ലക്‌സംബർഗും അത് മുൻകൂട്ടി കണ്ടിരുന്നു.
-------------------------------
* വേറ സസൂലിച്:ആദ്യ റഷ്യൻ വിപ്ലവകാരി സെർജി നെചായേവിന്റെ ശിഷ്യ,മെൻഷെവിക് നേതാവ്.സെൻറ് പീറ്റേഴ്‌സ്ബർഗ് ഗവർണർ ഫയദോർ ട്രെപ്പോവിനെ വെടിവച്ചു പരുക്കേൽപിച്ചു.ലെനിനും നെചായെവിനും ഇടയിലെ കണ്ണി
.  
** Plekhanov: Imagine that the Central Committee possessed the still-debated right of liquidation. The Central Committee everywhere liquidates the elements with which it is dissatisfied, everywhere seats its own creatures and, filling all the committees with these creatures, without difficulty guarantees itself a fully submissive majority at the congress.The congress, constituted of the creatures of the Central Committee, amiably cries Hurrah!, approves all its successful and unsuccessful actions, and applauds all its plans and initiatives.( Adam Bruno Ulam/The Bolsheviks,1965 ,Page 193 ).

See https://hamletram.blogspot.com/2019/07/3.html

ഒരു റഷ്യൻ യക്ഷിക്കഥ 4

4.ലെനിൻ തോറ്റു 28 -22

ലെനിൻറെ രാഷ്ട്രീയവും,യോഗങ്ങളിൽ പൊട്ടിത്തെറിക്കുന്ന സ്വഭാവവും വച്ച്,അയാൾ ഒരു രോഗി ആയിരുന്നു എന്ന നിഗമനത്തിൽ എത്താം.ആ നിഗമനം തെറ്റല്ലെന്ന് സോവിയറ്റ് യൂണിയൻറെ പതന ശേഷം തുറന്നു കിട്ടിയ ആർകൈവ്സ് / ചികിത്സാ രേഖകൾ വെളിപ്പെടുത്തുന്നു.1903 ലെ പിരിമുറുക്കം നിറഞ്ഞു നിന്ന രണ്ടാം പാർട്ടി കോൺഗ്രസിന് ശേഷം തലവേദനയും ഉറക്കമില്ലായ്‌മയും കലശലായപ്പോൾ ജനീവയിൽ വിദഗ്ദ്ധ ഡോക്ടറെ ലെനിൻ കണ്ടു.ഉദര രോഗമാണ് ലെനിൻ സംശയിച്ചത്.ഡോക്ടർ പറഞ്ഞു:" ഉദരമല്ല,തലച്ചോറാണ് ".

രണ്ടാം പാർട്ടി കോൺഗ്രസിന് മുൻപ്,ലണ്ടനിൽ ലെനിന് നെഞ്ചിൽ കഫക്കെട്ടുണ്ടായി.ഞരമ്പുകൾ വലിഞ്ഞു മുറുകും പോലെ തോന്നി.പനി വന്നു.ഭാര്യ നസ്ദേഷ  ക്രൂപ് സ്കേയ മെഡിക്കൽ പുസ്തകങ്ങൾ നോക്കി,ഇത് സയാറ്റിക്ക( Sciatica ) യാണെന്ന് കണ്ടെത്തി.റഷ്യൻ മാർക്‌സിസ്റ്റും ഡോക്ടറുമായ കെ എം തായ്തൊറോവ് സ്ഥിരീകരിച്ചു.ഇടുപ്പ്,കൈകാലുകൾ എന്നിവിടങ്ങളിൽ സയാറ്റിക് ഞരമ്പിലെ രോഗം കാരണം വേദന വരുന്നു.ഇടുപ്പിൽ തുടങ്ങി ശാഖകൾ ആകുന്ന ശരീരത്തിലെ ഏറ്റവും വലിയ ഞരമ്പാണ്,സയാറ്റിക്.ക്രൂപ് സ്കേയ,ലെനിൻറെ ശരീരമാകെ അയഡിൻ പുരട്ടിയിട്ടും ശമനമുണ്ടായില്ല.അങ്ങനെ ഡോക്ടറെ കണ്ട് രോഗം,ഹോളി ഫയർ ആണെന്ന് കണ്ടെത്തി.ഇതിന് സെൻറ് ആൻറണീസ് ഫയർ,എരിസിപെലസ് ( Erisipelas ),എർഗോട്ടിസം ( Ergotism ) എന്നൊക്കെ പറയും.ഭക്ഷ്യ വസ്‌തുക്കളിൽ നിന്നുള്ള ഫംഗസ് തൊലിയെയും അതിനു കീഴിലെ കോശങ്ങളെയും ബാധിക്കുന്നതാണ്,രോഗം .കൈകാലുകളിലും മുഖത്തുമൊക്കെ തിണർപ്പ് വരാം.ക്ഷീണവും തലവേദനയും മാനസിക പ്രശ്നങ്ങളും ഉണ്ടാകാം.

ലെനിനും ക്രൂപ് സ്കേയയും 

ബവേറിയൻ പൊലീസിനെ പേടിച്ച് ലെനിനും കൂട്ടരും ഇസ്‌ക്ര പത്രം ഓഫിസ്,മ്യൂണിക്കിൽ നിന്ന് ലണ്ടനിലേക്ക് മാറ്റാൻ തീരുമാനിച്ചതിനെ തുടർന്നാണ്,1902 ഏപ്രിലിൽ ലെനിൻ , ഭാര്യ, പത്രാധിപ സമിതി അംഗങ്ങളായ ജൂലിയസ് മാർട്ടോവ്,അലക്‌സാണ്ടർ പോട്രേസോവ്,വേറ സസൂലിച് എന്നിവർ ലണ്ടനിൽ എത്തിയത്.സൈബീരിയയിൽ നിന്ന് രക്ഷപ്പെട്ട ട്രോട് സ്‌കി ഒരു നാൾ ലെനിൻറെ വാതിലിൽ മുട്ടി.അയാൾ ഇസ്‌ക്ര പത്രാധിപ സമിതിയിൽ ഏഴാം അംഗമായി.ലെനിൻറെ ഈ നീക്കം,ജനീവയിലുള്ള കാരണവർ പ്ലഖനോവിന് പിടിച്ചില്ല.അയാൾ ഭൂരിപക്ഷമുണ്ടാക്കാൻ നോക്കുകയാണെന്ന് കാരണവർ സംശയിച്ചു.ഇതിന് പത്രാധിപ സമിതിയിൽ ഒരു വോട്ടു കൂടി കിട്ടുകയാണ്.വരുന്ന രണ്ടാം പാർട്ടി കോൺഗ്രസ്,ഇസ്‌ക്ര യിലെ ലെനിൻ ഗ്രൂപ് പിടിച്ചെടുത്താലോ?

മാർട്ടോവിന്റെ ഒരു നീക്കം വഴി,ഇസ്‌ക്ര 1903 ഏപ്രിലിൽ വീണ്ടും ജനീവയ്ക്ക് മാറ്റി.പ്ലഖനോവും ലെനിനും വീണ്ടും കണ്ടുമുട്ടേണ്ട നിലയുണ്ടായി.ലെനിൻറെ നേതൃത്വത്തിൽ പാർട്ടി കോൺഗ്രസിന് സംഘാടക സമിതിയുണ്ടായിരുന്നു.ബെൽജിയത്തിന്റെ തലസ്ഥാനമായ ബ്രസൽസിൽ ജൂലൈ 17 ന് കോൺഗ്രസ് തുടങ്ങിയെങ്കിലും,പൊലീസ് ശല്യം കാരണം അത് ലണ്ടനിലേക്ക് മാറ്റേണ്ടി വന്നു.ജൂലൈ 29 ന്, സോഷ്യലിസ്റ്റായ ഫാ സ്വാൻ സ്ഥാപിച്ച ബ്രദർഹുഡ് പള്ളിയിൽ കോൺഗ്രസ് പുനരാരംഭിച്ചു.

ജനീവയ്ക്ക് ഓഫിസ് മാറ്റും മുൻപ്,തങ്ങൾ ഇരുവരും ഒന്നിച്ചു നിന്ന് പ്ലഖനോവിനെ ഒറ്റപ്പെടുത്താമെന്ന് ലെനിൻ മാർട്ടോവിനോട് പറഞ്ഞിരുന്നു.കോൺഗ്രസിനിടയിൽ ലെനിനെ തള്ളിപ്പറയാൻ വ്ളാദിമിർ അകിമോവ്,പ്ലഖനോവിനോട് ആവശ്യപ്പെട്ടു.പ്ലഖനോവ് പറഞ്ഞു:" നെപ്പോളിയൻ ഭടന്മാരോട് ഭാര്യമാരെ തള്ളിക്കളയാൻ ആവശ്യപ്പെട്ടു.ഭാര്യമാരെ വിശ്വസിച്ചു കൊണ്ട് തന്നെ,അവരെ തള്ളിക്കളയാൻ പലരും തയ്യാറായി.അകിമോവ് ,നെപ്പോളിയനെപ്പോലെയാണ്. ഞാൻ ലെനിനെ തള്ളിക്കളയാൻ വേണ്ടി അയാൾ എന്ത് വിലയും തരും ."

കോൺഗ്രസിൽ പങ്കെടുത്തത് 50 പേരായിരുന്നു.അതിൽ അഞ്ചു പേർ ജ്യൂയിഷ് ബണ്ട് എന്ന പാർട്ടിയിലെ ജൂതരായിരുന്നു.വലിയ സ്വാധീനമുള്ള അവർ കൂടുതൽ പ്രാതിനിധ്യം പാർട്ടിയിൽ അവകാശപ്പെട്ടു പൊന്നു.ഇസ്‌ക്ര ഗ്രൂപ്പിലും ജൂതന്മാരായിരുന്നു,കൂടുതൽ:ആക്സൽറോഡ്,മാർട്ടോവ്,ട്രോട് സ്‌കി.ലെനിൻറെ മുതു മുത്തച്ഛൻ മോഷോ ബ്ലാങ്ക്,ജൂതനായിരുന്നു.

ട്രോട് സ്‌കിയുടെ ആചാര്യനായിരുന്നു,ജൂലിയസ് മാർട്ടോവ് ( 1873 -1923 ).ജനാധിപത്യ സോഷ്യലിസത്തിൻറെ ഹാംലെറ്റ് എന്ന് അദ്ദേഹത്തെ ട്രോട് സ്‌കി വിശേഷിപ്പിച്ചു.( Martov : A Political Biogrophy/Israel Getzler,2003 )." മാർട്ടോവ് കൂടെയില്ല എന്നതാണ് ഏറ്റവും വലിയ സങ്കടം" എന്ന് 1921 ൽ ലെനിൻ വിലപിച്ചു.

മാർട്ടോവ് 

കോൺസ്റ്റാന്റിനോപ്പിളിൽ ആണ് ജനനം.മെൻഷെവിക് നേതാവായ ലിഡിയ ഡാൻ സഹോദരി.1891 ലെ ക്ഷാമമാണ് തന്നെ മാർക്‌സിസ്റ്റ് ആക്കിയതെന്ന് മാർട്ടോവ് ഓർമിച്ചു.1895 ൽ ലെനിനൊപ്പം തൊഴിലാളി വർഗ ഉന്നമനത്തിനുള്ള സെൻറ് പീറ്റേഴ്‌സ് ബർഗ് ലീഗ് സ്ഥാപകനായിരുന്നു.ഇതിൻറെ നേതൃത്വത്തിലുള്ള പണിമുടക്കിനെ തുടർന്ന് 1896 ൽ റഷ്യയിൽ നിന്ന് നാട് കടത്തി.ഒരു കാർട്ടൂൺ വരച്ച് വനിതാ സഖാവിൻറെ ആത്മഹത്യയ്ക്ക് വഴിവച്ച നിക്കോളായ് ബൊമാനെ പുറത്താക്കണമെന്ന് മാർട്ടോവ് പാർട്ടിയിൽ വാദിച്ചു.

ഫെബ്രുവരി വിപ്ലവത്തിന് ശേഷം പാർട്ടിയിൽ തിരിച്ചെത്തി.ലെനിനുമായി സഖ്യം സാധ്യമായില്ല.മുഖ്യധാരയിൽ സ്ഥാനം പോയി.ആഭ്യന്തര യുദ്ധ കാലത്ത്,ജനാധിപത്യ ഐക്യ ഭരണ കൂടത്തിന് വാദിച്ചു.നിയമ നിർമാണ സഭയിൽ മെൻഷെവിക് നേതാവായി.ലെനിൻ സിംഹാസനമേറി ചുവപ്പ് ഭീകരത ( Red Terror ) നടമാടിയപ്പോൾ,മാർട്ടോവ് പറഞ്ഞു:" മൃഗം മനുഷ്യൻറെ ചുടുരക്തം നക്കി.മനുഷ്യനെ കൊല്ലുന്ന യന്ത്രം ചലിക്കാൻ തുടങ്ങി.എന്നാൽ,ചോര സൃഷ്ടിക്കുന്നത്,ചോരയെ തന്നെ ".( The Black Book of Communism ,Page 736 ).

പ്ലഖനോവുമായി തർക്കിച്ച ലെനിൻ 1901 ൽ തന്നെ,"എന്താണ് ചെയ്യേണ്ടത്" എന്ന ലഘു ലേഖ പുറത്തിറക്കിയിരുന്നു.കോൺഗ്രസിൽ,ലെനിൻ കരട് പാർട്ടി പരിപാടി അവതരിപ്പിച്ചു.അതിലാണ്,'തൊഴിലാളി വർഗ സർവാധിപത്യം' ( Dictatorship of the Proletariat) വന്നത്.അത് അംഗീകരിച്ചു.എന്നാൽ,പാർട്ടി ചട്ടങ്ങൾ അവതരിപ്പിച്ചപ്പോൾ,മാർട്ടോവ് എതിർത്തു.ആർക്കൊക്കെ പാർട്ടി അംഗങ്ങളാകാം എന്നതായിരുന്നു,പ്രശ്‍നം.'പാർട്ടി പരിപാടി അംഗീകരിക്കുകയും പാർട്ടിക്ക് ഭൗതിക സഹായം ചെയ്യുകയും പാർട്ടി സംഘടനയിൽ ഉണ്ടായിരിക്കുകയും ചെയ്യുന്നയാൾ പാർട്ടി അംഗമായിരിക്കും' എന്നായിരുന്നു,രേഖയിൽ.ഇതിൽ,മാർട്ടോവ്,' സംഘടനാ നിർദേശത്തിനു കീഴിൽ' ( under direction ) എന്ന ഭേദഗതി നിർദേശിച്ചു.കേന്ദ്ര നേതൃത്വത്തിൽ നിന്ന് സ്വതന്ത്രമായി അഭിപ്രായം പറയുന്ന അംഗങ്ങളുടെ പാർട്ടി എന്നാണ്,മാർട്ടോവ് ഉദ്ദേശിച്ചത്.ലെനിനാകട്ടെ,'നേതൃത്വം' മാത്രമായിരുന്നു,പ്രധാനം.ബാക്കിയെല്ലാം അതിന് കീഴെ.തർക്കം കോൺഗ്രസിൻറെ വോട്ടിനിട്ടു;ലെനിൻ തോറ്റു -28 -22.മാർട്ടോവിന്റെ പക്ഷത്തേക്ക് മാറിയ ഒരു സഖാവിന് നേരെ,അലക്‌സാണ്ടർ ഷോട് മാൻ കൈയോങ്ങി.

ഇസ്‌ക്ര പത്രാധിപ സമിതി അംഗത്വം മൂന്നായി ചുരുക്കാമെന്നും പ്ലഖ്നോവിന് മേൽ തനിക്കും മാർട്ടോവിനും പിടി മുറുക്കാമെന്നും മാർട്ടോവുമായി കോൺഗ്രസിന് മുൻപ് ലെനിൻ ധാരണയിൽ എത്തിയിരുന്നു.പക്ഷെ, ലെനിൻ കോൺഗ്രസിൽ ചുവട് മാറ്റിയത് മാർട്ടോവിന് ദഹിച്ചില്ല.മാർട്ടോവിനെ ലെനിൻ പക്ഷം,കാപട്യക്കാരൻ എന്ന് വിളിച്ചു,ജൂത ബണ്ടിലെ അഞ്ചു പേരും 'ഇക്കണോമിസ്റ്റു'കളും കോൺഗ്രസ് ബഹിഷ്‌കരിച്ചു പുറത്തിറങ്ങിയപ്പോൾ,മാർട്ടോവിന് പിന്തുണ നഷ്ടപ്പെട്ടു.

പാർട്ടിയുടെ  ഉന്നത ഘടകം മൂന്നംഗ പാർട്ടി കൗൺസിൽ ആയിരിക്കുമെന്ന് തീരുമാനിച്ചു.ഇതിനു കീഴിൽ,മൂന്നംഗ കേന്ദ്ര കമ്മിറ്റി.അങ്ങനെ പ്ലഖനോവിനൊപ്പം നിന്ന് ലെനിൻ ജയിച്ചു.അവിടെ ഭൂരിപക്ഷം കിട്ടിയ തൻറെ പക്ഷത്തെ ലെനിൻ,ഭൂരിപക്ഷ ( ബോൾഷെവികി ) വിഭാഗം എന്ന് വിളിച്ചു.മാർട്ടോവിൻറെ ഗ്രൂപ്,മെൻഷെവികി ( ന്യൂനപക്ഷ ) വിഭാഗമായി.മൂന്നംഗ കേന്ദ്ര കമ്മിറ്റിയെ തിരഞ്ഞെടുത്തു:വി എ നൊസ്‌കോവ്,ഗ്ലെബ് കിർഷിഷാനോവ്സ്കി,എഫ് വി ലെൻഗ്നിക്.ഇസ്‌ക്ര പത്രാധിപ സമിതിയിൽ മൂന്ന് അംഗങ്ങൾ:ലെനിൻ,പ്ലഖനോവ്,മാർട്ടോവ്.അങ്ങനെ,റഷ്യൻ സോഷ്യൽ ഡെമോക്രാറ്റിക് ലേബർ പാർട്ടി,പരിപാടിയും ചട്ടവുമായി,നിലവിൽ വന്നു.ലെനിൻറെ ഏകാധിപത്യത്തിൽ ചുരുങ്ങിപ്പോയ പ്ലഖനോവ്,ആത്മഹത്യയെപ്പറ്റി ആലോചിച്ചു.

കോൺഗ്രസ് കഴിഞ്ഞ്,ജനീവയിൽ നടന്ന ഫോറിൻ ലീഗ് ഓഫ് റഷ്യൻ റവലൂഷനറി സോഷ്യൽ ഡെമോക്രസി സമ്മേളനത്തിൽ,മാർട്ടോവ്,ലെനിനെ വ്യക്തിപരമായി ആക്രമിച്ചു.കോൺ ഗ്രസിനു മുൻപ്,പ്ലഖ്നോവിനെ  വെട്ടിനിരത്താൻ ഒന്നിച്ചു നിൽക്കണമെന്നു പറഞ്ഞ ലെനിൻ,വാക്ക് പാലിച്ചില്ലെന്ന് മാർട്ടോവ് കുറ്റപ്പെടുത്തി.ഹാളിൻറെ വാതിൽ തുറന്ന്,അത് കൊട്ടിയടച്ച് ലെനിൻ പുറത്തു പോയി.സംഘർഷം ഒഴിവാക്കാൻ താൻ പത്രാധിപ സമിതി വിടാമെന്ന് പ്ലഖനോവ് നിർദേശം വച്ചു.ഒരു വിപ്ലവ പാർട്ടി ഉണ്ടായിക്കാണാൻ 20 വര്ഷം കാത്ത കാരണവർക്ക്,പാർട്ടി ആയിരുന്നു,പ്രധാനം.ലെനിൻ പാർട്ടി കൗൺസിലിൽ നിന്നും ഇസ്‌ക്രയിൽ നിന്നും രാജി വച്ചു.ബോൾഷെവിക്കുകൾ ന്യൂനപക്ഷമായി.പ്ലഖനോവ്,മാർട്ടോവിന്റെ ന്യൂന പക്ഷത്തിനൊപ്പം നിന്നു.

ഇങ്ങനെ പുറത്തിറങ്ങിയതിനെ ന്യായീകരിച്ചാണ്,ലെനിൻ 1904 ൽ ' ഒരടി മുന്നോട്ട്,രണ്ടടി പിന്നോട്ട്' ( One Step Forward,Two Steps Backward ) എന്ന ലഘു ലേഖ എഴുതിയത്.അതിലാണ്,പാർട്ടി അംഗത്തിൻറെ വ്യക്തി സ്വാതന്ത്ര്യത്തിന് കൂച്ചു വിലങ്ങിടുന്ന ' ജനാധിപത്യ കേന്ദ്രീകരണം' ( Democratic Centralism ) എന്ന ഭ്രാന്തൻ ആശയം വന്നത്.ഇതാണ്,ലോകമാകെയുള്ള കമ്മ്യൂണിസ്റ്റുകൾ,ചൈനയും മാവോയിസ്റ്റുകളും ഉൾപ്പെടെ,പിന്തുടരുന്നത്.ഇത് എത്രമാത്രം അപകടകരമാണെന്ന് 1904 ൽ തന്നെ,റോസാ ലക്സംബർഗ് 'റഷ്യൻ സോഷ്യൽ ഡെമോക്രസിയുടെ സംഘടനാ പ്രശ്നങ്ങൾ' എന്ന പ്രബന്ധത്തിൽ നിരീക്ഷിച്ചു.സംഘടനയുടെ ഊന്നൽ തൊഴിലാളികളിൽ ആയിരിക്കണം എന്ന് അവർ പറഞ്ഞു.സോഷ്യലിസത്തിൻറെ പാത തീരുമാനിക്കേണ്ടത്,പാർട്ടി നേതാക്കൾ അല്ല.പാർട്ടി നേതൃത്വം നോക്കേണ്ടത്,അതിനുള്ളവിശാല മാർഗ രേഖയാണ് .ലെനിൻറെ അധിക കേന്ദ്രീകരണം ( Ultra Centralism ) അതിന് ഗുണം ചെയ്യില്ല.ആ പ്രബന്ധത്തിൽ റോസ പറഞ്ഞ കാര്യങ്ങൾ ഇവയാണ്:*

• കേന്ദ്ര കമ്മിറ്റിയിൽ അധികാരം കേന്ദ്രീകരിച്ചതായി ലെനിൻ സിദ്ധാന്തിക്കുന്നു.അതിൻറെ തീരുമാനത്തിന് അപ്പീൽ ഇല്ല.എന്നാൽ,സോഷ്യലിസ്റ്റ് അധികാര കേന്ദ്രീകരണം ഇതല്ല.അത്,തൊഴിലാളി പ്രതിനിധികളുടെ ഇച്ഛ ആയിരിക്കണം.തൊഴിലാളി വർഗ്ഗത്തിൽ മുന്നേറിയവരുടെ 'സ്വയം കേന്ദ്രീകരണം' ( self -centalism ) ആണ്,അത്.
• ലെനിൻ പറഞ്ഞ പോലെ,നിഷേധാത്മകമായ അധികാരം,പാർട്ടിയുടെ ഉന്നത്തിൽ കേന്ദ്രീകരിച്ചാൽ,ആ ഘടകത്തിന്റെ യാഥാസ്ഥിതികത്വത്തെ അത്,അപകടകരമാം വിധം ശക്തിപ്പെടുത്തും.
• ലെനിൻ പറയുന്നത് അവസര വാദമാണ്.അതിന് തത്വമില്ലായ്‌മ എന്ന തത്വം മാത്രമേയുള്ളു;അത്,ഏകാധിപത്യ കേന്ദ്രീകരണമാണ്.അവസരവാദികളായ ബുദ്ധിജീവികളുടെ ഏകാധിപത്യ കേന്ദ്രീകരണം.

റോസ വ്യക്തി സ്വാതന്ത്ര്യത്തിനും ജനാധിപത്യത്തിനും വേണ്ടി വാദിച്ചത് കൊണ്ട്,അവർ,ബോൾഷെവിക്കുകൾക്ക് പഥ്യമല്ലാതായി;കാൾ കൗട് സ്‌കിയും ലെനിൻറെ ' തൊഴിലാളി വർഗ സർവാധിപത്യ' ത്തെ തിരസ്‌കരിച്ചു.

കിർഷിഷാനോവ്സ്കി 

രണ്ടാം പാർട്ടി കോൺഗ്രസിന് ശേഷം,ലെനിന് തലവേദനയും ഉറക്കമില്ലായ്‌മയും കലശലായി.താൻ ഒരു ദൗത്യം നടപ്പാക്കാൻ പിറന്നവൻ ആണെന്ന തോന്നൽ ഇല്ലായിരുന്നെങ്കിൽ,ലെനിൻ നേരത്തെ തകർന്നടിഞ്ഞേനെ.പ്ലഖനോവുമായി തർക്കിച്ച് സ്വന്തo സിദ്ധാന്തം രൂപപ്പെടുത്തിയ ശേഷം,തനിക്ക് തുല്യൻ ആരുമില്ലെന്ന വിശ്വാസം,ലെനിനിൽ വളർന്നു.അത്,ഒറ്റപ്പെടലും ആയിരുന്നു.കിർഷിഷാനോവ്സ്കിയെപ്പോലെ അടുത്ത സുഹൃത്ത് വിട്ടു പോയത്,ലെനിനെ വിഷാദവാനാക്കി.ശാസ്ത്രജ്ഞനായ കിർഷിഷാനോവ്സ്കി 1895 ലെ സംഘടനാ സ്ഥാപകനും  1904 -05 ലെ മൂന്നാം കോൺഗ്രസ് സംഘാടകനും ആയിരുന്നു.1910 ൽ മോസ്‌കോ ഊർജ നിലയം സ്ഥാപിച്ചു;സാറാറ്റോയിൽ ജല വൈദ്യുത നിലയവുമുണ്ടാക്കി.റഷ്യൻ അക്കാദമി ഓഫ് സയൻസസിൽ ജോലി ചെയ്‌തു.ഗ്രേറ്റ് സോവിയറ്റ്  വിജ്ഞാനകോശം പത്രാധിപസമിതി അംഗം.

ജനാധിപത്യത്തെ തരിമ്പു പോലും വില വയ്ക്കാത്ത ലെനിൻ,1903 നവംബറിൽ,കിർഷിഷാനോവ്സ്കിയെ കണ്ട് ,കേന്ദ്ര കമ്മിറ്റിയിലേക്ക് തന്നെ കോ -ഓപ്റ്റ് ചെയ്യണം എന്നപേക്ഷിച്ചു.കൂട്ടുകാരൻ വഴങ്ങി.ലെനിൻ കേന്ദ്ര കമ്മിറ്റിയിൽ തിരിച്ചെത്തി.സത്യസന്ധത,സ്വഭാവ മഹിമ എന്നിവയുടെ അഭാവത്തിൽ,ലെനിൻ,ചെറ്റത്തരം രാഷ്ട്രീയ കലയാക്കി വളർത്തി എടുത്തിരുന്നു.അയാളുടെ രാഷ്ട്രീയവും രോഗവും ഭ്രാന്തമായി.

ലെനിൻ ജനീവയിൽ വിദഗ്ദ്ധ ഡോക്ടറെ കണ്ടതും,ഡോക്ടർ ' തലച്ചോറിനാണ് കുഴപ്പം ' എന്ന് പറഞ്ഞതും,ഇക്കാലത്താണ്.ലെനിൻറെ പിതാവ്,സെറിബ്രൽ ആർട്ടറിയോസ്ലെറോസിസ് വന്ന് ഹൃദയാഘാതം മൂലമാണ് മരിച്ചത്.തലച്ചോറിനാണ് അസുഖം എന്ന് ഡോക്ടർ പറഞ്ഞതിന്,അന്ന് അർഥം രണ്ടായിരുന്നു.ലെനിനും പിതാവിൻറെ രോഗമാകാം;രോഗം ന്യൂറോസ്‌തീനിയ ( neurosthenia ) ആകാം.കേന്ദ്ര നാഡീവ്യൂഹത്തിലെ തകരാർ നിമിത്തം ശരീരം ക്ഷീണിക്കുന്നതാണ്,ന്യൂറോസ്‌തീനിയ.മാനസിക പ്രവൃത്തികളിൽ നിന്ന് വിട്ടു നിന്ന് വിശ്രമിക്കാനാണ്,ഡോക്ടർമാർ ഉപദേശിച്ചിരുന്നത്.ഇന്ന് അങ്ങനെ ഒരു രോഗം ഇല്ല.ഇന്നത്തെ നിലയിൽ,ലക്ഷണങ്ങൾ വച്ച് ലെനിനുണ്ടായിരുന്നത്,സെറിബ്രോ വാസ്‌കുലാർ രോഗമാണ്.അതായത്,തലച്ചോറിന് രക്തവും പോഷകങ്ങളും എത്തിക്കുന്ന രക്തധമനികളുടെ കേട്.

ലെനിൻ ജോലി ചെയ്യുമ്പോൾ,ചെറിയ അനക്കം പോലും ഉണ്ടാക്കിയിരുന്നില്ല.ആശയങ്ങൾ തലയിൽ കയറി മുറിയിൽ നടന്നിരുന്നത്,പാദ പതനം ഉണ്ടാക്കാതെ,കാലിൻറെ പെരുവിരലുകൾ നിലത്തുറപ്പിച്ചാണ്.ഇന്നത്തെ ഭാഷയിൽ,ഒരു മനുഷ്യ ബോംബ് ( a human time bomb).

-----------------------

*Organizational Questions of the Russian Social Democracy / Rosa Luxemberg,1904:

Lenin’s thesis is that the party Central Committee should have the privilege of naming all the local committees of the party. It should have the right to appoint the effective organs of all local bodies from Geneva to Liege, from Tomsk to Irkutsk. It should also have the right to impose on all of them its own ready-made rules of party conduct. It should have the right to rule without appeal on such questions as the dissolution and reconstitution of local organizations. This way, the Central Committee could determine, to suit itself, the composition of the highest party organs. The Central Committee would be the only thinking element in the party. All other groupings would be its executive limbs...In consequence of this, ordinary members of the organization became simple executive organs, carrying out the orders of a will fixed beforehand, and outside of their particular sphere of activity. They became the instruments of a Central Committee. Here we have the second peculiarity of conspiratorial centralism – the absolute and blind submission of the party sections to the will of the center, and the extension of this authority to all parts of the organization....

 there do not exist for the Social Democracy detailed sets of tactics which a Central Committee can teach the party membership in the same way as troops are instructed in their training camps.....

(Socialist centralism )can only be the concentrated will of the individuals and groups representative of the working class. It is, so to speak, the “self-centralism” of the advanced sectors of the proletariat. It is the rule of the majority within its own party....

The discipline Lenin has in mind is being implanted in the working class not only by the factory but also by the military and the existing state bureaucracy – by the entire mechanism of the centralized bourgeois state....Granting, as Lenin wants, such absolute powers of a negative character to the top organ of the party, we strengthen, to a dangerous extent, the conservatism inherent in such an organ.... The ultra-centralism asked by Lenin is full of the sterile spirit of the overseer. It is not a positive and creative spirit. Lenin’s concern is not so much to make the activity of the party more fruitful as to control the party – to narrow the movement rather than to develop it, to bind rather than to unify it....

On the question of Organization,or any other question,opportunism knows only one principle:Opportunism chooses its means of action with the aim of suiting the given circumstances at hand,provided these means appear to lead towards the ends in view ...In general,it is rigorous,despotic centralism which is preferred by opportunistic intellectuals.

Seehttps://hamletram.blogspot.com/2019/07/3.html

ഒരു റഷ്യൻ യക്ഷിക്കഥ 3

3.പ്ലഖനോവിൻറെ വരട്ടു വാദങ്ങൾ 

പുസ്‌തകങ്ങളുടെ ലോകത്തെത്തിയ കാലത്ത്,പി കേശവദേവ് മാക്‌സിം ഗോർക്കിയുടെ അമ്മയും നോർവീജിയൻ എഴുത്തുകാരൻ നട്ട് ഹാംസണിന്റെ വിശപ്പും വായിച്ച് ആവേശം കൊണ്ടു.
വിശപ്പിലെ നായകൻ എഴുത്തുകാരനാണ്.രാത്രി ആഹാരത്തിനായി ആളെ പിടിക്കാൻ തെരുവിൽ അലയുന്ന വേശ്യ അയാളെ വിളിച്ചു കൊണ്ടു പോയി,കൈയിൽ കാശില്ലെന്നറിഞ്ഞ്, ആട്ടിപ്പുറത്താക്കുന്ന ഒരു സംഭവം ആ നോവലിലുണ്ട്.
ഒരിക്കൽ നായകൻ ഇറച്ചിക്കടയിൽ ചെന്ന് പട്ടിക്ക് കൊടുക്കാനെന്നു കള്ളം പറഞ്ഞ് ഒരെല്ലു വാങ്ങിക്കൊണ്ടു പോയി,തെരുവിൽ വിജനമായിടത്തു ചെന്ന്,എല്ലിൽ പറ്റിപ്പിടിച്ചിരുന്ന മാംസ ശകലം ചവച്ചിറക്കുമ്പോൾ,ഛർദിച്ചു.എല്ലു വലിച്ചെറിഞ്ഞ് സകല വെറുപ്പും രോഷവും സമാഹരിച്ച് അയാൾ ദൈവത്തെ നിന്ദിച്ചു.
ആ വാചകങ്ങൾ കേശവദേവ് പലവട്ടം ഉരുവിടുമായിരുന്നു.
ആര്യസമാജത്തിൽ ചേർന്ന് കേശവ പിള്ളയിലെ പിള്ള കളഞ്ഞ്,പൂണൂലിട്ട് കേശവദേവായ അദ്ദേഹം സമാജം ഉപേക്ഷിച്ച് നാട്ടിലെത്തി.1928 ൽ തിരുവനന്തപുരത്ത് സ്വദേശാഭിമാനി രാമകൃഷ്‌ണ പിള്ളയുടെ മരുമകൻ സ്വരാട് പത്രാധിപർ ബാരിസ്റ്റർ എ കെ പിള്ളയ്ക്ക് ദേവ് കത്തെഴുതി.
പിള്ള പത്രം നിർത്തി പ്രസ് വിറ്റിരുന്നു.പിള്ളയുടെ വീട്ടിൽ ചെന്നിരുന്ന് നിർബാധം വായിക്കണം എന്നാണ് ദേവ് എഴുതിയത്.പിള്ള സമ്മതിച്ചു.അവിടെയാണ് ദേവ്,അമേരിക്കൻ പത്രപ്രവർത്തകൻ ജോൺ റീഡ് എഴുതിയ  Ten Days that Shook the World കണ്ടത്.ഇന്ന് ,ആ പുസ്തകം ലെനിന് വേണ്ടി എഴുതിയ വ്യാജ നിര്മിതിയാണെന്ന് നമുക്കറിയാം.
ലൈബ്രറിയിൽ നിന്ന് കമ്മ്യൂണിസ്റ്റ് മാനിഫെസ്റ്റോ മാത്രമല്ല,പ്ലഖനോവിൻറെ ഡയലെക്റ്റിക്കൽ മെറ്റീരിയലിസവും* വായിക്കണമെന്ന് പിള്ള നിർദേശിച്ചു.
പി കൃഷ്‌ണ പിള്ളയ്ക്കും  ഇ എം എസിനും മുൻപ് കമ്മ്യൂണിസ്റ്റ് ആയ ആളാണ്,ദേവ്.
മാർക്‌സിസത്തിന്റെ ചരിത്രത്തിൽ, ചെക്ക് -ഓസ്ട്രിയൻ ചിന്തകൻ കാൾ കൗട് സ്‌കിക്ക് ഒപ്പമാണ്,പ്ലഖനോവിൻറെ സ്ഥാനം.ശരിപ്പേർ ജോർജ് വലന്റീനോവിച് പ്ലഖനോവ് ( 1856 -1918 ).റഷ്യയിൽ മാർക്സിസത്തിൻറെ പിതാവ്.ലെനിൻറെ തലമുറയിലെ മാർക്സിസ്റ്റുകൾ പ്ലഖനോവ് ശിഷ്യന്മാരായിരുന്നു.
മൗലിക താത്വികൻ ആയിരുന്നില്ല.തത്വ ശാസ്ത്രം പഠിച്ചിരുന്നുമില്ല.മാർക്സിസത്തിലെ ആദ്യ വരട്ടു തത്വ വാദിയായും അറിയപ്പെടുന്നു.ആദ്യ മാർക്‌സിസ ഇടയ ലേഖനങ്ങൾ എഴുതിയത് അദ്ദേഹമായിരുന്നു.പ്രവാസിയായിരുന്ന അദ്ദേഹം,ലെനിൻ അയച്ച മാസികകൾ വഴിയും സുഹൃത്തുക്കൾ വഴിയുമാണ്,റഷ്യയിലെ കാര്യങ്ങൾ അറിഞ്ഞിരുന്നത്.
പട്ടാള സ്‌കൂളിൽ പഠിച്ച്,മിലിട്ടറി അക്കാദമിയിൽ ചേർന്ന്,അവിടം വിട്ട് മൈനിംഗ് ഇൻസ്റ്റിട്യൂട്ടിൽ പോയ പ്ലഖനോവിനെ അവിടന്ന് പുറത്താക്കുകയായിരുന്നു.ഇക്കാലത്താണ് നിക്കോളായ് ചേർനിഷെവ്‌സ്‌കി തുടങ്ങിയ തീവ്ര എഴുത്തുകാരുടെ വലയിൽ വീണത്.പാവേൽ ആക്സൽറോഡ്,ലിയോവ് ദ്യൂഷ് എന്നിവർ പിൽക്കാലത്ത് ഉറ്റ സുഹൃത്തുക്കൾ ആയി.റഷ്യൻ ഏകാധിപത്യത്തിന് എതിരായ സെംലിയ ഐ വോല്യയുടെ സ്ഥാപകാംഗമായി.1876 ൽ സെൻറ് പീറ്റേഴ്‌സ്ബർഗിൽ നടന്ന പ്രകടനത്തിൻറെ സംഘാടകരിൽ ഒരാളായി,അറസ്റ്റിൽ നിന്ന് രക്ഷപ്പെടാൻ ബെർലിനിലേക്ക് കടന്നു.1877 ൽ മുഴുവൻ സമയ വിപ്ലവകാരിയായി മടങ്ങി വിപ്ലവ ഗ്രൂപ്പുകളെ ഏകോപിപ്പിച്ചു.സാർ ഭരണ കൂടത്തിനെതിരെ ലഘു ലേഖകൾ എഴുതി.വ്യക്തിപരമായ ഭീകര പ്രവർത്തനങ്ങൾക്ക് എതിരായിരുന്നു.വിപ്ലവ ചേരി രണ്ടായി;ഭരണ കൂടം ഇതിനെ അടിച്ചമർത്തി.1880 ൽ ഈ ഗ്രൂപ് വീണ്ടും ഉണർന്നപ്പോൾ,പ്ലഖനോവ്, ദ്യൂഷ്,വേറ സസൂലിച് എന്നിവർക്ക് റഷ്യ വിടേണ്ടി വന്നു.ജനീവയിൽ താമസിച്ച പ്ലഖനോവ് പിന്നെ റഷ്യയിൽ എത്തിയത് 1917 ൽ മാത്രമാണ്.

ജനീവയിലെ ആദ്യ രണ്ടു വർഷങ്ങളിൽ പ്ലഖനോവ് മാർക്സിസത്തിലേക്ക് മതം മാറി.റഷ്യയുടെ മോചനത്തിന് രാഷ്ട്രീയ സമരം മാർഗമായി അദ്ദേഹം അതുവരെ കണ്ടിരു ന്നി ല്ല.സാമൂഹിക വിപ്ലവമാണ് വേണ്ടത്.ഇതിൽ നിന്ന് മാർക്സിസത്തിലേക്ക് മാറിയപ്പോഴും,ആശയങ്ങൾക്ക് മുകളിൽ സാമ്പത്തികാവസ്ഥയെ പ്രതിഷ്ഠിച്ചില്ല.മതത്തിനു പകരം,ഭൗതിക വാദത്തെയും വച്ചില്ല.മതം അദ്ദേഹം ഉപേക്ഷിച്ചിരുന്നു.വിപ്ലവം നടത്തേണ്ടത് ജനമല്ല,വ്യവസായ തൊഴിലാളികളും പിന്നെ കര്ഷകരുമാണെന്ന് കരുതി.ഇവിടെ നിന്ന് മുന്നേറാത്തതിനാൽ പറഞ്ഞത് തന്നെ ഇ എം എസിനെപോലെ ആവർത്തിച്ച് കൊണ്ടിരുന്നു.പ്ലഖനോവ്,  ദ്യൂഷ്,വേറ,ആക്സൽറോഡ് എന്നിവർ Labour Emancipation Group ഉണ്ടാക്കി.രണ്ടു വർഷം കൊണ്ട് റഷ്യൻ സോഷ്യൽ ഡെമോക്രസിക്ക് അടിത്തറയിട്ടു.സോഷ്യലിസവും രാഷ്ട്രീയ  പോരാട്ടവും ( Socialism and Political Struggle 1883 ),നമ്മുടെ ഭിന്നതകൾ ( Our Differences ,1885 ) എന്നീ പുസ്തകങ്ങൾ വഴി പ്ലഖനോവ് സ്വയം ന്യായീകരിച്ചു.അങ്ങനെ,ജനകീയ ചേരിയും വിപ്ലവ ചേരിയും തമ്മിൽ അകൽച്ചയ്ക്ക് താത്വിക അടിത്തറയുണ്ടാക്കി.അലക്‌സാണ്ടർ രണ്ടാമൻ ചക്രവർത്തി റഷ്യയെ മുതലാളിത്തത്തിലേക്കാണ് നയിക്കുന്നത്.അതിനെ ഒറ്റച്ചാട്ടം വഴി മറികടന്ന് കമ്മ്യൂണിസത്തിൽ എത്താനാകില്ല.റഷ്യയുടെ ഉടൻ ആവശ്യം സോഷ്യലിസ്റ്റ് വിപ്ലവം അല്ല.ബൂർഷ്വ രാഷ്ട്രീയ വിപ്ലവമാണ്.ഈ സിദ്ധാന്ത പ്രകാരവും 1917 ൽ സോഷ്യലിസ്റ്റ് വിപ്ലവം അല്ല നടന്നത്.ബൂർഷ്വ വിപ്ലവവും   നടത്തേണ്ടത് തൊഴിലാളികൾ തന്നെയായിരിക്കണം-മാർക്‌സിസവുമായി ബന്ധമൊന്നും ഇല്ലാത്ത ഈ സിദ്ധാന്തത്തിൽ നിന്നാണ് ലെനിനിസം രൂപപ്പെട്ടത്.ജനകീയ ചേരിയുടെ പ്രത്യയ ശാസ്ത്രം പ്രതിവിപ്ലവ ഉട്ടോപ്യയായി പ്ലഖനോവ് ചിത്രീകരിച്ചു.ഒരു സംഘം വിപ്ലവകാരികൾ അട്ടിമറി വഴി ഭരണം പിടിച്ചാലും അവർക്ക് സോഷ്യലിസ്റ്റ് സംവിധാനം നടപ്പാക്കാനാകില്ല എന്ന് പ്ലഖനോവ് പറഞ്ഞത്,സത്യം തന്നെ എന്ന് ലെനിൻ പിന്നീട് തെളിയിച്ചു..
പ്ലഖനോവ് മറ്റൊരു വിഡ്ഢിത്തം കൂടി വിളമ്പി:തൊഴിലാളി വർഗ്ഗത്തിൽ പെടാത്ത ബുദ്ധിജീവി വർഗമാണ്,തൊഴിലാളികൾക്ക് സോഷ്യലിസ്റ്റ് അവബോധം നൽകേണ്ടത്.
ഈ വിഡ്ഢിത്തങ്ങൾ വലിയൊരു സമസ്യ ഉയർത്തി -ഒരു ബൂർഷ്വ വിപ്ലവത്തിൽ മറ്റു വര്ഗങ്ങളുമായി തൊഴിലാളി വർഗത്തിന് സഖ്യം ആകാമെങ്കിൽ,തൊഴിലാളി വർഗ്ഗത്തിൻറെ സ്വാഭാവിക സഖ്യം ബൂർഷ്വയുമായാണോ,കര്ഷകനുമായാണോ?അതോ,രണ്ടിലേയും ചില വിഭാഗങ്ങളോടാണോ?
ഇരുപതു വർഷത്തിന് ശേഷം,ഈ ചോദ്യങ്ങൾ റഷ്യൻ സോഷ്യൽ ഡെമോക്രാറ്റുകളെ പിളർപ്പിൽ എത്തിച്ചു.അവർ ബോൾഷെവിക്കുകളും മെൻഷെവിക്കുകളും ആയി.
പ്ലഖനോവിൻറെ രചനകൾ 1890 കളിൽ ജനാധിപത്യ പ്രസ്ഥാനത്തിന് അടിത്തറയായി .ഒരു സംഘം റഷ്യൻ ഭീകരർ നടത്തിയ സ്ഫോടനം അദ്ദേഹത്തെ സ്വിറ്റ്‌സർലൻഡിൽ നിന്ന് പുറത്താക്കി.ഫ്രാൻസിലേക്ക് പോയ അദ്ദേഹത്തെ 1894 ൽ സൂറിച്ചിൽ കമ്മ്യൂണിസ്റ്റ് ഇന്റര്നാഷനലിൻ്റെ ആദ്യ കോൺഗ്രസിൽ ഫ്രഞ്ച് സർക്കാരിനെ വിമർശിച്ചപ്പോൾ,ഫ്രാൻസ് പുറത്താക്കി.ലണ്ടനിലെത്തിയ അദ്ദേഹത്തിന് കുറച്ചു കഴിഞ്ഞ് ജനീവയിൽ പുനഃപ്രവേശം നൽകി.1894 ൽ റഷ്യയിൽ ബെൽറ്റോവ് എന്ന വ്യാജപ്പേരിൽ പ്ലഖനോവിൻറെ പുസ്തകം പുറത്തു വന്നു.അതിൻറെ യഥാർത്ഥ ശീർഷകം In Defence of Materialism** എന്നായിരുന്നെങ്കിലും,റഷ്യയിൽ ഇറക്കിയത്,A Contribution to the Question of the Development of the Monistic View of History എന്ന പേരിലായിരുന്നു!
ഈ പുസ്തകം റഷ്യയിൽ അദ്ദേഹത്തെ മഹാ പണ്ഡിതനാക്കി.ഈ പുസ്തകം അവർത്തിച്ചതാണ്,അദ്ദേഹത്തിൻറെ പിൽക്കാല രചനകൾ.ലോകമാകെ മാർക്സിസ്റ്റുകൾ ഇന്നോളം നടത്തിയ ചില പ്രയോഗങ്ങൾക്ക് ഏംഗൽസ് കഴിഞ്ഞാൽ അവർ കടപ്പെട്ടത് പ്ലഖനോവിനോടാണ്.ജനകീയ ചേരിക്കാർക്ക് ശേഷം,ജർമൻ പ്രതിവിപ്ലവകാരികളും നിയോ കാന്റിയനുകളും റഷ്യൻ എംപിരിയോ വിമർശകരും ശത്രു പക്ഷത്ത് വന്നു.അവർ മാർക്സിസത്തിന് അകത്തു നിന്ന് അതിനെ വ്യാഖ്യാനിക്കാൻ ശ്രമിച്ചത്,പ്ലഖനോവിന് പിടിച്ചില്ല.
പടിഞ്ഞാറൻ യൂറോപ്പിലെ മാർക്സിസ്റ്റ് ചിന്തകർ സാമൂഹിക വികാസ സിദ്ധാന്തമായ മാർക്‌സിസവും ജ്ഞാനശാസ്ത്ര പ്രശ്‍നങ്ങളും തമ്മിൽ ഒരു ബന്ധവും കണ്ടിരുന്നില്ല.കൗട് സ്‌കിയും ഒടുവിൽ ഈ നിലപാടിൽ എത്തിയിരുന്നു.എന്നാൽ,പ്ലഖനോവിന് എല്ലാറ്റിനുമുള്ള ഉത്തരം,മാർക്സിസത്തിൽ ഉണ്ടായിരുന്നു.മാർക്‌സിസ്റ്റ് തത്വചിന്തയെ സമഗ്രമായി വിശേഷിപ്പിക്കാൻ വൈരുദ്ധ്യാത്മക ഭൗതികവാദം ( Dialectical Materialism ) എന്ന് ആദ്യം പ്രയോഗിച്ചത് പ്ലഖനോവ്   ആണ്.ഈ വാദത്തെ ലെനിനും സ്വീകരിച്ചു.ഇത് സോവിയറ്റ് ഭരണകൂടത്തിൻറെ പ്രത്യയ ശാസ്ത്രവും സൗന്ദര്യ ശാസ്ത്രവുമായി.
പ്ലഖനോവ് മുന്നോട്ടു വച്ച തത്വ ചിന്ത എംഗൽസ് ക്രോഡീകരിച്ച സിദ്ധാന്തങ്ങളുടെ അതിശയോക്തി കലർന്ന രൂപം മാത്രമായിരുന്നു.ജർമൻ ചിന്തകരായ ഹെഗൽ,ഫോയർബാക് എന്നിവരിൽ നിന്ന് മാർക്‌സ് കോപ്പിയടിച്ചതാണ്,മാർക്സിസത്തിൻറെ ഭൗതികവാദ അടിത്തറ.പ്ലഖനോവിൻറെ അപരിഷ്‌കൃത രൂപമാണ്,ചിന്തകൻ എന്ന നിലയിൽ,ലെനിൻ.മാർക്‌സിസ്റ്റ്‌ മതത്തിലേക്ക് മാറാൻ തീരുമാനിച്ചു കഴിഞ്ഞാൽ,എല്ലാ പ്രശ്നങ്ങൾക്കും ഉത്തരമായി,ശത്രുവിനെ തച്ചു തകർക്കാൻ എന്തും സ്വീകരിക്കാം എന്നായി.ഫ്രാൻസ് മെഹ്‌റിങ്,പോൾ ലഫാർഗ് എന്നിവർക്കൊപ്പം മാർക്‌സിയൻ കലാനിരൂപണം തുടങ്ങി വച്ചവരിൽ ഒരാളായിരുന്നു,പ്ലഖനോവ് .മാർക്‌സിസ്റ്റ് സമീപനം ഗൗരവമായി എടുത്താൽ,ഒരു നല്ല എഴുത്തുകാരന്,സമൂഹത്തിൻറെ സാമ്പത്തിക നില വച്ച് അതിൻറെ കല,സാഹിത്യം എന്നിവയെപ്പറ്റി അനുമാനത്തിൽ എത്താൻ ആകണം.എലിസബത്തൻ കാലത്തെ ഇംഗ്ലണ്ടിലെ സാമ്പത്തികാവസ്ഥ അറിഞ്ഞാൽ,ഷേക്‌സ്‌പിയറിന്റെ നാടകങ്ങൾ എഴുതാൻ കഴിയണം.കലാപ്രവർത്തനത്തെ നിർണയിക്കുന്നത് വർഗ മൂല്യങ്ങൾ മാത്രമാണെന്നും ഉള്ളടക്കം വച്ചാണ് കലാരൂപത്തെ വിലയിരുത്തേണ്ടതെന്നും പ്ലഖനോവ് വാദിക്കുന്നു.ഉള്ളടക്കം,കലാരൂപം ഇല്ലാതെയും ആവിഷ്‌കരിക്കാവുന്നതേയുള്ളു.സ്വന്തം നിലയ്ക്കും ചെര്നിഷേവ്സ്കിയുടെ സ്വാധീനം വഴിയും പ്ലഖനോവ് സോഷ്യലിസ്റ്റ് റിയലിസത്തിലേക്ക് കൂപ്പു കുത്തി.ചിത്രകലയിലെ പുതിയ പരീക്ഷണങ്ങളെ അദ്ദേഹം വെറുത്തു.
കല കലയ്ക്കു വേണ്ടി എന്ന മുദ്രാവാക്യം,ഒരു കലാപ്രതിഭ സമൂഹത്തിൽ ഒറ്റപ്പെട്ടു പോയതിൻറെ ഉൽപന്നം മാത്രമാണെന്ന് പ്ലഖനോവ് വിശ്വസിച്ചു.ചിത്രകലയിലെ ക്യൂബിസം,ഇമ്പ്രഷനിസം എന്നിവ ബൂർഷ്വ ജീർണതയുടെ സൂചകങ്ങൾ മാത്രമായി അദ്ദേഹം കണ്ടു.ധ്വനിസാന്ദ്രമായ ( symbolic ) സാഹിത്യത്തിനും ഇത് തന്നെ ബാധകമാക്കി.മുസ്സോളിനിയെ പുൽകിയ ക്രിസ്ത്യൻ നോവലിസ്റ്റ് ദിമിത്രി മെറേകോവ്‌സ്‌കി,ഭാര്യ സീനായ്‌ദ ജിപ്പിയസ്,പേഴ്സിബിസേവ്സ്കി എന്നിവരെ വിമർശിച്ചു.പ്ലഖനോവ് എഴുതി:

നീലവസ്ത്രമണിഞ്ഞ സ്ത്രീ എന്ന ചിത്രം കലാകാരൻ വരയ്ക്കുന്നു എന്നിരിക്കട്ടെ.അത് ശരിക്കും ആ സ്ത്രീയെപ്പോലെ ഇരുന്നാൽ,അത് നല്ല ചിത്രമാണ് നാം കാൻവാസിൽ കാണുന്നത് നേർത്ത നിലയിൽ,പ്രാകൃതമായി,അവിടെയുമിവിടെയും കോറിയിട്ട ചില രൂപങ്ങൾ ആണെങ്കിൽ,അതിനെ നമുക്ക് എന്തെങ്കിലും പേരിട്ടു വിളിക്കാം;അതൊരു നല്ല ചിത്രം ആവില്ല ( Art and Social Life,1912 ).

ഗോർക്കിയുടെ അമ്മ എന്ന കൃതിയെ വിമർശിച്ചു കൊണ്ട്,താൻ കലാകാരൻറെ സ്വാതന്ത്ര്യത്തിൽ വിശ്വസിക്കുന്നു എന്ന് പറഞ്ഞയാളായിരുന്നു,പ്ലഖനോവ് .രാഷ്ട്രീയ നേതാവിൻറെ ആജ്ഞ കൊണ്ട് നിർമിക്കുന്ന കല പോലെയായിരിക്കും എന്ന് അദ്ദേഹത്തിന് അറിയാമായിരുന്നു.ക്‌ളാസിക്കൽ ദുരന്ത നാടകങ്ങൾ വരേണ്യ വർഗ്ഗത്തിൻറെ ആദർശങ്ങൾ ആവിഷ്‌കരിക്കുന്നു എന്ന് അദ്ദേഹം പറയുന്നത്,അസംബന്ധമാണ് എന്ന് നമുക്കറിയാം.ക്‌ളാസിക് ദുരന്തനാടകങ്ങളുടെ പ്രേക്ഷകർ വരേണ്യർ മാത്രമായിരുന്നില്ല.പ്രേക്ഷകനും വേദിയും ചേർന്നാലേ നാടകം ഉണ്ടാകൂ.പ്രധാനപ്പെട്ട ഗ്രീക്ക് ദുരന്ത നാടകകൃത്തുക്കൾ ആതൻസുകാരായിരുന്നു.മദ്യ ദേവതയായ ബാക്കസിൻറെ ആരാധനയുമായി ബന്ധിപ്പിച്ച് നടന്ന നാടക മത്സരത്തിനാണ് നാടകങ്ങൾ എഴുതിയത്.ആദ്യം പ്രേക്ഷകർക്ക് പ്രവേശനം സൗജന്യമായിരുന്നു.ബി സി അഞ്ചാം ശതകത്തിൽ ചെറിയ പ്രവേശന തുക വന്നു.ദരിദ്രരായവർക്ക് സർക്കാർ ചെലവിൽ നാലാം ശതകത്തിൽ പ്രവേശനം നൽകി.അപ്പോൾ എങ്ങനെയാണ്,നാടകം വരേണ്യ വർഗത്തിന്റേത് ആകുന്നത്?
പ്ലഖനോവിൻറെ രാഷ്ട്രീയ സിദ്ധാന്തങ്ങൾ വിശദമായി പറയാത്തത്,മാർക്‌സിസം തന്നെ അപ്രസക്തമായി കഴിഞ്ഞതിനാൽ ആണ്;എന്നാൽ അയാളുടെ കലാ,സാഹിത്യ സിദ്ധാന്തങ്ങൾ,വിപ്ലവാനന്തരം നല്ല കലാകാരന്മാരെയും എഴുത്തുകാരെയും ഉന്മൂലനം ചെയ്യുന്നതിന് കാരണമായി.
------------------------------------
*Dialectical Materialism അല്ല പുസ്തകം;The Materialist  Conception of History ( 1891  ) ആണ്.
** The Material Conception of History
See https://hamletram.blogspot.com/2019/07/1.html
  
       

ഒരു റഷ്യൻ യക്ഷിക്കഥ 2

2.ലെനിൻ എന്ന ജപ്പാൻ ചാരൻ 

ഓർത്തഡോക്‌സ് വൈദികനായ ജോർജി അപ്പോളോനോവിച്  ഗാപോൺ  ( 1870 -1906 ) 1905 ജനുവരി 22 ന് സാർ ചക്രവർത്തിയുടെ കൊട്ടാരത്തിലേക്ക് നയിച്ച ജനക്കൂട്ടത്തെ പട്ടാളം കൂട്ടക്കൊല ചെയ്‌ത സംഭവം, ' ചോരയുടെ ഞായർ ' ( Bloody Sunday ) എന്നറിയപ്പെടുന്നു.
യുക്രൈനിലെ കർഷക കുടുംബത്തിൽ ജനിച്ച ഗാപോൺ ,ടോൾസ്റ്റോയിയുടെ രചനകളിലെ പാവപ്പെട്ടവരോടുള്ള കാരുണ്യത്താൽ പ്രചോദിതനായി.നിലവിലുള്ള സഭയെ വിമർശിച്ചയാളാണ്,ലിയോ ടോൾസ്റ്റോയ്.അതായത്,1905 ലെ ആദ്യ റഷ്യൻ വിപ്ലവത്തിനുള്ള പ്രചോദനം മാർക്‌സ് അല്ല,ടോൾസ്റ്റോയ് ആണ്.കുട്ടികൾക്ക് ട്യൂഷൻ എടുത്ത് കിട്ടുന്ന പണം കൊണ്ടായിരുന്നു,അച്ചന്റെ കൗമാര,യൗവന ജീവിതം.ഡോക്ടറാകാൻ ആഗ്രഹിച്ച് സെമിനാരിയിൽ ചേർന്ന അയാൾക്ക് അത് പഠിക്കാനുള്ള ഗ്രേഡ് വിമത രീതികൾ കാരണം സെമിനാരിയിൽ നിന്ന് കിട്ടിയില്ല.കണക്കെഴുത്തും ട്യൂഷനുമായി കഴിയവേ,വിവാഹിതനായി.ലാറിയൻ മെത്രാന് അപേക്ഷ നൽകി വീണ്ടും സെമിനാരിയിൽ ചേർന്ന് വൈദികനായ ഗാപോണിൻറെ കുർബാനയിലെ പുതുമ ജനത്തെ ആകർഷിച്ചു.
രണ്ടാമത്തെ പ്രസവത്തിൽ ഭാര്യ മരിച്ച ശേഷം വിഷാദരോഗത്തിൽ പെട്ട് ക്രിമിയയിൽ ചികിത്സ തേടി.മടങ്ങിയെത്തി പെട്രോഗ്രാഡിൽ സെൻറ് ഓൾഗ ചിൽഡ്രൻസ് ഓർഫനേജിൽ 1900 ൽ എത്തി,കടകളിലും ഫാക്റ്ററികളിലും പോയി തൊഴിലാളി കുടുംബങ്ങളെ അടുത്തു പരിചയപ്പെട്ടു.

ഫാ ഗാപോൺ 

റഷ്യയുടെ ചരിത്രവുമായി ബന്ധപ്പെട്ട് നാം ശ്രദ്ധിക്കാത്ത ഒന്നാണ്,1904 -1905 ൽ റഷ്യയും ജപ്പാനും തമ്മിൽ നടന്ന യുദ്ധം.1917 ലെ 'വിപ്ലവ'ത്തിൻറെ കൂടി പശ്ചാത്തലത്തിൽ,റഷ്യയിൽ ജനത്തിനിടയിൽ അസ്വസ്ഥതയുടെ വിത്ത് വിതച്ച സംഭവമാണ് അത്.രണ്ടു രാജ്യങ്ങളിലും രാജഭരണം നിലനിൽക്കെ,മഞ്ചൂറിയയ്ക്കും കൊറിയയ്ക്കും മേലുള്ള ആധിപത്യത്തെ ചൊല്ലിയായിരുന്നു,യുദ്ധം.ചൈനയിൽ നിന്ന് റഷ്യ പാട്ടത്തിന് എടുത്തിരുന്ന പോർട്ട് ആർതർ പിടിച്ച ജപ്പാൻ,റഷ്യ റഷ്യയ്ക്ക് മേൽ വിജയം ഉറപ്പിച്ചു.അമേരിക്കൻ പ്രസിഡൻറ് റൂസ്‌വെൽറ്റിൻറെ മധ്യസ്ഥതയിൽ 1905 ൽ ഇരുരാജ്യങ്ങളും വെടി നിർത്തി.ഒരു ഏഷ്യൻ രാജ്യം ഒരു യൂറോപ്യൻ രാജ്യത്തിന് മേൽ വിജയം നേടിയ മറ്റൊരു സംഭവം,ലോക ചരിത്രത്തിൽ ഇല്ല.ജപ്പാൻ നേടിയ ഈ വിജയമാണ്,ജനത്തെ സാർ ചക്രവർത്തിക്ക് എതിരെ തിരിച്ചത്.
ആക്രമിക്കുന്ന രാജ്യം ശത്രു രാജ്യത്ത് അരാജകത്വം വിതയ്ക്കാൻ ഏതു മാർഗവും തേടും.ജപ്പാൻ പട്ടാളത്തിൻറെ യൂറോപ്പിലെ തന്ത്രങ്ങൾ മെനഞ്ഞിരുന്നത്,കേണൽ ആകാഷി മോട്ടോജിറോ ആയിരുന്നു.ഫാ ഗാപോണിന് പണം കൊടുത്ത്,അസംബ്ലി ഓഫ് റഷ്യൻ ഫാക്‌റ്ററി ആൻഡ് മിൽ വർക്കേഴ്‌സ് ഓഫ് സെൻറ് പീറ്റേഴ്‌സ്ബർഗ് എന്ന സംഘടന ഉണ്ടാക്കി.12 ശാഖകളും 8000 അംഗങ്ങളുമുള്ള സംഘടനയിൽ ഓർത്തഡോക്‌സ് സഭക്കാരാണ് ഉണ്ടായിരുന്നത്.അച്ചന് ഇതേസമയം,റഷ്യൻ രഹസ്യ പൊലീസായ ഓഖ്‌റാനയുമായും ബന്ധമുണ്ടായിരുന്നു.ഈ സംഘടന നടത്തിയ പൊതുപണിമുടക്കിന് പിന്നാലെയാണ്,ഞായറാഴ്ച അച്ചൻ ഒന്നരലക്ഷം വരുന്ന ജനക്കൂട്ടത്തെ സാർ ചക്രവർത്തിയുടെ വിന്റർ പാലസിലേക്ക് നയിച്ചത്.

ആകാഷി മോട്ടോജിറോ 

ആയുധമില്ലാത്ത ജനക്കൂട്ടമായിരുന്നു,അത്.ചക്രവർത്തിയുടെ ചിത്രങ്ങൾ വഹിച്ച്,'സാറിനെ ദൈവം രക്ഷിക്കട്ടെ ' എന്ന കീർത്തനം പാടി,ചക്രവർത്തിയെ സ്തുതിച്ചു തന്നെ ആയിരുന്നു,മാർച്ച്.അച്ചടിച്ച അഞ്ചു പേജ് നിവേദനം ,ഗാപോണിൻറെ കൈയിൽ ഉണ്ടായിരുന്നു.സർക്കാർ നടപടി ക്രമങ്ങളിൽ,17 മാറ്റങ്ങളും കാലങ്ങളായി ഉന്നയിച്ചു വന്ന പരിഷ്‌കാരങ്ങളുമാണ്,നിവേദനത്തിൽ ഉണ്ടായിരുന്നത്.ജനക്കൂട്ടം ആവശ്യപ്പെട്ട പരിഷ്‌ക്കാരങ്ങൾക്ക്,പുന്നപ്ര വയലാർ സമരക്കാർ പിൽക്കാലത്ത് 1946 ൽ ഉന്നയിച്ച ചില ആവശ്യങ്ങളോട് സാദൃശ്യമുണ്ടായിരുന്നു.നെഹ്‌റു ഭരിക്കുമ്പോഴായിരുന്നു,പുന്നപ്ര വയലാർ കലാപം എന്ന പ്രശ്നമേയുള്ളു!
അച്ചനും ജനവും ഉന്നയിച്ച ആവശ്യങ്ങൾ ഇവയായിരുന്നു:

• നിര്ബന്ധിതവും സാർവത്രികവുമായ പ്രാഥമിക വിദ്യാഭ്യാസം നടപ്പാക്കുക.
• പുരോഗമനപരമായ ആദായ നികുതി ചുമത്തുക .
• അധ്വാന സമയം എട്ടുമണിക്കൂറായി ചുരുക്കുക.
• ചുരുങ്ങിയ ദിവസ വേതനം ഒരു റൂബിൾ ആക്കുക.
• ഓവർടൈം അവസാനിപ്പിക്കുക 
• ചികിത്സാസൗകര്യം നടപ്പാക്കുക 
• മഴ,മഞ്ഞ് എന്നിവയിൽ നിന്ന് രക്ഷ നൽകും വിധം ഫാക്റ്ററികൾ പണിയുക 

സർ സി പി നാട് വിടുക എന്ന് പുന്നപ്ര വയലാർ സമരക്കാർ ഉന്നയിച്ച പോലെ,ഒരു രാഷ്ട്രീയ ആവശ്യവും നിവേദനത്തിൽ ഉണ്ടായിരുന്നു:ജപ്പാനുമായുള്ള യുദ്ധം അവസാനിപ്പിക്കുക.
മേലാപ്പിലെ ജനാലയ്ക്കരികിൽ നിന്ന് സാർ ചക്രവർത്തി തങ്ങളോട് സംസാരിക്കുമെന്ന് പ്രതീക്ഷിച്ച ജനക്കൂട്ടത്തിന് തെറ്റി -ചക്രവർത്തി കൊട്ടാരത്തിൽ ഉണ്ടായിരുന്നില്ല.ചക്രവർത്തിയുടെ അമ്മാവൻ ഗ്രാൻഡ് ഡ്യൂക്ക് വ്‌ളാദിമിർ,വെടി വയ്ക്കാൻ പട്ടാളത്തിന് ആജ്ഞ കൊടുത്തു.കൊല്ലപ്പെട്ടവർ 300 എന്നും പരുക്കേറ്റവർ 1500 എന്നും പറയുന്നുണ്ടെങ്കിലും,കൃത്യമായ കണക്കില്ല.പുന്നപ്ര വയലാർ പോലെ തന്നെ.പുന്നപ്ര വയലാറിലെ ഏറ്റവും കുറഞ്ഞ മരണ സംഖ്യ,ഇ എം എസ് കേന്ദ്ര കമ്മിറ്റിക്ക് നൽകിയ റിപ്പോർട്ടിൽ ആയിരുന്നു.
ജനം ഒന്നടങ്കം,വൃദ്ധരും കുട്ടികളും ഉൾപ്പെടെ പങ്കെടുത്ത ഒരു സമരം ആയതിനാലാണ്,1905 ലെ സമരമാണ് വിപ്ലവം എന്ന് മാർക്സിസ്റ്റ് ചരിത്രകാരി റോസാ ലക്‌സംബർഗ് നിരീക്ഷിച്ചത്.1917 ലെ ' വിപ്ലവം ' അവർ നിരാകരിച്ചത്.പക്ഷെ,നാം കണ്ടത് പോലെ,1905ലെ വിപ്ലവം ജപ്പാൻ സംഘടിപ്പിച്ചതായിരുന്നു.
ചോര ഞായർ കഴിഞ്ഞ് തിങ്കളാഴ്ച ജനീവയിൽ ലൈബ്രറിക്ക് പോകുന്ന വഴിയിൽ,അനറ്റോലി ലൂണാചാർസ്‌കി,ഭാര്യ അന്ന എന്നിവരിൽ നിന്നാണ്,ലെനിനും ഭാര്യ ക്രൂപ്സ് കേയയും സംഭവം അരിഞ്ഞത്.വിപ്ലവകാരിയായ നാടകകൃത്തും വിമര്ശകനുമായ ലൂണാചാർസ്‌കി 1917 നു ശേഷം ആദ്യ ജനകീയ വിദ്യാഭ്യാസ കമ്മിസാർ ആയി.

പിൽ സുഡ് സ്‌കി 

സത്യത്തിൽ വിപ്ലവം ഒന്നും നടന്നില്ല.നിരായുധരായ ഒരു പറ്റം മനുഷ്യരുടെ കൂട്ടക്കുരുതി ആണുണ്ടായത്.അച്ചൻ ആൾക്കൂട്ടത്തെ വഴിതെറ്റിച്ച പൊലീസ് ഏജൻറ് ആണെന്നാണ് ലെനിൻ കരുതിയത്.അച്ചൻ പെട്രോഗ്രാഡിൽ നിന്ന് രക്ഷപ്പെട്ട് സാർ ചക്രവർത്തിക്ക് ഒരു മാനിഫെസ്റ്റോയും റഷ്യയിലെ സോഷ്യലിസ്റ്റ് പാർട്ടിക്ക് തുറന്ന കത്തും പുറത്തിറക്കി.മാനിഫെസ്റ്റോ സാർ ചക്രവർത്തിയെ അപലപിച്ചു.മാനിഫെസ്റ്റോയിലും കത്തിലും," വ്യക്തികളും ജനക്കൂട്ടവും ബോംബും ഡൈനാമിറ്റും ഭീകരതയും പ്രയോഗിച്ച് രാജഭരണത്തെ താഴെയിറക്കാൻ" ആഹ്വാനം ചെയ്‌തു.
അച്ചനെ തൽക്കാലം മാക്‌സിം ഗോർക്കി സംരക്ഷിച്ചു.കുറച്ചു നാൾ കഴിഞ്ഞ് അയാൾ ജനീവയിൽ പൊങ്ങി.വിപ്ലവ പാർട്ടിക്കാർ തിരിഞ്ഞു നോക്കാത്ത ഒരു കഫെയിൽ,വിപ്ലവ പാർട്ടിയിൽ പെട്ട ഒരു സ്ത്രീ,അച്ചനും ലെനിനുമായി കൂടിക്കാഴ്ചയ്ക്ക് അവസരം ഒരുക്കി." അച്ചോ ,മണ്ടനായിപ്പോകരുത്",ലെനിൻ പറഞ്ഞ,"നന്നായി വായിച്ചു പഠിച്ചില്ലെങ്കിൽ,നിങ്ങളുടെ സ്ഥാനം ഇവിടെ ആയിരിക്കും",ലെനിൻ മേശയ്ക്ക് താഴേക്ക് വിരൽ ചൂണ്ടി.
ലെനിൻറെ ഉപദേശം സ്വീകരിച്ച് അച്ചൻ,പ്ലഖനോവിൻറെ ഉണക്ക സാഹിത്യം വായിച്ചു നോക്കി.കുതിര സവാരിയും തോക്ക് ഉപയോഗിക്കലും വിപ്ലവകാരിക്ക് വേണമെന്ന് കരുതി രണ്ടും ശീലിച്ചു.അച്ചന് പൊലീസുമായുള്ള ബന്ധം വച്ച്,വിപ്ലവകാരികൾ അയാളെ വിശ്വസിച്ചില്ല.ജപ്പാൻ പട്ടാളം കൊടുത്ത പണം കൊണ്ട് ഇംഗ്ലണ്ടിൽ നിന്ന് ആയുധങ്ങൾ സംഭരിച്ച് അച്ചൻ ജോൺ ഗ്രാഫ്റ്റൺ എന്ന കപ്പലിൽ അവ റഷ്യയിലേക്ക് അയച്ചു.ഫിനിഷ് തീരത്തിനടുത്ത് കപ്പൽ പൊട്ടിത്തെറിച്ചു.ലെനിൻ ആയുധം സംഭരിച്ച്,പെട്രോഗ്രാഡിലെ രഹസ്യ വിലാസങ്ങളിലേക്ക് അയച്ചതാണെന്ന് പാഠഭേദമുണ്ട്.*സെപ്റ്റംബറിൽ കപ്പൽ നശിച്ചതോടെ,അച്ഛൻറെ ഹൃദയം തകർന്നു.താമസിയാതെ,പെട്രോഗ്രാഡിന് പുറത്ത്,ഒരു കോട്ടേജിൽ അച്ഛൻറെ ജഡം തൂങ്ങിനിന്നു.വിപ്ലവകാരികൾ കൊന്നതാണെന്ന് സംശയിക്കപ്പെടുന്നു.അച്ചനെ ചരിത്രത്തിൽ നിന്ന് മായ്ച്ച് ,1905 ലെ വിപ്ലവം തങ്ങളുടെ അക്കൗണ്ടിൽ വരവ് വയ്ക്കാൻ ചെയ്തതാകാം.
ലെനിനും ആയുധം സംഭരിച്ചതായി പറഞ്ഞല്ലോ-എവിടെ നിന്നായിരുന്നു,പണം ?

അച്ചനു പണം കൊടുത്ത ജപ്പാൻ പട്ടാള ചാര മേധാവി ആകാഷി തന്നെ ലെനിനും ട്രോട് സ്‌കിക്കും പോളണ്ടിലെ വിപ്ലവകാരി ജോസഫ് പിൽ സുഡ് സ്‌കിക്കും പണം കൊടുത്തു.പത്തു ലക്ഷം യെൻ ആയിരുന്നു അന്ന് ആകാഷിക്ക്,ചാരവൃത്തിക്കുള്ള  ബജറ്റ്.  സിഡ്‌നി റൈലി എന്ന കുപ്രസിദ്ധ ചാരനെ പോർട്ട് ആർതറിലേക്ക് അയച്ചു.കവിയും ചിത്രകാരനുമായിരുന്ന ആകാഷി ,പിൽക്കാലത്ത് തായ്‌വാനിൽ ഗവർണർ ജനറലായി.പോളണ്ടിലെ ആദ്യ ഭരണാധികാരിയാണ്,മാർഷൽ പിൽ സുഡ് സ്‌കി.രണ്ടാം പോളിഷ് റിപ്പബ്ലിക്കിൻറെ സൈനിക മന്ത്രി.വിപ്ലവം ശൂന്യതയിൽ നിന്നുണ്ടാകില്ല -അത് പലപ്പോഴും ജാര സന്തതി ആയിരിക്കും.
കരിങ്കടലിൽ 1905 ജൂൺ 27 ന് പൊട്ടെoകിൻ എന്ന യുദ്ധക്കപ്പലിലെ കലാപത്തിന് പണം മുടക്കിയതും ജപ്പാൻ പട്ടാളമായിരുന്നു.കപ്പലിലെ എഴുന്നൂറോളം നാവികർ,കപ്പലിലെ തന്നെ ഓഫിസർമാർക്കെതിരെ കലാപം നടത്തി.അവരെ കൊന്ന് കപ്പൽ റുമേനിയൻ തുറമുഖമായ ഒഡേസയിലേക്ക് കൊണ്ടു പോയതാണ് സംഭവം.പല നാവികരും റഷ്യയിൽ തിരിച്ചെത്തിയത് 1917 ഫെബ്രുവരി വിപ്ലവ  ശേഷമാണ്.സംഭവം ബോൾഷെവിക്കുകൾ പ്രചാരണ ആയുധമാക്കി എന്നു മാത്രമല്ല,ലോക സിനിമാ ചരിത്രത്തിൽ ഒരു ക്‌ളാസിക് ഉണ്ടാവുകയും ചെയ്‌തു-സെർജി ഐസെന്സ്റ്റീന്റെ ബാറ്റിൽഷിപ് പൊട്ടെoകിൻ ( 1925 ) എന്ന നിശബ്ദ ചിത്രം.ഒഡേസയിലെ പടവുകളിൽ ഒരു പുതിയ സിനിമാ സങ്കേതം,വിപരീത ദൃശ്യങ്ങൾ ഒന്നിന് പിന്നാലെ ഒന്നായി എഡിറ്റ് ചെയ്തപ്പോൾ,രൂപപ്പെട്ടു;അതിന് മാർക്‌സിസ്റ്റ് സംജ്ഞ നൽകി -ഡയലെക്റ്റിക്കൽ മൊണ്ടാഷ്.
------------------
*Life and Death of Trotsky / Robert Payne,Page 101:
The Japanese were inflicting terrible defeats on the Russians in the Far East.They were also fanning the revolutionary flame in Russia,pouring huge amounts of money into the coffers of the revolutionaries.Colonel Akashi Motojiro,the chief of the Japanese secret agents in Europe,gave money to Lenin and Trotsky and to the Polish revolutionary Josef  Pilsudski ...Lenin was deeply involved with the outfitting of the John Grafton,a gun running steamer,which,it was hoped,would land enough guns and ammunitions near St Petersburg to arm the revolutionary army.Colonel Akashi was involved with the same project.

ഒരു റഷ്യൻ യക്ഷിക്കഥ 1

ഏകാധിപതിയുടെ പരീക്ഷണശാല 

റഷ്യയിൽ 1917 ലെ ' മഹത്തായ ഒക്ടോബർ വിപ്ലവം' നടന്ന് വെറും ആറു മാസം കഴിഞ്ഞപ്പോൾ, മാർക്‌സിസ്റ്റ് സൈദ്ധാന്തിക റോസാ ലക്‌സംബർഗ്,ആ ' വിപ്ലവ'ത്തിൻറെ അനന്തര ഫലങ്ങളെ പ്രവചന സ്വഭാവത്തോടെ, ഇങ്ങനെ  സമാഹരിച്ചു:

ഒന്ന്:പൊതു തിരഞ്ഞെടുപ്പും സ്വാതന്ത്ര്യവുമില്ലാത്ത ഒരു പൊതു ഭരണസംവിധാനം,ജീവിതം മരവിച്ച്,ഉദ്യോഗസ്ഥ സംവിധാനം മാത്രമായി തീരും.
രണ്ട്:ഊർജസ്വലരായ ചില നേതാക്കളുടെ കൈയിൽ അധികാരം കുമിഞ്ഞു കൂടും.തൊഴിലാളി വർഗത്തിലെ വരേണ്യ വിഭാഗം നേതാക്കളുടെ പ്രസംഗങ്ങൾക്ക് കൈയടിക്കും;പ്രമേയങ്ങൾ ഏകകണ്ഠമായി പാസാക്കും.
മൂന്ന്:തൊഴിലാളി വർഗ സർവാധിപത്യത്തിനു പകരം,ബൂർഷ്വാ ഏകാധിപത്യം വരും.ചോദ്യമില്ലാത്ത ഉന്മൂലനങ്ങൾ വഴി പൊതു ജീവിതം നരകമാകും.
നാല്:ഒരു പാർട്ടിയുടെ അംഗങ്ങൾക്കും അനുയായികൾക്കും മാത്രമായിരിക്കും,സ്വാതന്ത്ര്യം.
ഇത്രയും 'റഷ്യൻ വിപ്ലവം' എന്ന പ്രബന്ധത്തിൽ ( 1918 ) എഴുതിയ ശേഷമാണ്  റോസാ ലക്സംബർഗിൻറെ പ്രസിദ്ധമായ വാചകം വന്നത്:"സ്വാതന്ത്ര്യം എപ്പോഴും,വ്യത്യസ്തമായി ചിന്തിക്കുന്നവന് വേണ്ടി മാത്രമുള്ളതാണ്" 
പോളണ്ടിലെ ജൂത കുടുംബത്തിൽ ജനിച്ച റോസ,സൂറിച്ച് സർവകലാശാലയിൽ നിന്ന് തത്വ ചിന്തയിൽ ഡോക്ടറേറ്റ് നേടുമ്പോൾ,അവർ ഒരപൂർവത ആയിരുന്നു.ഡോക്ടറേറ്റ് നേടിയ സ്ത്രീകളിൽ അധികം ഉണ്ടായിരുന്നില്ല.പോളണ്ട് അന്ന് റഷ്യയുടെ അധീനതയിൽ ആയിരുന്നു.മാർക്‌സിസ്റ്റ് ചിന്താ ലോകത്ത് മൗലികതയുള്ള അപൂർവം പേരിൽ ഒരാളാണ്,റോസ.മാർക്‌സിസ്‌റ്റിൻറെ പല പിഴവുകളും അവർ തിരുത്തിയിട്ടുണ്ട്.റോസയുടെ 'റഷ്യൻ വിപ്ലവം" അവരുടെ മരണശേഷം പ്രസിദ്ധീകരിച്ചതിന് അവരുടെ പങ്കാളി പോൾ ലെവിയെ മൂന്നാം കമ്മ്യൂണിസ്റ്റ് ഇന്റർനാഷനിൽ നിന്ന് പുറത്താക്കി.
1917 ഒക്ടോബറിൽ നടന്നത് ' മഹത്തായ വിപ്ലവം' പോയിട്ട്, ഒരു വിപ്ലവമേ ആയിരുന്നില്ല;അതേ സമയം ഫെബ്രുവരിയിൽ നടന്നത് വിപ്ലവം ആയിരുന്നുവെന്നും റോസ കണ്ടു ( The Politics of Mass Strikes and Unions,Collected Works,Volume 2, Page 245.).അതാണ് ശരിയെന്ന് നൂറു വർഷത്തിന് ശേഷം ലോകവും തിരിച്ചറിഞ്ഞിരിക്കുന്നു.ഒക്ടോബറിൽ ലെനിൻറെ നേതൃത്വത്തിൽ നടന്നത്,ഒരു ഭരണകൂട അട്ടിമറി മാത്രമായിരുന്നു.
നമ്മുടെ കലണ്ടർ പ്രകാരം,2017 മാർച്ച് എട്ടിനാണ് നടന്നതാണ്,ഫെബ്രുവരി വിപ്ലവം.അലക്‌സാണ്ടർ കെറൻസ്കിയുടെ നേതൃത്വത്തിൽ നടന്ന ആ വിപ്ലവമാണ്,400 വർഷത്തെ സാർ ചക്രവർത്തി ഭരണത്തെ കടപുഴക്കിയത്.അത് നടക്കുമ്പോൾ,ലെനിനോ ട്രോട് സ്‌കിയോ റഷ്യയിൽ ഉണ്ടായിരുന്നില്ല..ഒന്നാം ലോകയുദ്ധത്തിന്റെ അസ്വസ്ഥതകൾ പെരുകിയിരുന്ന റഷ്യയിലെ തെരുവുകളിൽ,ഒരു നേരത്തെ റൊട്ടിക്ക് വേണ്ടിയായിരുന്നു,ആ വിപ്ലവം.റഷ്യ യുദ്ധത്തിൽ പങ്കു കൊണ്ടത് തന്നെ,അപകടമായിരുന്നു.ജർമനിയെപ്പോലെ റഷ്യയിൽ വ്യവസായം വളർന്നിരുന്നില്ല.ജർമനിയുടെ സൈനിക ശക്തിക്ക് മുന്നിൽ റഷ്യൻ പട്ടാളത്തിന് പിടിച്ചു നിൽക്കാനാവുമായിരുന്നില്ല.നിക്കോളാസ് രണ്ടാമൻ ചക്രവർത്തി,പൊതുസഭയായ ദൂമ പിരിച്ചു വിട്ടു.മാർച്ച് എട്ടിന് പെട്രോഗ്രാഡിലെ തെരുവുകളിൽ ആഹാരത്തിനായി ജനം ഇറങ്ങി.മാർച്ച് പത്തിന് തൊഴിലാളികളിലേക്ക് പടർന്നു.പൊലീസ് സ്റ്റേഷനുകൾ തകർത്തു.1905 ലെ വിപ്ലവകാലത്തെന്ന പോലെ,ഫാക്റ്ററികൾ,പെട്രോഗ്രാഡ് സോവിയറ്റിലേക്ക് പ്രതിനിധികളെ തിരഞ്ഞെടുത്തു.അവർ പ്രകടനക്കാരെ പിന്തുണച്ചു.സാർ ചക്രവർത്തി സ്ഥാനത്യാഗം ചെയ്‌തു.കെറൻസ്കിയുടെ നേതൃത്വത്തിൽ താൽക്കാലിക ഭരണകൂടം നിലവിൽ വന്നു.ഈ ജനകീയ ഭരണകൂടത്തെയാണ്,ലെനിൻ അട്ടിമറിച്ചത്.അത് വിപ്ലവം ആകുന്നതെങ്ങനെ?

റോസാ ലക്സംബർഗ് 

കെറൻസ്കിയുടെ ഭരണകൂടത്തെ അട്ടിമറിക്കാൻ അതിനു മുൻപ് പട്ടാളമേധാവി ജനറൽ ലാവർ കോർണിലേവ് ശ്രമം നടത്തിയിരുന്നു.ആ സമയത്ത് കെറൻസ്കി,സ്വന്തം രക്ഷ ലാക്കാക്കി തൊഴിലാളികൾക്ക് ആയുധങ്ങൾ വിതരണം ചെയ്‌തു.ഇതാണ്,ലെനിൻറെ നേതൃത്വാതിലുള്ള ബോൾഷെവിക്കുകളുടെ കൈയിൽ എത്തിയത്.ഫെബ്രുവരി വിപ്ലവം നടക്കുമ്പോൾ ലെനിൻ ഫിൻലൻഡിലായിരുന്നു.ബോൾഷെവിക്കുകളുടെ അട്ടിമറി നടക്കുമ്പോൾ,സൈന്യം കെറൻസ്കിയെ വിട്ട്,ലെനിനൊപ്പം ചേർന്നു.20 മണിക്കൂർ കൊണ്ട് കെറൻസ്കിയുടെ ഭരണകൂടം നിലം പൊത്തി.
അട്ടിമറി വേണോ എന്ന പ്രശ്‍നം ബോൾഷെവിക്കുകളുടെ കേന്ദ്ര കമ്മിറ്റിയിൽ ലെനിൻ വോട്ടിനിട്ടു.10 -2 ന് പ്രമേയം പാസായി.എതിർത്ത് വോട്ടു ചെയ്‌തത്‌,സിനോവീവും കാമനേവും ആയിരുന്നു.അതിൻറെ പേരിൽ ലെനിൻ അവരെ ആവർത്തിച്ചു ശകാരിച്ചു കൊണ്ടിരുന്നു.മരണക്കിടക്കയിലിരുന്ന് ലെനിന് സ്റ്റാലിനെതിരെ പാർട്ടി കോൺഗ്രസിന് എഴുതിയ കത്തുകളിലും ഇരുവരുടെയും പേരുകൾ കാണാം.ഇരുവരെയും പിൽക്കാലത്ത് സ്റ്റാലിൻ കൊന്നു.
കെറൻസ്കിയുടെ ഭരണകൂടത്തെ അട്ടിമറിക്കുകയല്ല,കെറൻസ്കിയുമായി സന്ധി ചെയ്യുകയായിരുന്നു വേണ്ടത് എന്നായിരുന്നു,ഏറ്റവും വലിയ കമ്മ്യൂണിസ്റ്റ് എഴുത്തുകാരൻ മാക്‌സിം ഗോർക്കിയുടെ അഭിപ്രായം.ഇതിൻറെ പേരിൽ ലെനിൻ,ഗോർക്കിക്കെതിരെ പ്രസ്താവനയിറക്കി.ലെനിൻറെ നീക്കങ്ങൾ വിനാശകരമായിരിക്കുമെന്ന്,റോസാ ലക്സംബർഗിന് മുൻപേ,ഗോർക്കി പ്രവചിച്ചു.ഒക്ടോബർ അട്ടിമറി നടക്കുമ്പോൾ തന്നെ,ലെനിൻറെ ഏകാധിപത്യ സ്വഭാവത്തെയും റഷ്യ കാണാനിരിക്കുന്ന ദുരന്തത്തെയും,സ്വന്തം പത്രമായ നൊവായ ഷിസനിൽ നിന്ന് ഗോർക്കി എഴുതിയ മുഖപ്രസംഗത്തിൽ വരച്ചു കാട്ടി." തൊഴിലാളി വർഗത്തോട്" എന്ന ശീർഷകത്തിൽ വന്ന ആ മുഖപ്രസംഗത്തിൻറെ ( നവംബർ 23 ) ചുരുക്കം ഇതാണ്:
ഒന്ന്:മാർക്‌സിന്റെ അല്ല,തീവ്രവാദിയായ നെചായേവിന്റെ സിദ്ധാന്തമാണ്,ലെനിൻ നടപ്പാക്കുന്നത്." ഏതു റഷ്യക്കാരനെയും അപമാനിച്ച് നമ്മുടെ ഭാഗത്താക്കാം " എന്നാണ് നെചയേവിൻറെ സിദ്ധാന്തം.തൊഴിലാളികളെക്കൊണ്ട് ലെനിൻ വംശഹത്യകളും കൂട്ടക്കൊലകളും ചെയ്യിക്കുന്നു.
രണ്ട്:ലെനിനും ട്രോട് സ്‌കിയും ജനാധിപത്യത്തിൻറെ കശാപ്പ് ചെയ്‌തു.റഷ്യയിൽ അവർ ദുരന്തം വിതയ്ക്കുന്നു.റഷ്യ ചോരക്കടൽ കൊണ്ട് വില നൽകേണ്ടി വരും.
മൂന്ന്:ഒരു നേതാവിന് വേണ്ട ധാർമിക നിലവാരം ലെനിന് ഇല്ല.വരേണ്യ വർഗത്തിൽ പെട്ട അയാൾക്ക് തൊഴിലാളികളോട് പുച്ഛമാണ്.റഷ്യയുടെ ദുരന്തം അയാൾക്ക് പ്രശ്നമല്ല.
നാല്:ലെനിൻ വരട്ടു തത്വ വാദത്തിന്റെ അടിമയും അനുയായികൾ അയാളുടെ അടിമകളുമാണ്.അയാൾക്ക് ജീവിതത്തിൻറെ സമഗ്രതയെപ്പറ്റി വിവരമില്ല.പുസ്തകം വായിച്ച് കലാപം നടത്തുകയാണ്,അയാൾ.
അഞ്ച്:രസ തന്ത്രജ്ഞൻ ജഡവസ്തുക്കളെ കൊണ്ട് പരീക്ഷണശാലയിൽ കളിക്കുമ്പോൾ,ലെനിൻ തൊഴിലാളികളെ വലിച്ചിഴച്ച്,വിപ്ലവത്തിൻറെ സ്വാഭാവിക വികാസത്തെ തടയുകയാണ്.
ഗോർക്കിയും റോസാ ലക്‌സംബർഗും പറഞ്ഞ പോലെ,ലെനിന് റഷ്യ,ഒരു ഏകാധിപതിയുടെ പരീക്ഷണശാല മാത്രമായിരുന്നു.അത് മാർക്സിസത്തിൻറെ പരീക്ഷണശാലയേ ആയിരുന്നില്ല;മാർക്സിസമാകട്ടെ,നടപ്പാക്കാൻ കഴിയുന്ന ഒരു പ്രത്യയ ശാസ്ത്രവും അല്ല.റഷ്യയിൽ 1905 ൽ നടന്ന ആദ്യ വിപ്ലവം തന്നെ ഒരു ഓർത്തഡോക്‌സ് വൈദികൻ നടത്തിയതാണ്.നമുക്ക് അതിലേക്ക് പോകാം.
------------------
നെചായേവ്:ഏതു മാർഗം വഴിയും,ഭീകരത കൊണ്ട് പോലും വിപ്ലവമാകാം എന്ന് ' വിപ്ലവത്തിൻറെ അനുഷ്ടാനവിധി" ( Catechism of Revolution ) എന്ന പുസ്തകത്തിൽ സിദ്ധാന്തിച്ചയാളാണ്,സെർജി നെചായേവ്.ഒരു സഖാവിനെ കൊന്ന് റഷ്യ വിട്ടു.ആദ്യ കമ്മ്യൂണിസ്റ്റ് ഇൻറർനാഷനൽ നിന്ന് പുറത്താക്കപ്പെട്ടു.20 വർഷം ശിക്ഷിക്കപ്പെട്ട് തടവിൽ മരിച്ചു.
Rosa Luxemburg/ The Russian Revolution,Chapter 6/ The Problem of Dictatorship:
When all this is eliminated, what really remains? In place of the representative bodies created by general, popular elections, Lenin and Trotsky have laid down the soviets as the only true representation of political life in the land as a whole, life in the soviets must also become more and more crippled. Without general elections, without unrestricted freedom of press and assembly, without a free struggle of opinion, life dies out in every public institution, becomes a mere semblance of life, in which only the bureaucracy remains as the active element. Public life gradually falls asleep, a few dozen party leaders of inexhaustible energy and boundless experience direct and rule. Among them, in reality only a dozen outstanding heads do the leading and an elite of the working class is invited from time to time to meetings where they are to applaud the speeches of the leaders, and to approve proposed resolutions unanimously – at bottom, then, a clique affair – a dictatorship, to be sure, not the dictatorship of the proletariat but only the dictatorship of a handful of politicians, that is a dictatorship in the bourgeois sense, in the sense of the rule of the Jacobins (the postponement of the Soviet Congress from three-month periods to six-month periods!) Yes, we can go even further: such conditions must inevitably cause a brutalization of public life: attempted assassinations, shooting of hostages, etc. (Lenin’s speech on discipline and corruption.)